Lerato le Dira Gore re Nyake go Bolela Ditaba tše Dibotse!

1. Ke’ng seo re ithutilego sona sebokeng sa ngwaga le ngwaga sa 2023?

SEBOKENG sa ngwaga le ngwaga sa 2023,a re kwele boitsebišo bjo bo kaonefaditšwego ka dilo tšeo re bego re di dumela. E bile re kwele le ditsebišo tše di kgahlišago ka bodiredi bja rena. Ka mohlala, re ithutile gore ba bangwe bao ba sa hlankelego Jehofa ba tlo ba le sebaka sa go mo thekga le go thekga batho ba gagwe ka morago ga gore Babilona o Mogolo a fedišwe. E bile re kwele gore go tloga ka November 2023, ga go sa hlokega gore bagoeledi ba bege mediro ka moka yeo ba e dirago tšhemong. Na diphetogo tšeo di ra gore go ya tšhemong ga go sa le bohlokwa? Aowa!

2. Ke ka bala la’ng bodiredi bja rena bo e ba bohlokwa ge nako e dutše e eya? (Mareka 13:10 )

² Letšatši le lengwe le lengwe modiro wa go bolela ditaba tše dibotse o ba bohlokwa le go feta. Ka baka la’ng? Ka gobane nako e jelwe ke magotlo. Nagana ka seo Jesu a ilego a se bolela mabapi le ditaba tše dibotse mehleng ya bofelo. (Bala Mareka 13:10.) Go ya ka pego yeo Mateo a e ngwadilego, Jesu o boletše gore ditaba tše dibotse di tla bolelwa lefaseng ka moka pele “bofelo” bo ka tla. (Mat. 24:14) Se se ra gore pele lefase le le lebe la Sathane le fedišwa. Jehofa o beile “letšatši “ leo dilo tše di tlago go direga ka lona. (Mat. 24:36; 25:13; Dit. 1:7) Letšatši leo le batamela ka lebelo. (Baroma 13:11) Eupša re swanetše go tšwela pele re bolela ditaba tše dibotse go ba go fihla bofelo bo etla.

3. Ke’ng seo se re thušago gore re ye tšhemong?

³ Ge re dutše re naganišiša ka bodiredi bja rena, re ka ipotšiša potšišo ye e bohlokwa: Ke ka baka la’ng re bolela ditaba tše dibotse? Ge re eya tšhemong re bontšha gore re rata ditaba tše dibotse, re rata batho e bile re rata Jehofa le leina la gagwe. A re boleleng ka dintlha tše dirapeng tše di latelago.

RE YA TŠHEMONG KA GOBANE RE RATA DITABA TŠE DIBOTSE

4. Re ikwa bjang ge re amogela ditaba tše dibotse?

⁴ Nagana kamoo o ilego wa ikwa ka gona ge selo seo se kgahlišago se direga bophelong bja gago. Mohlomongwe go na le lesea ka gae goba o hweditše mošomo wo e lego kgale o o hloka. Ga go pelaelo gore ge o ekwa ditaba tša mohuta wo, o ka fela pelo ya go botša ba leloko goba bagwera ka tšona. Ka mo go swanago, go ka direga gore le rena ge re ekwa ditaba tše dibotse la mathomo re ile ra thaba le go fela pelo ya go di botša batho ba bangwe.

5. O ile wa ikwa bjang ge o be o ithuta ka therešo ya ka Lentšung la Modimo la mathomo? (Bona le diswantšho.)

⁵ Na o gopola kamoo o ilego wa ikwa ka gona ge o be o ithuta ditherešo tša ka Lentšung la Modimo la mathomo? O ile wa ithuta gore Tatago wa magodimong o a go rata e bile o nyaka gore o be karolo ya lapa la gagwe. O tshepišitše gore o tlo fediša bohloko le tlaišego. O na le kholofelo ya gore o tlo bona batho ba o ba ratago bao ba hlokofetšego ba phela gape lefaseng le leswa. Jehofa o go tshepišitše le dilo tše dingwe tše dintšhi. (Mar. 10:​29, 30; Joh. 5:​28, 29; Baroma 8:​38, 39; Kut. 21:​3, 4) Dilo tšeo o ithutilego tšona di ile tša go thabiša. (Luka 24:32) O ile wa rata dilo tšeo o ithutilego tšona gomme wa nyaka go di botša batho ba bangwe!—Bapetša le Jeremia 20:9.

