Jehofa o re Thuša Bjang go Kgotlelela?

1. Ke ka baka la eng re swanetše go kgotlelela, gona ke mang yo a ka re thušago? (1 Petro 5:10)

BATHO ba Jehofa ba swanetše go kgotlelela mehleng ye ya bofelo ka ge bophelo bo le boima. Ba bangwe ba na le bolwetši bja go se fole, ba bangwe ba hlokofaletšwe ke batho bao ba ba ratago, mola ba bangwe ba tlaišwa ke batho ba gabo bona goba ba mmušo. (Mat. 10:​18, 36, 37) Kgodišega gore Jehofa o tla go thuša go kgotlelela bothata le ge e le bofe bjoo o kopanago le bjona.—Bala 1 Petro 5:10.

2. Bakriste ba hwetša kae matla a go ba thuša go kgotlelela?

² Go kgotlelela go bolela gore re tlo kgona go dula re botegela Jehofa le go mo hlankela re thabile le ge re na le mathata, re tlaišwa le go kopana le diteko. E le gore re kgone go kgotlelela, re swanetše go dumela gore dilo tšeo Modimo a re tshepišitšego tšona di tla phethagala. Ga re kgotlelele ka baka la matla a rena, eupša Jehofa ke yena a re thušago ka ge a re nea “matla a fetago a tlwaelegilego.” (2 Bakor. 4:7) Sehlogong se, re tlo kwa ka dilo tše nne tšeo Jehofa a re filego tšona e le go re thuša gore re kgone go kgotlelela. Re tlo kwa le gore re ka diriša bjang e nngwe le e nngwe ya tšona.

THAPELO

3. Ke ka baka la eng re ka re thapelo ke selo se bohlokwa seo se re thušago gore re kgone go boledišana le Jehofa?

³ Jehofa o re diretše selo se bohlokwa seo se ka re thušago gore re kgotlelele. O dirile gore re kgone go boledišana le yena le ge re na le sebe. (Baheb. 4:16) Nagana ka se: Re ka kgona go mo rapela nako e nngwe le e nngwe le go mmotša ka selo se sengwe le se sengwe. O kgona go re kwa ge re mo rapela ka leleme le ge e le lefe le ge re mo rapela re le lefelong le ge e le lefe, gaešita le ge re le noši goba re le teronkong. (Jona 2:​1, 2; Dit. 16:25, 26) Ge e ba re ka imelwa kudu moo re palelwago ke go botša Jehofa kamoo re ikwago ka gona, o kwešiša seo re bego re nyaka go mmotša sona. (Baroma 8:​26, 27) Ruri thapelo ke selo se bohlokwa seo se re thušago gore re kgone go boledišana le Jehofa!

4. Re tseba bjang gore Jehofa o tla re kwa ge re mo kgopela gore a re thuše go kgotlelela?

⁴ Jehofa o re kgodiša gore “selo se sengwe le se sengwe seo re se rapelelago seo se sepedišanago le thato ya gagwe, yena o a re kwa.” (1 Joh. 5:14) Na re ka kgopela Jehofa gore a re thuše go kgotlelela? Ee! Ka gobane go dira bjalo go sepedišana le thato ya gagwe. Ke ka baka la eng re realo? Ge re kgotlelela mathata, re dira gore Jehofa a kgone go araba Sathane Diabolo yo a mo kwerago. (Die. 27:11) Ebile Beibele e re Jehofa o fela pelo ya gore a “bontšhe matla a gagwe ka go thuša batho bao ba mo hlankelago ka dipelo tša bona ka moka.” (2 Dikor. 16:9) Ka gona, re ka kgodišega gore Jehofa o na le matla ebile o nyaka go re thuša gore re kgotlelele.—Jes. 30:18; 41:10; Luka 11:13.

