Kgodišega Gore Jehofa o a go Rata

1. Ke ka baka la’ng o ile wa ineela go Jehofa? (Bona le seswantšho.)

NA O sa gopola ge o be o ineela go Jehofa? O dirile phetho yeo ka ge o be o mo tseba ebile o mo rata. O mo tshepišitše gore go mo hlankela go tlo tla pele bophelong bja gago le gore o tlo tšwela pele o mo rata ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka. (Mar. 12:30) Go tloga ka nako yeo, o ile wa tšwela pele o mo rata kudu. O tlo reng ge e ba motho a ka tla go wena a go botšiša gore, “Na ka nnete o rata Jehofa?” Ka ntle le pelaelo o tlo re, “Ke mo rata go feta batho ka moka!”

2-3. Jehofa o nyaka gore re kgodišege ka eng, gona re tlo boledišana ka eng sehlogong se? (Jeremia 31:3)

² O be o ka araba bjang ge e ba motho yo mongwe a ka go botšiša gore, “Na o kgodišegile gore Jehofa o a go rata?” Na o be o ka dikadika go mo araba, mohlomongwe o nagana gore Jehofa yena ga a go rate? Kgaetšedi yo a bego a sa swarwe gabotse ge e be e sa le ngwana o re: “Ke rata Jehofa ka pelo ya ka ka moka. Ga ke belaele seo. Eupša ke fela ke ipotšiša gore, Na Jehofa yena o a nthata?” Ge e le gabotse Jehofa o ikwa bjang ka wena?

³ Jehofa o nyaka gore o kgodišege gore o a go rata. (Bala Jeremia 31:3.) Go bolela nnete, Jehofa o go gogetše go yena. Ge o be o ineela go yena gomme o kolobetšwa, o ile a go fa selo se bohlokwa kudu e lego lerato la gagwe le le botegago. Lerato leo le tseneletše, ebile ke la go ya go ile. Se se dira gore a lebelele wena le bahlanka ba gagwe bao ba botegago le le “thoto e kgethegilego.” (Mal. 3:​17, mongwalo wa tlase.) Jehofa o nyaka gore o kgodišege gore o a go rata go swana le ge moapostola Paulo le yena a be a kgodišegile gore o a mo rata. Ke ka baka leo Paulo a ilego a ngwala gore: “Ke kgodišegile gore le ge e le lehu goba bophelo goba barongwa goba mebušo goba dilo tšeo di lego gona gona bjale goba dilo tše di tlago go tla goba matla goba bophagamo goba go iša goba sebopiwa le ge e le sefe se sengwe di ka se kgone go re aroganya le lerato la Modimo.” (Baroma 8:​38, 39) Sehlogong se re tlo kwa gore ke ka baka la eng re swanetše go kgodišega gore Jehofa o a re rata le gore re ka thušwa ke eng go tshepa gore o a re rata.

KE KA BAKA LA ENG RE SWANETŠE GO KGODIŠEGA GORE JEHOFA O A RE RATA?

4. Re ka lwantšhana bjang le e nngwe ya ditiro tša boradia tša Sathane?

⁴ Ge e ba re kgodišega gore Jehofa o a re rata, re ka kgona go lwantšhana le e nngwe ya “ditiro tša boradia” tša Sathane. (Baef. 6:11) Sathane o tla leka ka mokgwa wo a ka kgonago ka gona go re thibela gore re se ke ra hlankela Jehofa. E nngwe ya dilo tša boradia tšeo Sathane a di dirago ke go dira gore re dumele gore Jehofa ga a re rate. O se ke wa lebala gore Sathane o dula a nyaka dibaka tša go re hlasela. Gantši o re hlasela ge re nyamile, mohlomongwe ge re imetšwe maikwelong ka baka la dilo tšeo di re diragaletšego nakong e fetilego, mathata ao re lebeletšanego le ona, goba ge re sa tsebe gore di tla le meso di re swaretše eng. (Die. 24:10) Sathane o swana le tau yeo e nyakago sebaka sa go hlasela phoofolo yeo e sa kgonego go itwela. Le gona, o re hlasela mola re nyamile gore re kgone go tlogela go hlankela Jehofa. Ge e ba re tšwela pele re kgodišega gore Jehofa o a re rata, re tlo kgona go “emeletšana” le Sathane le go ganetša maanomabe ao a a logilego.—1 Pet. 5:​8, 9; Jak. 4:7.

