Lefase le le se Nago Bohloko le Kgaufsi!

NA LEFASE le le se nago bohloko le tla tla ka pejana? Ditaba tše e tla ba tše di thabišago gakaakang go bao ba hlokofatšwago ke bokoka​—go sa šetšwe gore bohloko bja bona ke bja mmele, monagano goba maikwelo! Ka mohlala, ba dimilione ba tla thaba kudu ge go tlošwa bohloko bjo bogolo bja mmele bjo bo bakwago ke mehuta e mengwe ya dikankere, mahlaba a go thebetha ga digoba tše itšego, kudu-kudu tša sefahlego, molala goba magetla le bohloko bja pelo bjo bo bakwago ke kgateletšego yeo e bakwago ke go se be le madi a lekanego pelong. Bao ba tlaišwago ke mathata a šoro a monagano ba tla thabela kimollo mahlokong ao gantši a sa hlalosegego. Le gona, dimilione tše dingwe tše dintši tša batho di be di tla thaba ge feela bohloko bja tšona bja maikwelo bjo bo bakwago ke letšhogo, manyami, go ikwa ba le molato, go belaela le kgakanego a be a ka fela. Eupja na re tloga re nyaka go bona bofelo bja mahloko ohle?

Mokgola-ditho Allan Basbaum wa Yunibesithi ya California kua San Francisco o re: “Go se kwe bohloko le gatee go kotsi.” O ile a bolela taba ye a e-na le lebaka le lebotse. E le temošo e phafošago, bohloko bo re thuša go tseba gore go direga selo se kotsi.

Go se kgone go kwa bohloko bja mmele go ka ba kotsi e le ka kgonthe. Se se bontšhwa ke pego ya makasine wa Time: “Go nywanywa mo go kgahlišago ga mošemane wa nywaga e lesome-pedi go fapane le ponagalo ya gagwe e šokišago. Matsogo le maoto a gagwe a golofetše e bile a kobegile, bjalo ka ge e ka o be a swerwe ke bolwetši bja marapo (rickets). Ga a na menwana e mengwe. O na le ntho e kgolo e bulegilego khurung e nngwe gomme melomo ya gagwe ye e myemyelago e retetše. O lebelela lefase ka moka bjalo ka ngwana yo a bethilwego . . . O ile a belegwa ka bogole bjo bo tlogago bo sa tlwaelega bja leabela bjo bo mo dirago gore a se ke a kwa bohloko. Menwana ya gagwe e ile ya gobala goba ya fsa ka gobane o be a sa tloše seatla sa gagwe dilong tše fišago goba tše kotsi. Marapo le malokollo a gagwe a bopegile gampe ka gobane o ile a a kibakibiša ka matla ge a be a sepela goba a kitima. Khuru ya gagwe e tšwa boladu ka baka la go abula godimo ga dilo tše bogale tšeo a bego a sa kgone go di kwa. Ge a ka robega lerapo goba a phetlega noka, a ka se kwe bohloko gomme a lla gore a thušwe.”

Batho ba bangwe ba akgofela go bolela gore Modimo o ikarabelela bakeng sa ditlaišo tše di bjalo le bakeng sa

manyami ao batho ba dimilione ba lego go wona. Lega go le bjalo, na re ka bea Modimo molato ka tshwanelo bakeng sa mahloko a šiišago a batho?

Na Molato ke wa Modimo?

