Ke Dipakane Dife Tšeo Le Di Beetšego bana Ba Lena?
1 Katlego bophelong e ithekgile ka go bea le go fihlelela dipakane tša bohlokwa. Bao ba phegelelago dipakane tšeo e sego tša bohlokwa goba tše di sa kwagalego ba feleletša ka go nyama le go se kgotsofale. Go nyakega bohlale go lemoga gore ke dipakane dife tšeo di swanetšego go phegelelwa e le gore go ‘swarelelwe ka go tia bophelong bja kgonthe.’ (1 Tim. 6:19, NW) Re leboga gakaakang gore Jehofa ka Lentšu la gagwe le mokgatlo wa gagwe, o re bontšha gabotse tsela yeo re ka sepelago go yona!—Jes. 30:21.
2 Jehofa o beela batswadi mohlala o mobotse ka go nea tlhahlo e bjalo e lerato. Go e na le go tlogelela bana ba bona ba se nago phihlelo ba ikgethela yeo e lego tsela e kaone kudu, batswadi ba bohlale ba ba tlwaetša tseleng yeo ba swanetšego go sepela go yona gomme ge ba tšofala ba “ka se ke [ba] e tlogela.” (Die. 22:6, PK) Batswadi ba Bakriste ba tseba go tšwa phihlelong gore ba ka se ke ba bota kahlolo ya bona ka noši; ba swanetše go ithekga ka Jehofa. (Die. 3:5, 6) Senyakwa se e tloga e le se segolo go bana ba ba nago le tsebo le phihlelo tše di lekanyeditšwego.
3 Batswadi ba ka bea ka pele ga bana ba bona dipakane tša bohlokwa tšeo di tla ba thušago go lebiša tlhokomelo go “dilo tša bohlokwa kudu.” (Ba-Fil. 1:10, NW) Ba ka thoma ka thuto ya lapa, ba kgothaletša bana go leboga bohlokwa bja yona le go ithuta go yona. Ke mo gobotse gore bana ba hlagolele mokgwa wa go ithuta e sa le pele bakeng sa diboka tša phuthego gomme ba itokišeletše go nea ditlhaloso ka mantšu a bona ka noši. Go tšea karolo ka mehla modirong wa boboledi go bohlokwa. Bana ba banyenyane ba ka kgatha tema ka go sepediša dipampišana, go bala mangwalo goba go bolelela dimakasine. Ge ba kgona go bala, go ngwadiša Sekolong sa Bodiredi sa Pušo ya Modimo go ka akgofiša tšwelopele ya bona ya moya. Go swanelega e le mogoeledi yo a sa kolobetšwago goba go amogelwa bakeng sa kolobetšo ke mogato o mogolo wa go gatela pele.
4 Ge bana ba bona ba dutše ba batamela nywaga ya mahlalagading goba gaešita le pele ga moo, batswadi ba swanetše go bolela le bona e le ka kgonthe ka dipakane tša modiro wa bophelo. Baeletši ba sekolo le bao ba tsenago le bona ka klaseng ba ka ba tutuetša gabonolo ka go thekga mediro ya lefase le ya go rata dilo tše di bonagalago. Batswadi ba swanetše go thuša bana ba bona go kgetha dithuto tša sekolo tšeo di neago tlwaetšo e šomago, tše di ba hlamelago go hlokomela dinyakwa tša bona tša dilo tše di bonagalago ka ntle le go gafa dikgahlego tša Mmušo. (1 Tim. 6:6-10) Ba ka kgothaletšwa go katanela “mpho” ya go se be lenyalong gomme ka morago ge e ba ba dira phetho ya go ba lenyalong, ba tla be ba le boemong bja go amogela boikarabelo bjo boima bja lenyalo. (Mat. 19:10, 11, NW; 1 Ba-Kor. 7:36-38) Go bolela ka tsela e botse ka bobulamadibogo, go hlankela moo go nyakegago thušo e kgolo, tirelo ya Bethele goba modiro wa boromiwa go ka bjala ka go bana kganyogo ya go diriša maphelo a bona ka tsela yeo e kgahlago Jehofa gaešita le nywageng ya ge e sa le ba banyenyane, gwa hola ba bangwe gomme gwa ba tlišetša ditšhegofatšo.
5 Ga se ka kotsi gore re na le bafsa ba bantši kudu gakaakaa mokgatlong lehono ba ba swarelelago ditekanyetšong tše di phagamego tša Bokriste gomme ba phegelela dipakane tša pušo ya Modimo. Bogolo bja katlego ya bona bo ka bolelwa e le bjo bo ithekgilego ka batswadi ba lerato. Ge e ba o le motswadi, bana ba gago ba bonala ba lebile kae? Na ba tšwela pele ka go se kgaotše ba lebile bophelong bjo bo tsepamišeditšwego dikgahlegong tša Mmušo? Gopola, e nngwe ya dilo tša bohlokwa kudu yeo o ka e dirago ke go bjala therešo baneng ba gago le go bolela ka yona letšatši le lengwe le le lengwe. O ka šegofatšwa ka lapa leo le botegago go hlankeleng Jehofa.—Doit. 6:6, 7; Još. 24:15.