Kgaolo ya Masome-pedi-tee

Letsogo la Jehofa le a Phagama

Jesaya 25:1–27:13

1. Ke ka baka la’ng Jesaya a leboga Jehofa?

JESAYA o rata Jehofa kudu gomme o thabela go mo reta. O hlaboša lentšu o re: “Morêna, O Modimo wa-ka! Ke a Xo xodiša.” Ke eng seo se thušago moporofeta go ba le tebogo e bjalo e botse bakeng sa Mmopi wa gagwe? Lebaka le legolo ke go tseba ga gagwe Jehofa le mediro ya gagwe. Mantšu a Jesaya a latelago a utolla tsebo ye: “Ke rêta leina la xaxo, xobane ó dira mehlôlô; tše O di rerilexo kxalê ké therešô, di tiile.” (Jesaya 25:1) Go swana le Jošua yo a bilego gona pele ga gagwe, Jesaya o a tseba gore Jehofa o a botega e bile ke yo a ka botwago le gore ‘merero’ ya gagwe ka moka​—e a phethega.​—Jošua 23:14.

2. Ke morero ofe wa Jehofa wo Jesaya a o tsebatšago mo nakong ye, gomme pakane ya morero wo e ka ba e le efe?

² Merero ya Jehofa e akaretša dikgoeletšo tša gagwe tša kahlolo malebana le manaba a Isiraele. Bjale Jesaya o tsebatša e nngwe ya tše ka gore: “Xobane motse wó O o dirile lešope, meaxô ya dibô O e dirile marakô; mešatê ya ba-ntlê xa e sa le metse, e ka se hlwê e axwa neng le neng.” (Jesaya 25:2) Motse wo wo o sa bitšwego ka leina ke ofe? Jesaya a ka ba a bolela ka Ari ya Moaba​—Moaba ke kgale e le lenaba la batho ba Modimo.a Goba a ka ba a bolela ka motse o mongwe o matla kudu​—Babele.​—Jesaya 15:1; Tsefanya 2:8, 9.

3. Manaba a Jehofa a mo tumiša ka tsela efe?

³ Manaba a Jehofa a tla arabela bjang ge morero wa gagwe malebana le motse wa ona o matla o phethega? “Ké tšôna tše batho ba matla ba Xo rêtaxo ka tšôna; metse ya ’thšaba tše matla e Xo boifa ka ’baka leo.” (Jesaya 25:3) Ke mo go kwešišegago gore manaba a Modimo yo matla ka moka a tla mmoifa. Lega go le bjalo, a mo tumiša bjang? Na a tla lahla medimo ya ona ya maaka gomme a amogela borapedi bjo bo sekilego? Le gatee! Go e na le moo, a tumiša Jehofa ge a gapeletšega go lemoga go phagama ga gagwe mo go tlabago bjalo ka ge go ile gwa dira Farao le Nebukadinetsara.​—Ekisodo 10:16, 17; 12:30-33; Daniele 4:37.

4. Ke “[motse ofe wa] ’thšaba tše matla” wo o lego gona lehono, gomme ke bjang le wona o tumišago Jehofa?

⁴ Lehono “[motse wa] ’thšaba tše matla” ke “motse o moxolo woo o naxo le boxoši bya xo buša dikxoši tša lefase,” e lego “Babele o moxolo,” mmušo wa lefase wa bodumedi bja maaka. (Kutollo 17:5, 18) Karolo e kgolo ya mmušo wo ke Bojakane. Baetapele ba bodumedi ba Bojakane ba tumiša Jehofa bjang? Ka go dumela ka lehloyo dilo tše di kgahlišago tšeo a di diretšego Dihlatse tša gagwe. Kudu-kudu ka 1919 ge Jehofa a bušetša bahlanka ba gagwe modirong o mogolo ka morago ga go lokollwa ga bona bothopšeng bja moya go Babele o Mogolo, baetapele ba ba ile “ba swarwa ke xo thšoxa ba lothša Modimo wa lexodimo.”​—Kutollo 11:13.b

5. Jehofa o šireletša bjang bao ba mo holofetšego ka mo go feletšego?

⁵ Le ge a boifiša ge a lebelelwa ke manaba a gagwe, Jehofa ke setšhabelo go baipoetši le baikokobetši bao ba nyakago go mo hlankela. Ba matla ba bodumedi le ba dipolitiki ba ka leka sohle gore ba senye tumelo ya barapedi ba therešo, eupša ba a palelwa ka gobane ba ba holofetše Jehofa ka mo go feletšego. Mafelelong o homotša baganetši ba gagwe gabonolo, a dira bjalo go etša ge eka o be a khupetša letšatši le le fišago la leganateng ka leru goba a thibela matla a ledimo ka leboto.​—Bala Jesaya 25:4, 5.

