Jehofa ke “Modimo yo a Phelago”

1. Ke’ng seo se thušago bahlanka ba Jehofa gore ba tšwele pele ba mo hlankela le ge ba na le mathata?

BEIBELE e re botša gore re phela ‘dinakong tše di hlobaetšago tšeo go lego thata go lebeletšana le tšona.’ (2 Tim. 3:1) Go oketša go mathata ao batho ka moka ba lebeletšanago le ona mo tshepedišong ye ya dilo, bahlanka ba Jehofa ba lebeletšana le go ganetšwa le go tlaišwa. Ke’ng seo se re thušago go hlankela Jehofa le ge re na le mathata? Selo se segolo seo se re thušago, ke go gopola gore Jehofa ke “Modimo yo a phelago.”—Jer. 10:10; 2 Tim. 1:12.

2. Ke bjang re ka rego Jehofa ke Modimo yo a phelago?

² Jehofa ke Modimo wa kgonthe yo a re thušago ge re lebeletšane le mathata, e bile o dula a nyaka dibaka tša go re thuša. (2 Dikor. 16:9; Ps. 23:4) Go gopola gore ke Modimo yo a phelago go ka re thuša go lebeletšana le mathata ao re kopanago le ona. A re kwe kamoo seo se ilego sa thuša Kgoši Dafida ka gona.

3. Dafida o be a e ra go re’ng ge a be a re “Jehofa ke Modimo yo a phelago”?

³ Dafida o be a tseba Jehofa e bile a ithekga ka yena. Nakong ya ge a be a rakedišwa ke manaba a gagwe go akaretša le Kgoši Saulo, Dafida o ile a rapela Jehofa gore a mo thuše. (Ps. 18:6) Ka morago ga gore Jehofa a arabe thapelo ya gagwe le go mo phološa, Dafida o ile a bolela gore: “Jehofa ke Modimo yo a phelago!” (Ps. 18:46) Ge Dafida a be a bolela mantšu a, o be a sa no bontšha gore Modimo o gona. Nyakišišo e nngwe e bontšha gore Dafida o ile a bontšha gore o tshepa Jehofa ka ge e le “Modimo yo a phelago yoo a dulago a thuša batho ba gagwe.” Dafida o be a tseba gore Modimo ke yo a phelago ka ge a ile a mo thuša bophelong bja gagwe, gomme seo se ile sa dira gore a ikemišetše go hlankela Jehofa le go mo tumiša.—Ps. 18:​28, 29, 49.

4. Re holega bjang ge re lebelela Jehofa e le Modimo yo a phelago?

⁴ Ge re kgodišegile gore Jehofa ke Modimo yo a phelago re tlo kgona go mo hlankela ka mafolofolo. Re tlo ba le matla a go kgotlelela mathata, ra ba ra kgona go tšwela pele re šoma ka thata tirelong ya Modimo. Re tlo ikemišetša le go dula re le bagwera ba Jehofa.

MODIMO YO A PHELAGO O TLA GO MATLAFATŠA

5. Re ka kgodišega ka’ng ge re kopana le mathata? (Bafilipi 4:13)

⁵ Re ka kgona go kgotlelela mathata a mangwe le a mangwe ge e ba re ka gopola gore Jehofa o a phela e bile o dula a ikemišeditše go re thuša. Ga gona bothata bjo bo ka palelago Modimo wa rena. Ke Ramatlaohle, e bile a ka kgona go re nea matla a go kgotlelela. (Bala Bafilipi 4:13.) Re na le mabaka a kwagalago a go kgona go kgotlelela mathata a rena. Ge re bona Jehofa a re thuša ge re na le mathata a manyenyane, seo se tlo re kgodiša gore a ka kgona go re thuša ge re lebeletšane le mathata a magolo.

6. Ke’ng seo se diragetšego nakong ya ge Dafida e sa le moswa, gona dilo tšeo di mo thušitše bjang gore a tshepe Jehofa?

⁶ Nagana ka dilo tše pedi tšeo di dirilego gore Dafida a tshepe Jehofa. Nakong ya ge e be e sa le modiši go ile gwa tla bere le tau gomme e nngwe le e nngwe ya tšea nku ya tatagwe. Dinakong tšeo ka moka Dafida o ile a ba le sebete a kitimiša diphoofolo tšeo gomme a phološa dinku tša tatagwe. Eupša ga se a ka a bona e le yena a fentšego diphoofolo tšeo. O be a tseba gore ke Jehofa a mo thušitšego. (1 Sam. 17:​34-37) Dafida ga se a ka a lebala seo se diragetšego. O ile a naganišiša ka dilo tšeo di mo diragaletšego, gomme a lemoga gore Modimo yo a phelago o tlo mo thuša nakong e tlago.