Ka nywaga e 6 000 go fihla bjale, batho ba bile bokgobeng bja bohloko bja mmele, bja monagano le bja maikwelo. Ge e le gabotse, mo e ka bago makgolo a nywaga a 19 a fetilego, moapostola wa Mokriste Paulo o ile a bolela ka mo go nepagetšego gore: “Dibopya ka moka le tšôna di sa fêxêlwa, le tšona di sa šokwa.” (Ba-Roma 8:​22) Go sa šetšwe dibolaya-mahlaba tše dintši tšeo di hwetšwago mabenkeleng a diokobatši le maiteko a dingaka le dingaka tša monagano, bokgoba bjo bo apareditšego bja mahloko a mehuta ka moka bo tšwela pele. Ba bangwe ba ile ba ba ba roga Modimo ka baka la mahloko a bona, go etša ge mosadi wa monna yo a bitšwago Jobo a ile a mo kgothaletša go dira bjalo nywaga-kgolong e mentši e fetilego! Lega go le bjalo, bjalo ka ge Jobo ka noši a ile a lemoga, moya o bjalo ke wa bošilo le o sa swanelago.​—Jobo 2:9, 10.

Ga se tshwanelo go bea Modimo molato ka bokgoba bja bohloko bjoo batho gona bjale ba lego go bjona. Go e-na le moo molato ke wa moaketši yo a sa bonagalego gotee le batswadi ba rena ba pele. Se se bjalo bjang?

Mangwalo a bontšha gore gaešita lege mathomong se be se lokile, fela sebopiwa se sengwe sa moya se ile sa thoma go kganyoga matla le bogolo. Mathomong a bophelo bja motho mo lefaseng, se ile sa bonela pele moloko wa batho mo lefaseng la paradeisi, ka moka ba ineetše ka mo go feletšego go Modimo Ra-matla-ohle, Jehofa. Se hlohleletšwa ke pelo yeo e bego e šetše e thomile go ba le bonokwane, sebopiwa se sa moya se ile sa fetogela Mmopi ka go nyaka gore borapedi le boineelo bja batho bo lebišwe go sona. Maikemišetšo a sona a kgopo a ile a iponagatša ge se bolela maaka ka boradia. Se ka morago se ile sa tliša sebe lefaseng.

Jehofa Modimo o ile a botša monna wa pele, Adama, gore go ja seenywa sa sehlare sa go tseba botse le bobe go be go tla feleletša ka lehu. (Genesi 2:​15-17) Eupja mosadi wa Adama, e lego Efa, o ile a hlohleletšwa gore a se kwe. Senokwane sa moya ka go šomiša noga e le mmoleledi, se ile sa mmotša gore: “Le ka se kê la hwa lehu. Xe e le Modimo, yêna ó tseba xore mohla Lè se jaxo mahlô a lena [a Efa le monna wa gagwe] a tlo buduloxa [bobedi bja lena] la ba byalo ka Modimo, la tseba botse le bobe.” (Genesi 3:​1-5) Ao e be e le maaka a mathomo gomme a swaile sebopiwa se sa moya e le ‘rrago maaka.’ (Johane 8:​44) Go diriša ga sona noga lebakeng leo ka tšhemong ya Edene go bapa gabotse le go hlaolwa ga sona ka Mangwalong e le “Noxa e kxoló . . . yona yeo ba rexo ké Diabolo le Sathane.”​—Kutollo 12:9.

Sebe se tlišitše dillo le bokgoba bja bohloko godimo ga batho. Ka go ya kamoo lentšu la Modimo le boletšego ka gona, letšatšing lona leo Adama a dirilego sebe ka lona, Modimo o ile a bolela kahlolo ya lehu go badiradibe. Go ya ka kahlolo, go tšwa ponong ya Jehofa ya dilo, Adama le Efa ba hwile ka lona letšatši leo. (Bapiša le Luka 20:​37, 38.) Kua Edene, Jehofa o ile a botša mosadi wa pele yoo ka nako yeo a bego a e-na le sebe gore: “Ke tlo Xo atišetša kudu tapišêxo xo imeng xa xaxo, O tlo bêlêxa bana ka bohloko.” (Genesi 3:​16) Adama o be a tla phela bophelo bjo bohloko ka ntle ga tšhemo ya Edene lefaseng leo le lego kgole le boemo bja paradeise. Jehofa o itše: “Boxobe O tlo bo ja ka dikudumêla tša sefahloxô sa xaxo; wa bá wa boela mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:​17-19) Bokgoba bja bohloko bo ile bja thoma ka tsela yeo go morafo wa batho.

