Na Dithibelo di a go Nyamiša?

DITHIBELO! Ruri ga go le o tee yo a di nyakago; eupja ka moka ga rena re swanetše go lebeletšana le tšona go fihla bokgoleng bjo itšego. Lega go le bjalo, na ka dinako tše dingwe o nyama ka gobane bophelo bja gago bo bonagala bo segetšwe mellwane kudu? Mohlomongwe o be o tla ikwa kaone ge o ka fetola pono ya gago. Go e na le go ngongorega ka seo o ka se kego wa kgona go se dira, ke ka baka la’ng o sa ikhole ka mo go feletšego ka ditokologo lege e le dife tše o di thabelago?

Ka mohlala, ba bantši ba ba diilago go tša boiphedišo ba duma eka ba ka be ba humile. Lega go le bjalo, le ge bodiidi bo lekanyetša seo re ka kgonago go se dira tshepedišong ye ya dilo, dilo tše bohlokwa bophelong di a hwetšagala bakeng sa bohle. Batho ba diilago gotee le bahumi ba a ratana, ba tsena lenyalong, ba godiša bana, ba thabela bogwera bjo bobotse le tše dingwe. Se bohlokwa kudu ke gore batho ba diilago gotee le bahumi ba tseba Jehofa gomme ba lebeletše pele lefaseng le lefsa leo le holofeditšwego. Batho ba diilago gotee le bahumi ba gola bohlaleng bja Bokriste gotee le tsebong, e lego tše di lego kaone go feta mahumo. (Diema 2:1-9; Mmoledi 7:12) Bohle—bahumi le badiidi—ba ka itirela leina le lebotse le Jehofa. (Mmoledi 7:1) Phuthego ya Bokriste mehleng ya Paulo e be e dirilwe kudu ke batho ba boemo bja tlase—ba bangwe ba bona e be e le makgoba—ao a dirišitšego ka bohlale tokologo lege e le efe yeo maemo a bona a bego a e dumelela.—1 Ba-Korinthe 1:26-29.

Bohlogo bja Mangwalo

Lenyalong la Bokriste, mosadi o ikokobeletša monna wa gagwe—e lego thulaganyo yeo e reretšwego go hola lapa ka moka. (Ba-Efeso 5:22-24) Na mosadi o swanetše go ikwa a kokobeditšwe ka lebaka la se? Le gatee. Monna le mosadi ke sehlopha. Bohlogo bja monna ge bo dirišwa ka tsela ya go swana le ya Kriste, bo bea dithibelo tše sego kae kudu go mosadi wa gagwe, gomme bo mo tlogelela dibaka tše dintši tša go ka fihlelela bokgoni bja gagwe. (Ba-Efeso 5:25, 31) “Mosadi wa sethakxa” wa Diema kgaolo 31 o be a swaregile ka mešomo e mentši e kgahlišago le e hlahlago. Ka ntle le pelaelo, go ikokobeletša monna wa gagwe e be e se mo go ferekanyago go yena.—Diema 31:10-29.

Ka mo go swanago, ga go na tokišetšo ya gore mosadi a etelele pele banna ba swanelegago ka phuthegong ya Bokriste. (1 Ba-Korinthe 14:34; 1 Timotheo 2:11, 12) Na basadi ba Bakriste ba swanetše go belaela ka tlase ga thibelo e bjalo? Aowa. Ba bantši ba leboga kudu go bona sebopego seo sa tirelo ya Bokriste se hlokometšwe ka mokgwa wa pušo ya Modimo. Ba thabela go holwa ke bodiši le thuto ya bagolo ba kgethilwego gomme ba ipoloka ba swaregile ka mošomo o bohlokwa wa boboledi le wa go dira barutiwa. (Mateo 24:14; 28:19, 20) Basadi ba Bakriste ba phetha go gontši modirong wo, gomme se se ba tlišetša kgodišo mahlong a Jehofa Modimo.—Psalme 68:11; Diema 3:35.

