Jehofa ke Yena a ‘Dirago Gore re Thabe Kudu’

1-2. (a) Batho ba bantši ba ikwa bjang lehono? (b) Re tlo ithuta eng sehlogong se?

BATHO ba bantši lehono ba leka go dira dilo tše dintši gore ba thabe. Eupša go no pala. Batho ba bantši ba ikwa ba se na mohola ebile ba dula ba nyamile. Bahlanka ba Modimo le bona ba ka ikwa ka tsela yeo. Ka ge re phela “mehleng ya bofelo,” re letetše gore re hlakane le maemo ao a ka dirago gore go be ‘thata go lebeletšana le wona.’—2 Tim. 3:1.

² Sehlogong se, re tlo bolela ka dilo tšeo di ka dirago gore re se sa thaba le go bona gore re ka dira eng gore re boele re thabe. Pele re ka tsena ditabeng, a re boneng gore ke Mang a ka re thušago gore re thabe e le ka nnete.

KE MANG A KA RE THUŠAGO GORE RE THABE

3. Dilo tšeo Jehofa a di bopilego di re ruta eng ka yena? (Bona le diswantšho.)

³ Jehofa o dula a thabile. O nyaka gore le rena re thabe. Ke ka baka leo a bopilego dilo tše dintši, tšeo di dirago gore thabe. Ka mohlala, re thaba kudu ge re bona gore polanete ya rena e na le mebala e mentši e mebotse yeo e kgahlišago, le ge re bona diphoofolo di raloka ebile re thabela go ipshina ka dijo tše dintši tše di fapafapanego. Dilo tše ka moka di bontšha gore Jehofa o a re rata ebile o nyaka gore re thabele bophelo.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ke eng seo se dirago gore Jehofa a dule a thabile le ge a bona batho ba tlaišega mo lefaseng? (b) Jehofa o re file mpho efe? (Psalme 16:11)

⁴ Lege Jehofa e le “Modimo yo a thabilego” o kgona go bona dilo tšeo di re tshwenyago le go re kweša bohloko. (1 Tim. 1:11) Ga a dumelele dilo ka moka tšeo a di bonago di dira gore a se sa thaba. O a tseba gore dilo tšeo di re tlaišago ke tša nakwana ebile o tlo di fediša e se kgale. O letetše letšatši leo a le beilego gore a tle a fediše mathata ka moka ao re kopanago le ona. Ka ge Jehofa a sa letile o a tseba gore re ikwa bjang ebile o nyaka go re thuša. O re thuša bjang? Ka mohlala Jehofa ke yena a re filego mpho ya gore re thabe. (Bala Psalme 16:11.) Mpho yeo, o ile a e fa le morwa wa gagwe Jesu.

5-6. Ke ka baka la eng Jesu a dula a thabile?

⁵ Jesu ke motho yo a thabilego kudu yo Jehofa a ilego a mmopa. Ka baka la’ng? A re kweng mabaka a mabedi. (1) “ Ke yena seswantšho sa Modimo yo a sa bonagalego” ebile o ekiša dika ka moka tšeo Tatagwe a nago le tšona. (Bakol. 1:15; 1 Tim. 6:15.) (2) Jesu o feditše nako e ntši a na le Tatagwe, yo a thabilego kudu.

⁶ Jesu o dula a thabišwa ke go dira dilo ka moka tšeo Tatagwe a mmotšago gore a di dire. (Die. 8:​30, 31; Joh. 8:29) Ka ge a ile a dula a botega, Jehofa o a mo amogela ebile o ikgantšha ka yena.—Mat. 3:17.

7. Ke eng seo se ka dirago gore re thabe?

⁷ Le rena re ka thaba kudu ge re ka dula re e ba le segwera se se tiilego le Jehofa Modimo yo a thabilego. Ge re fetša nako e ntši re ithuta ka Jehofa le go leka go mo ekiša re tlo thaba kudu. Re tlo thaba kudu ge re ka dira seo Jehofa a re kgopelago gore re se dire ka ge re tseba gore o a re amogela ebile o ikgantšha ka rena.a (Ps. 33:12) Eupša re ka reng ge e ba re fela re sa thabe goba re nyama? Na seo se ra gore Modimo ga a re amogele? Aowa! Jehofa o a kwešiša gore ga se ra phethagala ebile ka dinako tše dingwe re kwa bohloko, ra nyama le go gateletšega kudu monaganong. (Ps. 103:14) A re boleleng ka dilo tšeo di ka re tšeelago lethabo le go bona gore re ka dira eng gore re boele re thabe.

