Holwa ke Mmalo wa Gago wa Beibele

1. Ke’ng seo se bontšhago gore Mangwalo a be a le bohlokwa go Jesu?

NAGANA gore go be go le bjang go theetša Jesu a ruta. O be a tseba Mangwalo a Makgethwa ka hlogo. Ge ele gabotse, mantšu a Jesu a mathomo ao a boletšego ka morago ga kolobetšo le mantšu a mangwe a mafelelo ao a boletšego pele a ehwa, o be a tsopola go tšwa Mangwalong.b (Doit. 8:3; Ps. 31:5; Luka 4:4; 23:46) Le gona nakong ya bodiredi bja gagwe bja mengwaga e meraro le seripa, Jesu o be a fela a bala Mangwalo phatlalatša le go a tsopola ke moka a a hlalosa.—Mat. 5:17, 18, 21, 22, 27, 28; Luka 4:16-20.

2. Ke’ng seo se thušitšego Jesu go tseba Mangwalo gabotse ge a dutše a gola? (Bona seswantšho sa letlakala la ka ntle.)

² Mengwaga e mentši pele Jesu a ka thoma bodiredi bja gagwe, o be a bala le go kwa Lentšu la Modimo gantši. Ga go pelaelo gore o be a dula a ekwa Maria le Josefa ba tsopola Mangwalo dipoledišanong tša bona tša lapa letšatši le letšatši.c (Doit. 6:6, 7) Re ka kgodišega gore Jesu o be a dula e eya sinagogeng le lapa la gabo ka Sabatha e nngwe le e nngwe. (Luka 4:16) Ge a le moo o be a theetša ka kelohloko ge Mangwalo a dutše a balwa. Ge nako e dutše e eya Jesu o ile a ithuta go bala Mangwalo ao a Makgethwa a nnoši. Ka baka la se, Jesu o ile a tseba Mangwalo gabotse, a a rata a ba a dumelela gore a mo hlahle bophelong. Ka mohlala, gopola seo se ilego sa direga tempeleng ge Jesu a be a na le mengwaga e 12 feela. Barutiši bao ba bego ba tseba Molao wa Moshe gabotse ba ile ba “makatšwa ke kwešišo ya gagwe le dikarabo tša gagwe.”—Luka 2:46, 47, 52.

3. Re tlo ithuta ka’ng sehlogong se?

³ Le rena re ka kgona go tseba Lentšu la Modimo le go le rata ge e ba re bala Mangwalo ka mehla. Re ka holwa bjang ke seo re se balago? Re ka ithuta go seo Jesu a se boditšego bao ba bego ba tseba molao e lego bamangwalo, Bafarisei le Basadutsei. Baetapele bao ba bodumedi ba be ba bala Mangwalo gantši eupša ba be ba sa holwe ke seo ba se balago. Jesu o boletše ka dilo tše tharo tšeo di bego di ka thuša banna bao go kwešiša Mangwalo. Mantšu a gagwe a ka re thuša gore (1) re kwešiše seo re se balago, (2) re hwetše matlotlo a moya, e bile (3) re dumelele Lentšu la Modimo le re hlahla.

KWEŠIŠA SEO O SE BALAGO

4. Luka 10:25-29 e re ruta’ng ka go bala Lentšu la Modimo?

⁴ Re nyaka go kwešiša dilo tšeo re di balago ka lentšung la Modimo, e le gore di kgone go re hola. Ka mohlala, nagana ka poledišano ya Jesu le “monna yoo a bego a tseba molao.” (Bala Luka 10:25-29.) Ge monna yoo a botšiša Jesu gore o swanetše go dira eng gore a hwetše bophelo bjo bo sa felego, Jesu o ile a mo thuša gore a hwetše karabo ka Lentšung la Modimo ka go mmotšiša gore: “Go ngwadilwe’ng Molaong? O bala bjang?” Monna yoo o ile a kgona go nea karabo ya maleba ka go tsopola Mangwalo ao a bego a bolela ka go rata Modimo le go rata moagišani. (Lef. 19:18; Doit. 6:5) Hlokomela seo a se boletšego ka morago, o itše: “Ge e le gabotse ke mang yo e lego moagišani wa ka?” Monna yoo o bontšhitše gore o be a sa kwešiše gabotse seo a se badilego. Ka baka leo o be a sa kgone go diriša Mangwalo ao gabotse bophelong bja gagwe.

