Dithuto tše Tšwago Mangwalong: Tsefanya 1:1–3:20

Tsoma Jehofa Gomme o Mo Direle ka Pelo e Feletšego

NYWAGENG e 50 pele ga ge Babele e šwalalanya Juda ya mohlanogi, Jehofa o ile a bolela ka moporofeta wa gagwe Tsefanya gore: “Ke tlo okoba, ka okoba tšohle tše di lexo lefaseng.” (1:1, 2) Eupja Modimo o ile a ba a bontšha batho ba gagwe tsela e išago phologong. (2:2; 3:9) Puku ya Tsefanya e hupere dithuto tše bohlokwa tabeng ye bakeng sa bohle bao mo nakong ye ba lebanego le ‘ntwa ya mohla-mogolo wa Modimo Ra-Matla-ohle.’—Kutollo 16:14.

Letšatši la Jehofa le Kgaufsi

Ka ge letšatši la Jehofa le le kgaufsi gakaalo, batho lege e le bafe bao ba furaletšego Modimo ba swanetše go boela go yena kapejana. Gare ga batho bao Modimo a tlago go ba ‘fediša’ ke “bahlanoxi ba-hlala-Morêna.” Ba hlanogile gomme ga ba sa itshwenya ka go dira thato ya Modimo. A boemo bjo kotsi gakaakang! Bo swanetše go lokišwa kapejana.—Tsefanya 1:3-11.

Lehumo la dilo tše di bonagalago le ka se nee tšhireletšo letšatšing la Jehofa. Ba bangwe bao ba ipolelago gore ba direla Jehofa ba dula ba swaregile ka go phegelela dilo tše di bonagalago, ba ikepela boemong bja mabothobotho. A boikaketši bjo bokaakang! Dilo tša bona tše di bonagalago di ka se nee tšhireletšo ‘letšatšing leo.’—Tsefanya 1:12-18.

Phologo e a Kgonega

Gore re tle re šireletšege letšatšing la Jehofa, go nyakega se se fetišago tsebo e sa rego selo ya Mangwalo. “Babotla” bao ba ilego ba ‘ya ka melao ya gagwe’ ba lemošwa gore ‘ba tsome Jehofa, ba tsome toko, ba tsome boikokobetšo.’ Ke feela bao ‘ba tiišeditšego go fihla bofelong’ ba tlago go phološwa.—Tsefanya 2:1-3; Mateo 24:13.

Ditšhaba tšeo di gatelelago batho ba Jehofa lehono di tla fedišwa. Di tla ba le phihlelo e swanago le ya Moaba, Amone, Asuri le ditšhaba tše dingwe tše di dikologilego Juda. Tshenyego gape e letetše Babele o Mogolo. (Kutollo 18:4-8) Se se re kgothatša gakaakang gore re tšwele pele re bolela kahlolo ya Modimo!—Tsefanya 2:4-15.

Batho ba Tsošološitšwego

Jehofa mo nakong ye o lokišeletša batho ba gagwe phologo. Na o lahlile dikgopolo tša Babele gomme wa thoma go bolela ‘leleme le le sekegilego’ la ditherešo tše bohlokwa tša Beibele? Na o ‘biditše leina la Jehofa, ka go ineela go yena? Na o ‘tliša sebego’ e lego “sona seenywa sa melomo ye e ipolelaxo ka leina la xaxwe”? Gore o phologe o swanetše go dirišana ‘kgaufsi’ le batho ba Jehofa ba ineetšego.—Tsefanya 3:1-10; Ba-Roma 10:13-15; Ba-Hebere 13:15.

Bakeng sa phologo re swanetše go tsoma Jehofa gomme re phagamiše leina la gagwe le lekgethwa. Boikgogomošo, bokgopo le maaka ga di nyakege gare ga batho ba gagwe. (Ba-Efeso 4:25-32) Ke feela ‘baipoetši le babotla’ ba tlago go phološwa ge a kgethagatša leina la gagwe.—Tsefanya 3:11-20.

Dithuto tše Tšwago Mangwalo: Hagai 1:1–2:23

PUKU ya Hagai e re iša go 520 B.C.E., e lego nywaga e 17 ka morago ga ge mašaledi a ba-Juda a boetše Jerusalema go ya go tsošološa tempele ya Jehofa. (Hagai 1:1) Yeo e be e le nako ya gore e mongwe le e mongwe a bee pelo ya gagwe modirong wa Modimo. Eupja Jehofa o ile a hwetša e le mo go nyakegago gore a romele moporofeta Hagai gore a ye go gopotša batho ba Gagwe ka boikarabelo bja bona. Na go na le dithuto go se bakeng sa rena?