‘Monyanya wa Ditšhaba ka Moka’

6, 7. (a) Jehofa o dira monyanya wa mohuta mang, gona o o direla bomang? (b) Monyanya o porofetilwego ke Jesaya o swantšhetša’ng?

⁶ Go swana le tate yo lerato, Jehofa ga a šireletše feela eupša gape o fepa bana ba gagwe kudu-kudu ka tsela ya moya. Ka morago ga go lokolla batho ba gagwe ka 1919, o ile a ba direla monyanya wa phenyo, e lego kabo e kgolo ya dijo tša moya: “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo.”​—Jesaya 25:6.

⁷ Monyanya o diretšwe “thabeng” ya Jehofa. Thaba ye ke eng? Ke “thaba ya Ntlo ya Morêna” yeo ditšhaba ka moka di kgeregelago go yona “bofelong bya mabaka.” Ke ‘thaba e kgethwa’ ya Jehofa moo barapedi ba gagwe ba botegago ba sa bakego kgobalo le go senya. (Jesaya 2:2; 11:9) Lefelong le le le phagamego la borapedi, Jehofa o diretše batho ba botegago monyanya wa gagwe o mogolo. Le gona dilo tše dibotse tša moya tšeo di abjago ka bontši gona bjale di swantšhetša dilo tše dibotse tša nama tšeo di tla newago ge Mmušo wa Modimo e e-ba mmušo o nnoši wa batho. Tlala e ka se sa ba gona. “Xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.”​—Psalme 72:8, 16.

8, 9. (a) Ke manaba afe a mabedi a magolo a batho ao a tlago go tlošwa? Hlalosa. (b) Modimo o tla dira’ng go tloša kgobošo ya batho ba gagwe?

⁸ Bao ba tšeago karolo monyanyeng wa moya wo o lokišeditšwego ke Modimo mo nakong ye ba na le ditebelelo tše di kgahlišago. Theetša mantšu a Jesaya a latelago. Ge a bapiša sebe le lehu le ‘lešela’ le le hupago moya goba ‘lešira,’ o re: “Xomme thabeng yé Morêna ó tlo tloša ’šira le le širilexo ’thšaba tšohle, ’šêla le le bipilexo ba-ntlê bohle. Lehu ó tlo le tloša ka xo sa felexo; Mong ’a bohle Morêna ó tlo phumola mexôkxô mahlong ohle.”​—Jesaya 25:7, 8a.

⁹ Ee, go ka se sa ba le sebe le lehu! (Kutollo 21:3, 4) Go feta moo, kgobošo ya maaka yeo bahlanka ba Jehofa ba e kgotleletšego ka nywaga e dikete le yona e tla fedišwa. “Kxoboxô ya sethšaba s’axwe ó tlo e široša dinaxeng ka moka; xobane Morêna ó r’yalo.” (Jesaya 25:8b) Se se tla direga bjang? Jehofa o tla tloša mothopo wa kgobošo yeo, e lego Sathane le peu ya gagwe. (Kutollo 20:1-3) Ga go makatše ge batho ba Modimo ba tla tutueletšega go goeletša ka gore: “Bônang, Modimo wa rena šó, yo re mmotilexo ’me a re phološa; ké Yêna Morêna yo re mmotilexo; a re hlalaleng re thabêlê phološô ya xaxwe.”​—Jesaya 25:9.

Baikgogomoši ba a Kokobetšwa

10, 11. Jehofa o boloketše Moaba tshwaro efe e šoro?