7. Go lebelela dilo ka tsela e fapanego go thušitše bjang Dafida ge a be a elwa le Goliata?

⁷ Ka morago, mohlomongwe ge Dafida e be e sa le moswa, o ile a ya moo madira a Baisiraele a bego a le gona. O ile a hwetša madira a tšhogile ka gobane senatla sa Bafilisita seo se bitšwago Goliata se be se tlile go “goboša madira a Isiraele.” (1 Sam. 17:​10, 11) Madira ao a be a tšhogile ka gobane a be a nagana kudu ka senatla seo le tsela yeo se bego se ba goboša ka yona. (1 Sam. 17:​24, 25) Eupša Dafida o ile a lebelela boemo bjoo ka tsela e fapanego. O be a tseba gore ge Goliata a goboša madira a Baisiraele ge e le gabotse o “[goboša] madira a Modimo yo a phelago.” (1 Sam. 17:26) Dafida o be a naganne ka Jehofa. O be a kgodišegile gore Modimo yo a ilego a mo thuša nakong ya ge e be e le modiši o tla mo thuša gape lekgeng le. Ruri Modimo o ile a mo thuša gore a fenye Goliata!—1 Sam. 17:​45-51.

8. Ke’ng seo se ka dirago gore re tshepe Jehofa ge re na le mathata? (Bona le seswantšho.)

⁸ Le rena re ka kgona go kgotlelela mathata ge re tseba gore Modimo yo a phelago o ikemišeditše go re thuša. (Ps. 118:6) Re ka kgodišega gore Jehofa o tlo re thuša ge re ka gopola dilo tšeo a di dirilego nakong e fetilego. Bala dipego tša Beibele tšeo di bontšhago kamoo Jehofa o ilego a thuša bahlanka ba gagwe ka gona. (Jes. 37:​17, 33-37) O ka bala le dipego tšeo di lego wepesaeteng ya rena ya jw.org tšeo di bontšhago kamoo Jehofa a ile a thekga bana babo rena le dikgaetšedi mehleng ya rena. E bile o ka gopola le kamoo Jehofa a ilego a go thuša ka gona. O se ke wa tshwenyega ge e ba o se wa ka wa diragalelwa ke selo se segolo se bjalo ka go lwa le bere le goba tau. Ka baka la’ng? Ka gobane ke kgale Jehofa a go thuša! O go gogetše go yena gore o be mogwera wa gagwe. (Joh. 6:44) Ke yena a go thušago gore o kgone go tšwela pele o mo hlankela. Kgopela Jehofa gore a go thuše go gopola dinako tšeo a ilego a araba dithapelo tša gago. Gopola kamoo a ilego a go thuša ka gona nakong ya ge o be o tloga o hloka thušo, goba a go thuša go lebeletšana le boemo bjo itšego bjo boima. Go naganišiša ka dilo tšeo go tlo go thuša go tshepa gore Jehofa o tlo dula a go thuša.

9. Ke’ng seo re swanetšego go se gopola ge re kopana le mathata? (Diema 27:11)

⁹ Go lebelela Jehofa e le yo a phelago go tlo re thuša gore re nagane gabotse ka mathata ao re kopanago le ona. Bjang? Re tlo thoma go lebelela mathata a rena e le kgang yeo e lego gona magareng ga Jehofa le Sathane. Diabolo o re ge re kopana le mathata re tlo tlogela go hlankela Jehofa. (Jobo 1:​10, 11; bala Diema 27:11.) Ge re kgotlelela mathata a rena ka katlego re bontšha gore re rata Jehofa le gore Sathane o bolela maaka a matala. Na o ganetšwa ke ba mmušo, o na le mathata a ditšhelete, batho ga ba arabele gabotse ge o le tšhemong goba o na le mathata a mangwe? Ge e ba go le bjalo gopola gore bothata bjoo o lebeletšanego le bjona bo ka dira gore o thabiše pelo ya Jehofa. Gopola le gore Jehofa a ka se dumelele gore o lekwe go feta kamoo o ka kgotlelelago ka gona. (1 Bakor. 10:13) O tlo go nea matla a go kgotlelela.

