Seotswa se Segolo se a Utollwa

TSHEPEDIŠO ya Bona bjale ya lefase ka tlase ga taolo ya Sathane e na le dikarolo tše tharo tše dikgolo tšeo di laolwago ke “modimo wa lefase le.” Tše ke pušo ya bopolitiki, taolo le tutuetšo tša kgwebo e kgolo gotee le bodumedi. Nywageng e diketekete ya histori, dikarolo tše tše tharo e bile dikarolo tša mo e nyakilego go ba tshepedišo e nngwe le e nngwe e bušago. Ke efe ya dikarolo tše tše matla yeo e swantšhetšwago ke “mma xo diotswa”?—2 Ba-Korinthe 4:3, 4; Kutollo 12:9; 17:5.

Go ya ka pono ya Johane yeo go bolelwago ka yona mo, babuši, “dikxoši tša lefase,” ba ile ba robala malaong a gagwe a bootswa ka boithatelo. (Kutollo 18:3) (Bohlatse bja se bja histori bo tla tšweletšwa matlakaleng a latelago.) Ka gona, Babele o Mogolo a ka se ke a swantšhetša karolo ya pušo ya bopolitiki tshepedišong ya lefase.

Go thwe’ng ka karolo ya kgwebo e kgolo yeo e tšeago karolo ya bohlokwa gakaalo ditabeng tša batho lehono? Ka kgonthe ke tutuetšo e matla ditšhabeng tše dintši gomme ge e le gabotse e dira phetho ya gore ke bomang bao ba tlago go huma le gore ke bomang ba tlago go diila. Na ye e ka ba e le Babele o Mogolo? Morongwa o neile Johane pontšho e bohlokwa yeo e arabago potšišo ye. O tsebišitše tiragalo e makatšago—go felelwa ga Babele ke botumo! O lahlegelwa ke bathekgi ba gagwe le dinyatsi, bao kapejana ba hwetšago e le yo a ferošago sebete. Ke bomang ba bangwe ka ntle le “dikxoši tša lefase” bao ba bilego gare ga baeng ba gagwe ba ka mehla? Morongwa o re: “Xobane dithšaba ka moka di nwile sebela se boxale sa bootswa bya [gagwe]; ’me dikxoši tša lefase di otswitše le [yena]; babapatši ba lefase ba humile ka boati bya maiphsino a [gagwe].” Ee, babapatši ba lefase ba ile ba holega ka go gwebišana le go gwerana le yena gomme ba oketša ‘maipshino a gagwe a nyatšegago.’ Ka gona a ka se swantšhetše kgwebo e kgolo tekanyong ya lefase.—Kutollo 18:3.

Ka gona, ka mogato wa go kgetha ka go hlahloba mabaka, pušo ya bopolitiki gotee le taolo le tutuetšo tša kgwebo e kgolo ga di sa balwa. Go šetše eng? E swanetše go ba karolo ya mmušo yeo le yona e swanelago molato, “’me wena wa timetša batho ka malea a xaxo.” Ke karolo yeo pele e bego e le e matla eupja bjale e le e fokolago yeo e tutueditšego kgopolo le ditiro tša ditšhaba e le ka kgonthe ga e sa le go tloga mehleng ya Babele wa bogologolo. Ke yena yo a ilego a ba le “boxoši bya xo buša dikxoši tša lefase,”—e lego bodumedi bja maaka!—Kutollo 17:18; 18:23.

Ee, bjalo ka ge go ka bonala go tšhoša go batho ba bangwe ba botegago ba bodumedi, Babele o Mogolo, mmago diotswa, ke seka sa mmušo wa lefase wa bodumedi bja maaka wa Sathane. Ke seka sa bodumedi bja lefase bjoo ka tsela a itšego bo ilego bja ikopantšha le dikarolo tša pušo ya bopolitiki le ya tša ditšhelete go theoša le histori ka moka.

Babele wa Ntwa-dumela

Ka go dumelelana le, pono ya boporofeta, Babele o Mogolo ke seotswa se segolo seo se ilego sa lebiša ditšhaba le batho dintweng tše sehlogo, dintweng tša bodumedi, le dintweng tša tšhollo ya madi ka baka la lehloyo, sa ba ‘šegofatša ka mantšu a bonoge, meetse a makgethwa, dithapelo le dipolelo tše matla tša borata-naga.a—Kutollo 18:24.

Baruti ba gagwe, kudu-kudu baruti ba gagwe ba madira, e bile didirišwa tše ikemišeditšego tša babuši tabeng ya go kgorela madira gore e be ao a bolawago dipolaong tša dintwa tše pedi tša lefase le dintwa tše dingwe tše dikgolo. Mokatholika o ile a bolaya Mokatholika, Moprotestanta a bolaya Moprotestanta ka go ikemišetša, gomme gwa loba maphelo a dimilione tše 50 go ya go tše 60 dintweng tše pedi tša lefase di nnoši.

Lekgolong le la nywaga la bo-20 le le hlabologilego, mohlala wa bodumedi o tšwela pele go baka lehloyo le lehu—e sego feela tikologong ya Bojakane moo go lwantšhanago Makatholika le Maprotestanta a bjona eupja go bile go lwantšhana bo-Isilamo le bo-Juda, bo-Hindu le bo-Isilamo, bo-Buddha le bo-Hindu, bo-Sikh le bo-Hindu le tše dingwe lefaseng la bjona leo e sego la Bokriste.

Go feta moo, bodumedi ka mehla bo ile bja rata go katanela go tutuetša “maxoši a lefase,” bja leka ka matla go dira phetho ya bokamoso bja wona le bahlatlami ba wona. Anke re eleng hloko ka bokopana mehlala e sego kae.

[Mongwalo wa tlase]

[Seswantšho go letlakala 4]

Gare ga tše—bopolitiki, kgwebo e kgolo goba bodumedi—ke efe yeo e emelwago ke ‘Babele o Mogolo’?