¹⁰ Jehofa o phološa bao ba bontšhago boikokobetšo gare ga batho ba gagwe. Lega go le bjalo, moagišani wa Isiraele e lego Moaba o a ikgogomoša gomme Jehofa o hlaswa boikgogomošo. (Diema 16:18) Ka gona, Moaba e rulaganyetšwa go kokobetšwa. “’Tsôxô la Morêna le tlo dula thabeng yé. Xe e le Moaba, yêna ó tlo xatakêlwa mo a lexo xôna, bo-ka moko xe o xatakêlwa moroleng. Mo a lexo xôna ó etša seruthi sè akxa matsôxô sè rutha. Fêla, ó tlo kokobetšwa boikxoxomošô le maanô a diatla. ’Me dibô tša xaxwe tša merakô e mexolo ó tlo di ušetša fase leroleng.”​—Jesaya 25:10-12.

¹¹ Seatla sa Jehofa se tla “dula” thabeng ya Moaba. Mafelelo e tla ba afe? Moaba yeo e ikgogomošago e swanelwa ke go otlwa le go gatakelwa fase bjalo ka “moroleng.” Mehleng ya Jesaya, mooko o be o gatakelwa mekgobong ya maloko go dira monontšha; ka gona Jesaya o bolela go kokobetšwa ga Moaba e sa le pele go sa šetšwe maboto a yona a phagamego le a bonalago a šireletšegile.

12. Ke ka baka la’ng Moaba e kgethilwe bakeng sa kgoeletšo ya kahlolo ya Jehofa?

¹² Ke ka baka la’ng Jehofa a kgetha Moaba bakeng sa morero o bjalo o šoro? Ba-Moaba ke ditlogolwana tša Lota setlogolo sa Aborahama le morapedi wa Jehofa. Ka go rialo, ga se feela baagišani ba setšhaba sa Modimo sa kgwerano eupša gape ke meloko. Go sa šetšwe se, ba amogetše medimo ya maaka le go bontšha lehloyo le lešoro go Isiraele. Ba swanelwa ke pheletšo ya bona. Go se, Moaba e swana le manaba a bahlanka ba Jehofa lehono. E swana kudu-kudu le Bojakane bjo bo ipolelago gore bo thomile phuthegong ya Bokriste ya lekgolong la pele la nywaga, eupša e le karolo e kgolo ya Babele o Mogolo bjalo ka ge go bonwe pejana.

Koša ya Phološo

13, 14. Batho ba Modimo ba na le “motse [ofe] wo o tiilexo” lehono, gona ke bomang bao ba dumelelwago go tsena go wona?

¹³ Go thwe’ng ka batho ba Modimo? Ba thabišitšwe ke go amogelwa ke Jehofa le tšhireletšo ya gagwe, ba hlaboša mantšu a bona ba opela. “Mehleng yeo mo naxeng ya Juda xo tlo hlabya sefela sé: Re n’e motse wo o tiilexo; merakô le maxôrô di beetšwe xo phološa. Bulang dikxôrô xo tsênê sethšaba se boló se-lata-pôtêxô.” (Jesaya 26:1, 2) Le ge go se na pelaelo gore mantšu a a phethagetše mehleng ya bogologolo, gape a na le phethagalo e kwagalago lehono. “Sethšaba se boló” sa Jehofa, e lego Isiraele wa moya, se neilwe mokgatlo o tiilego o swanago le motse. A lebaka le lekaakang la go thaba, la go opela!

¹⁴ Ke batho ba mohuta mang bao ba tsenago ‘motseng’ wo? Kopelo e araba ka gore: “Dipelo [“tshekamelo,” NW] di thekxilwe, O [Modimo] theile khutšô, khutšô ka xe xo botilwe wene. Bôtang Morêna ka mehla le mehla; xobane xe Le na le Yêna, Le na le Morêna [“Jah Jehofa,” NW] Lentswê la mehleng.” (Jesaya 26:3, 4) “Tshekamelo” yeo Jehofa a e thekgago ke kganyogo ya go kwa melao ya gagwe ya motheo ya go loka le go mmota, e sego go bota ditshepedišo tše di tekemago tša tša kgwebo, tša dipolitiki le tša bodumedi tša lefase. “Jah Jehofa” ke yena Lefsika le nnoši leo go ka ithekgwago ka lona la polokego. Bao ba botago Jehofa ka mo go tletšego ba hwetša tšhireletšo ya gagwe gomme ba thabela “khutšô.”​—Diema 3:5, 6; Ba-Filipi 4:6, 7.