O SE KE WA DUMELELA SELO LE GE E LE SEFE SE DIRA GORE O SE SA THABA

8. Mathata a bophelo a ka dira gore re ikwe bjang?

⁸ Selo sa pele seo se ka dirago gore re se sa thaba: Mathata a bophelo. Na o lebeletšana le mathata a go swana le go tlaišwa, dikotsi tša tlhago, bodiidi, bolwetši goba botšofadi? Go ka no ba bonolo gore re se sa thaba ka baka la mathata a go swana le a, kudukudu ao re sa kgonego go a laola. Beibele e re botša gore “ge motho a nyamile a ka gateletšega.” (Die. 15:13) Ngwanabo rena Babis, yo e lego mogolo o re ka nako e nnyane feela buti wa gagwe le batswadi ba gagwe ba ile ba hlokofala, o re: “Ke ile ka ikwa ke le noši ebile ke bona okare ga go na motho yo a tlago go nthuša. Ka dinako tše dingwe, ke be ke ikwa ka nyamile kudu ka gobane ke be ke e na le dilo tše dintši tšeo ke bego ke di dira, moo ke ilego ka palelwa ke go fetša nako e ntši le batswadi ba ka le buti wa ka pele ba hlokofala.” Mathata a bophelo a ka re fetša matla.

9. Ke eng seo se ka re thušago gore re boele re thabe? (Jeremia 29:​4-7, 10)

⁹ Ke eng seo se ka re thušago gore re boele re thabe? Re ka thaba kudu ge re ka tlogela go belaela ka dilo tšeo re ka se kgonego go di fetoša le go leboga dilo tšeo re nago le tšona. Lefase le, le fa batho kgopolo ya gore e le gore ba thabe, dilo di swanetše go dula di sepela gabotse. Eupša seo ga se nnete. Ka mohlala, Jehofa o ile a botša Bajuda bao ba bego ba ile bothopša Babilona gore ba amogele go phela nageng yeo ba bego ba sa e tsebe le go dira sohle seo ba ka se kgonago gore ba thabele bophelo moo. (Bala Jeremia 29:​4-7, 10.) Re ithuta eng mo? Leka go amogela maemo a gago le go leboga dilo tše dibotse tšeo o nago le tšona. Gopola gore Jehofa o tlo dula a go thuša. (Ps. 63:7; 146:5) Kgaetšedi Effie, yo a ilego a ba ka gare ga kotsi gomme a golofala o re: “Ke ile ka hwetša thušo e ntši go tšwa go Jehofa, lapa la ka le ka phuthegong. Ke ile ka bona gore ge nka fela matla, ke tla be ke sa bontšhe gore ke a leboga. Ke be ke nyaka go bontšha gore ke leboga Jehofa le batho ka moka bao ba ilego ba nthuša.”

10. Re ka thušwa ke eng gore re thabe le ge re e na le mathata?

¹⁰ Le ge re na le mathata goba dilo tše mpe di re diragalela goba di diragalela ba gabo rena, re ka thaba.b (Ps. 126:5) Ka baka la eng? Ka gobane seo se dirago gore re thabe ga se maemo a rena. Kgaetšedi Maria, yo e lego mmulamadibogo,o re: “Ge o dula o thabile le ge o na le mathata ga se gore o phaela ka thoko maikwelo a gago. Go e na le moo, se se ra gore ga se wa lebala dilo tšeo Jehofa a re tshepišitšego tšona. Jehofa o tlo re thuša gore re dule re thabile.” Dula o gopola gore le ge go ka ba boima gona bjale, maemo a rena a ka se dule a le bjalo. Re ka swantšha maemo a rena le mehlala ya maoto yeo e lego mo santeng. Ge phefo e foka, mehlala yeo e tlo tloga. E se kgale Jehofa o tlo tloša dilo ka moka tšeo di re kwešago bohloko le go re nyamiša.

