Bolela Ka Mmušo
1 Go Ba-Hebere 10:23, re opeletšwa gore re ‘re gomarele moeno wa kholofelo ya rena re sa šišinyege.’ Le gona, kholofelo ya rena e theilwe Mmušong wa Modimo. Jesu o laetše ka mo go kgethegilego gore ditaba tše di lokilego tša Mmušo di swanetše go bolelwa ditšhabeng ka moka. (Mar. 13:10) Re swanetše go dula re gopola ka se ge re dutše re le bodireding bja rena.
2 Ge re kopana le batho re leka go thoma poledišano ka selo seo se ba kgahlago goba se ba kgomago. Gantši re bolela ka dilo tšeo ba di tsebago gabotse, tše bjalo ka bosenyi tikologong ya rena, mathata a bafsa, dipelaelo mabapi le go hwetša tša boiphedišo goba mathata ditabeng tša lefase. Ka ge menagano ya batho ba bantši e lebišitšwe ‘dipelaelong tše tša bophelo,’ ge re bontšha gore re kgomegile le gore re a kwešiša, batho gantši ba tla bolela seo ba se naganago. (Luka 21:34) Se mo gongwe se ka re bulela tsela ya go abelana le bona kholofelo ya rena.
3 Lega go le bjalo, ge e ba re sa hlokomele poledišano e ka dikologa dilong tše di sa agego go fihla boemong bja gore re palelwe ke go phetha morero wa ketelo ya rena—e lego go bolela molaetša wa Mmušo. Gaešita le ge re lebiša tlhokomelo maemong a mabe ao a tlišago dikgateletšo tše dintši gakaakaa, pakane ya rena ke go lebiša tlhokomelo Mmušong woo mafelong o tlago go rarolla mathata ka moka a batho. Re na le kholofelo e kgahlišago e le ka kgonthe yeo batho ba swanetšego go kwa ka ga yona ka mo go akgofilego. Ka gona, gaešita le ge mathomong re ka ahla-ahla sebopego se itšego sa “dinako [tše] tše hlobaetšago tšeo go lego thata go lebeletšana le tšona,” re swanetše go akgofela go lebiša tlhokomelo molaetšeng wa rena wa motheo, e lego “Ebangedi ya neng le neng.” Ka tsela ye re tla phethagatša bodiredi bja rena ka botlalo.—2 Tim. 3:1, NW; 4:5, NW; Kut. 14:6.