15. “Motse-mophaxami” o kokobeditšwe bjang lehono, gona “maoto a bahlaki” a o gatakela ka tsela efe?

¹⁵ Se se fapana gakaakang le seo se diragalelago manaba a batho ba Modimo! “Ó uša ba-dula-tletlolo, motse-mophaxami; ó o kokobetša fase-fase, ó o dixêla leroleng. O xatakêlwa ka maoto, maoto a bahlaki, dinaô tša babôtla.” (Jesaya 26:5, 6) Gape, Jesaya mo a ka ba a bolela ka “motse-mophaxami” wa Moaba, goba a ka ba a bolela ka motse o mongwe o bjalo ka Babele yeo e phagamego e le ka kgonthe ka go ikgodiša. Go sa šetšwe boemo, Jehofa o fetotše maemo a “motse-mophaxami” gomme ‘bahlaki le babotla’ ba gagwe ba o gatakela. Lehono boporofeta bjo bo swanela gabotse Babele o Mogolo, kudu-kudu Bojakane. Ka 1919 “motse-mophaxami” wo o ile wa gapeletšega go lokolla batho ba Jehofa​—e lego go wa mo go kokobetšago​—gomme le bona ba gatakela mothopi wa bona wa kgale. (Kutollo 14:8) Bjang? Ka go tsebiša phatlalatša tefetšo ya Jehofa e tlago go yena.​—Kutollo 8:7-12; 9:14-19.

Go Kganyoga Toko le “Dikgopotšo” tša Jehofa

16. Jesaya o bea mohlala ofe o mobotse wa boineelo?

¹⁶ Ka morago ga kopelo ye ya phenyo, Jesaya o utolla bogolo bja boineelo bja gagwe ka noši le meputso ya go hlankela Modimo wa toko. (Bala Jesaya 26:7-9, bapiša le PK.) Moporofeta o nea mohlala o mobotse wa ‘go holofela Jehofa’ le wa go ba le kganyogo e tseneletšego ya go kganyoga ‘leina’ le “dikgopotšo” tša Jehofa. Dikgopotšo tša Jehofa ke eng? Ekisodo 3:15 e re: “[Jehofa, PK] . . . Ke lôna leina la-ka la neng le neng, le ke tl’o xo xopolwa ka lôna xo merafo le merafo.” Jesaya o rata leina la Jehofa le sohle seo le se emelago, go akaretša le ditekanyetšo le ditsela tša Gagwe tša go loka. Bao ba hlagolelago lerato le swanago la go rata Jehofa ba kgonthišetšwa ka tšhegofatšo ya gagwe.​—Psalme 5:8; 25:4, 5; 135:13; Hosea 12:5.

17. Ba kgopo ba tla tingwa ditokelo dife?

¹⁷ Lega go le bjalo, ga se bohle bao ba ratago Jehofa le ditekanyetšo tša gagwe tše di phagamego. (Bala Jesaya 26:10.) Ba kgopo gaešita le ge ba laletšwa, ba gana ka bonganga go ithuta toko e le gore ba tsene “naxeng ya mekxwa e mebotse,” e lego naga yeo e dutšwego ke bahlanka ba Jehofa ba ba letlilego boitshwarong le moyeng. Ka baka leo ba kgopo “boxolo bya Morêna xa [ba] bo bône.” Ba ka se ke ba phela gore ba thabele ditšhegofatšo tšeo di tla tlelago batho ka morago ga ge leina la Jehofa le kgethagaditšwe. Gaešita le lefaseng le lefsa ge lefase ka moka e tla be e le ‘naga ya mekgwa e mebotse,’ ba bangwe ba ka palelwa ke go arabela bothong bjo lerato bja Jehofa. Maina a batho ba bjalo a ka se ke a ngwalwa ka pukung ya bophelo.​—Jesaya 65:20; Kutollo 20:12, 15.

18. Ke ka tsela efe ba bangwe mehleng ya Jesaya ba ikgethetšego go ba difofu, gomme ba tla gapeletšega go “bôna” Jehofa neng?