MODIMO YO A PHELAGO O TLO GO PUTSA

10. Modimo yo a phelago o tlo direla’ng bao ba mo hlankelago?

¹⁰ Jehofa o putsa bao ba mo hlankelago. (Baheb. 11:6) Gona bjale o dira gore re be le khutšo ya monagano le go kgotsofala, e bile o tlo re nea bophelo bjo bo sa felego nakong e tlago. Re ka holofela Jehofa re kgodišegile gore o nyaka go re putsa e bile o na le matla a go dira bjalo. Ge e ba re kgodišegile re tlo kgona go dula re hlankela Jehofa go swana le ge bahlanka ba gagwe ba nakong e fetilego ba ile ba dira. Se ke seo Timotheo a se dirilego lekgolong la pele la mengwaga.—Baheb. 6:​10-12.

11. Ke’ng seo se dirilego gore Timotheo a šome ka thata ka phuthegong? (1 Timotheo 4:10)

¹¹ Bala 1 Timotheo 4:10. Timotheo o ile a tshepa Modimo yo a phelago. Ka gona o ile a kgona go šoma ka thata le go ikgafa. Ka ditsela dife? Moapostola Paulo o ile a mo kgothaletša gore a dule a kaonefatša tsela ya gagwe ya go ruta le go bolela phatlalatša. Timotheo o be a swanetše go beela badumedi gotee le yena mohlala o mobotse. Le gona o be a na le dikabelo tše thata tšeo di bego di akaretša go nea keletšo e tiilego eupša ka tsela e lerato go bao ba bego ba e hloka. (1 Tim. 4:​11-16; 2 Tim. 4:​1-5) Timotheo o be a kgodišegile gore le ge batho ba ka se bone maiteko a gagwe goba go leboga seo a se dirago, Jehofa yena o be a tlo mo putsa.—Baroma 2:​6, 7.

12. Ke’ng seo se ka thušago bagolo gore ba dule ba šoma ka thata? (Bona le seswantšho.)

¹² Lehono bagolo le bona ba ka kgodišega gore Jehofa o bona mošomo wo ba o dirago le go o tšeela godimo. Bagolo ba swaregile ka go dira maeto a bodiši, go ruta le go ya tšhemong, e bile bagolo ba bangwe ba bantšhi le bona ba thekga mošomo wa go aga meago ya mokgatlo le go thuša ge go na le dikotsi. Ba bangwe ba hlankela Dihlopheng tša go Etela Balwetši goba Dikomiting tša go Hloma Kwano le Sepetlele. Bagolo bao ba ikgafago ka ditsela tše, ba lebelela phuthego e le thulaganyo ya Jehofa e sego mokgatlo wo o hlomilwego ke batho. Ka baka leo ba phetha dikabelo tša bona ka dipelo ka moka, e bile ba kgodišegile gore Modimo o ba putsa ka baka la mošomo wo ba o dirago.—Bakol. 3:​23, 24.

13. Jehofa o ikwa bjang ge re dira sohle seo re se kgonago gore re dule re mo hlankela?

¹³ Re ka se be bagolo ka moka ga rena. Eupša go na le seo re ka se neago Jehofa. Modimo wa rena o thaba kudu ge re dira sohle seo re ka se kgonago go mo hlankela. O lemoga seo re se dirago go thekga modiro wa lefase ka moka go sa šetšwe gore ke se se kaakang. O a thaba ge re rapa sebete gomme re emiša letsogo gore re arabe ge re le dibokeng, e bile o thaba kudu ge re lebalela batho a bangwe. Le ge o ka bona e ka seo o se dirago ga sa lekana, kgodišega gore Jehofa o leboga seo o mo direlago sona. O a go rata, e bile o tlo go putsa.—Luka 21:​1-4.