5. Go rapela le go se bale ka lebelo go ka go thuša bjang gore o kwešiše seo o se balago?

⁵ Re ka kwešiša Lentšu la Modimo gabotse ge e ba re ka kaonefatša tsela yeo re balago ka yona. A re boneng ditšhišinyo tšeo di ka go thušago. Rapela pele o thoma go bala. Re nyaka gore Jehofa a re thuše go kwešiša Mangwalo, ka gona re ka mo kgopela moya wa gagwe o mokgethwa gore o re thuše ge re bala. O se ke wa bala ka lebelo. Go dira bjalo go tla go thuša gore o kwešiše seo o se balago. Selo se sengwe seo se ka go thušago ke go balela godimo goba go theetša Beibele e rekhotilwego. Ge o theetša mantšu a rekhotilwego e bile o a bala ka Beibeleng, seo se tla go thuša gore o gopole, o kwešiše o be o ithute mo gontši ka seo o se balago ka lentšung la Modimo. (Josh. 1:8) Ge o fetša go bala, rapela gape o leboge Jehofa ka mpho ya Lentšu la gagwe e bile o mo kgopele gore a go thuše go diriša seo o se badilego.

6. Ke ka baka la’ng go ipotšiša dipotšišo le go ngwala dintlha go ka go thuša ge o bala? (Bona le seswantšho.)

⁶ Go na le ditšhišinyo tše dingwe gape tše pedi tšeo di ka go thušago go kwešiša lentšu la Modimo. Ipotšiše dipotšišo ka seo o se balago. Ge o dutše o bala karolo e itšego ka Beibeleng, ipotšiše gore: ‘Ke bomang bao go bolelwago ka bona mo? Ke mang a bolelago? O bolela le mang, gona ka baka la’ng? Tiragalo ye e diregile neng, gona kae?’ Go ipotšiša dipotšišo tše go tlo go thuša gore o naganišiše le gore o kwešiše seo o se balago. Le gona, o ka ngwala dintlha ge o dutše o bala. Ge o ngwala dintlha o tlo kgona go naganišiša gabotse ka seo o se balago le go se kwešiša. Le gona go ngwala go go thuša gore o tle o gopole seo o se balago. O ka ngwala dipotšišo, wa ngwala dilo tšeo o di hweditšego ge o dira nyakišišo, wa akaretša dintlha tše dikgolo goba wa no ngwala fase kamoo o ikwago ka gona ka seo o se balago. Go ngwala dintlha tše bjalo go ka go thuša gore o lebelele Lentšu la Modimo e le molaetša woo a go ngwaletšego ona ka go lebanya.

7. Ke seka sefe seo re se hlokago ge re bala, gona ka baka la’ng? (Mateo 24:15)

⁷ Jesu o boletše ka seka sa bohlokwa seo re se hlokago ge re bala gore re kgone go kwešiša Lentšu la Modimo, seka seo ke temogo. (Bala Mateo 24:15.) Temogo ke eng? Ke bokgoni bja go kwešiša kamoo selo se itšego se tswalanago ka gona le selo se sengwe le go kwešiša kamoo selo se itšego se fapanago ka gona le selo seo se sego molaleng. Jesu o bontšhitše le gore re hloka temogo gore re kgone le go bona ditiragalo tšeo di bontšhago go phethagala ga boporofeta bja Beibele. Re hloka seka se gore re kgone go holwa ke dilo ka moka tšeo re di balago ka Beibeleng.

8. Re ka diriša bjang temogo ge re bala?

⁸ Jehofa o nea bahlanka ba gagwe temogo. Ka gona mo rapele ke moka o mo kgopele gore a go thuše gore o kgone go ba le seka se. (Die. 2:6) O ka bontšha bjang gore o dira dilo ka go dumelelana le seo o se rapelelago? Hlahloba dilo tšeo o di balago ka kelohloko ke moka o bone gore di sepedišana bjang le dilo tšeo o di tsebago. Diriša dikgatišo tša rena tša go re thuša go ithuta Beibele gore di go thuše go dira seo. Ka mohlala, o ka diriša Tlhahlo ya go Dira Nyakišišo ya Dihlatse tša Jehofa. Dikgatišo tše di tlo go thuša gore o kgone go kwešiša ditemana tše itšego tša Beibele le go bona gore o ka di diriša bjang bophelong bja gago. (Baheb. 5:14) Ge o dutše o bala ka temogo, o tlo kgona go kwešiša Mangwalo gabotse.

