Babadi ba Rena ba a Botšiša

Ke Swanetše go Neela ka Bokae?

“Modimo o rata monei yo a neago ka go hlalala.” (2 Bakorinthe 9:7) Mantšu a a tsebja ke batho ba dimilione lefaseng ka bophara. Lega go le bjalo, batho ba bangwe ba tsenago kereke ba ka ikwa ba gapeletšega go neela ka seo ba ka se kgonego go se fihlelela. Ge e le gabotse, madumedi a mangwe a nyaka gore ditho tša ona di neele ka tekanyo e itšego ya tšhelete. Mokgwa wo o bitšwa gore ke karolo ya lesome, e lego gore motho o neela ka 10 lekgolong ya mogolo wa gagwe kerekeng.

Na ruri Beibele e nyaka gore re ntšhe tekanyo e itšego ya tšhelete e le moneelo? Ka mantšu a mangwe re ka re, ke swanetše go neela ka bokae?

Dinyakwa le Meneelo ya Boithatelo ya Nakong e Fetilego

Beibele e hupere ditaelo tše di kwagalago tšeo di yago go setšhabeng sa Isiraele tša mabapi le tekanyo yeo Modimo a bego a nyaka gore ba neele ka yona. (Lefitiko 27:30-32; Numeri 18:21, 24; Doiteronomio 12:4-7, 11, 17, 18; 14:22-27) Dinyakwa tše e be e se tše di feteletšego. Jehofa o ile a holofetša gore ge ba e-kwa melao ya gagwe, o be a tlo “humiša” setšhaba.—Doiteronomio 28:1, 2, 11, 12.

Mabakeng a mangwe, Baisiraele ba be ba ka neela kudu goba ganyenyane ka mo ba ratago. Ka mohlala, ge Kgoši Dafida a be a rulaganyetša go agela Jehofa tempele, balata ba gagwe ba ile ba ntšha moneelo wa “’Talente tše dikete tše thlano tša xauta.”a (1 Koronika 29:7) Bapiša se le seo Jesu a ilego a se bona ge a be a le lefaseng. O ile a bona “mohlologadi yo mongwe wa mohloki a lahlela ditšheletiana tša tšhipi tše pedi tša theko e nyenyane kudu” ka matloleng a matlotlo a tempele. O ile a neela ka bokae? O ile a ntšha feela tekanyo ya 1/64 ya mogolo wa letšatši le tee. Lega go le bjalo, Jesu o boletše gore tšhelete ye e nyenyane e be e amogelega.—Luka 21:1-4.

Na Bakriste ba Swanetše go Neela ka Tekanyo e Itšego ya Tšhelete?

Bakriste ga ba ka tlase ga kgwerano ya Molao yeo Baisiraele ba bego ba le ka tlase ga yona. Ka go rialo, ga ba tlamega go neela ka tekanyo e itšego go Modimo. Lega go le bjalo, go nea ke mothopo wa lethabo le legolo ka phuthegong ya Bokriste bja therešo. Jesu Kriste ka boyena o itše: “Go na le lethabo le legolo go neeng go feta go amogeleng.”—Ditiro 20:35.

Dihlatse tša Jehofa di thekga modiro wa tšona wa lefase ka bophara wa boboledi ka meneelo ya boithatelo. Meneelo ye e dirišetšwa go gatiša dipuku, tše bjalo ka makasine wo o o balago, go aga le go hlokomela mafelo a tšona a borapedi, ao a bitšwago Diholo tša Mmušo. Meneelo yeo e amogelwago ga e dirišetšwe go lefelela batho e le mogolo. Ba bangwe bao ba tšeago karolo modirong wa go dira barutiwa ka nako e tletšego ba hwetša thušo ya tša ditšhelete bakeng sa go lefelela ditshenyagalelo tša dinamelwa le ditshenyagalelo tše dingwe. Eupša ga go le o tee yo a gapeletšago gore a hwetše thušo e bjalo. Ge e le gabotse, Dihlatse tše dintši kudu tša Jehofa ga di hwetše thušo le ge e le efe ya tša ditšhelete bakeng sa go thekga modiro wa tšona wa boboledi. Go e na le moo, Dihlatse tše dintši di ithekga ka go šoma mošomo wa boiphedišo, go etša ge Paulo a dirile ge a be a šoma e le modiri wa ditente.—2 Bakorinthe 11:9; 1 Bathesalonika 2:9.

Motho o swanetše go neela ka bokae ge a nyaka go thekga modiro woo o dirwago ke Dihlatse tša Jehofa? Moapostola Paulo o ngwadile gore: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.”—2 Bakorinthe 8:12; 9:7.

[Mongwalo wa tlase]