Go Thoma Poledišano Ge O Boela

1 Gore o kgone go thoma poledišano le motho yo a bontšhitšego kgahlego ketelong ya mathomo, leka go aga godimo ga seo se fihleletšwego ka lekga lela la mathomo. Morero ke go thuša motho go bona bohlokwa bja dikgopolo gotee le dipuku tšeo a di tlogeletšwego pejana.

2 Dira nako ya go lokišeletša leeto la go boela. Kgetha mantšu ao a tsošago kgahlego ao a lego ka pukung yeo o e sepetšago. Diriša bohlale bakeng sa go lemoga gore o ka akaretša taba e kaakang le gore o ka dula nako e kaakang. Gantši go boledišana ka bokopana ka ntlha e tee goba tše pedi go botse kudu ka ntle le ge go bontšhwa kgahlego e sa tlwaelegago. Akanya ka dihlogo tše di latelago:

3 Ke maemo afe a nakong e tlago ao re ka letelago gore a be gona lefaseng ge e ba lefase e tla ba legae la motho la ka mo go sa felego? Poledišano ye e theilwe go Kutollo 11:18 le Jesaya 35:1, 2, bjalo ka ge di hlaloswa le go bontšhwa ka seswantšho pukung ya Khutšo ya Kgonthe go matlakala 97-8.

Poledišano e ka thongwa ka gore:

◼“Ge ke be ke tlile nakong e fetilego, re boledišane ka taba ya kamoo Modimo a rerilego gore lefase le be gona ka mo go sa felego. Eupja ke go tlogeletše potšišo ye gore o šale o e nagana: Ke maemo afe ao a swanetšego go ba gona ka nako yeo? Ke thabetše go boa le go tla go abelana le wena karabo ya Beibele.”

4 Seo re swanetšego go se dira gore re hwetše bophelo ka tlase ga Mmušo wa Modimo. Sehlogo se se ka godišwa ka go diriša Doiteronomio 30:15, 16, 19 le Johane 4:23 bjalo ka ge go hlaloswa ka pukung ya Khutšo ya Kgonthe go letlakala 93.

Mo gongwe o ka thoma ka gore:

◼“Ke ipshinne ka go boledišana le wena ka kholofetšo ya Modimo ya go fediša bokgopo. [Mo kgopele gore a tle le puku ya gagwe ya Khutšo ya Kgonthe.] Potšišo ye o mongwe le o mongwe wa rena a swanetšego go nagana ka yona ke ya gore, Re ka dira’ng gore re be gona e le gore re holwe ke phetogo ye? E-kwa seo Jesu a se boletšego go Johane 4:23, bjalo ka ge e tsopotšwe ka pukung ya gago go letlakala 93.”

5 Ke dinyakwa dife tšeo di tlago go kgotsofatšwa lefaseng la Paradeise? O ka diriša Psalme 67:6, 7 goba 72:16 goba Mika 4:3, 4 gotee le Jesaya 65:21, 22. Ditlhaloso tše di swanetšego di newa ka pukung ya Khutšo ya Kgonthe go matlakala 97-100.

Mo gongwe mantšu a gago a mathomo e ka ba a rego:

◼“Ge ke be ke tlile mo [bolela letšatši], re ile ra bolela ka kholofetšo ya Modimo ya go tsošetša baratiwa ba ba hwilego lefaseng la Paradeise ka Morwa wa gagwe. Tše dingwe tša ditšhegofatšo tšeo di tlago go thabelwa ka nako yeo ke dife? Puku ya gago e bontšha ka Mangwalo gore tše dingwe e tla ba dife.” Motheong wa ditsopolo tše di lego ka mo godimo, bala lengwalo le letee goba a mabedi go tšwa Beibeleng le ditlhaloso tše di tšwago ka pukung, mohlomongwe go dirapa 11, 15 le 16 go matlakala 97-100.

6 Batho ba bantši ba bontšhitše go thabela molaetša wa Mmušo wo re o bolelago. Ba bantšinyana ba ile ba amogela dipuku tša rena. Maemong a mangwe, re lemogile go thabelwa ga poledišano ya rena ya Mangwalo ka lekga la mathomo. Ka gona, dirang maeto a go boela go bohle bao ba bontšhitšego go thabela, gomme le leke go ba ruta therešo.—Mat. 10:11; 28:19, 20; Joh. 21:17; Kut. 22:17.