Matseno a ka Dirišwago Bodireding bja Tšhemo

Ditlhaloso: Gore o tle o tsebe matseno ao o ka a dirišago ge o le bodireding bja tšhemo, ruri o swanetše go ela hloko dilo tše tharo: (1) Molaetša woo re laetšwego go o bolela ke “ditaba tše tše di lokilego tša mmušo.” (Mat. 24:14, NW) Gaešita lege re sa bolele ka ona ka go lebanya, fela re swanetše go gopola ka go thuša batho go bona kamoo o nyakegago ka gona goba mo gongwe go tloša dithibelo tseleng tšeo di ba šitišago go o ela hloko. (2) Go kgongwa e le ka kgonthe ke katlego ya batho bao re kopanago le bona go tla re thuša go fihlelela dipelo tša bona, go etša ge go thušitše Jesu. (Mar. 6:34) Go kgahlišwa mo go bjalo ga kgonthe go ka bontšhwa ke go myemyela mo go borutho le mokgwa wa bogwera, go rata go theetša ge ba bolela gomme ra dira gore dipolelo tša rena e be tšeo di kwalago, gotee le go diriša ga rena dipotšišo tšeo di ba kgothatšago gore ba bolele se sengwe, e le gore re tle re kwešiše kgopolo ya bona kaone. Ba-Korinthe ba Pele 9:19-23 e bontšha gore moapostola Paulo o ile a dira gore go nea ga gagwe ditaba tše di lokilego go dumelelane le maemo a batho bao a bego a bolela le bona. (3) Dikarolong tše dingwe tša lefase baeng ba lebeletšwe gore ba ele hloko mekgwa e mengwe pele ga ge ba ka bolela lebaka leo ba etetšego ka lona. Mafelong a mangwe mong wa ntlo mo gongwe a ka lebelela gore moeng yo a se a laletšwago a bolele taba ya gagwe kapejana.—Bapiša le Luka 10:5.

Matseno a latelago a bontšha kamoo Dihlatse tše di nago le tsebo di thomago ka gona dipoledišano. Ge e ba matseno ao o a dirišago mo nakong ye e lego ka sewelo moo a bulago dipoledišano, gona leka a mangwe a matseno a. Ge o dira bjalo, gona ka ntle le pelaelo o tla rata go a bolela ka mantšu ao e lego a gago. Le gona, o tla hwetša gore ke mo go thušago go hwetša dikeletšo Dihlatseng tše dingwe ka phuthegong ya geno, bao ba atlegago gabotse ge ba boledišana le batho.

BEIBELE/MODIMO

● ‘Dumela. Ke etetše ka nako e nyenyane go tla go abelana molaetša o bohlokwa le wena. Hle anke o hlokomele seo se bolelwago mo Beibeleng. (Bala lengwalo le le swanago le Kutollo 21:3, 4.) O gopola’ng ka se? Na se kwala e le se sebotse go wena?’

● ‘Re boledišana le baagišane ba rena mabapi le moo re ka hwetšago thušo e holago gore re bape le mathata a bophelo. Batho ba bantši nakong e fetilego ba ile ba bala Beibele. Eupja re phela nakong yeo mekgwa e fetogago. O gopola’ng ka yona? Na o dumela gore Beibele ke Lentšu la Modimo, goba na o bona gore ke fela puku e botse e ngwadilwego ke batho? . . . Ge e ba e e-tšwa go Modimo, gona o gopola gore motho a ka kgonthiša bjang seo?’ (Bona matlakala 52-62, tlase ga hlogo ya ditaba e kgolo ya “Beibele.”)

● ‘Ke thabišitšwe ke go go hwetša gae. Ke abelana le baagišane ba-ka taba e kgothatšago yeo e tšwago Beibeleng (goba Mangwalong a Makgethwa). Na o šetše o kile wa ipotšiša ka gore: . . . ? (Botšiša potšišo yeo e tlago go dira gore le tsene sehlogong seo o se dirišago sa poledišano.)’