5. Go rapela go ka re thuša bjang gore re be le khutšo ya monagano? (Jesaya 26:3)

⁵ Beibele e re botša gore ge re rapela go tšwa pelong ka dilo tšeo di re tshwenyago, Modimo o tla re nea ‘khutšo yeo batho ba sa kgonego go e kwešiša gomme khutšo yeo e tla šireletša dipelo tša rena le menagano ya rena.’ (Bafil. 4:7) A re kweng gore seo se ra go reng. Batho bao ba hlankelago Jehofa ba na le mathata ebile ba ka dira sohle seo ba ka se kgonago gore ba be le khutšo ya monagano. Ka mohlala, batho ba bangwe ba diriša mokgwa wo o itšego wa go naganišiša e le gore ba ntšhe dilo ka moka ka monaganong wa bona, go akaretša le dilo tšeo di ba tshwenyago. Go dira bjalo go kotsi kudu ka gobane ge e ba motho a sa laole tsela yeo a naganago ka yona a ka fa matemona sebaka sa gore a mo laole. (Bapiša le Mateo 12:​43-45.) Khutšo yeo motho a ka bago le yona a diriša mekgwa ya go swana le yeo ge a naganišiša e phalwa kgole ke khutšo yeo Modimo a re fago yona ge re rapela. Ge re rapela Jehofa, re bontšha gore re ithekgile ka yena ka mo go feletšego ebile o tlo dira gore re ‘dule re na le khutšo.’ (Bala Jesaya 26:3.) Jehofa o dira gore re dule re na le khutšo ka go re thuša gore re gopole Mangwalo ao a re homotšago. Mangwalo ao a re thuša gore re be le khutšo ya monagano ka gobane re a tseba gore Jehofa o na le taba le rena ebile o nyaka go re thuša.—Ps. 62:​1, 2. 

6. O ka dira eng gore o holwe ke go rapela? (Bona le seswantšho.)

⁶ Seo o ka se dirago. Ge o lebeletšane le teko, “lahlela maima a gago go Jehofa” gomme o mo kgopele gore a go fe khutšo ya monagano. (Ps. 55:22) Le gona, mo kgopele gore a go fe bohlale bjo o bo hlokago e le gore a go thuše go lebeletšana le mathata a gago. (Die. 2:​10, 11) Ge o dutše o mo kgopela gore a go thuše go kgotlelela, o se ke wa lebala go mo leboga. (Bafil. 4:6) Nagana ka ditsela tšeo Jehofa a go thušago ka tšona ge o na le mathata gomme o mo leboge. O se ke wa dumelela mathata ao o nago le ona a go dira gore o se ke wa bona dilo tše dibotse tšeo Jehofa a šetšego a go diretše tšona.—Ps. 16:​5, 6.

LENTŠU LA MODIMO

7. Go ithuta Beibele go ka re thuša bjang go kgotlelela?

⁷ Jehofa o re file Lentšu la gagwe e le gore a re thuše go kgotlelela. Beibele e na le ditemana tše dintši tšeo di re kgodišago gore Jehofa o tlo re thekga. Nagana ka mohlala wo o latelago. Mateo 6:8 e re: “Modimo Tatago lena o tseba gore ke dilo dife tšeo le di nyakago le pele le mo kgopela.” Mantšu ao a boletšwe ke Jesu ka gobane o tseba Jehofa kudu go feta batho ka moka. Ka gona, re kgodišegile gore ge re na le mathata, Jehofa o tlo re thuša ka gobane o tseba dilo tšeo re di hlokago. Beibele e na le ditemana tše dintši tše di kgahlišago tšeo di ka re thušago go kgotlelela ge re na le mathata.—Ps. 94:19.

8. (a) Beibele e re kgothaletša go dira eng? (b) Ke eng seo se ka re thušago go gopola mangwalo ge re kopana le mathata?

⁸ Melao ya motheo ya Beibele e ka re thuša go kgotlelela. E re thuša gore re be le bohlale bja go re thuša gore re kgone go dira diphetho tše dibotse. (Die. 2:​6, 7) Ka mohlala, Beibele e re kgothaletša gore re se ke ra tshwenyega ka dilo tša nakong e tlago, eupša letšatši le lengwe le le lengwe re ithekge ka Jehofa. (Mat. 6:34) Ge e ba re tlwaetše go bala Beibele letšatši le lengwe le le lengwe ebile re naganišiša ka seo re ithutilego sona, seo se tla re thuša gore ge re kopana le mathata re gopole mangwalo ao a ka re thušago.

9. Dipego tša ka Beibeleng di re kgodiša bjang gore Jehofa o tlo re thuša?

⁹ Beibele e re botša ka dipego tša batho ba go swana le rena bao ba ilego ba ithekga ka Jehofa gomme a ba thuša. (Baheb. 11:​32-34; Jak. 5:17) Ge re bala dipego tšeo re ba le tumelo ya gore Jehofa o tla “re šireletša ebile o re fa matla, o tla dula a re thuša nakong ya ge re tlaletšwe.” (Ps. 46:1) Ge re naganišiša ka tumelo yeo bahlanka ba Jehofa ba nakong e fetilego ba bego ba na le yona le kamoo ba ilego ba kgotlelela mathata ka gona, re tlo ekiša mohlala wa bona.—Jak. 5:​10, 11.