¹⁸ “Morêna, xe ’tsôxô la xaxo le phaxamile, xa ba lemoxe; ba tlo bá ba di bôna, ba lewa ke dihlong, xe O pelofaletše ’thšaba sa xaxo, mollô wa xe O xalefetše manaba a xaxo, xe o ba ja.” (Jesaya 26:11) Mehleng ya Jesaya, letsogo la Jehofa le ile la ipontšha le phagame ge Jehofa a šireletša batho ba gagwe ka go gata mogato malebana le manaba a bona. Eupša ba bantši ga ba a lemoga se. Batho ba bjalo bao ba ikgethetšego go ba difofu moyeng, mafelelong ba tla gapeletšega go “bôna” goba go lemoga Jehofa ge ba lewa ke mollo wa phišego ya gagwe. (Tsefanya 1:18) Modimo ka morago o re go Hesekiele: “Ba tla swanelwa ke go tseba gore ke nna Jehofa.”​—Hesekiele 38:23, NW.

“Morêna ó Sôla Moratwa wa Xaxwe”

19, 20. Ke ka baka la’ng gona ke bjang Jehofa a ilego a laya batho ba gagwe, gomme ke bomang bao ba ilego ba holwa ke tayo e bjalo?

¹⁹ Jesaya o a tseba gore khutšo le katlego le ge e le dife tšeo batho ba naga ya gabo ba di thabelago ke ka baka la tšhegofatšo ya Jehofa. “Morêna, O tlo re nea khutšô; xobane ka moka tše re di dirilwexo, re di dirilwe ke Wêna.” (Jesaya 26:12) Go sa šetšwe se e bile go sa šetšwe go bea ga Jehofa sebaka sa go ba “mmušo wa baperisita le setšhaba se se kgethegilego” pele ga batho ba gagwe, Juda e bile le histori e feto-fetogago. (Ekisodo 19:6, PK) Batho ba yona ba ile ba retologela borapeding bja medimo ya maaka leboelela. Ka baka leo, ba ile ba laiwa gantši-ntši. Lega go le bjalo, tayo e bjalo ke pontšho ya lerato la Jehofa ka gobane “Morêna ó sôla moratwa wa xaxwe.”​—Ba-Hebere 12:6.

²⁰ Gantši Jehofa o laya batho ba gagwe ka go dumelela ditšhaba tše dingwe, e lego ‘marena a mangwe’ gore ba buše. (Bala Jesaya 26:13.) Ka 607 B.C.E., o dumelela ba-Babele gore ba ba iše bothopša. Na se se a ba hola? Tlaišego ka boyona ga e hole motho. Lega go le bjalo, ge e ba motlaišegi a ithuta go seo se diregago, a itshola gomme a nea Jehofa boineelo bjo bo feletšego, gona o a holega. (Doiteronomio 4:25-31) Na ba-Juda le ge e le bafe ba bontšha go itshola ga go boifa Modimo? Ee! Jesaya o bolela ka mokgwa wa boporofeta gore: “’Ina re rêta la xaxo le nnoši.” Ka morago ga ge ba boile bothopša ka 537 B.C.E., ba-Juda gantši ba be ba nyaka tayo bakeng sa dibe tše dingwe, eupša le ka mohla ga se ba ka ba tanywa gape ke go rapela medimo ya lefsika.

21. Go tla direga’ng ka bao ba ilego ba gatelela batho ba Modimo?

²¹ Go thwe’ng ka bathopi ba Juda? “Diriti di ka se hlwê di tsoxa, xobane O ba hlotše wa ba fetša; maina a bôná ka moka O a phumotše.” (Jesaya 26:14) Babele e tla kwešwa bohloko ka baka la sehlogo seo e se dirilego setšhaba se se kgethilwego sa Jehofa. Jehofa o tla menola Babele e ikgantšhago a diriša ba-Meda le ba-Peresia gomme a lokolla batho ba gagwe ba thopilwego. Motse woo o mogolo wa Babele o tla dirwa seriti, go fo etša ge o hwile. Mafelelong o ka se sa ba gona.

