Dihlatse tša Jehofa Mokgatlo wo o Emelago Leina Leo

KA OCTOBER 6, 1990, lešaba la ba nyakilego go ba 5 000 leo le bego le bokane Holong ya Kopano ya Dihlatse tša Jehofa kua Jersey City, New Jersey, U.S.A., bakeng sa seboka sa ngwaga le ngwaga sa Watch Tower Bible and Tract Society le be le le kgaufsi le go hwetša selo sa go makatša. Modula-setulo John E. Barr, o ile a tsebiša batheetši ka go lokollwa ga video yeo e tšeago metsotso e 55, e nago le sehlogo se se rego, Jehovah’s Witnesses​—The Organization Behind the Name. Ye e bile video ya mathomo yeo e kilego ya tšweletšwa ke Mokgatlo, eupja e sego ya mafelelo.

Video e bontšha kamoo batho ba Jehofa ba rulaganyeditšwego ka gona go nea bohlatse ka leina la Modimo le go phatlalatša “ditaba tše di lokilego tša mmušo.” (Mateo 24:​14, NW) Ntlo-kgolo kua Brooklyn, New York le meago ya Watchtower Farms a bontšhwa ka mo go kgethegilego. Go tšweleditšwe dikopi tše di fetago 500 000 ka Seisemane, gomme gona bjale (goba go se go ye kae) e tla hwetšagala ka maleme a mangwe a 26.a

Karabelo e Bile Efe?

Batho bao e sego Dihlatse tša Jehofa ba arabetše bjang go video? Rakgwebo o mongwe o ngwadile:

“Ke hweditše theipi e le ya maemo a godimo kudu. Ke ile ka tloga ke tanywa ke phadimo le bothakga bja thulaganyo ya diswantšho tša yona yeo e dirilwego ka bokgoni. Ke be ke e-na le tshekamelo ya go lebala gore e be e le theipi gomme ke nagana kudu ka yona e le paesekopo. Theipi ye e swanetše go dirišwa e le e holago go hlaloseng ka mo go kgethegilego morero wa ntlo-kgolo ya lena ya New York. Re a le lebogiša ka selo se se se kgahlišago.”​—J. J.

Bao ba ithutago Beibele le Dihlatse tša Jehofa ba hotšwe ke go bogela video. Se se latelago se hlalosa lebaka leo ka lona ba ilego ba holega:

“Ke ithuta Beibele le lesogana la nywaga e 20 gomme le tsena yunibesithing ya gabo rena. O be a tshwenyegile ka boemo bjo bo mpefalago bja lefase. Eupja ka morago ga go bogela theipi le go bona banababo rena ba babotse ba masogana ba Bethele, ba ba nago le morero wa kgonthe bophelong, boemo bja gagwe bja monagano bo ile bja fetoga ka mo go feletšego. O ile a ba gona Letšatšing la rena le le Kgethegilego la Kopano gomme a kgopela gore a ithute Beibele gabedi ka beke. Morutwana o mongwe wa Beibele, e lego morutiši sekolong se se phagamego, o ile a adima video gore a bontšhe ba leloko la gagwe. Ba be ba nagana gore Dihlatse tša Jehofa e fo ba mokgatlo o monyenyane, o fokolago le o sa tumago. Ba ile ba tlabja ke sebopego sa lefase ka bophara sa modiro wa rena le katlego yeo re bago le yona yeo re e newago ke Jehofa.”​—J. B.

“Mantšu ga a kgone go hlalosa lethabo leo ke le kwelego ge mosadi o mongwe yo ke ithutago le yena Beibele a tšholla megokgo ya lethabo le tebogo ka morago ga go bona video ye. A bolela a tletše megokgo, o itše: ‘Ke mang yo a ka se bonego gore ye ke phuthego ya Modimo wa therešo, Jehofa? Le ka mohla ga se ka tseba gore go na le batho ba go swana le ba.’ Ke moka o itše: ‘Ke nyaka go kolobetšwa.’”​—C. D.

