Thuša Mong wa Ntlo go fa Mabaka
1. Tsela e kaone ya go bolela le batho bodireding ke efe?
1 Ke tsela efe e atlegago kudu ge re le bodireding. Na ke ya go bolela ka go gatelela dikgopolo tša rena, goba ya go thuša mong wa ntlo go fa mabaka go ba go fihlela a hwetša karabo e nepagetšego? Moapostola Paulo o dirišitše tsela ya go fa mabaka ge a be a boledišana le Bajuda kua Thesalonika gomme “ka baka leo ba bangwe ba bona ba fetoga badumedi.” (Dit. 17:2-4) Ke’ng seo se akaretšwago ke go fa batho ba bangwe mabaka?
2. Re ka ekiša bjang mohlala wa Paulo ge re bolela ditaba tše dibotse?
2 Ela Hloko Maikwelo le Setlogo sa Motho: E le gore o thuše batho go fa mabaka ge o le tšhemong, o swanetše go ela hloko maikwelo a bona. Paulo o ile a thoma poledišano le Bagerika ba sa dumelego kgorong ya Areopago ka go bolela ka dilo tšeo go bonagalago ba be ba di tseba le go di amogela. (Dit. 17:22-31) Ka baka leo, ge o lokišetša thero ya gago, ela hloko ditumelo le dikganetšo tša batho ba tšhemong ya geno. (1 Bakor. 9:19-22) Ge e ba mong wa ntlo a tsoša kganetšo, leka go hwetša seo le dumelelanago ka sona, gomme o thee poledišano ya lena go sona.
3. Re ka fa bjang batho ba bangwe mabaka ka katlego ka go diriša dipotšišo ka bokgoni?
3 Diriša Dipotšišo ka Bokgoni: Re ka se nee mosepedi ditaelo tša go mo thuša go fihla mo a yago gona ge e ba re sa tsebe moo a tlogago a le gona. Ka mo go swanago, re ka se kgone go thuša mong wa ntlo go fihlelela phetho e swanetšego ge e ba re sa tsebe seo a se naganago. Pele ga ge Jesu a ka fa motheetši mabaka, o be a nyaka go tseba seo motheetši a bego a se nagana. Ka mohlala, ge monna yo mongwe a be a botšiša Jesu gore: “Ke swanetše go dira’ng gore ke je bohwa bja bophelo bjo bo sa felego?,” Jesu o ile a lokiša pono ya gagwe pele a ka mo araba. (Luka 10:25-28) Lebakeng le lengwe ge Petro a be a nea karabo e fošagetšego, Jesu o ile a diriša dipotšišo ka bokgoni go phošolla kgopolo ya gagwe. (Mat. 17:24-26) Ka baka leo, ge e ba mong wa ntlo a botšiša potšišo goba a tšweletša pono e fošagetšego, re ka diriša dipotšišo go mo thuša go fa mabaka ka taba yeo.
4. Ke ka baka la’ng re swanetše go leka go thuša mong wa ntlo go fa mabaka?
4 Ge re thuša mong wa ntlo go fa mabaka, re ekiša Morutiši yo Mogolo, Jesu gotee le baebangedi ba bangwe bao ba bego ba na le bokgoni ba lekgolong la pele la nywaga. Re nea mong wa ntlo seriti le tlhompho. (1 Pet. 3:15) Mafelelong, a ka re dumelela gore re boe gape.