THUTO 50
O ka Dira Eng Gore le Dule le Thabile ka Lapeng la Gago?—Karolo 2
Bana ke mpho yeo e tšwago go Jehofa. Jehofa o nyaka gore batswadi ba hlokomele mpho yeo. O file batswadi keletšo e botse yeo e ka ba thušago gore ba kgone go hlokomela bana ba bona. Keletšo yeo e ka thuša le bana gore ba tsebe gore ba ka dira eng gore ka lapeng ba dule ba thabile.
1. Jehofa o nea batswadi keletšo efe?
Jehofa o nyaka gore batswadi ba rate bana ba bona, e bile ba fetše nako e ntši ba na le bona. Le gona o nyaka gore ba šireletše bana ba bona go dilo tšeo di ka ba gobatšago, e bile ba diriše melao ya motheo ya Beibele go ba ruta. (Diema 1:8) Le gona Jehofa o botša botate gore ba ‘tšwele pele ba godiša bana ba bona ka tayo le temošo ya gagwe.’ (Bala Baefeso 6:4.) Ka gona, Jehofa o a thaba ge a bona batswadi ba diriša keletšo ye ge ba godiša bana ba bona, e bile ba sa fe motho yo mongwe boikarabelo bja gore a ba godišetše bana.
2. Jehofa o nea bana keletšo efe?
Jehofa o botša bana gore: “Kwang batswadi ba lena.” (Bala Bakolose 3:20.) Ge bana ba hlompha batswadi ba bona le go ba kwa, ba thabiša Jehofa le batswadi ba bona. (Diema 23:22-25) Jesu o beile mohlala o mobotse tabeng ye ge e be e sa le ngwana. Le ge a be a se na sebe, o be a dula a ekwa batswadi ba gagwe le go ba hlompha.—Luka 2:51, 52.
3. O ka dira eng gore wena le lapa la gago le dule le na le segwera se sebotse le Jehofa?
Ge e ba o le motswadi, re a tseba gore o nyaka gore bana ba gago ba rate Jehofa go no swana le wena. Bjale o ka dira’ng gore bana ba gago le bona ba rate Jehofa? O ka dira se ka go kwa seo Beibele e se bolelago ge e re: ‘O nweletše mantšu a Jehofa ngwaneng wa gago, o bolele ka ona ge o dutše ntlong ya gago, ge o sepela tseleng, ge o robala le ge o tsoga.’ (Doiteronomio 6:7) Go “nweletša” go ra gore o swanetše go ruta ngwana wa gago selo setee gantšintši. Mohlomongwe le wena o a tseba gore gantši ge o ruta ngwana wa gago selo se itšego, o swanelwa ke go se bušeletša gantšinyana gore a dule a se gopola. Ka gona, lengwalo le le ra gore o swanetše go dula o ipha nako ya go bolela le bana ba gago ka Jehofa. Le ka dira gabotse ge le ka beela nako ka thoko beke e nngwe le e nngwe gore le kgone go ithuta ka Jehofa le le lapa. Ge e ba o se na bana, le wena o ka holega ge o ka ipeela nako ya go ithuta Beibele beke e nngwe le e nngwe.
ITHUTE KA MO GO TSENELETŠEGO
Ekwa gore o ka dira eng gore wena le lapa la gago le ikwe le šireletšegile e bile le thabile.
4. Ge o ruta bana ba gago ba bontšhe lerato
Go ruta bana ga go bonolo. Beibele e ka go thuša bjang gore o kgone go ba ruta? Balang Jakobo 1:19, 20, gomme le boledišaneng ka dipotšišo tše di latelago:
Batswadi ba ka bontšha bjang gore ba rata bana ba bona ge ba bolela le bona?
Ke ka baka la’ng motswadi a sa swanela go laya ngwana wa gagwe a kwatile?a
5. Šireletša bana ba gago
Ge o nyaka go šireletša bana ba gago, go bohlokwa gore o bolele le yo mongwe le yo mongwe wa bona ka tša thobalano. Eupša go dira bjalo go ka no se be bonolo. Bapalang BIDIO ye, gomme le boledišaneng ka dipotšišo tše di latelago:
Ke ka baka la’ng go se bonolo go batswadi ba bangwe gore ba bolele le bana ba bona ka tša thobalano?
Batswadi ba bangwe ba ile ba diriša mekgwa efe gore ba hlalosetše bana ba bona ka thobalano?
Ka ge Beibele e boletše e sa le pele, lefase le la Sathane le senyega le go feta. Balang 2 Timotheo 3:1, 13, gomme le boledišaneng ka potšišo e latelago:
Batho ba bangwe ba babe bao go bolelwago ka bona mo go temana 13, ba tlaiša bana ka tša thobalano. Bjale ke ka baka la’ng go le bohlokwa gore batswadi ba rute bana ba bona ka tša thobalano, le go ba ruta gore ba swanetše go itšhireletša bjang go batho bao?
