Dirang Dilo Tšohle Gore Modimo a Tumišwe
1 Ke mo go lapološago gakaakang go kopana le banababo rena le dikgaetšedi ba rategago! (1 Ba-Kor. 16:17, 18) Re dira se dibokeng, dikopanong tše dinyenyane le tše dikgolo, gotee le bodireding bja tšhemo. Gape re kopana mabakeng a tlwaelegilego, go etša nakong ya ge re e-na le baeng bao ba etetšego legaeng la rena. Ka go dira bjalo, re bontšha go amogela baeng gomme ra kgothatšana. (Ba-Roma 12:13; 1 Pet. 4:9) Ge le rulaganya dipokano tša bogwera tša lenyalo, gopolang keletšo e botse e lego go Morokami wa October 15, 1984.
2 Meletlo e Rulagantšwego ya Bogwera: Go sa šetšwe gore re “a ja goba re a nwa goba re dira selo se sengwe se itšego,” re swanetše go ‘dira dilo tšohle gore Modimo a tumišwe.’ (1 Ba-Kor. 10:31-33, bapiša le NW.) Keletšo ye ba bangwe ga ba e latele, gomme mathata a tšwela pele go gola ka baka la dipokano tša bogwera tšeo e lego tše dikgolo kudu go ka di laola ka mo go swanetšego. Mabakeng a mangwe, batho ba makgolo ba laleletšwa meletlong ya kgoparara moo boithabišo bja lefase bo bontšhwago gona. Ka dinako tše dingwe bao ba bago gona ba kgopelwa gore ba lefe ditefo tša go tsena goba tše dingwe. Dipokano tše bjalo di swana kudu le meletlo ya lefase, tšeo moya wa tšona o sa dumelelanego le bothakga gotee le melao ya motheo ya Beibele.—Ba-Roma 13:13, 14; Ba-Ef. 5:15-20.
3 Go begilwe gore dipokano tše dikgolo tša bogwera tša manyalo di ile tša rulaganywa, tše dingwe di e-na le baeng ba fetago 1 000. Mafelong a mangwe, ditaletšo tša lenyalo di ile tša ntšhwa tšeo di laletšago feela batho ba bagolo, e sego bana pokanong ya bogwera. Ba bangwe ba ile ba ba gona dipokanong tša bogwera tša lenyalo ba sa laletšwa. Na se se dumelelana le tlhahlo yeo e neilwego nakong e fetilego? Go tloga go se bjalo! Ka baka la go ba thata tabeng ya go laola ka tshwanelo dihlopha tše bjalo tše dikgolo, mathata a ile a tšwelela. Ka dinako tše dingwe go ile gwa feleletša ka go ba le mašata, go nwa bjala ka go fetišiša gotee le boitshwaro bjo bo gobogilego. (Ba-Ef. 5:3, 4) Se se ile sa lebiša go go kgaolweng goba go kgalemelweng ka tsela ya boahlodi ga ba bangwe gomme bagolo ba bangwe le bahlanka ba bodiredi ba bile ba lahlegelwa ke tokelo ya bona ya tirelo. Ruri, dipokano tše bjalo tša bogwera ga di godiše Jehofa. Go e na le moo, di tliša kgobošo leineng le lebotse la phuthego le go kgopiša ba bangwe.—1 Ba-Kor. 10:23, 24, 29.
4 Bakriste ba kgothaletšwa go bontšha go amogela baeng, eupša kgatelelo e swanetše go lebišwa tabeng ya poledišano ya moya. (Ba-Roma 1:11, 12) Dipokano tše dinyenyane gantši ke tše kaone. Puku ya Bodiredi bja Rena go matlakala 135-6 e re: “Ka dinako tše dingwe, malapa a mmalwa a ka laletšwa go ya legaeng gore a thabele bogwera bja Bokriste. . . . Ka mo go kwalago, bao e lego beng ba dintlo mabakeng a bjalo ba swanetše go kwa ba ikarabela go seo se diragalago fao. Bakriste ba hlaologanyago ge ba dutše ba gopola ka se, ba bone bohlale bja go lekanetša bogolo bja dihlopha tše bjalo le botelele bja nako ya dikgobokano.” Jesu o bontšhitše gore ga go nyakege selo sa kgoparara ge e ba pakane ya rena e le go kgothatša bagwera ba rena moyeng.—Luka 10:40-42.
5 Ke selo se se botse go bontšha go amogela baeng go Bakriste-gotee le rena. Lega go le bjalo, go na le phapano e kgolo magareng ga pokano e lekaneditšwego legaeng la rena le moletlo wa kgoparara wo o bonagatšago moya wa lefase moagong o hirilwego. Ge o laletša ba bangwe gore e be baeng ba gago, o swanetše go kgonthišetša gore o ka kgona go rwala boikarabelo bjo bo tletšego bakeng sa seo se diragalago.—Bona Morokami wa August 15, 1992, matlakala 17-20.
6 Ruri, Jehofa o re šegofaditše ka borwarre bjo go bjona re hwetšago kgothatšo e lapološago yeo e re tutueletšago go tšwela pele medirong e mebotse. (Mat. 5:16; 1 Pet. 2:12) Ka go bontšha boipoetšo le teka-tekano medirong ya bogwera, re tla dula re tliša tumišo go Modimo wa rena le go ba ba agago go ba bangwe.—Ba-Roma 15:2.