6. O ithuta’ng mohlaleng wa ngwanabo rena Ernest le mosadi wa gagwe Rose?

⁶ Nagana ka phihlelo ye. Ge ngwanabo rena Ernestba be a na le mengwaga e ka bago e lesome, tatagwe o ile a hlokofala. Ngwanabo rena Ernest o re: “Ke be ke ipotšiša gore ‘na o ile legodimong? Na go fedile ka yena?’ Ke be ke duma bana ba bangwe bao ba bego ba na le botatago bona.” Ernest o be a dula a eya dirapeng a khumana pele ga lebitla la tatagwe gomme a rapela ka gore: “Hle Modimo, ke nyaka go tseba gore tate o kae.” Ernest o ile a thoma go ithuta Beibele mengwaga e ka bago e 17 ka morago ga gore tatagwe a hlokofale. O ile a thabela go ithuta gore bahu ga ba tsebe selo le gatee, go bjalo ka ge eka ba robetše, e bile Beibele e tshepiša gore ba tlo tsoga nakong e tlago. (Mmo. 9:​5, 10; Dit. 24:15) O ile a hwetša dikarabo tša dipotšišo tšeo a bego a ipotšiša tšona nako e telele! Ernest o be a thabišwa ke ditherešo tšeo a bego a ithuta tšona ka Beibeleng. Mosadi wa gagwe e lego Rose, le yena o ile a ithuta Beibele gomme a thabela seo a bego a ithuta sona. Ba ile ba kolobetšwa ka 1978. Ba ile ba botša bagwera, ba leloko le batho ba bangwe ka seo ba bego ba ithuta sona. Ngwanabo rena Ernest le mosadi wa gagwe ba ile ba thuša batho ba fetago ba 70 gore ba kolobetšwe.

7. Go direga’ng ge re thoma go rata therešo ya Beibele? (Luka 6:45)

⁷ Ke nnete gore ge re rata seo re ithutilego sona ka Beibeleng re tlo nyaka go se botša batho ba bangwe. (Bala Luka 6:45.) Re ikwa go swana le balatedi ba Jesu ba lekgolong la pele la mengwaga bao ba ilego ba bolela gore: “Re ka se ke ra tlogela go bolela ka dilo tše re di bonego le tše re di kwelego.” (Dit. 4:20) Re rata ditaba tše dibotse gomme re nyaka go di botša batho ba bantšhi kamoo re ka kgonago ka gona.

RE YA TŠHEMONG KA GOBANE RE RATA BATHO

8. Ke’ng seo se dirago gore re botše batho ba bangwe ditaba tše dibotse? (Bona lepokisi leo le rego “Rata Batho—o ba Dire Barutiwa.”) (Bona le seswantšho.)

⁸ Re rata batho go swana le Jehofa le Morwa wa gagwe. (Die. 8:31; Joh. 3:16) Re ba kwela bohloko ka gobane ga ba na “kholofelo” e bile ga ba “tsebe Modimo.” (Baef. 2:12) Ba na le mathata a mantši, gomme rena re na le selo seo se ka ba thušago e lego ditaba tše dibotse tša Mmušo wa Modimo. Ka ge re ba rata e bile re ba kwela bohloko re dira sohle seo re ka se kgonago gore re ba botše ditaba tše dibotse. Molaetša wo o bohlokwa o ka dira gore ba be le kholofelo, wa ba thuša le gore ba be le bophelo bjo bo kaone gona bjale. Le go ba thuša gore ba be le kholofelo ya bophelo bja kgonthe, e lego bophelo bjo bo sa felego lefaseng le leswa la Modimo.—1 Tim. 6:19.

