Bontšha Gore o Leboga Moya wa Jehofa wa go fa

JEHOFA ke Modimo yo a nago le seatla se se bulegilego. (Jakobo 1:17) Re bona se go dilo tšohle tšeo a di bopilego. O tladitše legohle ka dinaledi gomme a apeša lefase ka dimela le matšoba a mabotse.—Psalme 65:12, 13; 147:7, 8; 148:3, 4.

Mongwadi wa Psalme 104 o ile a leboga kudu dilo tšohle tšeo Jehofa a di bopilego, gomme a ngwala koša ya go mo tumiša. Ge o bala psalme ye, na o leboga Modimo go swana le kamoo mopsalme a ilego a mo leboga ka gona? O itše: “Ke tla opelela Jehofa bophelong bja ka ka moka; ke tla gobela Modimo wa ka ge feela ke sa phela.” (Psalme 104:33) Na le wena o nyaka go dira bjalo?

MOHLALA O MOGOLO WA GO FA

Jehofa o nyaka re mo ekiša tabeng ye. Le gona o re neile mabaka a kwagalago a go dira bjalo. O buduletše moapostola Paulo go ngwala gore: “Laela bao ba humilego tshepedišong ya gona bjale ya dilo gore ba se ke ba ikgantšha le gore ba se holofele mahumo a sa kgonthišegego, eupša ba holofele Modimo yo a re neago ka mo go humilego dilo tšohle tšeo re di thabelago. Ba botše gore ba dire botse, ba hume medirong e mebotse, ba be le seatla se se bulegilego, ba ikemišetše go abelana, ka go re’alo ba ipolokele motheo o mobotse wa bokamoso e le lehumo la bona, e le gore ba swarelele ka go tia bophelong bja kgonthe.”—1 Timotheo 6:17-19.

Lengwalong la bobedi leo a le ngwaletšego Bakorinthe, Paulo o hlalositše maikemišetšo ao re swanetšego go ba le wona ge re nea ba bangwe dilo tše itšego. O itše: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” (2 Bakorinthe 9:7) Ke mang yo re mo thušago ge re eba le seatla se se bulegilego? Paulo o boletše gore re thuša ba bangwe ge re ba nea dilo tšeo ba di hlokago, eupša le rena re holega kudu ka gobane Jehofa o tla re šegofatša.—2 Bakorinthe 9:11-14.

Ke moka Paulo o ile a bolela ka bohlatse bjo bogolo bjo bo bontšhago gore Modimo o na le seatla se se bulegilego. O itše: “A go lebogwe Modimo bakeng sa mpho ya gagwe e sa lefelelwego le e sa hlalosegego.” (2 Bakorinthe 9:15) “Mpho e sa lefelelwego” ya Jehofa e akaretša dilo ka moka tše dibotse tšeo a re neago tšona ka Jesu Kriste. Ruri ga re na mantšu a go hlalosa mpho ye e bohlokwa kudu.

Re ka bontšha bjang gore re leboga dilo ka moka tšeo Jehofa le Jesu ba re diretšego tšona le tšeo ba sa tlago go re direla tšona? Tsela e nngwe ke ka go fana ka nako ya rena, matla le selo le ge e le sefe seo re nago le sona bakeng sa go hlankela Jehofa le go thuša ba bangwe go ithuta ka yena. Re ka dira se go sa šetšwe gore re humile goba re a diila.—1 Dikoronika 22:14; 29:3-5; Luka 21:1-4.

Mekgwa Yeo Ba Bangwe Ba Kgethago Go Neela Ka Yona Go Thekga Modiro Wa Lefase Ka Bophara

Go swana le Bakriste ba lekgolong la pele la nywaga, ba bantši lehono ba beela tšhelete ka thoko gomme ba e tsenya ka lepokising la phuthegong ya gabo bona la moneelo wa go thekga modiro wa lefase ka bophara. (1 Bakorinthe 16:2) Kgwedi le kgwedi, diphuthego di romela meneelo ye ofising ya Dihlatse tša Jehofa yeo e hlankelago naga ya gabo tšona. E bile go a kgonega gore le wena o romele moneelo ka go lebanya mokgatlong wa molao woo o dirišwago ke Dihlatse tša Jehofa nageng ya geno. E le gore o tsebe leina la mokgatlo woo wa molao wo o dirišwago ke Dihlatse tša Jehofa nageng ya geno, hle eya go www.pr2711.com/nso gomme o ikgokaganye le ofisi ya lekala ya Dihlatse tša Jehofa yeo e hlankelago naga ya geno. Mekgwa yeo o ka neelago ka yona še:

MENEELO

O ka ntšha moneelo ka go o romela ka akhaonto ya panka, ka karata ya panka goba ka karata ya mokitlana. Dinageng tše dingwe o ka ntšha moneelo o diriša wepesaete ya jw.org goba wepesaete e nngwe.
O ka neela ka tšhelete, mabenyabje goba dilo tše dingwe tša bohlokwa tša motho ka noši. Akaretša le lengwalo leo le bontšhago gore tšhelete yeo goba dilo tšeo ke moneelo wa go lebanya.