Na o be o tseba?
Dihlatse tša Jehofa di dira dikgatišo le dibidio tše dintši tšeo di ka thušago batswadi gore ba kgone go ruta bana ba bona ka tša thobalano, le go ba šireletša gore ba se ke ba tlaišwa. Ka mohlala, bona bidio yeo e rego:
Bala puku e rego, Ithute go Morutiši yo Mogolo, kgaolo 10 le 32
Bala sehlogo seo se rego, “Go Ruta Ngwana wa Gago ka tša Thobalano” go Phafoga! No. 5 2016
6. Hlompha batswadi ba gago
Bana le bafsa ba ka bontšha batswadi ba bona gore ba ba hlompha ka tsela yeo ba bolelago le bona ka yona. Bapalang BIDIO ye, gomme le boledišaneng ka dipotšišo tše di latelago:
Ke ka baka la’ng go le bohlokwa gore mofsa a bolele le batswadi ba gagwe ka tlhompho?
Mofsa a ka bolela le batswadi ba gagwe bjang ka tsela yeo e bontšhago gore o a ba hlompha?
Balang Diema 1:8, gomme le boledišaneng ka potšišo e latelago:
Mofsa o swanetše go dira’ng ge batswadi ba gagwe ba mmotša seo a swanetšego go se dira?
7. Ithuteng ka Jehofa le le lapa
Malapa a Dihlatse tša Jehofa a bea nako ka thoko beke e nngwe le nngwe gore a ithute ka Jehofa a le ka moka. Gantši nako yeo re e bitša borapedi bja lapa. Borapeding bjoo bja lapa go direga’ng? Bapalang BIDIO ye, gomme le boledišaneng ka dipotšišo tše di latelago:
Lapa le ka dira’ng gore le be le borapedi bja lapa beke e nngwe le e nngwe?
Motswadi a ka dira’ng gore bana ba thabele borapedi bja lapa?—Bona seswantšho seo se lego mathomong a thuto ye.
Ke’ng seo se ka dirago gore go se be bonolo gore le be le borapedi bja lapa?
Mehleng ya Baisiraele, Jehofa o be a nyaka gore batswadi ba boledišane gantši le bana ba bona ka Mangwalo. Balang Doiteronomio 6:6, 7, gomme le boledišaneng ka potšišo e latelago:
O ka diriša bjang lengwalo le?
Dilo tšeo le ka di dirago borapeding bja lena bja lapa:
Lokišetšang diboka le le ka moka.
Kgethang taba e itšego ya ka Beibeleng yeo le ka boledišanago ka yona le yeo lapa ka moka le ka e thabelago.
Ge e ba o na le bana, taonelouta goba o phrinthe mešongwana ya bana yeo e lego go jw.org/nso.
Ge e ba o na le bafsa, boledišanang ka dihlogo tša bafsa tšeo di lego go jw.org/nso.
Bapalang setori se itšego sa ka Beibeleng le bana ba gago.
Kgethang bidio yeo le ka e bogelago go jw.org/nso gomme le boledišaneng ka yona.
BATHO BA BANGWE BA RE: “Bana ba ka se kgone go kwešiša Beibele.”
Wena o ka re’ng go bona?
O ITHUTILE ENG?
Jehofa o nyaka gore batswadi ba rate bana ba bona, ba ba rute le go ba šireletša. O nyaka le gore bana le bona ba hlomphe batswadi ba bona le go ba kwa. E bile o nyaka le gore malapa ka moka a ithute ka yena a le ka moka.
Dipotšišo
Batswadi ba ka ruta bana ba bona bjang le go ba šireletša?
Bana ba ka bontšha batswadi ba bona bjang gore ba a ba hlompha?
Lapa le holega bjang ge le bea nako ka thoko beke e nngwe le e nngwe gore le ithute ka Jehofa?
ITHUTE KA MO GO OKETŠEGILEGO
Ke dilo dife tšeo di ka thušago ngwana wa gago gore a gole gabotse?
“Dilo tše Tshela Tšeo Bana ba Swanetšego go Ithuta Tšona” (Phafoga! ya No. 2 2019.)
Ekwa gore Beibele e ka thuša bjang batho bao ba hlokometšego batswadi ba bona bao ba tšofetšego.
Ekwa gore ke eng seo se thušitšego monna yo a bego a sa tsebe gore o swanetše go godiša bana bjang gore a feleletše a kgona go ba godiša gabotse.
Ekwa gore botate ba ka dira eng gore ba be le segwera se sebotse le bana ba bona.
“Botate ba ka Dula ba Batamelane le Barwa ba Bona Bjang?” (Morokami wa November 1, 2011.)