9. Ke temošo e fe yeo re e neago batho ka bokamoso, gona ka baka la’ng? (Hesekiele 33:​7, 8 )

⁹ Ka ge re rata batho re ba botša gore tshepedišo ye e kgopo ya dilo e tlo fedišwa. (Bala Hesekiele 33:​7, 8) Re kwela batho ka moka bohloko, go akaretša baagišani ba rena le ba leloko bao ba sa hlankelego Jehofa. Batho ba bantšhi ba no iphelela ka ge ba sa tsebe seo se tlago go direga e se kgale. Ga ba tsebe gore “go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mat. 24:21) Re nyaka gore ba tsebe seo se tlago go direga nakong yeo ya kahlolo. Sa pele, bodumedi bja maaka bo tlo fedišwa, ke moka ka morago gwa fedišwa tshepedišo ye e kgopo ya dilo ka ntwa ya Haramagedone. (Kut. 16:​14, 16; 17:​16, 17; 19:​11, 19, 20) Re rapelela gore batho ba bantšhi ba kwe molaetša wo wa temošo, ke moka ba tle ba hlankele Jehofa le rena. Eupša go tlo direga eng ka batho bao ba sa kwego molaetša wa temošo gona bjale, go akaretša le ba leloko bao re ba ratago?

10. Ke ka baka la’ng go le bohlokwa gore re dule re lemoša batho ka seo se tlago go direga e se kgale?

¹⁰ Ka ge re boletše sehlogong se se fetilego, e ka no ba thato ya Jehofa gore a phološe batho bao ba fetošago maphelo a bona ge ba bona Babilona o Mogolo a fedišwa. Ge e ba go le bjalo, go bohlokwa kudu gore re dule re lemoša batho. Nagana ka se: Dilo tšeo re ba botšago tšona gona bjale ba ka tla ba di gopola nakong e tlago. (Bapiša le Hesekiele 33:33.) Mohlomongwe ba ka nagana ka seo re ilego ra ba botša sona gomme ba kgetha go hlankela Jehofa pele selemo e e ba ngwagola. Go swana le moleta kgolego wa kua Filipi yo a ilego a fetoga ka morago ga “tšhišinyego e kgolo ya lefase,” mohlomongwe ba bangwe bao ba sa arabelego gabotse ba ka fetoga ge ba bona Babilona o Mogolo a fedišwa.—Dit. 16:​25-34.

RE YA TŠHEMONG KA GOBANE RE RATA JEHOFA LE LEINA LA GAGWE

11. Ke ka baka la’ng re nea Jehofa letago, kgodišo le matla? (Kutollo 4:11 ) (Bona le diswantšho.)

¹¹ Lebaka le legolo la gore re ye tšhemong le go bolela ditaba tše dibotse ke ka gobane re rata Jehofa le leina la gagwe. Re tšea bodiredi bja rena e le tsela ya go tumiša Jehofa Modimo yo re mo ratago. (Bala Kutollo 4:11.) Re dumela Jehofa Modimo wa rena o swanelwa ke go amogela letago, kgodišo le matla. Re nea Modimo wa rena kgodišo le letago ge re nea ba bangwe bohlatse bja gore o “bopile dilo ka moka” le gore re bile gona ka baka la gagwe. Re nea Jehofa matla ka go diriša nako le dilo tšeo re nago le tšona gore re bolele ditaba tše dibotse kamoo re kgonago ka gona ge maemo a re dumelela. (Mat. 6:33; Luka 13:24; Bakol. 3:23) Ge e le gabotse re ka re, re rata go bolela ka Modimo yoo re mo ratago. Re rata go botša batho ka leina la Modimo le seo le se bolelago. Ka baka la’ng?

