O ka Dira’ng Gore o Thabele go ya Tšhemong

1. Batho ba bangwe ba ikwa bjang ka go botša ba bangwe ditaba tše dibotse ge ba le tšhemong? (Bona le seswantšho.)

KA GE re le bahlanka ba Jehofa, re botša batho ba bangwe ditaba tše dibotse ka gobane re rata Tatago rena wa legodimong e bile re nyaka go thuša baagišani ba rena gore ba mo tsebe. Bagoeledi ba bantšhi ba thabela go bolela ditaba tše dibotse eupša ba bangwe ga ba thabele go dira bjalo. Ka baka la’ng? Ba bangwe ba ka ba ba na le dihlong e bile ba ikwa okare ga ba na bokgoni bja go ruta. Ba bangwe ga ba rate go ya malapeng a batho bao ba sego ba ba mema. Ba bangwe ba tšhaba go ganetšwa. Ba bangwe ba rutilwe go phema dingangišano le batho ba bangwe. Le ge bana babo rena ba le dikgaetšedi ba rata Jehofa kudu, ba thatafalelwa ke go botša batho bao ba sa ba tsebego ditaba tše dibotse. Eupša ka ge ba lemoga gore mošomo wo o bohlokwa kudu, ba dula ba botša batho ba bangwe ditaba tše dibotse. Jehofa o thabišwa ke seo kudu!

2. Ke ka baka la’ng o se wa swanela go nyama ge o sa thabele tšhemo?

² Na le wena ka dinako tše dingwe o ikwa ka tsela ye gomme o hwetša go le thata go ya tšhemong? Ge e ba o ikwa ka tsela ye o se ke wa nyama. Go nagana gore ga o na bokgoni go ka bontšha gore o ikokobeditše, ga o nyake go ikgogela mahlo a batho e bile ga o nyake go ngangišana le batho ba bangwe. Ga go na motho yo a nyakago go ganetšwa, kudukudu ge a leka go direla batho ba bangwe selo se se lokilego. Tatago wa legodimong o bona mathata ao o kopanago le wona e bile o nyaka go go thuša. (Jes. 41:13) Sehlogong se re tlo bona dilo tše tlhano tšeo di ka re thušago go fenya maikwelo ao, le gore re ka hwetša bjang lethabo tšhemong.

MATLAFATŠWA KE LENTŠU LA MODIMO

3. Moporofeta Jeremia o thušitšwe ke’ng gore a botše ba bangwe ditaba tše dibotse?

³ Ke go tloga kgale bahlanka ba Modimo ba dutše ba matlafatšwa ke Lentšu la Modimo ge ba lebeletšane le dikabelo tše thata tšeo ba swanetšego go di dira. Nagana ka mohlala wa moporofeta Jeremia. Ge Jehofa a be a mo nea kabelo ya go botša ba bangwe ka yena, Jeremia o ile a dikadika. Jeremia o itše: “Ga ke tsebe go bolela, gobane ke fo ba mošemanyana.” (Jer. 1:6) O ile a thušwa ke eng gore a be le matla a go botša batho ba bangwe ka Jehofa? O ile a matlafatšwa ke Lentšu la Modimo. O itše: “Gwa ba bjalo ka ge eka ke mollo o fišago wo o tswaleletšwego marapong a ka; ka lapa go homola.” (Jer. 20:​8, 9) Le ge batho bao Jeremia a bego a swanetše go ba botša ditaba tše dibotse ka Jehofa ba be ba thatafišitše dihlogo, eupša molaetša woo a bego a swanetše go ba botša wona, o ile wa mo nea matla a gore a phethagatše mošomo woo Modimo a mo filego wona.

4. Go direga’ng ge re bala Lentšu la Modimo e bile re naganišiša ka lona? (Bakolose 1:​9, 10)

⁴ Bakriste ba matlafatšwa ke molaetša wo o lego ka Lentšung la Modimo. Ge moapostola Paulo a be a ngwalela Phuthego ya Kolose, o itše go ba le tsebo e nepagetšego go tlo kgothaletša bana babo gore ba “[phele] ka tsela yeo Jehofa a e amogelago” le go tšwela pele ba dira “mediro e mebotse.” (Bala Bakolose 1:​9, 10.) Mediro yeo e mebotse e akaretša go bolela ditaba tše dibotse. Ge re bala Lentšu la Modimo gomme re naganišiša ka lona, tumelo ya rena go Jehofa e a tia gomme re kgona go bona bohlokwa bja go botša batho ba bangwe molaetša wa Mmušo.

