Lokišetša Matseno A Gago Bakeng Sa February

1 Kgweding ya February re neela puku ya Khutšo ya Kgonthe. Puku ye e botse e ka dirišetšwa go neela ditaba tše di lokilego ka ditsela tše di fapa-fapanego. Ga go na pelaelo gore o tla hwetša e le mo go holago go ithuta le go diriša matseno a tee goba ka moka a a latelago a šišintšwego.

2 Lefase—Legae la Motho la ka go sa Felego: Ge e ba o rata go thoma poledišano le batho bao ba tshwenyegilego ka lefase le tikologo ya lona, leka sehlogo se se rego, “Lefase le tla Dula le le Gona e le Legae la Motho.” Sehlogo se se kgona go feto-fetoga ka mo go lekanego go tanya šedi ya batho ba sekametšego kudu go tša lapa, barati ba tlhago le bo-ra-tikologo. Lengwalo le le swanetšego go dirišwa ke Mmoledi 1:4. Mo gongwe o ka rata go gogela tlhokomelo ya mong wa ntlo go dirapa 1 le 7 go matlakala 94-5 ka pukung ya Khutšo ya Kgonthe.

3 Ka morago ga go itsebiša, mo gongwe o ka re:

◼“Ke etetše ka nakwana gore ke tle ke bolele ka taba yeo e tshwenyago bontši bja rena kudu. Lefase ke legae la rena, gomme ga go na pelaelo gore o tshwenyegile ka tsela yeo le senywago ka yona. Bo-ra-thutamahlale le bo-ra-tikologo ba dula ba lemoša gore ge tšhilafalo e ka tšwela pele, lefase e ka ba le le sa dulegego. Na o bona eka bothata bjo bo na le tharollo? [Letela mong wa ntlo gore a hlalose ge e ba a kganyoga go dira bjalo] Ke rata go go bontšha ka boripana seo Beibele e se bolelago ka bokamoso bja lefase go Mmoledi 1:4.” Bala temana gomme o mmontšhe ditlhaloso dirapeng 9 le 11 go matlakala 96-7 a puku ya Khutšo ya Kgonthe.

4 Bobe bo tla Tlošwa: Go ipiletša go batho bao ba tshwenyegilego ka bosenyi, bošoro le ntwa, mo gongwe o ka rata go bolela le bona ka sehlogo se rego “Ba Babe ba tla Fedišwa e le Gore Bao ba Ratago Modimo ba Kgone go Thabela Bophelo le Khutšo.” Psalme 37:9-11 e bolela ntlha ye gomme e hlaloswa ka pukung ya Khutšo ya Kgonthe, go matlakala 86-7, dirapa 1-3.

5 Ka morago ga matseno ao a tlwaelegilego mo gongwe o ka re:

◼“Na o nagana gore nako e tla ka ya tla ye ka yona re ka se swanelego go lwantšhana le bosenyi le bošoro? [Letela karabo ya mong wa ntlo.] Beibele e šupa tharollo ya sa ruri go Psalme 37:9-11.” Bala lengwalo gomme o phetle go matlakala 86-7 ka pukung ya Khutšo ya Kgonthe bakeng sa gore o bale dikarolo tše itšego go dirapa 1-3.

6 Kholofelo ya Tsogo: Ka ge ka nako e nngwe o mongwe le o mongwe a ile a lahlegelwa ke moratiwa wa gagwe lehung, gona e ka ba mo go kgothatšago go thoma poledišano ka sehlogo se se rego “Pušo ya Mmušo Bakeng sa go Bušetša Bophelo go Baratiwa ba Rena ka Tlase ga Maemo a Paradeise.” O ka diriša Johane 5:28, 29 goba Ditiro 24:15 gomme wa bontšha ditlhaloso mabapi le sehlogo ka go puku ya Khutšo ya Kgonthe go matlakala 102-5, dirapa 20-4.

7 O ka thoma poledišano ya gago ka matseno a boraro go letlakala 14 la puku ya “Go Boledišana” gomme wa re:

◼“Nako le nako ba bantši ba rena ba nagana ka baratiwa bao re lahlegetšwego ke bona lehung. Na o nagana gore re ka buša re ba bona gape? [Nea mong wa ntlo sebaka sa go bolela.] Batho ba bantši bao re boledišanago le bona ba a makala ge ba ekwa seo Lentšu la Modimo le se holofeditšego le gore kholofetšo ye e tla phethagatšwa gona mo lefase. Ela hloko kholofetšo ya Beibele go . . . ” Diriša Johane 5:28, 29 goba Ditiro 24:15, gomme o kgokaganye ditlhaloso tšeo di lego go dirapa 20-4 go matlakala 102-5 ka pukung ya Khutšo ya Kgonthe.

8 Lokišetša gomme o diriše a tee a matseno a goba ka moka ga ona kgweding ye. Ga se gwa swanela go ba thata go hwetša ditsopolo tše di swanetšego ka pukung lege e le efe yeo o e dirišago. Ge e-ba go sa bontšhwe kgahlego, neela pampišana e ahla-ahlago taba e tswalanago le sehlogo.