22. Batho ba Modimo ba šegofaditšwe bjang mehleng yeno?

²² Phethagalong ya mehleng yeno, mašaledi a Isiraele wa moya yo a hlwekišitšwego a ile a lokollwa go Babele o Mogolo gomme a bušetšwa tirelong ya Jehofa ka 1919. Bakriste ba tloditšwego bao ba neilwego matla a mafsa ba ile ba nwelela modirong wa bona wa go bolela. (Mateo 24:14) Ka baka leo, Jehofa o ba šegofaditše ka koketšego gaešita le go tliša lešaba le legolo la “dinku tše dingwê” gore le hlankele le bona. (Johane 10:16) “Morêna, O kile wa atiša ’thšaba sé, wa rêtwa Ò se atišitše, Ò katološitše mellwanê ya naxa yohle. Morêna, ba tlile ba Xo nyaka bà tlaletšwe, ba thšolla dithapêlô mohla Ò ba sôla.”​—Jesaya 26:15, 16.

“Ba tlo Tsoxa”

23. (a) Ke pontšho efe e kgolo ya matla a Jehofa yeo e diregago ka 537 B.C.E.? (b) Ke pontšho efe e swanago yeo e diragetšego ka 1919 C.E.?

²³ Jesaya o boela boemong bjo Juda e lebanego le bjona ge e sa le bothopša Babele. O bapiša setšhaba le mosadi yo a swerwego ke lešoko eupša a palelwa ke go belega. (Bala Jesaya 26:17, 18.) Thušo yeo e tla ka 537 B.C.E. gomme batho ba Jehofa ba boela nageng ya gabo bona, ba fišegela go aga tempele lefsa le go tsošološa borapedi bja therešo. Ge e le gabotse, setšhaba se tsošitšwe bahung. “Bahu ba xaxo ba tlo phela, le wa-ka mmele. Ba tlo tsoxa. Phafoxang! Hlalalang! Ba Le robetšexo leroleng; xobane phoka ya xaxo ké phoka ya seetša; ’me lefase le tlo nthša ba hwilexo.” (Jesaya 26:19) A pontšho e kgolo gakaakang ya matla a Jehofa! Go feta moo, e bile pontšho e kgolo gakaakang ge mantšu a a be a phethagala ka kgopolo ya moya ka 1919! (Kutollo 11:7-11) Le gona re fagahletše gakaakang nako ya ge mantšu a a phethagala ka tsela ya kgonthe lefaseng le lefsa gomme bao ba robetšego lehung ba ‘e-kwa lentšu la Jesu gomme ba e tšwa’ mabitleng a kgopotšo!​—Johane 5:28, 29.

24, 25. (a) Ka 539 B.C.E., ba-Juda ba ka ba ba kwele bjang taelo ya Jehofa ya gore ba ikute? (b) ‘Diphapoši’ di ka ba di šupa eng mehleng yeno, gomme re swanetše go hlagolela boemo bofe bja kgopolo ka tšona?

²⁴ Lega go le bjalo, ge e ba babotegi ba tla thabela ditšhegofatšo tša moya tšeo di holofeditšwego ka Jesaya, ba swanetše go kwa ditaelo tša Jehofa: “Wene Sethšaba sa-ka! Sepela O y’o tsêna phapošing ya xaxo, O itswalêlêlê O iphihlê xo se xokaenyana, xo bê xo fetê dikôtlô. Xobane Morêna šoo-lee! O tšwêlêla felô xa xaxwe; ó tla xo latiša molato wa ba dutšexo lefaseng; naxa e tlo bipolla madi a a lexo mo xo yôna, e ka se fêle e bipile ba xo bolaêlwa mo xo yôna.” (Jesaya 26:20, 21, bapiša le Tsefanya 1:14.) Temana ye e ka ba e bile le phethagalo ya mathomo ge ba-Meda le ba-Peresia bao ba etilwego pele ke Kgoši Korese ba be ba fenya Babele ka 539 B.C.E. Go ya ka radihistori wa mo-Gerika Xenophon, ge Korese a tsena Babele o laela batho ka moka go dula ka magaeng a bona ka ge banamedi ba gagwe ba dipere “ba laetšwe go bolaya bohle bao ba ba hwetšago ka ntle.” Lehono ‘diphapoši’ tša boporofeta bjo di ka ba di tswalane kgaufsi le diphuthego tše masome a dikete tša batho ba Jehofa go dikologa lefase. Diphuthego tše bjalo di tla tšwela pele go kgatha tema e bohlokwa maphelong a rena gaešita le “tlaišexong e kxolo.” (Kutollo 7:14) Ke gabohlokwa gakaakang gore re kgomarele boemo bjo bobotse bja kgopolo ka phuthego gomme re kopanele le yona ka mehla!​—Ba-Hebere 10:24, 25.