12. Re kgethagatša leina la Jehofa bjang bodireding bja rena?

¹² Go rata Jehofa go re dira gore re kgethagatše leina la gagwe. (Mat. 6:9) Re nyaka go hlatswa leina la Modimo ka ge Sathane a le tsentše ka gare ga maraga. (Gen. 3:​1-5; Jobo 2:4; Joh. 8:44) Ge re le tšhemong re nyaka go botša batho ka moka bao ba re theetšago gore Jehofa ke Modimo wa mohuta mang. Re nyaka gore motho yo mongwe le yo mongwe a tsebe gore Modimo ke lerato, gore tsela yeo a bušago ka yona e lokile e bile ke ya toka le gore Mmušo wa gagwe o tlo fediša tlaišego ka moka wa dira gore batho ka moka ba phele ka khutšo e bile ba thabile. (Ps. 37:​10, 11, 29; 1 Joh. 4:8) Ge re ruta batho ka Jehofa re kgethagatša leina la gagwe. Re thaba kudu ge re tseba gore re phelela leina la rena. Bjang?

13. Ke ka baka la’ng re thabela bo bitšwa Dihlatse tša Jehofa? (Jesaya 43:​10-12 )

¹³ Jehofa o re kgethile gore re be “dihlatse” tša gagwe. (Bala Jesaya 43:​10-12.) Mengwaga e sego kae e fetilego Sehlopha se Bušago se ile sa re ngwalela lengwalo sa re: “Tokelo e kgolo kudu yeo yo mongwe le yo mongwe wa rena a nago le yona, ke ya go bitšwa yo mongwe wa Dihlatse tša Jehofa.”c Ke ka baka la’ng re re’alo? Nagana ka mohlala wo. Ge e ba o le kgorong ya tsheko o pharilwe ka molato wo o sa o tsebego, o tlo nyaka motho wa mohuta mang gore a go emelele? O tlo nyaka motho yo o mo tsebago gabotse le go mo tshepa. Le rena Jehofa o re kgethile gore re be Dihlatse tša gagwe ka gobane a re tseba gabotse le go re tshepa. O a tseba gore re tlo kgona go hlatsela gore ke yena Modimo a nnoši wa therešo. Re tšeela godimo kudu tokelo ya go ba Dihlatse tša Jehofa, ke ka baka leo re dirišago sebaka se sengwe le se sengwe go tsebatša leina la gagwe. E bile re šoma ka thata gore re hlatswe leina la Modimo. Re phelela seo leina la rena le se bolelago e lego go hlatsela Jehofa!—Ps. 83:18; Baroma 10:​13-15.

RE TLO DULA RE BOLELA DITABA TŠE DIBOTSE GO BA GO FIHLA BOFELO BO ETLA

14. Ke dilo dife tše di kgahlišago tšeo di ka diregago nakong e tlago?

¹⁴ Re fela pelo ya go bona gore bokamoso bo re swaretše eng! Ka thekgo ya Jehofa, re fela pelo ya go bona batho ba bantšhi ba amogela therešo pele masetlapelo a magolo a thoma. E bile re thabišwa kudu ke gore le nakong ya masetlapelo a magolo go tlo ba le batho bao ba tlogelago Sathane gomme ba thoma go rapela Modimo.—Dit. 13:48.

15-16. Re tlo dula re dira’ng, gona go fihla neng?

¹⁵ Re na le mošomo o mogolo wo re swanetšego go o dira. Mošomo woo o bohlokwa kudu, e bile re ka se tsoge re o dirile gape. Ke wa go bolela ditaba tše dibotse lefaseng ka moka. Re se ke ra lebala gore re swanetše go dula re gopotša batho ka seo se lego kgauswi le go direga. Batho ba swanetše go tseba gore lefase le le lebe le kgauswi le go fedišwa. Ge nako ya kahlolo e fihla ba tlo tseba gore molaetša wo re bego re o bolela o tšwa go Jehofa Modimo.—Hesek. 38:23.

¹⁶ Ke’ng seo re swanetšego go ikemišetša go se dira? Go rata ditaba tše dibotse, go rata batho le go rata Jehofa Modimo le leina la gagwe, go tlo dira gore re tšwele pele re bolela ditaba tše dibotse ka mafolofolo le go se dikadike go fihlela Jehofa a re: “Go lekane!”