5. Ke ka baka la’ng re nyaka gore Jehofa a re rate le go re tšeela godimo?

⁵ Ge e ba re tshepa gore Jehofa o a re rata, re tlo kgona go batamela kgauswi kudu le yena. A re kweng gore ke ka baka la eng re realo. Jehofa o re bopile re na le maikwelo a go nyaka go rata ba bangwe le a go nyaka gore le bona ba re rate. Ge batho ba bangwe ba re bontšha gore ba a re rata seo se dira gore le rena re ba rate. Ka gona, ge Jehofa a re bontšha gore o a re rata ebile o re tšeela godimo, seo se tlo dira gore le rena re mo rate le go feta. (1 Joh. 4:19) Ge re dutše re bontšha Jehofa gore re a mo rata le yena o tlo re rata kudu. Beibele e re botša gore: “Batamelang Modimo gomme o tla le batamela.” (Jak. 4:8) Re ka thušwa ke eng go tshepa gore Jehofa o a re rata?

KE ENG SEO SE KA GO THUŠAGO GO TSHEPA GORE JEHOFA O A GO RATA?

6. E le gore o tshepe gore Jehofa o a go rata, o ka rapelela eng?

⁶ Dula o mo kgopela gore a go thuše go bona gore o a go rata. (Luka 18:1; Baroma 12:12) Ge e ba go hlokega, letšatši le lengwe le lengwe kgopela Jehofa ka makga a mantši gore a go thuše go itebelela ka tsela yeo a go lebelelago ka yona. Ka dinako tše dingwe o ka ikwa o thatafalelwa ke go dumela gore Modimo o a go rata. Eupša gopola gore Jehofa ke yo mogolo go feta pelo ya gago. (1 Joh. 3:​19, 20) O go tseba go feta kamoo wena o itsebago ka gona, ebile o kgona go bona dilo tšeo wena o ka se kgonego go di bona. (1 Sam. 16:7; 2 Dikor. 6:30) Ka gona o se ke wa tšhaba go ‘mmotša’ gore o ikwa bjang, le go mo kgopela gore a go thuše go tshepa gore o a go rata. (Ps. 62:8) Ka morago ga moo, dira dilo ka go dumelelana le seo o se rapelelago gomme o dire dilo tše di latelago.

7-8. Dipsalme di re kgodiša bjang gore Jehofa o a re rata?

⁷ Tshepa dilo tšeo Jehofa a di bolelago. O file bangwadi ba Beibele moya o mokgethwa go re thuša go bona gore dilo tšeo ba di ngwalago ka yena ke tša nnete. Ekwa tsela yeo Dafida a ilego a hlalosa kamoo Jehofa a nago le taba le rena ka gona. Dafida o itše: “Jehofa o kgauswi le bao ba tlaišegago, le gona o phološa bao ba nyamilego o šoro.” (Ps. 34:18) Ge o nyamile o ka ikwa eka o noši. Eupša Jehofa o tshepiša gore ka nako yeo, o tlo go thuša ka gobane a bona gore o tloga o mo hloka. Ka pukung e nngwe ya dipsalme, Dafida o ngwadile gore: “O tsenye megokgo ya ka ka lepotlelong la gago la mokgopa.” (Ps. 56:8) Jehofa o a bona ge o nyamile le ge o ekwa bohloko. O tloga a e na le taba le wena ebile o kwešiša kamoo o ikwago ka gona. Ka mantšu a mangwe, o tšea megokgo ya gago a e boloka, bjalo ka ge eka ke meetse a bohlokwa ao a lego ka lepotlelong la mokgopa la motho yoo a tšeago leeto. Psalme 139:3 e re: “O [Jehofa] tseba dilo ka moka tšeo ke di dirago.” Jehofa o bona dilo ka moka tšeo o di dirago eupša o šetša kudu dilo tše dibotse. (Baheb. 6:10) Ka baka la’ng? Ka gobane o tšeela godimo maiteko le ge e le afe ao o a dirago e le gore o mo thabiše.a