Dithibelo go Bafsa

Bafsa le bona ka dinako tše dingwe ba belaela ka gore bophelo bja bona bo thibetšwe kudu, gantši ka gobane ba le ka tlase ga taolo ya batswadi ba bona. Eupja se le sona ke sa Mangwalo. (Ba-Efeso 6:1) Bakriste ba bohlale ba bafsa go e na le go befedišwa ke dithibelo tše batswadi ba bona ba di beago godimo ga bona, ba tsepelela go thabeleng ditokologo tšeo ba nago le tšona—gantši go akaretša tokologo boikarabelong bjo boima. Ka gona ba ka diriša ka mo go holago matla le maemo a bona a bofsa go itokišetša bophelo bja ge ba godile.

Yo e kilego ya ba molebeledi wa tikologo kua Brazil o sa gopola gabotse mošemane wa nywaga e 12 sehlopheng se senyenyane sa ka thoko yo a bego a lekanyeditšwe go seo a bego a ka kgona go se dira. Yo a bego a ikarabelela ka dipego o be a swaregile modirong wa boiphedišo gomme a sa kgone go nea tlhokomelo e ntši sehlopheng, eupja o ile a rulaganyetša gore lesogana le le mo thuše. Le ile la tseba moo difomo ka moka di bego di le gona gomme le be le hwetšagala ka mehla bakeng sa go nea thušo. Kgahlego ya lona e be e kgothatša, gomme e be e le mogwera yo a botegago bodireding bja tšhemo. Lesogana leo gona bjale ke mogolo yo a kgethilwego.

Go na le maemo a mantši ao a lekanyetšago tokologo ya motho. Ba bangwe ba šitišwa ke bolwetši. Ba bangwe ba ka malapeng a aroganego gomme ba hwetša tokologo ya bona e lekanyeditšwe ke dinyakwa tša molekane yo a sa dumelego. Le ge bao ba phelago ka dithibelo ba ka duma eka dilo di ka be di le ka mo go fapanego, ba sa dutše ba ka phela maphelo a kgotsofatšago. Makasine wo o rwele dipego tše dintši tša batho ba bjalo bao e ilego ya ba ba kgothatšago kudu go ba bangwe, ka gobane ba ithekga ka Jehofa gomme ba diriša maemo a bona gabotse kudu ka mo go tletšego.

Ge a bolela ka boemo bjo bo tlwaelegilego bja mehleng ya gagwe, moapostola Paulo o itše: “Ge o biditšwe o le mohlanka, se belaele selo; eupja le ge o ka kgona go lokollwa, o ikhole ka seo ka go fetiša.” (1 Ba-Korinthe 7:21, PK) A pono e leka-lekanego gakaakang! Maemo a mangwe a a fetoga. Bafsa ba a gola. Balekane bao ba ganetšago ka dinako tše dingwe ba amogela therešo. Maemo a tša boiphedišo a tsebja e le ao a kaonefalago. Batho bao ba babjago ba ka kaonefala. Maemong a mangwe, dilo mo gongwe di ka se fetoge go fihla ge lefase le lefsa la Jehofa le e-tla. Lega go le bjalo, ke’ng seo se tlago go hwetšwa ka go belaela ka lebaka la ge motho a sa kgone go dira seo ba bangwe ba kgonago go se dira?

Na o kile wa lebelela dinonyana tše di akaletšego sebakeng ka godimo ga lefase gomme wa kgahlwa ke botse le tokologo ya mesepelo ya tšona? Mohlomongwe o ile wa duma eka o ka be o kgona go fofa ka tsela yeo. Ee, o ka se kgone gomme le ka mohla o ka se ke wa kgona go fofa go etša ge dinonyana di fofa! Eupja ka mo go kwagalago ga o belaele. Go e na le moo, o thabela bokgoni bja gago bjo o bo neilwego ke Modimo. O tšwela pele gabotse ka go itshepelela mo godimo ga lefase. Ka mo go swanago, go sa šetšwe boemo lege e ka ba bofe bophelong bja rena, ge e ba re bea tlhokomelo go seo re kgonago go se dira go e na le go belaela ka seo re ka se kgonego go se dira, bophelo e tla ba bjo bo kgotsofatšago gomme re tla hwetša lethabo tirelong ya Jehofa.—Psalme 126:5, 6.

[Seswantšho go letlakala 28]

Na o ikwa eka batswadi ba gago ba go ageleditše ka legora?