5. Re tlo holega bjang ge re bala le go ithuta Lentšu la Modimo?

⁵ E le gore re holwe ke Lentšu la Modimo, ga se ra swanela go kitima ge re bala, re ithuta le go naganišiša. Tšea nako ya gago ge o ithuta. Ge o ka kopana le lengwalo le o sa le kwešišego gabotse, o se ke wa no le feta. Go e na le moo, nyaka tlhathollo ya lona ka go Watch Tower Publications Index goba ka go Tlhahlo ya go Dira Nyakišišo ya Dihlatse tša Jehofa. Ge o ka tšea nako ya gago ge o ithuta, o tlo kgodišega gore Lentšu la Modimo ke therešo. (1 Bathes. 5:21) Ge o kgodišegile, o tlo thabela go botša batho ba bangwe ka seo o ithutilego sona.

LOKIŠETŠA GABOTSE GE O EYA TŠHEMONG

6. Ke ka baka la’ng re swanetše go lokišetša gabotse pele re eya tšhemong?

⁶ Ge o ka lokišetša gabotse ge o eya tšhemong, o ka se sa tšhoga kudu ge o bolela le batho ba bangwe. Jesu o ile a thuša barutiwa ba gagwe gore ba kgone go lokišetša pele ba eya tšhemong. (Luka 10:​1-11) Ba ile ba thabišwa ke seo ba se fihleletšego ka ge ba ile ba thabišwa ke seo Jesu a ba rutilego sona.—Luka 10:17.

7. Re ka lokišetša bjang pele re eya tšhemong? (Bona le seswantšho.)

⁷ Re ka lokišetša bjang go ya tšhemong? Re swanetše go nagana ka seo re nyakago go se bolela gomme re se hlalose ka tsela yeo e kwagalago go rena le ka mantšu a rena. Re ka nagana le ka ditsela tše tharo tšeo batho ba tšhemong ya rena ba tlwaetšego go re araba ka tšona gomme re nagane gore re ka ba araba bjang. Ka gona ge re kopana le batho re ka leka go iketla, ra myemyela e bile ra ba botho.

8. Bakriste ba swana bjang le dibjana tša letsopa tšeo moapostola Paulo a boletšego ka tšona?

⁸ Moapostola Paulo o ile a swantšha karolo ya rena mošomong wo wa go bolela ditaba tše dibotse ge a be a re: “Letlotlo le re le swere ka dibjana tša letsopa.” (2 Bakor. 4:7) Letlotlo le ke eng? Ke mošomo wo o phološago maphelo wa go bolela ditaba tše dibotse. (2 Bakor. 4:1) Dibjana tša letsopa ke eng? Di swantšhetša bahlanka ba Modimo bao ba botšago batho ba bangwe ditaba tše dibotse. Mehleng ya Paulo, barekiši ba be ba diriša dibjana tša letsopa go rwala dilo tše bohlokwa tša go swana le dijo, beine le tšhelete. Ka tsela e swanago, Jehofa o bontšha gore o a re tshepa ka go re nea molaetša o bohlokwa wa go bolela ditaba tše dibotse. Ka ge Jehofa a re thekga, re kgona go ba le matla ao re a hlokago a go bolela ditaba tše dibotse ka go botega.

RAPELELA GO BA LE SEBETE

9. Re ka thušwa ke’ng gore re se ke ra tšhaba batho goba ra tšhaba go ganetšwa? (Bona le seswantšho.)

⁹ Ka dinako tše dingwe re ka tšhaba batho goba ra tšhaba go ganetšwa. Re ka fenya bjang bothata bjoo? Nagana ka thapelo yeo baapostola ba ilego ba e rapela ge ba be ba laelwa gore ba se ke ba bolela ditaba tše dibotse. Go e na le gore ba tšhoge, ba ile ba kgopela Jehofa gore a ba thuše gore ba ‘tšwele pele ba bolela lentšu la gagwe ka sebete.’ Jehofa o ile a araba thapelo ya bona kapelapela. (Dit. 4:​18, 29, 31) Le rena ge ka dinako tše dingwe re ka ikwa re tšhaba batho, re ka rapela Jehofa ra mo kgopela gore a re thuše. Kgopela Jehofa gore a go thuše gore o se sa tšhaba batho gomme o ba rate.