● ‘Re kgothaletša batho go bala Beibele. Dikarabo tšeo e di neago dipotšišong tše bohlokwa gantši di makatša batho. Ka mohlala: . . . (Ps. 104:5; goba Dan. 2:44; goba e nngwe).’

● ‘Re etela ka nako e nyenyane baagišane ba rena lehono. Batho ba bangwe bao re bolelago le bona ba holofela Modimo. Ba bangwe ba hwetša go le thata go mo dumela. Wena o ikwa bjang? . . . Beibele e re kgothatša go ela hloko seo se bolelwago ke legohle le le bonagalago. (Ps. 19:1) Motho yo melao ya gagwe e bušago dilo tše tša legodimo o bile o re neile tlhahlo e holago. (Ps. 19:7-9)’ (Bona le matlakala 332-338, 417-422, tlase ga hlogo ya ditaba e kgolo ya “Modimo” le ya “Tlholo.”)

BOKAMOSO/TŠHIRELETŠEGO

● ‘Dumela. O kae? . . . Re ikemišeditše go abelana le baagišane ba rena kgopolo e lebanego ka bokamoso. Na ye ke tsela yeo o lekago go lebelela bophelo ka yona? . . . Na o hwetša gore maemo a mangwe a dira gore go be thata go dira se? . . . Ke hweditše gore Beibele e thuša kudu tabeng ye. E hlalosa ka mo go kwalago maemo ao a lego gona mehleng ya rena, eupja e bile e hlalosa seo a se bolelago gomme e re botša seo mafelelo e tlago go ba ona. (Luka 21:28, 31)’

● ‘Dumela. Leina la-ka ke ——. La gago ke wena mang? . . . Ke kgothatša batho ba bafsa bao ba swanago le wena gore ba ele hloko bokamoso bjo bo kgahlišago bjoo Beibele e re huparetšego bjona. (Bala lengwalo le le swanago le Kutollo 21:3, 4.) Na se se kwala e le se sebotse go wena?’

BOKEBEKWA/GO LOTEGA

● ‘Dumela. Re boledišana le batho ka taba ya go lotega ga bona. Go na le bokebekwa bjo bontši bjo bo re dikologilego gomme bo kgoma maphelo a rena. Na o gopola gore nako e tla tla yeo ka yona batho bao ba swanago le wena le nna re tlago go kgona go sepela mekgotheng bošego gomme re kwe re lotegile? (Goba, Na o bona gore motho o mongwe le o mongwe o na le sehlare sa kgonthe mathateng?) . . . (Die. 15:3; Ps. 37:10, 11)’

● ‘Leina la-ka ke——. Ke dula gona mo motseng. Ge ke dutše ke sepela mesong ye, ruri ke hlokometše gore batho bohle ba bolela ka (bolela ka bokebekwa bjo bo bilego gona e sego kgale motseng goba taba e nngwe yeo e kgomago lefelo leo). O gopola’ng ka se? . . . Na go na le selo seo o bonago gore se ka thuša go dira maphelo a rena gore e be ao a šireletšegilego kudu? . . . (Die. 1:33; 3:5, 6)’

BOKGOPO/MAHLOKO

● ‘Na o šetše o kile wa ipotšiša gore: Na Modimo ruri o ela hloko bokgopo le mahloko ao batho ba welwago ke wona? . . . (Mmo. 4:1; Ps. 72:12-14)’ (Bona le hlogo ya ditaba e kgolo ya “Mahloko” le “Kgothatšo.”)

BOPHELO/LETHABO

● ‘Re etela baagišane ba rena gore re hwetše batho bao ba kgongwago e le ka kgonthe ke seo e lego morero wa bophelo. Batho ba bantši ba thabile. Eupja ba bile ba lebana le mathata a mantši. Ge re dutše re tšofala, ruri re lemoga gore bophelo e ba bjo bokopana kudu. Na se ke sona seo bophelo bo bego bo reretšwe go ba sona? O ikwa bjang ka se? . . . (Bolela ka morero wa mathomo wa Modimo ka ge o bonagatšwa Edene; o bolele ka Johane 17:3 le Kutollo 21:3, 4.)’ (Bona le matlakala 101-106, tlase ga hlogo ya ditaba e kgolo ya “Bophelo.”)