HWETŠA MATLOTLO A MOYA GE O DUTŠE O BALA

9. Ke therešo efe e bohlokwa ya Mangwalo yeo Basadutsei ba ilego ba se e amogele?

⁹ Basadutsei ba be ba tlwaelane le dipuku tše hlano tša mathomo tša Mangwalo a Seheberu, eupša ba be ba se na taba le dithuto tše bohlokwa tšeo di lego kamoo dipukung tšeo di buduletšwego. Ka mohlala, nagana kamoo Jesu a ilego a araba Basadutsei ka gona ge ba be ba mmotšiša ka taba ya tsogo. O ile a ba botšiša gore: “Na ga se la ka la bala pukung ya Moshe, pegong ya mabapi le sehlare sa meetlwa, kamoo Modimo a ilego a re go yena: ‘Ke nna Modimo wa Aborahama, Modimo wa Isaka le Modimo wa Jakobo’?” (Mar. 12:18, 26) Le ge Basadutsei ba ile ba bala pego yeo gantši, potšišo yeo ya Jesu e ile ya utolla gore ba ile ba hlokomologa therešo e bohlokwa ya Mangwalo e lego thuto ya tsogo.—Mar. 12:27; Luka 20:38.d

10. Ke eng seo re swanetšego go se hlokomela kudu ge re bala?

¹⁰ Ke eng seo re ithutago sona? Ge re bala, re swanetše go hlokomela seo temana goba pego e itšego ya Beibele e re rutago sona. Ga re nyake go no kwešiša dilo tše bonolo feela eupša re nyaka go kwešiša le ditherešo tše bohlokwa le melao ya motheo yeo e swanago le matlotlo a utilwego.

11. O ka diriša bjang 2 Timotheo 3:16, 17 go hwetša ditherešo tše bohlokwa tša ka Beibeleng?

¹¹ O ka hwetša matlotlo a moya bjang ge o bala Beibele? Ekwa seo 2 Timotheo 3:16, 17 e se bolelago. (Bala.) E re “lengwalo ka moka le . . . hola” ka (1)  go ruta, (2) go kgala, (3) go phošolla le (4) go laya. Dintlha tše tše nne di ka hwetšagala le go dipuku tše dingwe tša Beibele tšeo o sa di balego gantši. Ge o bala pego e itšego, leka go bona gore e go ruta eng ka Jehofa, morero wa gagwe, goba melao ya gagwe ya motheo. Leka go bona gore e kgala bjang. Dira se ka go leka go bona kamoo ditemana tše di ka go thušago ka gona go lemoga le go tlogela mekgwa goba boitshwaro bjo bobe le go dula o botegela Jehofa. Bona kamoo temana yeo e ka go thušago go phošolla pono e fošagetšego, mohlomongwe yeo motho a e boletšego ge o be o le bodireding. Ke moka o nyake tayo moo ditemaneng tšeo yeo e ka go thušago gore o kgone go lebelela dilo ka tsela yeo Jehofa a di lebelelago ka yona. Ge o ka dula o gopola dintlha tše tše nne, o tlo kgona go hwetša matlotlo a moya ao a tlo go holago ge o dutše o bala Beibele.

DIRA GORE SEO O SE BALAGO SE GO HLAHLE

12. Ke ka baka la’ng Jesu a ile a botšiša Bafarisei gore “Na ga se la ka la bala?”

¹² Jesu o ile a botšiša gore: “Na ga se la ka la bala?” go bontšha gore Bafarisei ba be ba na le pono e fošagetšego ka Mangwalo. (Mat. 12:1-7)e Ka nako yeo Bafarisei ba be ba latofatša barutiwa ba Jesu ka gore ga ba hlomphe Sabatha. Jesu o ile a ba fetola ka go tsopola ditemana tše pedi go tšwa pukung ya Hosea, tšeo di bego di bontšha gore Bafarisei ba be ba sa kwešiše gore ke ka baka la’ng molao wa Sabatha o be o le gona e bile ba be ba se na kgaugelo. Ke ka baka la’ng banna bao ba be ba sa hlahlwe ke seo ba se balago ka Lentšung la Modimo? Ka gobane ba be ba ikgogomoša. Boikgogomošo bjoo bo be bo dira gore ba se ke ba kwešiša dilo tšeo ba di balago.—Mat. 23:23; Joh. 5:39, 40.

