Lentšu La Modimo Le Nea Tlhahlo
1 “Re phela lefaseng leo le nago le mathata a mantši le leo le nago le dikarabo tše sego kae kudu. Batho ba dimilione tše dintši ba bolawa ke tlala ka mehla. Palo e golago e lemaletše dihlare-tagi. Malapa a mantši kudu a a thubega. Go kopana ka botona le botshadi ga ba moloko wa kgaufsi le bošoro bja ka lapeng ke tšeo gantši di kwewago ditabeng. Moya woo re o hemago le meetse ao re a nwago ganyenyane-ganyenyane di ba le mpholo. Go sa dutše go le bjalo, ba bantši ba rena ba hlaselwa ke bosenyi.”
2 Ke kamoo puku ya Beibele—Na ke Lentšu la Modimo Goba la Motho? e thomago ka gona. Matseno a yona ke a swanetšego kudu lehono go feta ge puku ye e be e gatišwa nywageng e šupago e fetilego. Batho ba swanetše go tseba gore Lentšu la Modimo le nea tlhahlo gomme le nea ditharollo mathateng ka moka ao a ba hlaselago. Re tla katanela go thuša batho ka December ka go ba sepedišetša puku ya Beibele—Na ke Lentšu la Modimo Goba la Motho? New World Translation of the Christian Greek Scriptures e hwetšagala ka se-Afrikaans, Sesotho, se-Xhosa le se-Zulu gomme re tla dira gabotse go e sepedišetša bohle bao ba bolelago maleme a. Go ba gona, go fo tlogelela motho dipuku ga se kgonthišetšo ya gore o tla amogela tlhahlo ya Modimo. Re swanetše go dira maeto a go boela ka morero wa go thoma thuto ya Beibele. Re holofetšwa thušo ge e ba re dira boiteko bjo bjalo. (Mat. 28:19, 20) Tše dingwe tša dithero tšeo di šišinywago šidi:
3 Ge e ba o kopana le motho yo a tšofetšego, mo gongwe o ka leka matseno a: ◼“E re ke botšiše: Ge o be o sa le yo mofsa, batho setšhabeng ba be ba swarana bjang? [Dumelela karabo.] Maemo ke a fapanego kudu mo nakong ye, na ga go bjalo? O nagana gore lebaka la phetogo ye ke lefe? [Dumelela karabo.] Ge e le gabotse re bona go phethagala ga boporofeta bja Beibele. [Bala 2 Timotheo 3:1-5.] Ka ntle le go hlalosa lefase ka mo go nepagetšego kamoo le lego ka gona lehono, Beibele e holofetša lefase le lekaone kgaufsinyane. Ka baka leo re kgothaletša yo mongwe le yo mongwe go bala Beibele.” Bontšha puku ya Beibele—Na ke Lentšu la Modimo Goba la Motho?, gomme o šupe go kgaolo 10, yeo e hlalosago boporofeta bjo bongwe bjo re bo bonego bo phethagala. Sepediša puku ka moneelo wa R4,00.
4 Ge o boela go motšofadi yo o mo sepedišeditšego Beibele le puku, o ka re:
◼“Ge re be re bolela nakong e fetilego, re ile ra dumelelana gore ka ditsela tše dintši lekoko la mehleng yeno le fetogile le lebe kudu ge le bapišwa le kamoo bophelo bo bego bo le ka gona nywageng e sego kae feela e fetilego. Lega go le bjalo, ke boetše go go bontšha gore Beibele e hlalosa ditebelelo bakeng sa lefase le lekaone nakong e tlago. [Bala Kutollo 21:3, 4.] Go tseba gore le ke Lentšu la Modimo go swanetše go re kgothaletša gore re hlahlobe se sengwe gape seo Beibele e se bolelago.” Phetla puku ya Lentšu la Modimo go kgaolo 14, gomme o bale dirapa 3-4. Ithapele go swara thuto e sa lefelelwego ya legae ya Beibele.