● ‘Lehono re botšiša baagišane ba rena seo ba se gopolago ge ba bala ka Dibeibeleng tša bona polelo “bophelô byo bo sa felexo.” Ke mo go kgahlišago ka mo go kgethegilego ka gobane polelo yeo e tšwelela ka Beibeleng ka makga a ka bago a 40. Bophelo bjo bo bjalo bo be bo ka bolela’ng go rena? . . . Re ka bo hwetša bjang? (Joh. 17:3; Kut. 21:4)’

● ‘Re boledišana le batho bao ba kgongwago e le ka kgonthe ke seo bophelo bo lego sona lehono. Ba bantši ba rena re thabišwa ke go ba ba phelago, eupja batho ba bantši ba botšiša ka gore, Na bophelo bjo bo thabišago e le ka kgonthe bo ka kgonega? O ikwa bjang ka se? . . . O be o ka bolela gore e nngwe ya ditšhitišo tše dikgolo tša lethabo lehono ke efe? . . . (Ps. 1:1, 2; ditemana tše dingwe tšeo di ka swanelago seo se kgomago mong wa ntlo)’

BOTŠOFADI/LEHU

● ‘Na o šetše o kile wa ipotšiša lebaka leo ka lona re tšofalago le go hwa? Dipshinyaleraga tše dingwe tša lewatle di phela makgolo a nywaga. Dihlare tše dingwe di phetše ka dikete tša nywaga. Eupja batho ba phela feela nywaga e 70 goba e 80 gomme ba hwa. Na o šetše o kile wa botšiša lebaka? . . . (Ba-Roma 5:12) Na boemo bjoo bo tla ba bja fetoga? . . . (Kut. 21:3, 4)’

● ‘Na o šetše o kile wa botšiša ka gore: Na lehu ke mafelelo a dilo tšohle? Goba na go na le selo se sengwe gape ka morago ga lehu? . . . Beibele e araba potšišo lege e le efe yeo re ka e botšišago ka lehu. (Mmo. 9:5, 10) Le gona e bontšha gore go na le kholofelo ya kgonthe ya batho bao ba dumelago. (Joh. 11:25)’ (Bona le matlakala 248-254 le 225, tlase ga hlogo ya ditaba ya “Lehu” le “Kgothatšo.”)

DITIRAGALO TŠA MO NAKONG YE

● ‘Dumela. Leina la-ka ke——. Ke moagišane wa gago yo a tšwago (bolela setarata goba lefelo). Na o bone ditaba thelebišeneng bošegong bja maabane? . . . Pego yeo e bego e le (bolela ka taba e nngwe ya gona bjale yeo go bolelwago ka yona kudu), o gopola’ng ka yona? . . . Ga se taba e makatšago go kwa batho ba botšiša ka gore, Lefase le le lebile kae? Rena ka ge re le Dihlatse tša Jehofa re dumela gore re phela go seo Beibele e se bitšago ‘mehla ya bofelo.’ Hlokomela tlhaloso ye ye e bolelwago ka botlalo go 2 Timotheo 3:1-5.’ (Bona le matlakala 305-314.)

● ‘Na o badile se pampiring ya ditaba bekeng ye? (Bontšha setsekana se se swanetšego.) O gopola’ng . . . ?’

● ‘Ke rata go go botšiša potšišo. Ge e ba o be o ka ikgethela, ruri ke bothata bofe bja mathata a mantši ao a lebanego le lefase mo nakong ye bjo o bego o ka rata go bona bo ka lokišwa pele? (Ka morago ga go tseba seo e lego se se kgomago kudu mong wa ntlo, gona diriša seo e le motheo wa poledišano ya lena.)’

