Go Rola Modiro—Na ke Mojako o Bulegetšego Modiro wa Pušo ya Modimo?

GO ROLA modiro—go ba bantši go tswalela mojako wa nako e telele ya kgateletšo le matshwenyego. Ka morago ga go kgakgelwa tseleng ya ka mehla e lapišago goba ya bošilo, ba bantši ba lebeletše pele bakeng sa gore go rola modiro go bule mojako wa go ya nywageng ya boiketlo le ya tokologo ya motho ka noši. Lega go le bjalo, mojako woo gantši o iša bodutung le go nolegeng moko. Boithabišo le maipshino di fo ba di sa nee maikwelo a seriti ao mošomo o a neago.

Go Dihlatse tša Jehofa, go rola modiro go ka bula “mojako o mogolo o išago modirong.” (1 Ba-Korinthe 16:9, NW) Gaešita le ge go tšofala go e-na le mathata le ditekanyetšo tša gona, batho ba bangwe ba godilego ba hweditše gore ka thušo ya Jehofa ba ka oketša tirelo ya bona go yena. Ela hloko diphihlelo tša Bakriste ba bangwe ba godilego kua Netherlands. Ngwageng wa tirelo wa 1995, 269 ya babulamadibogo ba fetago 1 223 (bagoeledi ba Mmušo ba nako e tletšego) e be e le ba nywaga e 50 goba go feta moo. Go ba, ba 81 ba be ba e-na le nywaga e 65 goba go feta moo.

Ba bangwe ba kgona go bula madibogo ka go fo tšwetša pele mokgwa wa go dula ba swaregile wo ba o hlomilego ge ba be ba sa šoma. (Bapiša le Ba-Filipi 3:16.) Mokriste yo mongwe yo a rotšego modiro yo a bitšwago Karel o a gopola: “Ge ke be ke šoma modirong wa-ka wa boiphedišo, ke be ke tlwaetše go thoma modiro ka 7:30 a.m. Ge ke be ke thoma go amogela phenšene ya-ka, ke ile ka dira phetho ya go kgomarela mokgwa o swanago. Ke be ke thoma letšatši ka go nea bohlatse setarateng ka dimakasine pele ga seteišene sa setimela mesong e mengwe le e mengwe ka iri ya bošupa.”

Go rulaganya ka kelohloko le gona ke senotlelo sa katlego. (Diema 21:5) Ka mohlala, ba bangwe ba ile ba kgona go beela tšhelete e lekanego ka thoko bakeng sa go itlhokomela bodireding bja bona. Ba bangwe ba ile ba dira phetho ya go fokotša ditshenyagalelo tša motho ka noši gomme ba hwetša modiro wa nakwana. Ela hloko Theodore le Ann. Ba ile ba thoma bophelo bja lenyalo e le babulamadibogo go fihlela boikarabelo bja lapa bo ba nyaka gore ba kgaotše go bula madibogo. Eupša moya wa bona wa bobulamadibogo o ile wa tšwela pele o le gona! Ge barwedi ba bona ba dutše ba gola, ba be ba fela ba kgothaletšwa go bula madibogo. Sa bohlokwa le go feta, Theodore le Ann ba beile mohlala o mobotse, gantši ba hlankela e le babulamadibogo ba go thuša. Ge banenyana ba dutše ba gola, Theodore le Ann ba ile ba thoma go fokotša modiro wa boiphedišo e le gore ba be le nako e oketšegilego ya tirelo ya tšhemo.

Ka morago ga gore barwedi ba bona ba tsenele bodiredi bja nako e tletšego le go tloga gae, Ann o ile a thoma go bula madibogo. Ka letšatši le lengwe o ile a kgothaletša Theodore gore a tlogele mošomo wa gagwe. O ile a šišinya gore: “Bobedi bja rena re ka kgona go bula madibogo.” Theodore o ile a tsebiša mothwadi wa gagwe ka maikemišetšo a gagwe. Se se ilego sa mo tlaba ke gore mong wa gagwe o ile a ithapela go thuša ka go mo nea mošomo wa nakwana, a re: “Ke akanya gore o nyaka go šomela mong wa gago wa kua godimo [legodimong] ka nako e tletšego.” Mo nakong ye Theodore le Ann ba thabela go bula madibogo ba le gotee.

Ba bangwe ba ile ba thoma go bula madibogo ka baka la maemo ao a tšweletšego maphelong a bona. Lehu la masetla-pelo la morwedi wa bona le setlogolo sa bona sa ngwanenyana le ile la dira gore banyalani ba bangwe ba tšofetšego ba naganišiše kudu tsela yeo ka yona ba bego ba diriša nywaga ya bona e šetšego. (Mmoledi 7:2) Go e na le go metšwa ke manyami, ba ile ba tsenela tirelo ya nako e tletšego yeo ga bjale ba e thabetšego ka nywaga e fetago e seswai!