Ka gona, bokgoba bja bohloko bo kgokaganywa le go se phethagale, sebe gotee le lehu tšeo di abetšwego go Adama. Bjalo ka ge moapostola Paulo a bea ditaba: “Ké xôna, byalo ka xe sebe sè tsene lefaseng ka motho o tee, ’me lehu la tsêna ka sebe, lehu le apareditše batho bohle ka xe ba dirile dibe bohle.” (Ba-Roma 5:​12) Eupja Lentšu la Modimo le re thuša go kgotlelela bohloko ka gobane le re botša lebaka leo ka lona Jehofa a bo dumeletšego gomme le re holofetša gore go se go ye kae bo tla fela. Modimo o dumeletše ‘rrago maaka’ yo e lego noga, Sathane Diabolo, go tlaiša Jobo yo a lokilego gomme ka mokgwa woo a leka potego ya gagwe. Pelaelo ya Diabolo e be e le ya gore Jobo o be a direla Modimo ka baka la boithati, e sego lerato. (Jobo 1:​8-12) Eupja Jobo o ile a dula a botega go Modimo a hlatsela gore batho ba ba sa phethagalago ba ka Mo direla ka baka la lerato gomme ba ka thekga ka go botega bogoši bja Gagwe go sa šetšwe diteko tše šoro tša go leka tumelo ya bona. Kgotlelelo ya Jobo e le mmotegi e ile ya tlaleletša tabeng ya go kgethagatšwa ga Leina la Jehofa, gomme ya bontšha gore Sathane ke moaketši, gomme ya tliša meputso e humilego go mopatriareka yo yo e lego mohlala. (Jobo 42:​12-17; Jakobo 5:​11) Go tšwa phihlelong ya Jobo, re ka phetha ka gore ge merero ya Modimo e phethegile, go ba ga batho makgoba a bohloko go tla fela. Eupja re ka kgodišega bjang ka seo?

Kamoo Bohloko bo tla Felago ka Gona

Ge e le gabotse, Jehofa o neile mokgwa o šomago ka mo go feleletšego bakeng sa go fedišwa ga bokgoba bja batho bohlokong. Se o se dirile motheong wa sehlabelo sa topollo sa Morwa wa gagwe, Jesu Kriste. Jesu ke “Kwana ya Modimo e rwelexo sebe sa lefase.” (Johane 1:​29) O tlile lefaseng, ‘a sa tla go direlwa, a tlile go direla, le go neela bophelo bja gagwe [bophelo bja gagwe bjo bo phethagetšego bja motho] gore e be topollo ya ba bantši.’ (Mateo 20:​28) Ka baka la go se kwe, Adama o ile a lahlegelwa ke bophelo bjo bo phethagetšego bja motho gotee le ditshwanelo tša bjona ka moka le ditebelelo. Seo ke sona seo se lopollwago ka sehlabelo sa Jesu sa topollo. (1 Timotheo 2:​5, 6; Ba-Hebere 7:​26) Ka kgonthe, “Modimo ó ratile lefase [la batho] xakaakaa, a bà a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.”​—Johane 3:16.

Le gona, Modimo o ile a holofetša ka go lebanya gore bokgoba bja bohloko bo tla fela. Ge a bolelela pele nakong yeo ka yona bohloko bjoo bo tswalanago le sebe di ka se sa hlwago di e-ba gona, moapostola wa Mokriste Paulo o ile a budulelwa ke Modimo gore a ngwale gore:

“Ka bôna lexodimo le lefsa le lefase le lefsa. Xobane lexodimo la pele le be le tloxile, le lôna lefase la pele. Le lewatle xa le sa le xôna. . . . Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yena mong Modimo ó tlo ba le bôná è le Modimo wa bôná. ’Me Yena Modimo ò tlo phumola mexôkxô ka moka mahlong a bôná; le lehu le ka se hlwe le e-ba xôna; le xe e le manyami le dillô le bohloko, di ka se hlwê di e-ba xôna, xobane tša pele di fetile. E a dutšexo sedulong sa boxoši a re: Šidio; dilô tšohle ke di dira tše mphsa​—Nna a ntaêla a re: Ngwala, xobane ’taba tšé ké tša xo rereša le xo bôtêxa.”​—Kutollo 21:​1-5.