“Re atlegile kudu ka go diriša video go barutwana ba rena ba Beibele. Bošego bja maabane monna wa o mongwe wa barutwana ba mosadi wa-ka ba Beibele o ile a tla. O be a ile a ganetša kudu. O ile a bogela video. Ka morago ga moo, o ile a botšiša dipotšišo gomme a tloga mo a e-na le Beibele le puku ya go ithuta Beibele ya O ka Phela ka mo go sa Felego Paradeiseng mo Lefaseng. Pele o be a ile a fiša dipuku ka moka tša mosadi wa gagwe!”​—D. H.

Bafsa le bona ba hweditše video e tanya, bjalo ka ge ditlhaloso tše di latelago di bontšha:

“Ke na le nywaga e tshelelago le seripa. Ke ratile karolo yela ye e lego mabapi le Dibeibele le ge mapokisi a fetišwa ka lebelo.”​—K. W.

“Bana ba banyenyane ba boletše gore e kaone go feta lenaneo lege e lefe le ba kilego ba le bona thelebišeneng.”​—R. C.

“Ka morago ga go bogela video ka lekga la bobedi, morwa wa rena wa nywaga e mehlano, yo a ilego a e bogela ka kelohloko go fihla e fela, o ile a botšiša, ‘Na re ka bona se letšatši le lengwe le lengwe?’ Morwedi wa rena wa nywaga e meraro o ile a tlaleleletša ka gore, ‘Ke nyaka go ya go šoma Bethele gomme ke dire dipuku!’”​—M. E.

“Bana ba-ka, e lego Robin le Shannan, ba nywaga e 12 le e 9, ba tšwetše pele ba bapala theipi leboelela. Morwedi wa-ka o monyenyane ka morago ga go bona theipi ye, o itše, ‘Ke rata go ya tirelong ya tšhemo. Go kgahliša kudu.’ Re ikwa gore video e bile le mafelelo a a lebanyago bophelong bja rena bja lapa. Go lapološa gakaakang go bulela lenaneo la thelebišene le o ikwago o bolokegile ge o le bogetše!”​—N. B.

“Ke na le nywaga e 131/2. Video e dirile gore ke lemoge kamoo ke sa rego selo kudu ka gona ka ditokišetšo tše di makatšago tše di tšwago go Jehofa. Ke tokelo go ba o mongwe wa batho ba Modimo.”​—K. W.

“Ke na le nywaga e 16, gomme video ye e thušitše go gatelela monaganong wa-ka gore modiro wo o dirwa lefaseng ka moka.”​—A. M.

“Bana ba rena ba boletše gore mananeo a ka mehla a thelebišene ga a sa hlwa a ba kgahla kudu ka baka la go bona kamoo boitapološo bja pušo ya legodimo bo ka bago ka gona. Le gona e matlafaditše kganyogo ya bona ya go kganyoga go tsena tirelong ya nako e tletšego.”​—L. M.

Gaešita le bao ba bilego Dihlatse tša Jehofa ka nywaga e mentši ba kgomilwe ke seo ba se bonego.

“Ge e ba video e kgwatha rena batho ba Jehofa pelo gakaakaa, e tla kgoma ba bangwe gakaaka’ng? Ge go e ba thata kudu go lebeletšana le tshepedišo ye, ke diriša iri ya nakong ya-ka gomme ka etela Bethele mabusebuseng a phapoši ya-ka ya bodulo!”​—K. B.

“Ka morago ga go bona tlhokomelo le nepagalo tšeo modiro o mongwe le o mongwe o dirwago ka tšona, ke ile ka ikwa eka ke tla ya phapošing ya-ka gomme ka gokarela dipuku tša-ka tša go ithuta Beibele.”​—L. P.

Re le kgothaletša gore le iphe sebaka sa go bona video ya Jehovah’s Witnesses​—The Organization Behind the Name. E tla le fa pono e fapanego ka bophelo le go le thuša gore le be le kholofelo bokamosong bjo bo bolokegilego.

[Mengwalo ya tlase]