10. Jehofa o re thuša bjang go phethagatša boikarabelo bja rena bjalo ka dihlatse tša gagwe? (Jesaya 43:​10-12)

¹⁰ Jehofa o re kgethile gore re be dihlatse tša gagwe e bile o re tshepiša gore o tlo re thuša gore re be le sebete. (Bala Jesaya 43:​10-12.) A re boneng ditsela tše nne tšeo a re thušago ka tšona. Tsela ya mathomo ke gore nako le nako ge re bolela ditaba tše dibotse, Jesu o na le rena. (Mat. 28:​18-20) Ya bobedi, Jehofa o šomiša barongwa go re thuša. (Kut. 14:6) Ya boraro, Jehofa o diriša moya wa gagwe o mokgethwa go re thuša go gopola dilo tšeo re ithutilego tšona. (Joh. 14:​25, 26) Ya bone, Jehofa o re neile bana babo rena le dikgaetšedi gore re šome le bona. Ka ge Jehofa le bana babo rena le dikgaetšedi ba re thekga, re na le sohle seo re se hlokago gore re be le sebete gomme re tšwele pele re bolela ditaba tše dibotse.

FETOFETOGA LE MAEMO GOMME O SE KE WA FELA MATLA

11. O ka hwetša bjang batho ba bantšhi ge o le tšhemong? (Bona le seswantšho.)

¹¹ Na o nyamišwa ke go se hwetše batho ka magaeng a bona? Mohlomongwe o ka ipotšiša gore: ‘Batho ba mo tšhemong ya gešo ba kae gona bjale?’ (Dit. 16:13) ‘Na ba mošomong goba ba mabenkeleng?’ Ge e ba go le bjalo, na o ka hwetša batho ba bantšhi ge o ka bolela ditaba tše dibotse mošomong wa seterateng? Ngwanabo rena Joshua o re, “Ke ile ka hwetša sebaka sa go bolela ditaba tše dibotse ge ke dutše ke sepela kgauswi le mabenkele le moo go phakago dikoloi.” Yena le mosadi wa gagwe Bridget, ba hweditše batho ba bantšhi mantšiboa goba Sontaga thapama.—Baef. 5:​15, 16.

12. Re ka dira’ng go bona gore batho ba dumela go eng le gore ba tshwenyegile ka eng?

¹² Ge e ba batho ba sa kgahlegele molaetša wa rena, leka go bona gore ba dumela eng goba ba tshwenyegile ka eng. Joshua le Bridget ba šomiša potšišo ye e lego ka pele ga pampišana ge ba dira matseno. Ka mohlala, ge ba diriša pampišana yeo e rego O Lebelela Beibele Bjang? ba re: “Batho ba bangwe ba nagana gore Beibele ke puku yeo e tšwago go Modimo, eupša ba bangwe ga ba nagane bjalo. Wena o nagana’ng?” Se gantšhi se dira gore ba thome poledišano.

13. Ke ka baka la’ng bodiredi bja rena bo atlega le ge batho ba sa arabele gabotse? (Diema 27:11)

¹³ Go atlega ga rena tšhemong ga se gwa ithekga ka gore batho ba bangwe ba arabela bjang. Ka baka la’ng? Ka gobane re dirile seo Jehofa le Jesu ba nyakago re se dira, re boditše batho ba bangwe ditaba tše dibotse. (Dit. 10:42) Le ge re sa hwetše batho bao re ba botšago ditaba tše dibotse goba molaetša wa rena o ganetšwa, re ka thaba ka gobane re a tseba gore re thabiša Tatago rena wa legodimong.—Bala Diema 27:11.