Batho ba kwago, ka pejana ba tla amogela mohola o tletšego wa sehlabelo sa topollo sa Jesu. Se se tla direga ka tlase ga pušo ya Mmušo wo e lego kgale baloki ba o rapelela ba re: “Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:​9, 10) Mmušong wa legodimo, Jesu Kriste o tla buša go fihlela ge a beile manaba a gagwe ka tlase ga maoto a gagwe, go akaretša le bokgoba bja bohloko le lenaba la bofelo, e lego lehu.​—1 Ba-Korinthe 15:​25, 26.

Ee, ge e le ka batho ba ba kwago, ka pejana Modimo ‘o tla phumola megokgo ka moka, le lehu le ka se hlwe le e-ba gona, le ge e le manyami le dillo le bohloko, di ka se hlwe di e ba gona.’ (Kutollo 21:4) Ka morago, mantšu a latelago a boporofeta ao mo nakong ye a dirišwago ka tsela ya moya a tla phethagala e le ka kgonthe: ‘Moya wa-ka, reta Morena! . . . Yena yo a go lebalelago melato ya gago yohle; a go fodišago malwetši a gago ka moka.’ “Mo xo ba ba axilexo fá xo ka se bê le e a rexo: ke a babja!”​—Psalme 103:​1-3; Jesaya 33:24.

Bohloko bo tla Fela Neng?

Bofelo bja bokgoba bja bohloko bo kgaufsi. Ee, bo tla direga mehleng ya rena gomme wona moloko wo o tla bona seo se direga. Go phethagala ga boporofeta bja Beibele go bontšha gore re phela bofelong bja tshepedišo ye e mpe ya dilo. Dintwa tše šoro ka go fetišiša, ditlala le ditšhišinyego gotee le go bolelwa ga ditaba tše di lokilego lefaseng ka bophara ke Dihlatse tša Jehofa, ke karolo ya ‘pontšho’ e bopaganego ya ‘go ba gona’ mo go sa bonagalego ga Jesu letagong la Mmušo wa legodimo.​—Mateo 24:​3-14, 21, 34.

Ka pejana “lexodimo la pele le lefase la pele,” e lego tshepedišo e rulagantšwego ya dilo ya Sathane Diabolo gotee le sebopego sa yona sa mmušo, di tla feta. “Lewatlê” le le bilokanago la batho ba babe le ka se sa ba gona. Ka gona, re eme mollwaneng wa mmušo wa “lexodimo le lefsa” woo o šegofaditšwego ke Modimo godimo ga “lefase le lefsa,” e lego lekoko la batho ba ba lokilego. Go tšona ‘go tla aga toko.’​—Kutollo 21:1; 2 Petro 3:13.

Ka ge ditšhegofatšo tše di bjalo ka tlase ga mmušo o mofsa​—Mmušo wa Modimo—​di le kgaufsi gakaalo, tiang matla. Tsomang tsebo e oketšegilego ka lefase le lefsa le le se nago bohloko le lehu. Ruri, fagahlelang letšatši leo le lego kgaufsi kudu, leo ka lona bohle ba ba ratago le go kwa Jehofa Modimo ba tlago go phela lefaseng le le se nago bohloko.

Bokgoba bja bohloko bja mmele, monagano le maikwelo bo ka se sa ba gona lefaseng le lefsa leo mo nakong ye le lego kgaufsi