Bontšhang go Naganela ba Bangwe—Karolo 1
1 Re thabela go bona tšwelopele ya batho ba Jehofa yeo e feleleditšego ka palo e golago ya diphuthego. Mafelong a mangwe, kudu-kudu metseng e megolo, meago ya Diholo tša Mmušo e dirišwa ka mo go tletšego mo ka dinako tše dingwe go nyakegago gore diphuthego tše mmalwa di diriše Holo e tee ya Mmušo. Boemo bjo bo nyaka go naganelana mo go oketšegilego ga bohle ba ba akaretšwago.
2 Phuthego e nngwe le e nngwe yeo e dirišago Holo ya Mmušo e swanetše go e tlogela e le boemong bja bothakga gomme e beakantšwe gabotse bakeng sa banababo rena bao ba tsenago ka morago. Ditulo di swanetše go bewa ka bothakga, dipuku le ge e le dife tšeo di lego tafoleng ya dipuku di swanetše go bewa madulong gomme dilo le ge e le dife tša motho ka noši tše di tlogetšwego di gašane ka Holong ya Mmušo di swanetše go bokanywa. Dintlwana di swanetše go tlogelwa di hlwekile, le kgonthišetšeng gore sesepe, ditoulo le pampiri ya ka ntlwaneng ya boithomelo tše di dirišwago di okeditšwe gomme maleke a ditlakala a kgothotšwe.
3 Ge seboka se sengwe se rulaganyeditšwe go thoma kapejana, bao ba šalago ka morago ga seboka sa pele ga se ba swanela go diega ka mo go sa nyakegego ba šitiša ditokišetšo tša seboka se se latelago. Mehlamu e nabilego e ka dira gore go kgobokanwe ka bontši kudu kgorong gomme ya diegiša banababo rena gore ba fetše go rulaganyetša seboka se se latelago. Sekgoba sa go emiša dikoloi Holong ya Mmušo e ka ba se senyenyane, gomme e tla ba e le botho go tloga kapejana e le gore bao ba tlago ba be le lefelo la go emiša dikoloi. Ka lehlakoreng le lengwe, bao ba yago sebokeng se se latelago ga se ba swanela go fihla e sa le ka pela kudu ba baka pitlagano e sa nyakegego kgorong, phapošing ya go bea merwalo le lefelong la go emiša dikoloi.
4 Moo diphuthego tše mmalwa di akaretšwago, go nyakega ka mo go kgethegilego gore go be le tirišano ya kgaufsi ge go dirwa dithulaganyo tša beke le beke tša go hlwekišwa ga Holo ya Mmušo. Gantši diphuthego di šielana ka dinako tše di beilwego. Ge phuthego ya lena e le yona e ikarabelago, kgonthišetšang gore modiro wa go hlwekiša o dirwa ka botlalo le gona ka pela. Diphuthego tše dingwe tše di dirišago holo gona di ka se be le lebaka la go belaela.
5 Ka dinako tše dingwe go a nyakega gore phuthego e nngwe le e nngwe e fetoše dinako tša yona tša diboka, go swana le nakong ya ge molebeledi wa tikologo a etela. Ge e ba phuthego e nngwe e kgomega, bagolo ba swanetše go tsebiša phuthego e nngwe nako e sa le gona e le gore ba kgone go tsebiša bagoeledi ba bona ka pela ka mo go kgonegago. Le gona, ge e ba go rulaganyeditšwe modiro o mongwe o dumeletšwego bjalo ka Sekolo sa Tirelo ya Bobulamadibogo, seboka sa bagolo ba tikologo goba lenyalo, diphuthego tše dingwe le balebeledi ba tikologo ba bangwe ba ba kgomegago go swanetše go ikopanywe le bona nako e sa le gona; ka go rialo ba ka se rulaganye go diriša Holo ya Mmušo ka nako yeo.
6 Go ka ba go e-na le diholo tše di dirišwago ke diphuthego tše di abetšwego ditikologong tše di fapanego. Ke gabohlokwa gore balebeledi ba basepedi bao ba etelago diholong tše ba dule ba tsebišana ka diketelo tše di batamelago tšeo di rulaganyetšwago. Dipeakanyo tša motsotsong wa mafelelo goba mathata a mangwe a ka tšwelela ge balebeledi ba babedi ba basepedi ba rulaganyetša diketelo ka beke e tee.
7 Go naganela ba bangwe ka lerato, poledišano e botse, go rulaganya dilo nako e sa le gona le tirišano di tla thuša go boloka tswalano e borutho e lego gona magareng ga diphuthego, gomme di tla kgonthiša gore “tšohle di yê ka bothakxa le ka molaô.”—1 Ba-Kor. 14:40.