14. Ke ka baka la’ng re swanetše go thaba ge mogoeledi yo mongwe a hwetša motho yo a thabelago tšhemong?

¹⁴ Re ka thabišwa gape ke ge mogoeledi yo mongwe a hweditše motho yo a thabelago tšhemong. Morokami o swantšha modiro wa rena le go tsoma ngwana yo a timetšego. Batho ba bantšhi ba tšea karolo ya go tsoma ngwana yoo, ba akaretša mafelo a mantšhi gore ba mo hwetše. Ge ngwana yoo a hwetšwa, batho ka moka ba a thaba go sa šetšwe gore o hweditše ke mang. Ka mo go swanago, re šoma re le sehlopha mošomong wo wa go dira batho barutiwa. Ka moka ga rena re a hlokana gore re akaretše tšhemo ya rena e bile ka moka ga rena re a thaba ge motho yo mongwe a thoma go tla dibokeng.

RATA JEHOFA LE MOAGIŠANI WA GAGO

15. Go diriša Mateo 22:​37-39 go tlo re thuša bjang gore re thabele go ya tšhemong? (Bona le seswantšho sa letlakala la ka ntle.)

¹⁵ Re ka thabela tšhemo kudu ge re ka rata Jehofa le baagišani ba rena. (Bala Mateo 22:​37-39.) Nagana kamoo Jehofa a thabago ka gona ge a re bona re dira mošomo wo, o nagane le kamoo batho ba tšhemong ya geno ba tlago go thaba ka gona ge ba thoma go ithuta Beibele! Nagana le kamoo molaetša wa rena o tlago go phološa bao ba o amogelago.—Joh. 6:40; 1 Tim. 4:16.

16. Ge re sa kgone go tšwa ka magaeng a rena, re ka thabela bjang go botša ba bangwe ditaba tše dibotse? Nea mehlala.

¹⁶ Na o palelwa ke go tšwa ka legaeng la gago? Ge e ba go le bjalo, dula o swaregile ka se o ka se dirago go bontšha gore o rata Jehofa le moagišani wa gago. Nakong ya leuba la COVID-19, Samuel le Dania ba be ba sa kgone go tšwa ka legaeng la bona. Nakong yeo e thata ba be ba dutše ba botša batho ditaba tše dibotse ka founo, ba ngwala mangwalo e bile ba swara dithuto tša Beibele ka Zoom. Samuel o be a botša batho bao a kopanago le bona kliniking ditaba tše dibotse ge a eya go tšea dihlare tša bolwetši bja kankere. O re: “Ge re lebeletšane le maemo a thata, re ka tshwenyega kudu monaganong, ra babja mmeleng le tumelo ya rena ya lekwa. Re swanetše go thaba ge re dutše re hlankela Jehofa.” Ka yona nako yeo Dania o ile a wa gomme a se kgone go fologa mpeteng ka dikgwedi tše tharo. O ile a šomiša wheelchair ka dikgwedi tše tshela. O re: “Ke ile ka leka go dira dilo tšeo maemo a ka a ntumelelago gore ke di dire. Ke be ke botša mooki yoo a bego a nketela ditaba tše dibotse e bile ke di botša le batho bao ba bego ba re tlišetša dilo. Ke be ke botša mosadi yoo ke bego ke bolela le yena ka founo ditaba tše dibotse yo a bego a šomela khamphani ya tša maphelo.” Le ge maemo a Samuel le Dania a be a sa ba dumelele go dira dilo tše dingwe, eupša ba ile ba dira seo ba ka se kgonago gomme ba hwetša lethabo.

17. Ditšhišinyo tše go boletšwego ka tšona sehlogong se di ka go hola bjang kudu?

¹⁷ Ditšhišinyo tše re boletšego ka tšona sehlogong se di šoma gabotse ge re ka di diriša ka moka ga tšona. Tšhišinyo e nngwe le e nngwe e swana le dilo tšeo motho a di šomišago ge a apea. Ge motho a tswakantšhitše dilo tšeo a apeago ka tšona, go tšwelela tatso e bose. Ge re ka diriša dilo tše ka moka, re tlo fenya maikwelo a go nyama gomme ra thabišwa ke go ya tšhemong.