5 Ge e ba o boledišana le mofsa, o ka re: ◼“Ke rata go go botšiša potšišo: Bjalo ka motho yo mofsa, na o nagana gore o na le lebaka la go ba le kholofelo ya tše botse mabapi le seo se lego ka pele? Bokamoso bo bonala bo le bjang go wena? [Dumelela karabo.] Ka mahlatse go na le lebaka la kgonthe bakeng sa go ba le kholofelo ya tše botse ka bokamoso. [Bala Psalme 37:10, 11.] Ka ge batho ba e-na le dipono tše fapa-fapanego ka Beibele le dikagare tša yona, re gatišitše puku ye e rego, Beibele—Na ke Lentšu la Modimo Goba la Motho? Hlokomela mabaka ao e a neago bakeng sa go bala Beibele. [Bala dirapa 16-17 go matlakala 10-11.] Ge re šetše re kgodišegile gore seo Beibele e se bolelago ke sa therešo, re thoma go ba le kholofelo ya kgonthe ka bokamoso. Ge e ba o rata go bala puku ye, ke tla thabela go go tlogelela kopi ye ka moneelo wa R4,00.”
6 Ge o boela bakeng sa go bona mofsa yo a amogetšego puku ya “Lentšu la Modimo,” mo gongwe o ka thoma ka go bolela gore: ◼“Ke thabetše go kwa kamoo o kgomegilego ka gona ka bokamoso. Gopola gore ke go bontšhitše temana ya Beibele yeo e re holofetšago bokamoso bjo bo thabišago le bjo bo šireletšegilego. E nngwe še. [Bala Kutollo 21:3, 4.] Puku yeo ke go tlogeletšego yona e nea bohlatse bjo bo kgodišago bja gore Beibele ke Lentšu la Modimo, e sego la motho. Therešo yeo e na le go gontši mo e go bolelago. Hlokomela gore ke gofe. [Bala dirapa 1-2 go matlakala 184-5.] Ge e ba o tla rata, nka thabela go ithuta Beibele le wena ka ntle le tefo.”
7 Motho yo a sa tsebego moo a ka retologelago gona bakeng sa tlhahlo ya go lebeletšana ka katlego le mathata a bophelo mo gongwe a ka arabela matsenong a: ◼“Re phela nakong yeo ka yona mo e nyakilego go ba motho yo mongwe le yo mongwe a lebanego le mathata a magolo. Ba bantši ba retologela go baeletši ba mehuta ka moka bakeng sa tlhahlo. Ba bangwe ba lebelela go didupe bakeng sa thušo. O nagana gore re ka hwetša kae keletšo e kwagalago yeo e tlago go re hola e le ka kgonthe? [Dumelela karabo.] Beibele e bolela therešo e bohlokwa yeo ka moka ga rena re swanetšego go e kwešiša.” Bala Jeremia 10:23. Phetla puku ya Beibele—Na ke Lentšu la Modimo Goba la Motho? go letlakala 187 gomme o bale serapa 9. “Puku ye e tla go thuša go kwešiša kamoo ka tlase ga Mmušo wa Modimo, mathata ka moka a rena a tlago go fedišwa ka gona. Na o tla rata go e bala?” Sepediša puku ka moneelo wa R4,00.
8 Ge e ba ketelong ya pele o be o boletše ka go nyaka ga motho tlhahlo, o ka tšwetša pele poledišano leetong la go boela ka gore: ◼“Ge re be re kopana ka lekga la mathomo, re ile ra dumelelana gore re nyaka tlhahlo ya Modimo ge e ba re tla lebeletšana ka katlego le mathata a bophelo. Mabapi le seo ke nagana gore o tla thabela ditlhaloso tša go phetha tšeo di dirwago ka pukung yeo ke go tlogeletšego yona. [Bala dirapa 12-13 go letlakala 189 ka pukung ya Lentšu la Modimo.] Ke thabela go go nea lenaneo-thuto le le sa lefelelwego la thuto ya legae ya Beibele, gomme ke itokišeditše go go bontšha yona gona bjale.”
9 Jehofa o tla šegofatša maiteko a rena ge re dutše re thuša ba bagolo le ba banyenyane go kwešiša mohola wa Lentšu la Modimo le tlhahlo ya lona bophelong bja rena.—Ps. 119:105.