HARAMAGEDONE

● ‘Batho ba bantši ba kgongwa ke Haramagedone. Ba kwele baetapele ba lefase ba diriša leina leo ge ba bolela ka ntwa yeo e fetago tšohle ya nuclear. O dumela gore Haramagedone e tla bolela’ng bathong? . . . Ee, leina Haramagedone le tšewa Beibeleng gomme le bolela selo se sengwe seo se arogilego kudu go seo lentšu le atišago go dirišetšwa sona. (Kut. 16:14, 16) Beibele le gona e bontšha gore go na le dilo tšeo rena ka noši re ka di dirago ka go rata go phologa. (Tsef. 2:2, 3)’ (Bona le matlakala 200-204, tlase ga hlogo ya ditaba e kgolo ya “Haramagedone.”)

LAPA/BANA

● ‘Re boledišana le batho bao ba kgahlišwago ke kamoo re ka bapago kaone le mathata a bophelo bja lapa. Ka moka ga rena re leka go dira seo re ka se kgonago, eupja ge e ba go e-na le selo se sengwe seo se ka re thušago go atlega kudu, ruri re be re ka se thabela, na ga go bjalo? . . . (Ba-Kol. 3:12, 18-21) Beibele e bea pele ga rena kholofelo yeo e ka re neago bokamoso bja kgonthe bja malapa a rena. (Kut. 21:3, 4)’

● ‘Ka moka ga rena re rata gore bana ba rena ba be le maphelo a thabišago. Eupja na o gopola gore go na le lebaka le le kwalago la go lebelela mafelelo a thabišago mathateng ao lefase le lego go ona lehono? . . . Ka gona, ke lefase la mohuta ofe leo o gopolago gore bana ba rena ba tla lebana le lona ge ba gotše? . . . Beibele e bontšha gore Modimo o tla dira lefase le gore e be lefelo le le kgahlišago kudu go phela go lona. (Ps. 37:10, 11) Taba ya ge e ba bana ba rena ba tla ba le karolo go lona, ruri e ithekgile kudu ka kgetho yeo re e dirago. (Doit. 30:19)’

LERATO/BOTHO

● ‘Re hwetša gore batho ba bantši ba kgongwa kudu ke go hlaelelwa ga lerato la kgonthe lefaseng. Na le wena o ikwa ka tsela yeo? . . . Ke ka baka la’ng o gopola gore se se bjalo? . . . Na o be o tseba gore Beibele e boletše ka boemo bjo e sa le pele? (2 Tim. 3:1-4) Le gona e hlalosa lebaka la bjona. (1 Joh. 4:8)’

● ‘Leina la-ka ke——. Ke o mongwe wa baagišane ba gago. Ke etela ka nako e nyenyane go boledišana le baagišane ba-ka ka selo se sengwe seo se nkgomago kudu, gomme ke holofela gore le wena o se etše hloko. Botho ga bo rekwe, eupja go bonagala e le bjo bo sego gona lehono. Na o šetše o kile wa ipotšiša lebaka leo boemo bjoo bo lego gona ka lona? . . . (Mat. 24:12; 1 Joh. 4:8)’

MATŠATŠI A BOFELO

● ‘Re etela gore re boledišane ka seo se bolelwago ke seo se diregago mathokong a rena lefaseng lehono. Gare ga batho ba bantši ruri go bile le go se sa kgahlišwa ke Modimo le melao ya gagwe ya bophelo go etša ge e ngwadilwe ka Beibeleng. Se se tutueditše kudu kamoo batho ba gopolago ka ba bangwe. Hle anke ke abelane le wena tlhaloso ye ye e ngwadilwego go 2 Timotheo 3:1-5, gomme o mpotše ge e ba o gopola gore e swanela lefase la lehono. (Bala) . . . Na go na le lebaka le le kwalago go lebelela maemo a kaone nakong e tlago? (2 Pet. 3:13)’

● ‘Batho ba bantši ba dumela gore nako e felela lefase le e le ka kgonthe. Ba bolela ka mehla ya rena e le ‘mehla ya bofelo.’ Eupja na o ile wa lemoga gore Beibele e re botša kamoo re ka phologago ka gona bofelo bja lefase la mehleng yeno, gomme ra phela lefaseng leo le tlago go dirwa paradeise? (Tsef. 2:2, 3)’ (Bona le matlakala 305-314, tlase ga hlogo ya ditaba e kgolo ya “Mehla ya Bofelo.”)