DULA O GWERANE LE MODIMO YO A PHELAGO

14. Go dula re gwerane le Jehofa go re thuša bjang gore re botege? (Bona le seswantšho.)

¹⁴ Ge re ka lebelela Jehofa e le mogwera wa rena go tlo ba bonolo gore re dule re mmotegela. Josefa le yena o ile a ba mogwera wa Modimo. O ile a gana go dira bootswa.Modimo e be e le mogwera wa gagwe, e bile o be a sa nyake go dira selo seo se mo šišimišago. (Gen. 39:9) E le gore re be bagwera ba Jehofa re swanetše go dula re mo rapela le go bala Lentšu la gagwe. Ge re dira bjalo segwera sa rena le yena se tlo gola. Ge re ka swana le Josefa gomme ra ba le segwera se sebotse le Jehofa, re ka se nyake go dira dilo tšeo di mo šišimišago.—Jak. 4:8.

15. Re ithuta’ng go seo se diragaletšego Baisiraele ge ba be ba le lešokeng? (Baheberu 3:12)

¹⁵ Batho bao ba sa tshepego Jehofa ba ka tlogela go gwerana le yena. Nagana ka seo Baisiraele ba ilego ba se dira ge ba be ba le lešokeng. Ba be ba tseba gore Jehofa o gona, eupša ba ile ba thoma go nagana gore a ka se sa ba hlokomela. Ba ile ba thoma go botšiša gore: “Na Jehofa o gona gare ga rena goba ga a gona?” (Ek. 17:​2, 7) Se se ile sa dira gore ba fetoge marabele. Ruri ga re nyake go swana le bona!—Bala Baheberu 3:12.

16. Ke’ng seo se ka dirago gore go be thata go dula re botegela Jehofa?

¹⁶ Batho bao re phelago gare ga bona ba dira gore go be thata go gwerana le Jehofa. Ba bantšhi ga ba dumele gore Modimo o gona. Gantšhi bao ba sa mo kwego, dilo di ba sepelela gabotse. Ge re bona seo se direga, re ka no se sa botegela Jehofa. Le ge re tseba gore Modimo o gona, re ka thoma go nagana gore a ka se sa re hlokomela. Mongwadi wa Psalme 73 le yena o ile a ikwa ka tsela yeo. O be a bona batho bao a phelago gare ga bona ba sa kwe melao ya Modimo eupša dilo di ba sepelela gabotse. Ka baka la seo, o ile a thoma go ipotšiša ge eba go sa le bohlokwa gore a hlankele Modimo.—Ps. 73:​11-13.

17. Re tlo thušwa ke’ng gore re dule re le bagwera ba Jehofa?

¹⁷ Ke eng seo se thušitšego mopsalme gore a se sa ikwa ka tsela yeo? O ile a naganišiša ka seo se tlago go diragalela batho bao ba se nago taba le Jehofa. (Ps. 73:​18, 19, 27) O ile a naganišiša le ka mehola yeo e bago gona ka baka la go hlankela Jehofa. (Ps. 73:24) Le rena re ka naganišiša ka tsela yeo Jehofa a re šegofaditšego ka yona gomme ra bapiša seo le ka tsela yeo bophelo bja rena bo bego bo ka ba ka yona ge nkabe re sa hlankele Jehofa. Ge re dira bjalo re tlo dula re botega, gomme ra bolela mantšu ao mopsalme a a boletšego ao a rego: “Ge e le nna ke holwa ke go ba kgauswi le Modimo.”—Ps. 73:28.

18. Ke’ng seo se ka dirago gore re se ke ra tšhoga ge re nagana ka bokamoso?

¹⁸ Re ka kgona go lebeletšana le mathata ao re kopanago le ona mehleng ye ya bofelo ka gobane re “makgoba a Modimo yo a phelago le wa therešo.” (1 Bathes. 1:9) Modimo wa rena ke wa kgonthe e bile o thuša bao ba mo hlankelago. O ile a thuša bahlanka ba gagwe ba mehleng ya kgale, e bile le lehono o sa tlo tšwela pele a re thuša. E se kgale re tlo lebeletšana le masetlapelo a magolo mo lefaseng. Eupša re ka se lebeletšane le ona re nnoši. (Jes. 41:10) Eka ka moka ga rena re ka ba le sebete kudu gomme ra re: “Jehofa ke mothuši wa ka; nka se boife.”—Baheb. 13:​5, 6.