Go Ithapa Ka Go Rata
1 Mopsalme Dafida o porofetile gore batho ba Jehofa “[ba] tlo ithapa”; ke gore e le “baithapi ba itlhaganelago.” (Ps. 110:3, mongwalo wa ka tlase wa NW) Se ruri se phethagala gare ga mokgatlo wa lefase ka bophara wa banababo rena. Go o mongwe le o mongwe wa nywaga e fetilego e mene ya tirelo, batho ba Jehofa ba ile ba gafela diiri tše fetago tše dikete tše dimilione go gašeng ditaba tše di lokilego tša Mmušo. Le gona go na le ditsela tše dintši tšeo ka tšona re ka ithapelago go thuša ba bangwe ka go rata, go tlaleletša modirong wa boboledi le wa go dira barutiwa.
2 Ditsela Tšeo ka Tšona re ka Bontšhago go Rata ga Rena: Ba bangwe ka phuthegong mo gongwe ba ka ba ba nyaka thušo gore ba ye dibokeng. Ke ka baka la’ng o sa ithapele go sepela le bona? Ba bangwe mo gongwe ba ka ba ba babja, ba fokola mmeleng goba ba le sepetlele. Na o ka gata mogato wa pele gore o ba etele goba wa nea thušo ka tsela e itšego? Mo gongwe go ka ba go e-na le motho goba lapa leo le nyakago kgothatšo. Na o kile wa nagana ka go laletša ba bjalo gore ba be gona thutong ya lena ya lapa nako le nako? Mmulamadibogo goba mogoeledi mo gongwe a ka ba a nyaka mogwera yo a ka yago le yena bodireding. Ke ka baka la’ng o sa ithapele gore le šome gotee tirelong? Tše ke tše dingwe tša ditsela tšeo ka tšona re ka ithapelago go dira seo e lego se sebotse go bao ba tswalanago le rena tumelong.—Ba-Gal. 6:10.
3 Banababo rena ba ka bontšha go rata ga bona go dirišwa mokgatlong wa Jehofa ka go katanela go fihlelela ditshwanelego tša bagolo le bahlanka ba bodiredi. (1 Tim. 3:2-10, 12, 13; Tito 1:5-9) Ge re dutše re tšwela pele re gola ka palo, go na le go nyakega ga banababo rena ba swanelegago bao ba ikemišeditšego go etelela pele boboleding le go ruteng le go dišeng diphuthego.—1 Tim. 3:1.
4 Mohlomongwe ba bangwe ba rena re ka itira gore re hwetšagale bakeng sa tirelo ya Jehofa ka tekanyo e kgolo kudu ka go ngwadiša re le babulamadibogo ba go thuša nako le nako. Le gona, ka go dira diphetogo tše sego kae tše kwagalago thulaganyong ya rena, re ka kgona go dira bjalo ka mo go tšwelago pele goba gaešita le go tšea tirelo ya bobulamadibogo bja ka mehla. Na maemo a rena ke ao a ka re dumelelago go khudugela lefelong le lengwe moo go nyakegago thušo e kgolo kudu gona? Na re ka itira gore re hwetšagale bakeng sa go hlankela Bethele gomme ka go rialo ra tsenya letsogo ka go lebanya tšwelopeleng ya modiro wa lefase ka bophara? Gape go dirwa go gontši go agweng ga Diholo tša Mmušo, Diholo tša Kopano le meago ya makala go dikologa lefase, moo go nyakega ga bašomi ba ratago e lego mo gogolo kudu. Bao ba ithapetšego go dira mediro yeo e mebotse ba lebogwa kudu, gomme ba šegofaditšwe ka mo go humilego!—Luka 6:38.
5 Ye ke mehla e thabišago. Jehofa ka moya wa gagwe o phetha modiro o kgahlišago mo lefaseng ka batho ba gagwe ba ratago! Neng le neng ge Jehofa ka mokgatlo wa gagwe a fetišetša taletšo ya go kopanela modirong o oketšegilego wa Mmušo, re dira gabotse ge re ipotšiša gore, ‘Na ke sa dutše ke ithapa ka go rata?’ Ke moka re swanetše go lekola pelo ya rena le maemo ka thapelo. Boineelo bja rena go Modimo bo tla re tutueletša go dira sohle seo re ka se kgonago tirelong e kgethwa, ka go rialo ra thabiša pelo ya Jehofa!—Tsef. 3:17.