13. Maikemišetšo a rena ge re bala Beibele e swanetše go ba afe, gona ka baka la’ng?

¹³ Mantšu a Jesu a re ruta gore re swanetše go bala Beibele ka maikemišetšo a mabotse. Re swanetše go ba bao ba ikokobeditšego le bao ba ikemišeditšego go rutwa, re se ke ra swana le Bafarisei. Re swanetše gore re “amogele ka boleta go bjalwa ga lentšu.” (Jak. 1:21) Ge e ba re le boleta, re tlo dumelela lentšu la Modimo le fetola seo re lego sona. Ge e ba re ka phema moya wa boikgogomošo, dithuto tšeo di lego ka Beibeleng tša kgaugelo, kwelobohloko le lerato di tlo kgoma dipelo tša rena.

14. Re ka tseba bjang gore re dumelela Beibele e re hlahla? (Bona le seswantšho.)

¹⁴ Tsela yeo re swarago batho ka yona e tla bontšha ge e ba re dumelela Lentšu la Modimo le re hlahla. Ka ge Bafarisei ba ile ba se dumelele Lentšu la Modimo le kgoma dipelo tša bona, ba ile ba “bona molato bao ba se nago molato.” (Mat. 12:7) Ka mo go swanago tsela yeo re naganago ka yona le yeo re swarago batho ba bangwe ka yona e tla bontšha ge e ba re dumelela Lentšu la Modimo le re hlahla. Ka mohlala, na re dula re bolela ka dilo tše dibotse tšeo re di bonago go batho goba na re dula re bolela ka mafokodi a bona? Na re bontšha kgaugelo le go lebalela batho ba bangwe, goba na re dula re swere dikgopi? Dikarabo tša dipotšišo tše di ka bontšha ge e ba re dumelela seo re se balago se fetola tsela yeo re naganago ka yona, re ikwago ka yona le go dira dilo ka yona.—1 Tim. 4:12, 15; Baheb. 4:12.

GO BALA LENTŠU LA MODIMO GO DIRA GORE RE THABE

15. Jesu o be a ikwa bjang ka Mangwalo a Makgethwa?

¹⁵ Jesu o be a rata Mangwalo a Makgethwa, le gona seo se ile sa bonagala gabotse go boporofeta bjo bo lego go Psalme 40:8 yeo e rego: “Wena Modimo wa ka, ke kgahlwa ke go dira thato ya gago, molao wa gago o ka garegare ga ka.” Ka ge Jesu a be a rata Mangwalo o be a thabile ge a hlankela Jehofa e bile dilo di mo sepelela gabotse. Le rena re ka thaba e bile dilo tša re sepelela gabotse ge re ka bala Lentšu la Modimo e bile ra ithuta go le rata.—Ps. 1:1-3.

16. O tlo dira eng gore o kgone go kwešiša Lentšu la Modimo? (Bona lepokisi leo le rego “Mantšu a Jesu a ka go Thuša Gore o Kwešiše Seo o se Balago.”)

¹⁶ Mantšu a Jesu le mohlala wa gagwe di ka re thuša go kaonefatša tsela yeo re balago Beibele ka yona. Re ka kaonefatša tsela yeo re kwešišago Beibele ka yona ka go rapela, go bala re sa kitime, go ipotšiša dipotšišo le go ngwala dintlha. Re ka diriša temogo ka go hlahloba ka kelohloko seo re se balago re thušwa ke dikgatišo tša rena tšeo di theilwego Beibeleng. Re ka ithuta go diriša Beibele gabotse le ditemana tšeo re sego ra di tlwaela ka go nyaka matlotlo a moya ao a lego ditemaneng tšeo. E bile re ka dumelela Lentšu le Modimo le re hlahla ka go ba le maikemišetšo a mabotse ge re dutše re le bala. Ge re leka ka thata go dira dilo tše, re tlo holega kudu ge re bala Beibele ke moka ra batamela kgauswi le Jehofa.—Ps. 119:17, 18; Jak. 4:8.