11. Mohlala wa moapostola Paulo o re kgothatša bjang?

¹¹ Re ka dira eng ge e ba re thoma go nagana gore Jehofa ga a sa re amogela ka baka la mathata ao re nago le ona? Re ka thušwa ke go nagana ka bahlanka ba Jehofa bao ba botegago, bao ba ilego ba hlakana le mathata. A re kweng ka mohlala wa moapostola Paulo. Moapostola Paulo o ile a kgethwa ke Jesu gore a iše therešo “ditšhabeng gotee le go dikgoši le go bana ba Isiraele.” (Dit. 9:15) Ye ke tokelo e kgolo kudu! Lega go le bjalo, Paulo o be a fela a e ba le mathata. (2 Bakor. 11:​23-27) Na mathata a ka moka ao Paulo a ilego a ba le wona a be a e ra gore Modimo ga a sa mo amogela? Aowa! Go e na le moo, Paulo o ile a kgona go kgotlelela ka gobane Jehofa o be a mo thekga. (Baroma 5:​3-5) Nagana ka boemo bjo. Le wena o tšwela pele o hlankela Jehofa ka go botega le ge o na le mathata. O ka kgodišega gore Jehofa o a go thekga ebile o a go amogela.

12. Go ka direga eng ge re ka palelwa ke go fihlelela dilo tšeo re nyakago go di dira?

¹² Selo sa bobedi seo se ka dirago gore re se sa thaba: Dilo tšeo re palelwago ke go di fihlelela. (Die. 13:12) Ge re rata Jehofa ebile re leboga dilo tšeo a re direlago tšona, re tlo nyaka go dira sohle seo re ka se kgonago go mo hlankela. Ge re ka ipeela dipakane tšeo re palelwago ke go di fihlelela ka baka la maemo a rena, re ka nyama. (Die. 17:22) Mmulamadibogo yo mongwe yo a bitšwago Holly, o re: “Ke be ke nyaka go ya Sekolong sa Baebangedi ba Mmušo, e le gore ke hlankele nageng e nngwe goba go šoma go aga protšekeng ya Ramapo. Eupša maemo a ka a ile a fetoga gomme ka palelwa ke go fihlelela dipakane tšeo ke bego ke ipeetše tšona. Go nyamiša kudu ge e ba o nyaka go dira sohle seo o ka se kgonago go hlankela Jehofa eupša o sa kgone.” Batho ba bantši ba ekwa ka tsela ye.

13. Ge e ba maemo a rena a re palediša go dira dilo tšeo re nyakago go di fihlelela, ke dipakane tša mohuta mang tšeo re ka ipeelago tšona?

¹³ Ke eng seo se ka re thušago gore re boele re thabe? Jehofa a ka se tsoge a nyakile dilo tšeo re ka se kgonego go di dira. Ga a nyake dilo tše dintši go tšwa go rena; ebile ga a re rate ka gobane go na le dilo tšeo re kgonago go mo direla tšona. Jehofa o nyaka gore re ikokobetše le go botega. (Mika 6:8; 1 Bakor. 4:2) O kgahlwa kudu ke seo re lego sona ka gare e sego seo re kgonago go se dira. Na go a kwagala gore re nyake go dira dilo tšeo Jehofa a sa letelago gore re di dire?c Aowa! Ge e ba maemo a gago a go palediša go dira dilo tše di oketšegilego ka mokgatlong wa Jehofa, leka go dira dilo tšeo wena o ka kgonago go di fihlelela. Ka mohlala o ka tlwaetša baswa ka phuthegong goba wa kgothatša bao ba godilego. O ka leka go etela motho yo mongwe, wa mo founela, goba wa mo ngwalela molaetša e le gore o mo kgothatše. Jehofa o a thaba ge a bona re dira dilo tšeo re ka kgonago go di fihlelela ebile o tlo re šegofatša ka go dira gore re thabe. Dula o kgodišegile gore lefaseng le leswa, re tlo kgona go hlankela Jehofa ka ditsela tše di kgahlišago. Holly yo re boletšego ka yena pejana o re: “Ge ke dutše ke nagana ke a tseba gore ke tlo phela ka mo go sa felego. Lefaseng le leswa, Jehofa o tlo nthuša gore ke fihlelele tše dingwe tša dipakane tšeo ke ipeetšego tšona.”