Bona le “Ditiragalo tša Mehleng Yeno” mo lenaneong le la matseno a rulagantšwego.

MMUŠO

● ‘Ge ke boledišana le baagišane ba-ka, ruri ke lemogile gore ba bantši ba duma go phela tlase ga mmušo woo o ka rarollago e le ka kgonthe mathata a magolo ao re lebanego le ona lehono, ao e lego bokebekwa le mokgwa o thata wa go phela (goba taba efe le efe yeo batho ba bantši ba gopolago ka yona mo nakong ye). Se ke seo se kganyogwago, na ga o dumele? . . . Na go na le mmušo o bjalo lehono? . . . Batho ba bantši ba rapeletše e le ka kgonthe mmušo woo o ka dirago dilo tše. Ka ntle le pelaelo, o o rapeletše, eupja ga se batho ba bantši bao ba o gopolago e le mmušo. (Dan. 2:44; Ps. 67:6, 7; Mika 4:4)’ (Bona le matlakala 324-332 le 377-381, tlase ga hlogo ya ditaba e kgolo ya “Mmušo” le ya “Pušo.”)

● ‘Re botšiša baagišane ba rena potšišo. Re tla leboga karabo ya gago go yona. Ee, Jesu o re rutile gore re rapelele Mmušo wa Modimo gore o tle le gore thato ya Gagwe e dirwe lefaseng go etša ge e dirwa legodimong. Na o gopola gore thapelo ye e tla ba ya arabja e le gore thato ya Modimo e dirwe e le ka kgonthe mo lefaseng? . . . (Jes. 55:10, 11; Kut. 21:3-5)’

● ‘Ke boledišana le baagišane ba-ka ka kgang yeo ka moka ga rena re swanetšego go lebana le yona: Na re rata mmušo wa Modimo, goba na re rata pušo ya motho? Ka baka la maemo a lego lefaseng lehono, ruri na o bona gore re nyaka se sengwe se se fetago seo batho ba šetšego ba se dirile? . . . (Mat. 6:9, 10; Ps. 146:3-5)’

MODIRO/MADULO

● ‘Re be re dutše re boledišana le baagišane ba gago mabapi le seo se ka dirwago go kgonthiša gore go tla ba le mediro ya batho bohle le madulo a bona. Na o dumela gore ke bohlale go lebelela gore mebušo ya batho e tla dira se? . . . Eupja go na le motho yo a tsebago kamoo a tlago go rarolla ka gona mathata a; yoo ke Mmopi wa batho. (Jes. 65:21-23)’

● ‘Re abelana le baagišane ba rena taba e bolelago ka mmušo wa go loka. Batho ba bantši ba tla rata go ba le mmušo woo o ka hunologago boradieng, mmušo woo o ka neago batho bohle mediro le madulo a mabotse. Ke mmušo ofe woo o naganago gore o ka dira dilo tše ka moka? . . . (Ps. 97:1, 2; Jes. 65:21-23)’ (Bona le matlakala 377-381, tlase ga hlogo ya ditaba e kgolo ya “Pušo.”)