²⁵ Lefase la Sathane le tla tloga le fela. Ga se ra hlwa re tseba kamoo Jehofa a tlago go šireletša batho ba gagwe nakong yeo e boifišago. (Tsefanya 2:3) Lega go le bjalo, re a tseba gore go phologa ga rena go tla ithekga ka tumelo ya rena go Jehofa le go mmotegela ga rena ka go se kwanantšhe gotee le go mo kwa.

26. “Kwêna-kxolo” mehleng ya Jesaya le mehleng ya rena ke eng, gomme “mamokêbê [wo] wa lewatlê” o diragalelwa ke eng?

²⁶ Ge a lebeletše nakong yeo, Jesaya o porofeta gore: “Mohla woo Morêna ó tlo ôtla kwêna-kxolo, nôxa ya lebelô, le kwêna-kxolo nôxa ya xo menaxana; ó tlo bolaya mamokêbê wa lewatlê, ka lerumô l’axwe le le tiilexo, le lexolo, le le matla.” (Jesaya 27:1) Phethagalong ya mathomo, “kwêna-kxolo” e šupa dinaga tšeo Isiraele e bego e phatlalaletše go tšona, tše bjalo ka Babele, Egipita le Asiria. Dinaga tše di ka se kgone go thibela go boela ga batho ba Jehofa nageng ya gabo bona ka nako e swanetšego. Lega go le bjalo, kwena-kgolo ya mehleng yeno ke mang? Go bonala e le Sathane​—“noga ya kgale”​—le tshepedišo ya gagwe e kgopo ya dilo mo lefaseng yeo e lego sedirišwa sa gagwe sa go lwantšha Isiraele wa moya. (Kutollo 12:9, 10, PK; 13:14, 16, 17; 18:24) “Kwêna-kxolo” e lahlegetšwe ke taolo ya yona go batho ba Modimo ka 1919, gomme kgaufsinyane e tla hwelela ka mo go feletšego ge Jehofa a “bolaya mamokêbê wa lewatlê.” Mo nakong ye, ga go na seo “kwêna-kxolo” e ka lekago go se dira malebana le batho ba Jehofa seo se tla atlegago e le ka kgonthe.​—Jesaya 54:17.

“Serapa sa Merara ye e Ratêxaxo”

27, 28. (a) Tšhemo ya Jehofa ya merara e tladitše lefase ka moka ka eng? (b) Jehofa o šireletša bjang tšhemo ya gagwe ya merara?

²⁷ Ka kopelo e nngwe, Jesaya bjale o swantšhetša ka bothakga go atlega ga batho ba Jehofa ba lokolotšwego ka gore: “Mohla woo ba tlo hlaba ’fela sa serapa sa merara ye e ratêxaxo. Nna Morêna, ke Nna moloti wa sôna; ke fêla ke se nošetša; ke se leta bošexo le mosexare, xore se se senywê.” (Jesaya 27:2, 3) Mašaledi a Isiraele wa moya le bagwera ba ona ba diroto ba tladitše lefase ka moka ka ditšweletšwa tša moya e le ka kgonthe. A lebaka la go bina monyanya​—lebaka la go opela! Tumišo ka moka e ya go Jehofa yo a lotago tšhemo ya gagwe ya merara ka lerato.​—Bapiša le Johane 15:1-8.

