Go Neela Ditaba Tše Lokilego—Ka go Boledišana le Batho
1 Go ya ka puku-ntšu, poledišano ke “go abelana maikwelo, dikgopolo, dipono, goba dikakanyo ka molomo.” Eupja o ka thoma bjang poledišano yeo e theilwego Beibeleng ge batho bao o gahlanago le bona e ka ba e le bao ba ganetšago bodumedi goba ba swaregile ka kudu ka ditaba tša bona ka noši? Jesu o ile a botšiša dipotšišo go dira gore batheetši ba akaretšwe.—Joh. 4:9-15, 41, 42.
2 Re swanetše go rapela Modimo ka go tšwa pelong gore a re thuše go hwetša batho ba dipelo tše di botegago gomme a re bulele tsela ya go boledišana le bona. Go nea bohlatse go bonolo ge e ba re lebelela mong wa ntlo o mongwe le o mongwe e le yo e ka bago mohlanka wa Jehofa. Boemo bjo bja monagano bo tla re thuša go fetišetša therešo ka tsela e borutho le ya kgonthe yeo e tlago go gogela bao ba kgahlegago.
RE DIRIŠE SEO RE NAGO LE SONA
3 Puku ya Go Boledišana e nea matseno a mantši a mabotse go matlakala 9-15. A mantši a a a diriša dipotšišo ka mo go holago. Ge mong wa ntlo a araba potšišo, re theetše ka tlhompho gomme ka morago re arabe ka tsela yeo e tlago go bontšha mong wa ntlo gore re etše hloko seo a se boletšego.—Ba-Kol. 4:6.
4 Ee, ge o botšiša potšišo, ga o tsebe tsela yeo mong wa ntlo a tlago go araba ka yona. Itokišetše go beakanya poledišano ya lena ka mo go swanetšego. Leka go boloka poledišano e tšwela pele ka go rola tsebišo e oketšegilego yeo e tšwago Beibeleng yeo e lego mabapi le tšeo di mo kgahlago le ka go botšiša dipotšišo tše dingwe tšeo di nago le tlhaologanyo.
LOKIŠETŠA E SA LE PELE
5 O ka ba o šetše o tlwaelane le kgopolo ya kakaretšo ya batho tšhemong ya lena. Ge e ba go le bjalo, gona kgetha matseno ao e tlago go ba a holago kudu tšhemong ya lena e itšego ka pukung ya Go Boledišana. Go kgokaganya a mangwe a matseno a le Sehlogo sa gona bjale sa Poledišano go ka go hola kudu. Thoma poledišano ya gago ka dilo tšeo o dumelago gore di kgoma mong wa ntlo, hlalosa bothata ka bokopana, gomme ka morago o lebiše tharollong ya Beibele. Ge a bolela, hlalosa ka mo go swanetšego, e sego ka go ntšha diphošo go seo a se bolelago. Go thabela ga gago dikgopolo le maikwelo a gagwe go swanetše go mo kgothaletša go tšwela pele a boledišana le wena. Leka go hwetša dintlha tšeo le dumelelanago ka tšona gomme o bolele ka tšona. Boloka poledišano e le yeo e swanetšego ka go gatelela ditšhegofatšo tša Mmušo e le tharollo ya Beibele bakeng sa mathata a motho.
6 Lebelela dikgopolo tšeo di sa swanego e le dinotlelo tša poledišano yeo e tšwelago pele. Ge e ba mong wa ntlo a rata go beelana mabaka, mo gongwe o ka botšiša gore, “Na o kile wa e nagana ka mokgwa wo?” Ka gona šupa go seo Lentšu la Modimo le se bolelago ka taba. Ge e ba o hwetša gore motho o gana go theetša mabaka, o se ke wa gapeletša gore a amogele seo o se boletšego. Go e na le moo, phetha ka tlhaloso ya bogwera, o tlogele tsela e bulegetše sebaka seo se tlago sa go neela ditaba tše di lokilego go yena.—Die. 12:8, 18.
7 Batho ba bangwe ba rata kudu go bolela ge o gahlana le bona ka mo go sa rulaganyetšwago. O se ke wa dika-dika go thoma dipoledišano le batho bao o gahlanago le bona setarateng goba bao ba šomago goba ba iketlile magaeng a bona. Mo gongwe ba ka amogela kgahlego ya gago ya kgonthe modirong wa bona, le gona mo gongwe o ka kgona go lebiša poledišano tabeng ya kholofetšo ya Beibele ya gore go se go ye kae lefase le tla fetoga paradeise. Ge o thoma poledišano, leka go e dira phihlelo e kgahlišago go mong wa ntlo. Leka ka matla gore o tlogele motho a e-na le kgopolo e botse kudu ka Modimo, Lentšu la gagwe le bahlanka ba gagwe. Ka tsela ye, gaešita lege e ba o sa atlege mathomong go fihlelela pelo ya gagwe, e ka ba yo a amogelago kudu nakong e tlago ge Hlatse e etela.