Bea Modiro wa Jehofa Pele

Le ka mohla o se ke wa bea dikgahlego tša dilo tše di bonagalago pele ga mediro ya moya. Ba-Juda bao ba boetšego nageng ya gabo bona ba be ba e-na le lebaka la go tshwenyega ka go hloka maemo ga tša boiphedišo, baagišani ba manaba le tše dingwe. Eupja tše e be e se lebaka la go se šetše ga bona, ka baka la maemo a bona a bophelo bja matsaka. Ke feela ka morago ga ge ba hlohleleditšwe ke Hagai mo ba ilego ba thoma go aga tempele. Ka mo go swanago lehono, re swanetše go ‘bea dipelo tša rena ditseleng tša rena’ gomme re kgonthišege gore re thekga modiro wa Modimo ka botlalo kudu ka mo go ka kgonegago.—Hagai 1:2-15.

Jehofa o šegofatša maiteko a bao ba dirago modiro wa gagwe ka pelo e feletšego. Modimo o be a ka šegofatša modiro wa Serubabele le ba-Juda ba bangwe ge ba fetša tempele, gomme letago la yona le be le tla feta la ntlo ya pele. Ka ge “lešaba le lexolo” le arabela molaetšeng wa Mmušo lehono, “matsaka a dithšaba ka moka” a tla tempeleng ya moya ya Jehofa, gomme o ‘tlatša ntlo ya gagwe letago.’—Hagai 2:1-9; Kutollo 7:9.

Go Nyakega Tirelo ya Pelo e Feletšego

Borapedi bja rena ke bjo bohlokwa ge feela re hlwekile, maikemišetšo a rena e le a sekilego, gomme re direla Jehofa ka pelo e feletšego. Go hlokomologa ntlo ya Modimo go ile gwa dira gore ba-Juda e be ba sa hlwekago, eupja o be a tla ba šegofatša kapejana ge modiro wa tempele o thoma. Ka gona ge e ba re tla thabela tšhegofatšo ya Jehofa, gona re swanetše go lokiša selo lege e le sefe seo se nyakago go hlokomelwa gomme re bee pelo ya rena modirong wa gagwe. (Bapiša le Numeri 19:11-13.) Ge re dutše re letetše Modimo gore a šišinye magodimo le lefase, a phekgole mebušo, anke re lateleng Serubabele o mogolo, Jesu Kriste gomme re be le karolo modirong wa Jehofa ka pelo e feletšego.—Hagai 2:10-23.

[Lepokisi go letlakala 30]

DITEMANA TŠA BEIBELE TŠEO DI HLAHLOBIŠIŠITŠWEGO

○ Tsefanya 1:5—Malikamo yoo mo gongwe e lego motho o tee le Milikomo, Moleke goba Moloko e be e le modimo o mogolo wa maaka wa ba-Amone. (1 Dikgoši 11:5, 7) Borapedi bja Moloko bo be bo akaretša go dira bana dihlabelo gomme bo be bo ganwa ke Molao.—Lefitiko 20:2-5; Ditiro 7:42, 43.

○ Tsefanya 2:14—Ka ge go boletšwe e sa le pele, dikokwane tše wešitšwego tša Ninife ya lešope le mešate ya tšona di ile tša fetoga bodulo bja dinonyana le dibata. Dinonyana mo gongwe le phefo di be di ‘duma’ mafesetereng a lešope. Dikgoro gotee le mejako ya ka gare ya ngwako wa bogoši di be di sentšwe.

○ Tsefanya 3:9—Leleme le tee la batho ga le kgonthišetše botee, ka ge go bontšhwa ke dintwa tše di lwewago magareng ga batho ba leleme letee. ‘Leleme le le sekilego’ ke therešo ya Mangwalo, ‘mohlala wa mantšu a se nago senyalo.’ (2 Timotheo 1:13) Le feta boikgogomošo, le reta Modimo, gomme le kopanya bohle bao ba le bolelago.

○ Hagai 1:16—Ka ge ba-Juda ba be ba hlokomologa tempele ya Jehofa, o be a sa ba šegofatše. Ka gona ba be ba bjala kudu eupja ba hwetša dithoro tše sego kae gomme ba hloka dijo le dino tše lekanego go kgotsofatša tšeo ba di nyakago. Diaparo tša bona di be di sa lekana goba di sa ba ruthetše, gomme bao ba golago go be go bonala e ka ba tsenya tšhelete ya bona mekotleng e dutlago. Ka go se swane le ba-Juda bao, anke le ka mohla re se hlokomologe dikgahlego tša Modimo.—Diema 10:22; Nehemia 10:39.

○ Hagai 2:9—Gaešita lege tempele ya ‘pele’ yeo e agilwego ke Salomo e ile ya ema ka nywaga e 420, fela ‘ntlo ya morago’ e ile ya dirišwa ka nywaga e 584 (515 B.C.E.-70 C.E.). Ka gona tempele ya bobedi e ile ya tšea nako e telele. Barapedi ba bantši ba ile ba kgeregela go yona, go etša ka Pentekoste ya 33 C.E., ge ba-Juda le bao ba sokologelago Bojudeng ba be ba kgobokana go yona ba e-tšwa ka ntle ga Judea. Go feta moo, Mesia, Jesu Kriste o ile a rutela ka ‘ntlong ya morago.’ Mabaka a a ile a dira gore e tume kudu ka tša bodumedi.