MENEELO YEO E ITHEKGILEGO KA MAEMO

Ye ke tšhelete yeo o neelago ka yona eupša e le yeo o ka e bušetšwago ge e ba o e nyaka.
Akaretša le lengwalo leo le hlalosago gore go ka direga gore tšhelete yeo o tle o e nyake.

MEKGWA E MENGWE YEO O KA NEELAGO KA YONA

Ka mo tlase go lokeleditšwe mekgwa e mengwe ya go ntšha meneelo ya go thekga modiro wa Mmušo lefaseng ka bophara. Pele o ntšha moneelo, thoma ka go ikgokaganya le ofisi ya lekala yeo e hlankelago naga ya geno gomme o botšiše gore ke mekgwa efe yeo e dirišwago nageng ya geno. Dinyakwa tša molao le melao ya lekgetho e a fapana, ka gona boledišana le motho yo a tsebago melao yeo gabotse pele o neela.

Inšorense: O ka ntšha moneelo wo ka go kgetha mokgatlo wa molao wo o dirišwago ke Dihlatse tša Jehofa gomme wa o ngwadiša gore o tšee inšorense ya gago ya bophelo goba thulaganyo ya go rola modiro/phenšene.

Diakhaonto tša Panka: Go ithekgile ka dinyakwa tša panka yeo motho a e dirišago, a ka dira gore mokgatlo e be mojabohwa wa tšhelete ya gagwe, a ngwala lengwalo la panka leo le bontšhago gore o nea mokgatlo bokae goba a dira gore mokgatlo e be mojabohwa wa tšhelete ya gagwe ge a rola modiro. Le gona a ka ngwala gore o mongwe wa mekgatlo yeo e dirišwago ke Dihlatse tša Jehofa o šale o tšea tšhelete yeo ge a hwile.

Di-stock le Di-bond: Motho a ka neela ka di-stock le di-bond go mokgatlo wa molao wo o dirišwago ke Dihlatse tša Jehofa. Le gona a ka ngwala tumelelano yeo go yona a laelago gore dilo tše di fetišetšwe go mokgatlo ka morago ga lehu la gagwe.

Mafelo: Ge e ba motho a na le lefelo goba moago wo o ka rekišwago, a ka neela ka wona go mokgatlo wa molao wo o dirišwago ke Dihlatse tša Jehofa. Ge e ba a dula moagong woo, a ka rulaganya gore a tšwele pele a dula moo go fihlela a ehwa.

Moneelo wa Ngwaga le Ngwaga: Motho a ka neela ka tšhelete go mokgatlo wa molao wo o dirišwago ke Dihlatse tša Jehofa gomme a dira tumelelano ya gore o tla diriša e nngwe ya tšhelete yeo ngwaga le ngwaga ge a sa phela. Motho yoo a ka fokoletšwa tšhelete ya lekgetho ngwageng woo a ntšhago moneelo woo ka wona.

Dikeno le Mekgatlo ya Semolao: Motho a ka rulaganya gore dithoto tša gagwe goba tšhelete di newe mokgatlo wo o dirišwago ke Dihlatse tša Jehofa ka morago ga ge a hwile. A ka dira seo ka go ngwala keno ya semolao goba tumelelano yeo go yona a bolelago gore mokgatlo wa Dihlatse tša Jehofa ke mojabohwa wa dilo tša gagwe. Tumelelano e bjalo e ka ba le mehola e itšego tabeng ya lekgetho.

O ka hwetša tsebišo e oketšegilego ya mabapi le go ntšha moneelo wa go thekga modiro wa lefase ka bophara wa Dihlatse tša Jehofa ka poroutšheng ya Charitable Planning to Benefit Kingdom Service Worldwide, yeo e hwetšagalago ka Seisemane le Sepanishi. Poroutšha ye e bolela ka mekgwa e fapafapanego yeo motho a ka neelago ka yona. Tsebišo yeo e lego ka poroutšheng ye e ka no se šome maemong a gago ka baka la melao ya lekgetho le melao e mengwe ya nageng ya geno. Ka gona ka morago ga go bala poroutšha ye, o swanetše go e ahlaahla le moeletši wa gago wa molao goba wa lekgetho. Ba bantši ba kgonne go thekga modiro wa rena wa lefase ka bophara e bile ba hweditše meputso ya lekgetho ka go neela ka e nngwe ya ditsela tše. Ge e ba poroutšha ye e le gona nageng ya geno, o ka kgopela kopi ya yona go mongwaledi wa phuthego ya geno.

Ge o nyaka go tseba mo go oketšegilego, o ka ikgokaganya le ofisi ya lekala leo le hlankelago naga ya geno.