⁸ Jehofa o re homotša a diriša mangwalo ao a lego ka Lentšung la gagwe. Ge e le gabotse, o re go rena: “Tseba gore ke go rata kudu ebile ke na le taba le wena.” Ka ge re šetše re bone dirapeng tše di fetilego, Sathane o nyaka gore re dumele gore Jehofa ga a re rate. Ka gona, ge e ba o fela o belaela gore Jehofa o a go rata, emanyana gomme o ipotšiše gore, ‘Ke swanetše go tshepa mang? Na ke swanetše go tshepa “tatago maaka” goba “Modimo wa therešo”?’—Joh. 8:44; Ps. 31:5

9. Ke eng seo Jehofa a se tshepišago batho bao ba mo ratago? (Ekisodo 20:​5, 6)

⁹ Ipotšiše gore Jehofa o ikwa bjang ka batho bao ba mo ratago. Nagana ka seo Jehofa a ilego a se botša Moshe le Baisiraele. (Bala Ekisodo 20:​5, 6.) Jehofa o tshepiša bao ba mo ratago gore o tla dula a ba bontšha lerato leo le botegago. Mantšu ao a re kgodiša gore Modimo wa rena yo a tshepegago, a ka se tsoge a tlogetše go rata bahlanka ba gagwe bao ba mo ratago. (Neh. 1:5) Ge e ba o fela o nagana gore Jehofa ga a go rate, emanyana gomme o ipotšiše gore, ‘Na ke rata Jehofa?’ Ke moka o nagane ka se: Ge e ba o mo rata gomme o leka ka thata gore o mo thabiše, kgodišega gore o go rata kudu. (Dan. 9:4; 1 Bakor. 8:3) Ka mantšu a mangwe, ge e ba o kgodišegile gore o rata Jehofa, ke ka baka la’ng o sa kgodišege gore le yena o a go rata? O ka kgodišega gore o tla dula a go rata ebile a ka se tsoge a go lahlile.

10-11. Jehofa o nyaka o lebelela topollo bjang? (Bagalatia 2:20)

¹⁰ Naganišiša ka topollo. Jehofa o file batho mpho e bohlokwa kudu ka gore a romele Jesu Kriste gore a tle a ba hwele. (Joh. 3:16) Na Jehofa o rometše Morwa wa gagwe gore le wena a go hwele? Ee! Nagana ka mohlala wa moapostola Paulo. Gopola gore pele e eba Mokriste, o be a dirile dibe tše dikgolo ebile o be a swanetše go tšwela pele a lwantšhana le mafokodi a gagwe. (Baroma 7:​24, 25; 1 Tim. 1:​12-14) Eupša o ile a bona gore Jehofa o mo file mpho ya topollo. (Bala Bagalatia 2:20.) Gopola gore Jehofa o dirile gore Paulo a ngwale mantšu ao ka Beibeleng. Dilo ka moka tšeo di ngwadilwego ka Beibeleng di ngwaletšwe go ruta rena. (Baroma 15:4) Mantšu a Paulo a bontšha gore Jehofa o nyaka gore o lebelele topollo e le mpho yeo a go filego yona. Ge e ba o lebelela topollo e le mpho yeo Jehofa a go filego yona, o tlo kgodišega gore o a go rata.