²⁸ Ruri, bogale bja Jehofa bja pejana bo tšeetšwe sebaka ke lethabo! “Mo xo nna xa xo sekxôrô; fêla, xe nka hwetša metlwa le dithsêhlô, ke di wêla ka xodimo ka lwa natšô’, ka di fiša tšohle. E tlê e re mohlomong ’rapa sa-ka e bê sa menônô xe ke tsoša matla. A se ntêtlêxêlê, a se ntêtlêxêlê!” (Jesaya 27:4, 5) Go kgonthišetša gore merara ya gagwe e tšwela pele go tšweletša “merara ye e ratêxaxo” ka boati, Jehofa o pšhatlaganya le go latswa bjalo ka ge eka ke ka mollo tutuetšo le ge e le efe e swanago le mofoka yeo e ka gobošago tšhemo ya gagwe ya merara. Ka gona, anke go se be le yo a beago boiketlo bja phuthego ya Bokriste kotsing! Go e na le moo, anke bohle ba ‘tiiše matleng a Jehofa,’ ba nyake kamogelo le tšhireletšo tša gagwe. Ka go dira bjalo, ba dira khutšo le Modimo​—e lego selo se bohlokwa kudu moo Jesaya a se bolelago gabedi. Mafelelo e ba afe? “Mehleng e tlaxo Jakobo ó tlo nama medu, Isiraele a khukhušê a hloxê, a tlatšê lefase dienywa.” (Jesaya 27:6)c Go phethagala ga temana ye ke pontšho e kgahlišago gakaakang ya matla a Jehofa! Ga e sa le go tloga ka 1919 Bakriste ba tloditšwego ba tladitše lefase ka “dienywa,” e lego dijo tše di nago le phepo tša moya. Ka baka leo, ba tladitšwe ke dimilione tša dinku tše dingwe tše botegago, tšeo gotee le bona ‘di hlankelago [Modimo] mosegare le bošego.’ (Kutollo 7:15) Ba ba kgomarela ka lethabo ditekanyetšo tša gagwe tše phagamego ba le gare ga lefase le gobogilego. Le gona Jehofa o tšwela pele go ba šegofatša ka koketšego. Anke le ka mohla re se ke ra lahlegelwa ke pono ya tokelo e kgolo ya go ja “dienywa” le go di abelana le ba bangwe ka mogoo wa rena ka noši wa theto!

[Mengwalo ya ka tlase]

[Lepokisi go letlakala 285]

“Phalafala-kxolo” e Goeletša Tokologo

Ka 607 B.C.E., mahloko a Juda a oketšega ge Jehofa a laya setšhaba sa gagwe se se arogilego ka go se otla ka go thopša. (Bala Jesaya 27:7-11.) Phošo ya setšhaba ke e kgolo kudu go ka boelanywa ka dihlabelo tša diphoofolo. Ka gona, bjalo ka ge motho a ka phatlalatša dinku goba dipudi ka “mogoo o tšhošago” goba “go tšutla” go matla mo go bakwago ke moya o matla, Jehofa o raka Isiraele nageng ya yona. Ka morago ga moo, gaešita le batho ba fokolago ba swantšhetšwago ke bong bja bosadi, ba kgona go diriša gampe seo se šetšego nageng.

Lega go le bjalo, go tla nako ya gore Jehofa a lokolle batho ba gagwe bothopša. Go ka thwe o ba lokolla go etša ge molemi a ka lokolla mahlware ao a golegilwego dihlareng. “Mohla woo Morêna ó tlo hlotha ’kenyô, a thôma ka tša nokeng e kxolo, a xoma ka tša nokana ya Egipita; ’me lena Ba-Isiraele Le tlo topya ka o tee ka o tee. Mohla woo xo tlo letšwa phalafala-kxolo; xwa tla ba ba raketšwexo kwa naxeng ya Asuri, le ba xo falalêla Egipita, ba tlo tla ba lothša Morêna fá thabeng e kxêthwa ya Jerusalêma.” (Jesaya 27:12, 13) Ka morago ga phenyo ya gagwe ka 539 B.C.E., Korese o ntšha taelo yeo e lokollago ba-Juda ka moka ba lego mmušong wa gagwe, ba akaretšago bao ba lego Asiria le Egipita. (Esera 1:1-4) Go bjalo ka ge eka “phalafala-kxolo” e llile, e goeletša kopelo ya tokologo bakeng sa batho ba Modimo.

[Caption on page 274]

“Monyanya wa makhura”

[Caption on page 275]

[Caption on page 277]

Babele e gatakelwa ka tlase ga maoto a bao e bego e le bagolegwa

[Caption on page 278]

[Caption on page 279]

“Tsêna phapošing ya xaxo”