Ke Mang Yo A Tlago Go Theetša Molaetša Wa Rena?
1 Ka go se swane le ge e le neng pele historing ya motho, batho ba tlaletšwe ke tsebišo yeo bontši bja yona e lego yeo e sa holego gaešita le e arošago. Ka baka leo, ba bantši ba ikwa ba le tlalelong, gomme e ba tlhohlo go rena go ba dira gore ba theetše molaetša o lego mabapi le Mmušo wa Modimo. Ga ba lemoge mafelelo a mabotse ao go theetša ga bona Lentšu la Modimo go ka bago le ona go bona.—Luka 11:28.
2 Re a thaba ka gore dikarolong tše dintši tša lefase, batho ba masome a dikete ba theetša molaetša woo gomme ba amogela mpho ya rena ya dithuto tša legae tša Beibele. Lega go le bjalo, mašemong a mangwe karabelo ga se yeo e kgahlišago gakaalo. Tše dintši tša diketelo tšeo re di dirago bodireding ke tšeo di sa bego le mafelelo a mabotse, gomme mo gongwe re ka ipotšiša gore ke mang yo a tlago go theetša molaetša wa rena.
3 Re swanetše go itiša malebana le go nolega moko. Paulo o hlalositše ka gore: “Ba xo tlo phološwa ké ba ba bitšaxo ’ina la Morêna. Xomme byale ba tlo bitša bya’ng . . . xe ba sešo ba Mo kwa? Ba tlo kwa bya’ng, xe xo se sexoeledi? . . . Ké tšôna tše di ngwadilwexo xwa thwe: A ratêxa bya’ng maoto a motseta wa ditaba tše botse!” (Ba-Roma 10:13-15) Ge e ba re bjala peu ya Mmušo ka mafolofolo, Modimo o tla e mediša ka go batho ba dipelo tše di botegago.—1 Ba-Kor. 3:6.
4 Senotlelo ke go Dira Maeto a go Boela a ka Mehla: Mašemong ao go bonalago eka ke batho ba sego kae bao ba theetšago molaetša wa rena, re swanetše go lebiša tlhokomelo go hlagoleleng kgahlego le ge e le efe yeo re e hwetšago, go sa šetšwe gore re sepediša dipuku goba go se bjalo. Ke ka baka la’ng re ka akgofela go phetha ka gore ga go na selo seo se tlago go phethwa? Ge re bjala peu, ga re tsebe moo e tlago go atlega gona. (Mmo. 11:6) Ge e ba re boa re itokišeditše go abelana le ba bangwe se sengwe go tšwa Mangwalong, gaešita le ge e le ka bokopana, mo gongwe re ka kgona go fihlelela pelo ya motho. Re ka tlogela pampišana goba ra sepediša dimakasine tša gona bjale. Mafelelong mo gongwe re ka kgona go bontšha thuto ya Beibele. Re tla makatšwa kudu ke go bona kamoo Jehofa a šegofatšago maiteko a rena ka gona.—Ps. 126:5, 6.
5 Pampišana e ile ya tlogelelwa mosadi yo a bego a bontšha kgahlego e itšego. Ga se a hwetšwa gae gape go fihlela ka morago ga dikgwedi tše pedi, le gona o be a swaregile kudu go ka bolela. O ile a tlogelelwa pampišana e swanago gape. Go sa šetšwe maiteko a tšwelago pele a mogoeledi bakeng sa go mo hwetša gae, go ile gwa tšea dikgwedi tše dingwe tše tharo gore go kopanwe le yena, gomme a hwetšwa a babja. Kgaetšedi o ile a etela gape bekeng e latelago, gomme gwa thongwa poledišano e kopana ka pampišana. Ge kgaetšedi a be a boela bekeng e latelago, mosadi o ile a bontšha kgahlego ya kgonthe molaetšeng wa Mmušo. Phetogo ya maemo bophelong bja gagwe e ile ya mo dira gore a lemoge dinyakwa tša gagwe tša moya. Thuto ya Beibele e ile ya thongwa, gomme o ile a ithuta ka phišego bekeng e nngwe le e nngwe ka morago ga moo.
6 Ka go swana le ka selo se sengwe le se sengwe seo re ratago go se bona se gola, e ka ba matšoba, merogo goba kgahlego ya go kgahlegela molaetša wa Mmušo, go hlagola go a nyakega. Seo se nyaka nako, boikgafo, boemo bja kgopolo bja go šetša le boikemišetšo bja go se langwe. Ngwagola batho ba fetago ba tee-tharong ya milione bao peu ya Mmušo e ilego ya mela ka go bona ba ile ba kolobetšwa! Ge e ba re tšwela pele re dira boboledi, re ka kgonthišega gore re tla hwetša ba bangwe ba bantši bao ba tlago go theetša molaetša wa rena.—Bapiša le Ba-Galatia 6:9.