¹¹ Re leboga Jehofa ka ge a ile a romela Jesu mo lefaseng gore a tle a re hwele. Lebaka le lengwe leo Jesu a bego a tlile mo lefaseng e be e le go tlo botša batho nnete ka Modimo. (Joh. 18:37) E nngwe ya dinnete tšeo e be e le go botša batho kamoo Jehofa a ratago bana ba gagwe ka gona.

JESU O RE THUŠA BJANG GO KGODIŠEGA GORE JEHOFA O A RE RATA?

12. Ke ka baka la’ng re ka tshepa seo Jesu a se boletšego ka Jehofa?

¹² Ge Jesu a be a le mo lefaseng, o be a thabela go botša batho gore Jehofa ke Modimo wa mohuta mang. (Luka 10:22) Re na le mabaka a mantši ao a dirago gore re tshepe seo Jesu a se boletšego ka Jehofa. Ka gobane pele Jesu a e tla lefaseng, o phetše legodimong le tatagwe ka nako e telele go feta sebopiwa le ge e le sefe. (Bakol. 1:15) Jesu o be a tseba gore Jehofa o mo rata kudu, ebile o bone le kamoo Jehofa a bontšhitšego barwa le barwedi ba gagwe bao ba botegago gore o a ba rata. Jesu o thuša bjang ba bangwe gore ba kgodišege gore Jehofa o a ba rata?

13. Jesu o nyaka re lebelela Jehofa bjang?

¹³ Jesu o nyaka re lebelela Jehofa ka tsela yeo a mo lebelelago ka yona. Ka Diebangeding, Jesu o bitša Jehofa gore “Tate” ka makga a fetago a 160. Le gona, ge a bolela le balatedi ba gagwe o šomišitše dipolelwana tše bjalo ka “Tatago lena” goba “Tatago lena wa legodimong”. (Mat. 5:16; 6:26) Pele ga ge Jesu a ka tla mo lefaseng, bahlanka ba Jehofa bao ba botegago ba be ba bitša Jehofa ba re ‘Ramatlaohle,’ ‘yo Godimodimo,’ ‘Mmopi yo Mogolo’ ebile ba mmitša le ka direto tše dingwe tšeo di nyakilego go swana le tše. Eupša gantši Jesu o be a bitša Jehofa gore ke ‘Tatago’ rena. Polelwana yeo e bontšha gore Jehofa o nyaka gore bahlanka ba gagwe ba ikwe ba le kgauswi kudu le Yena go swana le ge ngwana a le kgauswi le tatagwe yo a mo ratago. A re boneng mehlala e mebedi yeo ka yona Jesu a dirišitšego lentšu “Tate.”

14. Jesu o bontšhitše bjang gore yo mongwe le yo mongwe wa rena o bohlokwa go Jehofa? (Mateo 10:​29-31) (Bona le seswantšho.)

¹⁴ Sa pele a re kweng mantšu ao Jesu a a boletšego go Mateo 10:​29-31 (Bala.) Dithaga ke dinonyana tše dinyenyane tšeo di ka se tsogego di ratile Jehofa goba tša mo hlankela. Eupša ka ge Tatago rena a di tšeela godimo o a tseba ge e nngwe le e nngwe ya tšona e wela fase. Ge e ba Jehofa a tšeela godimo nonyana ye e nyenyane, gona re ka kgodišega gore o na le taba le yo mongwe le yo mongwe wa rena, ka ge re mo rata ebile re mo hlankela! Jesu o boletše gape gore Tatago lena wa magodimong o a tseba gore yo mongwe le mongwe wa rena o na le meriri e mekae hlogong ya gagwe. Ka ge Jehofa a tseba le dilo tše dinyenyane ka rena, re ka kgodišega gore o tloga a na le taba le rena. Go molaleng gore Jesu o nyaka gore re kgodišege gore yo mongwe le yo mongwe wa rena, o bohlokwa go Tatago rena wa magodimong.