Ke therešo gore go nyakega boikemišetšo bja kgonthe bakeng sa go dula bodireding bja nako e tletšego. Ka mohlala, Ernst le mosadi wa gagwe Riek, ba ile ba thoma go bula madibogo kapejana ka morago ga ge bana ba bona ba tlogile gae. Kapejana ka morago ga moo, yo pele e bego e le modirišani wa tša kgwebo o ile a holofetša Ernst mošomo o lefago tšhelete e ntši. Ernst o ile a araba ka gore: “Re na le mothwadi yo kaone-kaone go feta le ge e le mang, gomme ga re rate go mo tlogela!” Ka ge Ernst le mosadi wa gagwe ba ile ba dula “mošomong” wa Jehofa, ditokelo tše dingwe tša tirelo di ile tša ba bulegela. Ba ile ba hlankela modirong wa tikologo nywaga e fetago e 20 gomme ba tšwela pele e le babulamadibogo go fihla le lehono. Na ba a itshola bakeng sa tsela ya bona ya boikgafo? Nakong e nngwe e fetilego banyalani ba ile ba ngwala gore: “Ge e ba e le thato ya Jehofa, lebakeng la dikgwedi tše tharo re lebeletše go bina nywaga ya rena e 50 ya lenyalo yeo gantši e bitšwago monyanya wa kgopotšo wa ngwaga wa gauta. Eupša ka kgodišego e tletšego re bolela gore nywaga ya rena ya kgonthe ya gauta e thomile ge re be re thoma go bula madibogo.”

Ba bantši ba hwetša gore mojako o išago modirong o oketšegilego gape o iša lethabong le oketšegilego! Ngwanabo rena yo mongwe yo a ilego a thoma go bula madibogo dibeke tše pedi ka morago ga go ba le nywaga e 65 o re: “Ke swanetše go dumela gore le ka mohla ga se ka ba le nako e tletšego ditšhegofatšo ka mo go humilego gakaakaa bophelong bja-ka go etša nywaga e lesome e fetilego ya go bula madibogo.” Banyalani bao ba butšego madibogo ka nywaga e fetago e šupago ba re: “Ke’ng se sengwe seo banyalani ba nywaga ya go lekana le ya rena le ba nago le maemo a go swana le a rena ba swanetšego go ba ba se dira? Gantši re bona batho ba maemo a swanago le a rena tšhemong—ba dutše ka boiketlo ka gae, ba fo nona, ba tšofala le go gwagwalala. Tirelo e re boloka re phetše monaganong le mmeleng. Re dula re le gotee. Re sega kudu gomme re thabela bophelo.”

Ee, ga se batšofadi ka moka bao ba nago le maemo ao a ba dumelelago gore ba bule madibogo. Bakriste ba ba ka kgodišega gore Jehofa o leboga selo le ge e le sefe seo ba kgonago go se dira tirelong ya gagwe. (Bapiša le Mareka 12:41-44.) Ka mohlala, kgaetšedi yo mongwe yo a golofetšego o beilwe legaeng la go hlokomela batšofadi le dikoka. Lega go le bjalo, mojako wa modiro o sa dutše o mmulegetše! Ngaka e ile ya mmotšiša gore o kgona bjang go diriša nako ya gagwe. O a laodiša: “Ke ile ka mmotša gore ke tloga ke hlaelelwa ke nako. O be a sa kgone go kwešiša se. Ke ile ka mmotša gore se ke ka baka la gore matšatši a-ka a tletše ka mediro e kgotsofatšago. Ga ke lewe ke bodutu, eupša ke tsoma batho ba bangwe bao ba lewago ke bodutu gomme ka leka go ba botša seo Modimo a se boloketšego batho.” O akaretša ditaba ka boripana ka gore: “Motho a ka se ke a letela go gontši go motho wa nywaga e nyakilego go ba e 80. Nthapelele e le gore ke kgone go dula ke iša ba bantši go Jehofa.”

Na o nywageng ya go rola modiro? Mojako o yago boiketlong e ka ba o lekago kudu, eupša ga se mojako o išago tšhegofatšong ya moya. Naganišiša maemo a gago ka thapelo. Mo gongwe e ka ba e le gore o ka kgona go tsena mojakong o išago modirong o mogolo tirelong ya Jehofa.

[Pictures on page 25]

Go rola modiro go ka lebiša modirong o oketšegilego bodireding