14. Ke eng se sengwe seo se ka dirago gore re se sa thaba?

¹⁴ Selo sa boraro seo se ka dirago gore re se sa thaba: Go ithabiša kudu. Ba bangwe ba diriša social media go dira gore batho ba nagane gore e le gore ba thabe ba swanetše go ipshina le go ithabiša kudu. Batho ba bangwe ba nagana gore re ka thaba kudu ge re ka dira dilo tša go swana le go yo reka, go etela dinaga tše dingwe goba go dira dilo tšeo rena re di ratago. Ga se phošo go dira tšeo le go di thabela. Jehofa o re bopile ka tsela yeo e dirago gore re kgone go thabela dilo tše dibotse. Eupša batho ba bangwe ba lemogile gore dilo tšeo ba bego ba nagana gore di ka ba thabiša ge e le gabotse ke tšona di dirago gore ba se ke ba thaba. Kgaetšedi Eva, yo e lego mmulamadibogo, o re: “Ge e ba o phelela go dira dilo tšeo di thabišago wena feela o ka se tsoge o thabile.” Ge e ba re dulela go ithabiša kudu re tlo nyama ebile ra ikwa okare ga re na mohola.

15. Re ka ithuta eng go Kgoši Solomone?

¹⁵ Go na le dilo tše dintši tšeo re ka ithutago tšona go Kgoši Solomone mabapi le dilo tše mpe tšeo di ilego tša mo diragalela ka baka la go ithabiša kudu. O ile a leka go thaba ka go ikgotsofatša ka dilo tša go swana le dijo tše bose, mmino o mo bose le go reka dilo tše dintši tšeo a ka bego a ile a kgona go di reka. Le ge a ile a dira dilo tše ka moka o ile a se kgotsofale. O itše: “Leihlo ga le kgotsofatšwe ke go bona, le tsebe ga e kgotsofatšwe ke go kwa.” (Mmo. 1:8; 2:​1-11) Batho ba bangwe ba nagana gore ba ka thaba e le ka nnete ge e ba ba e na le tšhelete, eupša seo ke maaka a matala. Dilo tše di ka se tsoge di dirile gore re hwetše lethabo la nnete.

16. Ke ka baka la eng re ka thaba ge re ka thuša batho ba bangwe? (Bona le diswantšho.)

¹⁶ Ke eng seo se ka dirago gore re boele re thabe? Jesu o ile a ruta gore “Go na le lethabo le legolo go neeng go feta go amogeleng.” (Dit. 20:35) Ngwanabo rena Alekos yo a hlankelago e le mogolo o re: “Ke leka go thuša batho ka dilo tše dinyenyane tšeo nka di kgonago. Ge ke dulela go thuša batho ba bangwe, ga ke nagane kudu ka nna ebile ke a thaba.” Ke dilo dife tšeo o ka di direlago ba bangwe? Ge e ba o ka bona motho yo mongwe a nyamile, mo kgothatše. O ka no se rarolle mathata a gagwe, eupša o ka bontšha gore o mo kwela bohloko ka go mo theetša le go mo gopotša gore a lahlele maima a gagwe go Jehofa. (Ps. 55:22; 68:19) O ka mo gopotša gore Jehofa a ka se tsoge a tlogetše bao ba mmotegelago. (Ps. 37:28; Jes. 59:1) Ebile o ka dira se sengwe go mo thuša, go swana le go mo apeela dijo goba go tšwa le sepele mmogo. Mo meme gore a ye le wena tšhemong mohlomongwe e ka mo dira gore a ikwe a le kaone. Dumelela gore Jehofa a go šomiše. Ge e ba re ka thuša batho ba bangwe re tlo thaba kudu!—Die. 11:25.

17. Ge e ba re nyaka go thaba e le ka nnete re ka dira eng? (Psalme 43:4)

¹⁷ Re ka thaba e le ka nnete ge e ba re tšwela pele re tiiša segwera sa rena le Tatago rena wa legodimong. Beibele e re kgodiša gore Jehofa o dira gore re “thabe kudu.” (Bala Psalme 43:4.) Le ge re ka kopana le mathata a mantši, ga se ra swanela go tšhoga. Ge re ka dula re e na le segwera se se tiilego le Jehofa, re tlo dula re thabile!—Ps. 144:15.