Na o tla Tšea Bobulamadibogo bja go Thuša?
1. Ke ka baka la’ng sehla sa Segopotšo e le nako e botse ya go katološa bodiredi bja rena?
1 Sehla sa Segopotšo ke nako e botse ya gore re katološe bodiredi bja rena. Ke nako yeo re naganišišago ka lerato le legolo la Jehofa la ge a re neile Morwa wa gagwe go ba sehlabelo. (Joh. 3:16) Seo se dira gore re thabe kudu dipelong tša rena, gomme se godiša kganyogo ya rena ya gore re botše ba bangwe ka Jehofa le seo a se direlago batho. (Jes. 12:4, 5; Luka 6:45) Le gona ke nako yeo re thabelago go tšea karolo lesolong le le kgethegilego la go laletša batho bao re ba tlwaetšego le ba bangwe ka moka bao ba lego tšhemong ya gabo rena gore ba be le rena Segopotšong. Ka morago ga moo, re katanela go hlagolela kgahlego ya bao ba bilego gona Segopotšong. Na o tla katološa bodiredi bja gago ka gore o tšee bobulamadibogo bja go thuša ka March, April goba May?
2. Ke eng seo se dirago gore March e be kgwedi e botse kudu ya go tšea bobulamadibogo bja go thuša?
2 Dira Gore March e be Kgwedi e Kgethegilego: March e tla ba kgwedi e botse ka mo go kgethegilego gore re tšee bobulamadibogo bja go thuša. Bao ba tsenyago dikgopelo ba ka kgetha ge e ba ba nyaka go fihlelela pakane ya diiri tše 30 goba tše 50. Ge e ba ketelo ya molebeledi wa tikologo e le ka March, gona babulamadibogo ba go thuša ba ka ba gona sebokeng ka moka seo a bago le sona le babulamadibogo ba ka mehla le ba kgethegilego. Lesolo la go laletša batho Segopotšong, e lego seo se tlago go ba ka Labobedi, March 26, 2013, le okeditšwe ge le bapetšwa le la nywaga e fetilego gomme le tla thoma ka March 1. Go oketša moo, March e na le mafelobeke a mahlano. Ka gona ke ka baka la’ng o sa naganišiše ka kelohloko ge e ba o ka tsenya letsogo gore kgwedi yeo e be e kgethegilego kudu lenyaga?
3. Re ka dira bjang dithulaganyo tša go oketša bodiredi bja rena?
3 Rulaganya Gona Bjale: Ye ke nako ya gore o hlahlobe lenaneo la gago gomme o bone gore ke dipeakanyo dife tšeo go nyakegago gore o di dire e le gore o tle o tšee bobulamadibogo. Go tla ba bohlokwa gore lapa le swarišane, ka gona fetšang nako mantšiboeng a Borapedi bja Lapa le ahlaahla dipakane tša lapa gomme le dire dithulaganyo. (Die. 15:22) Ge e ba o ka se kgone go tšea bobulamadibogo bja go thuša, gona o se ke wa nyama. Na o ka rulaganyetša gore o fetše nako e teletšana matšatšing ao o tlago go tšea karolo bodireding? Na o ka oketša ka letšatši le tee matšatši ao o a fetšago bodireding mo bekeng?
4. Re tla holega bjang ka go oketša modiro wa rena ka March, April le May?
4 Ge re dutše re oketša bodiredi bja rena ka March, April le May, re tla oketša lethabo le kgotsofalo tšeo re bago le tšona ge re hlankela Jehofa gotee le ge re nea ba bangwe. (Joh. 4:34; Dit. 20:35) Se bohlokwa le go feta, boikgafo bja rena bo tla thabiša Jehofa.—Die. 27:11.