15. Mantšu a Jesu ao re a hwetšago go Johane 6:44 a go botša eng ka Tatago wa legodimong?

¹⁵ A re bone mohlala wa bobedi woo Jesu a ilego a diriša lentšu “Tate.” (Bala Johane 6:44.) Tatago wa legodimong o go gogetše go yena gore o tle o mo tsebe le go mo rata. Ke ka baka la’ng a go gogetše go yena? Ka gobane o bone gore pelo ya gago e sekametše go lokeng. (Dit. 13:48) Mohlomongwe ge Jesu a be a bolela mantšu ao a lego go Johane 6:​44, o be a bolela mantšu ao a boletšwego ke Jehofa, ao a hwetšagalago go Jeremia 31:3 ao a rego: ‘Ke go bontšhitše lerato le le botegago gomme ka go gogela go nna.’ (Jer. 31:3; mongwalo wa tlase. Bapiša le Hos. 11:4) Seo se ra gore’ng? Tatago rena wa legodimong o dula a bona dilo tše dibotse go wena, tšeo wena o ka se kgonego go di bona.

16. (a) Ke eng seo Jesu a bego a leka go re botša sona, gona ke ka baka la eng re swanetše go mo tshepa? (b) O ka thušwa ke eng go kgodišega gore Jehofa ke Tate yo mokaone? (Bona lepokisi leo le rego, “Tate yo ka Moka ga Rena re mo Nyakago.”)

¹⁶ Ge Jesu a be a hlalosa gore Jehofa ke tatago rena, ge e le gabotse o be a leka go re botša gore: “Jehofa ga se Tate wa ka feela eupša le lena ke Tatago lena. Bjale, kgodišegang gore o rata yo mongwe le yo mongwe wa lena ebile o tloga a na le taba le lena.” Ka gona, ge e ba ka dinako tše dingwe o fela o sa tshepe gore Jehofa o a go rata, emanyana gomme o ipotšiše gore, ‘Na ga se ka swanela go tshepa seo se boletšwego ke Morwa yo a tsebago Tatagwe gabotse, le yoo a dulago a bolela nnete?’—1 Pet. 2:22.

ŠOMA KA THATA GORE O KGODIŠEGE GORE JEHOFA O A GO RATA

17. Ke ka baka la’ng re swanetše go dira sohle seo re ka se kgonago gore re dule re kgodišega gore Jehofa o a re rata?

¹⁷ Re swanetše go dira sohle seo re ka se kgonago go kgodišega gore Jehofa o a re rata. Re ithutile gore lenaba la rena la moradia e lego Sathane le ka se hwe matwa, o dira sohle seo a ka se kgonago gore re tlogele go hlankela Jehofa. O nyaka go re nyamiša ebile o tlo tšwela pela a dira sohle seo a ka se kgonago gore re bone okare gore Jehofa ga a re rate. Ga se ra swanela go dumelela Sathane a atlega.—Jobo 27:5.

18. O ka dira eng gore o dule o kgodišegile gore Jehofa o a go rata?

¹⁸ E le gore o dule o kgodišegile gore Jehofa o a go rata, dula o rapela gore a go thuše go itebelela ka tsela yeo a go lebelelago ka yona. Naganišiša kamoo ditemana tša Beibele di hlalositšego kamoo Jehofa a nago le taba le batho bao mo ratago. Dula o gopola gore Jehofa a ka se tsoge a tlogetše go rata bao ba mo ratago. Naganišiša gore ke ka baka la’ng o swanetše go lebelela topollo e le mpho yeo Modimo a go filego yona. O be o tshepe mantšu ao Jesu a a boletšego ge a go kgonthišetša gore Jehofa ke Tatago wa legodimong. Bjale ge yo mongwe a go botšiša gore, “Na o kgodišegile gore Jehofa o a go rata?” o tlo mo araba o sa dikadike wa re, “Ee o a nthata. Ebile ke dula ke dira sohle seo nka se kgonago go mmontšha gore ke a mo rata!”