Rulaganya Gona Bjale go Katološa Bodiredi bja Gago
1. Ke selo sefe seo se kgahlišago ka sehla sa Segopotšo, gomme re ka itokišetša sona bjang?
1 Sehla se sengwe le se sengwe sa Segopotšo se re nea sebaka se sefsa sa go “reta Jehofa kudu.” (Ps. 109:30) Na o tla katološa bodiredi bja gago ka March e le tsela e nngwe ya go bontšha gore o leboga Mong wa topollo? Ga bjale ke nako ya gore o thome go dira ditokišetšo.—Die. 21:5.
2. Wena le ba bangwe le ile la arabela bjang tokišetšong ya diiri tše di fokoditšwego tša bobulamadibogo ngwagola ka April?
2 Bobulamadibogo bja go Thuša: Ngwagola diphuthego di ile tša thaba kudu ge di ekwa ka tokišetšo ya gore bao ba nyakago go bula madibogo ka April ba ka dira seo ka diiri tšeo di fokoditšwego. Ngwanabo rena yo mongwe o ngwadile gore: “Ke sa le sekolong se se phagamego, gomme ke thatafalelwa ke go ba mmulamadibogo wa ka mehla. Eupša ke ya go tsenela bobulamadibogo bja diiri tše 30 kgweding ya April gomme ke katanele go fihlelela tše 50.” Kgaetšedi yo a šomago ka nako e tletšego o ngwadile gore: “Diiri tše masometharo tšona di ka se mpalele!” Ge go be go tsebišwa ka ga tokišetšo ye, mogoeledi yo mongwe yo a kilego a bula madibogo yoo ga bjale a nago le nywaga ya ka godimo ga e 80, o itše: “Ye ke nako yeo ke bego ke dutše ke e letetše! Jehofa o be a tseba gore nako ya ge ke be ke bula madibogo e bile e kaone kudu bophelong bja ka!” Ba bangwe bao ba paletšwego ke go bula madibogo ba ile ba ipeela dipakane tša gore ba oketše bodiredi bja bona.
3. Re na le mabaka afe ao a re thušago gore re naganele go bula madibogo ka March, April le May?
3 March e tla ba kgwedi e botse ya go tsenela bobulamadibogo ka gobane re tla buša ra kgetha ge e ba re nyaka go fihlelela pakane ya diiri tše 30 goba tše 50. Go oketša moo, go thoma ka Mokibelo, March 17, re tla tsenela lesolo le le kgethegilego la go laletša batho ba bangwe gore ba be le rena Segopotšong ka April 5. Ba bantši ba rena ba tla thabela go katološa bodiredi bja bona moo e lego gore ba tla nyaka go bula madibogo ka April le May, e lego dikgwedi tšeo go nyakegago diiri tše 50 ge e ba motho a bula madibogo.
4. Re ka katološa bjang bodiredi bja rena, gona ka mafelelo afe?
4 Mantšiboeng a latelago a Borapedi bja lena bja Lapa, go re’ng le sa ahlaahle kamoo yo mongwe le yo mongwe ka lapeng a ka katološago bodiredi bja gagwe sehleng sa Segopotšo? (Die. 15:22) Kgopelang Jehofa gore a šegofatše maiteko a lena. (1 Joh. 3:22) Ge le dutše le katološa bodiredi bja lena, le ka se tsenye letsogo feela go tumišeng Jehofa eupša le tla oketša le lethabo la lena.—2 Bakor. 9:6.