10. O ka dira eng gore o holwe ke Lentšu la Modimo?

¹⁰ Seo o ka se dirago. Bala Beibele ka mehla gomme o ngwale ditemana tšeo di ka tlago tša go thuša. Batho ba bantši ba bala temana ya letšatši e sa le mesong, seo se ba thuša gore ba hwetše mangwalo ao a kgothatšago ao ba ka naganišišago ka ona letšatšing leo. Kgaetšedi Mariea o bone gore seo ke nnete nakong ya ge batswadi ba gagwe ba be ba na le kankere. Ke eng seo se mo thušitšego gore a kgone go kgotlelela ge ba be ba le kgauswi le go hlokofala? O re: “Mesong e mengwe le e mengwe ke be ke bala temana ya letšatši gomme ke naganišiša ka seo ke ithutilego sona. Go dira bjalo go nthušitše gore ke dule ke nagana ka Jehofa le ka dilo tše dibotse tšeo a nthutago tšona ka Lentšung la gagwe, go e na le go dulela go nagana ka mathata ao ke bego ke na le ona.”—Ps. 61:2.

BAKRISTEGOTEE LE RENA

11. Go tseba gore ga se rena feela re kgotleletšego mathata go re kgothatša bjang?

¹¹ Jehofa o re file bana babo rena le dikgaetšedi lefaseng ka moka go re thuša gore re kgone go kgotlelela mathata. Go tseba gore “ditlaišego tše di swanago di kgotlelelwa ke ba bangwe mokgatlong ka moka wa bana babo [rena] lefaseng,” go re kgonthišetša gore ga se rena feela re welwago ke mathata. (1 Pet. 5:9) Re ka kgodišega gore mathata ka moka ao re lebeletšanego le ona, bana babo rena ba bangwe le bona ba lebeletšane le ona ebile ba kgona go a kgotlelela. Seo se bolela gore le rena re ka kgona go a kgotlelela!—Dit. 14:22.

12. Bakristegotee le rena ba ka re thuša bjang, gona rena re ka ba thuša bjang? (2 Bakorinthe 1:​3, 4)

¹² Ge re na le mathata, Bakristegotee le rena ba ka re kgothatša gore re kgone go kgotlelela. Moapostola Paulo le yena o ile a kgothatšwa ke Bakristegotee le yena. Gantši o be a leboga bana babo bao ba bego ba mo thuša ge a be a golegilwe ka ntlong, ebile a ba bitša le ka maina a bona. Ba ile ba homotša Paulo, ba mo kgothatša ba ba ba mo thuša le ka dilo tšeo a bego a di hloka. (Bafil. 2:​25, 29, 30; Bakol. 4:​10, 11) Le rena re ka diragalelwa ke se se swanago. Ge re na le mathata, bana babo rena le dikgaetšedi ba re thuša gore re kgone go kgotlelela. Le gona, le rena re dira se se swanago ge ba na le mathata.—Bala 2 Bakorinthe 1:​3, 4.

13. Ke eng seo se thušitšego kgaetšedi Maya gore a kgone go kgotlelela?

¹³ Bana babo rena lefaseng ka moka ba ile ba kgothatša kgaetšedi Maya yo a tšwago Russia. Maya o re ka 2020 maphodisa a kua Russia a ile a phuruputša legae la gagwe, gomme ka morago o ile a swanelwa ke go ya kgorong ya tsheko gore a ye a emele ditumelo tša gagwe. O re: “Nakong ya ge ke be ke imetšwe, bana babo rena le dikgaetšedi ba ile ba mphounela le go nngwalela melaetša go bontšha gore ba a nthata. Ke kgale ke tseba gore ke na le lapa le legolo leo le nthatago. Eupša go tloga ka 2020 ke ile ka kgodišega kudu.”

14. Ge re dutše re kgotleletše mathata, re ka dirang gore re holege ge bana babo rena le dikgaetšedi ba re thuša? (Bona le seswantšho.)

¹⁴ Seo o ka se dirago. Ge o dutše o kgotleletše mathata, dula o le kgauswi le bana beno le dikgaetšedi. O se ke wa tšhaba go kgopela bagolo gore ba go thuše. Ba ka swana le “lefelo la go tšhabela phefo, le lefelo la go tšhabela ledimo.” (Jes. 32:2.) O se ke wa lebala gore Bakristegotee le wena le bona ba kgotleletše mathata. Ge e ba go na le motho yo a hlokago selo se itšego gomme wena wa mo direla selo se sebotse, o tlo thaba ke moka seo sa dira gore o kgone go kgotlelela mathata a gago.—Dit. 20:35.