NTWA/KHUTŠO

● ‘Mo e ka bago motho o mongwe le o mongwe matšatšing a o kgongwa ke poifo ya go boifa ntwa ya nuclear. Na o gopola gore re tla ba ra bona khutšo ya kgonthe lefaseng le? . . . (Ps. 46:8, 9; Jes. 9:5, 6)’

● ‘Ke tsoma batho bao ba ka ratago go phela lefaseng leo le hunologilego ntweng. Lekgolong le la nywaga le nnoši go bile le dintwa tše makgolo-kgolo, go akaretša dintwa tše pedi tša lefase. Mo nakong ye re lebane le ntwa ya nuclear. O bona e ka re go nyakega’ng, ge e ba ntwa e bjalo e swanetše ke go phengwa? . . . Ke mang yo a ka tlišago lefase la khutšo? . . . (Mika 4:2-4)’

● ‘Re hwetša gore mo e ka bago batho bohle ba bolela gore ba nyaka khutšo ya lefase. Baetapele ba bantši ba lefase le bona ba bolela seo. Ke ka baka la’ng go le thata go e hwetša? . . . (Kut. 12:7-12)’

THUTO YA LEGAE YA BEIBELE

● ‘Ke etetše go tla go go nea thuto ya legae ya Beibele yeo e sa lefelelwego. Ge e ba go kgonega, ruri ke tla rata go diriša metsotso e se mekae go bontšha kamoo batho mafaseng a 200 ba boledišanago ka Beibele magaeng e le dihlopha tša malapa. Re ka diriša sehlogo lege e le sefe sa dihlogo tše e le motheo wa poledišano. (Bontšha go latelana ga ditaba tša ka gare pukung yeo e ithutwago.) Ke efe yeo e go kgahlišago kudu?’

● ‘Re bontšha thušo ye ya go ithuta Beibele baagišaneng ba rena. (E bontšhe.) Na o šetše o kile wa e bona? . . . Ge e ba o e-na le metsotso e se mekae, ruri ke be nka rata go go bontšha kamoo e ka dirišwago ka gona le Beibele ya gago.’

GE BATHO BA BANTŠI BA BOLELA GORE: ‘KE NA LE BODUMEDI BJA-KA’

● ‘Dumela. Re etela malapa ka moka a lego motseng wa geno (goba lefelong le), gomme re hwetša gore ba bantši ba bona ba na le bodumedi bja bona. Le wena ka ntle le pelaelo o na le bjona. . . . Eupja go sa šetšwe bodumedi bja rena, ruri re kgongwa ke mathata a mantši ao a swanago, ao e lego mokgwa o thata wa go phela, bokebekwa, bolwetši, na ga go bjalo? . . . Na o gopola gore go na le sehlare lege e le sefe sa kgonthe dilong tše? . . . (2 Pet. 3:13; bj. bj.)’

GE BATHO BA BANTŠI BA BOLELA GORE: ‘KE SWAREGILE’

● ‘Dumela. Re etela motho o mongwe le o mongwe mo motseng ka molaetša o bohlokwa. Ka ntle le pelaelo o motho yo a swaregilego, ka gona ke tla bolela ka nako e kopana.’

● ‘Dumela. Leina la-ka ke——. Morero wa go tla ga-ka ke go boledišana le wena ka ditšhegofatšo tša Mmušo wa Modimo, le kamoo re ka bago le kabelo ka gona go tšona. Eupja ke bona gore o swaregile (goba o itokišetša go sepela). Na nka bolela feela taba ka bokopana?’

TŠHEMONG YEO E DIRWAGO KA MEHLA

● ‘Ke thabišwa ke go go hwetša ka gae. Re etela ka mokgwa wa rena wa beke le beke motseng gomme re na le selo se sengwe seo re ratago go abelana le wena ka sona, seo se lego mabapi le dilo tše di kgahlišago tšeo Mmušo wa Modimo o tlago go di direla batho.’

● ‘Dumela. Ke mo go botse go go bona gape. . . . Na bohle ka lapeng ba sa iketlile? . . . Ke tsena feela gore ke abelane le wena taba e lego mabapi le . . . ’

● ‘Dumela. O kae? . . . Ke be ke dutše ke duma go bulegelwa ke sebaka se sengwe sa go boledišana le wena. (Bolela taba e lebanego yeo o ratago go bolela ka yona.)’