KHOLOFELO YA RENA

15. Go ba le kholofelo go re thuša bjang, gona go ile gwa thuša Jesu bjang? (Baheberu 12:2)

¹⁵ Jehofa o re file kholofelo ya nnete yeo e re thušago gore re kgone go kgotlelela mathata a rena. (Baroma 15:13) Gopola kamoo go ba le kgotlelelo go ilego gwa thuša Jesu go kgotlelela letšatši le le thata ge a be a le mo lefaseng. (Bala Baheberu 12:2.) Jesu o be a tseba gore ge a ka dula a kgotlelela, seo se be se tla bontšha gore dilo tšeo Sathane a di boletšego ka Jehofa ke maaka le gore Jehofa o swanelwa ke go hlomphiwa. Jesu o be a fela pelo ya go boela go Tatagwe le go tlo buša gotee le bana babo legodimong. Ka mo go swanago, go ba le kholofelo ya go tlo phela go ya go ile lefaseng le leswa la Modimo go re thuša gore re kgone go kgotlelela mathata ka moka ao re lebeletšanago le ona lefaseng le la Sathane.

16. Go ba le kholofelo go thušitše bjang kgaetšedi yo mongwe gore a kgotlelele, gona wena o ithuta eng ka seo a se boletšego?

¹⁶ Ekwa kamoo go ba le kholofelo ya go tla go phela lefaseng le leswa nakong e tlago go ilego gwa thuša kgaetšedi Alla yo a tšwago Russia. Monna wa gagwe o ile a išwa teronkong gomme a dula moo go fihlela a tlo sekišwa. Ka morago ga gore seo se direge, Alla o re: “Go rapela le go naganišiša ka dilo tšeo Jehofa a tshepišitšego go tlo re direla tšona nakong e tlago go nthušitše gore ke se ke ka fela matla. Ke a kwešiša gore mathata a a tlo fela. Jehofa o tlo fenya gomme le rena re tlo fenya.”

17. Re ka bontšha bjang gore re tšeela godimo dilo tšeo re ithutago tšona ka Beibeleng tšeo Modimo a re tshepišitšego tšona nakong e tlago? (Bona le seswantšho.)

¹⁷ Seo o ka se dirago. Iphe nako ya go naganišiša ka dilo tše dibotse tšeo Jehofa a re tshepišitšego tšona. Ipone ka leihlo la kgopolo o le lefaseng le leswa gomme o thabela dilo tšeo Jehofa a tla bego a go šegofaditše ka tšona. Ge o dira bjalo, mathata ka moka ao o lebeletšanego le ona a tla bonagala e le a “nakwana gomme [a] le bohwefo.” (2 Bakor. 4:17) Le gona, dira sohle seo o ka se kgonago gore o botše batho ba bangwe ka dilo tšeo Modimo a re tshepišitšego tšona. E no nagana gore batho bao ba sa tsebego gore Modimo o tlo re direla eng nakong e tlago ba ikwa bjang ge ba lebeletšane le mathata lefaseng le la Sathane. Re ka ba botša dilo tše sego kae tšeo Modimo a tlago go re direla tšona lefaseng le leswa, ke moka mafelelong ba ka nyaka go ithuta ka yena.

18. Ke ka baka la eng re ka kgodišega gore dilo tšeo Jehofa a re tshepišitšego tšona di tlo direga?

¹⁸ Ka morago ga gore Jobo a kgotlelele mathata a mantši le go dula a botegela Jehofa, o ile a botša Jehofa gore: “Bjale gona ke a tseba gore o kgona go dira dilo ka moka, le gore ga go na selo seo o se nagannego seo se ka go palelago.” (Job 42:2) Jobo o bone gore ga go na selo seo se ka thibelago Jehofa go dira dilo tšeo a di tshepišitšego. Go tseba seo go ka re thuša gore le rena re kgone go kgotlelela. Ka mohlala, nagana ka mosadi yo a babjago ebile a nyamile ka gobane dingaka tše dintši di palelwa ke go fodiša bolwetši bja gagwe. Eupša ge ngaka yeo e tshepegago ebile e le kgale e alafa batho e mmotša gore bothata ke eng le gore e tlo mo thuša gore a fole, o ikwa a imologile le ge e ba o tlo fola ka morago ga nako e telele. Bjale gona o tlo kgona go kgotlelela ka gobane o a tseba gore o tlo fola. Ka mo go swanago, go ba le tumelo ya gore re tlo phela lefaseng le leswa la Paradeise go tlo re thuša gore re kgone go kgotlelela mathata.

19. Re swanetše go dira eng gore re kgone go kgotlelela?

¹⁹ Re ithutile gore Jehofa o re thuša gore re kgone go kgotlelela mathata a rena a diriša thapelo, Lentšu la gagwe, Bakristegotee le rena le kholofelo ya rena. Ge re diriša gabotse dilo tšeo Jehofa a re filego tšona, o tlo re thuša go kgotlelela mathata ka moka ao re lebeletšanego le ona go fihlela letšatšing leo lefase la Sathane leo le tletšego ka mathata le fedišwa.—Bafil. 4:13.