Na o Diriša Poroutšha ya Seo Modimo a se Nyakago go Thoma Dithuto?
1 Na o lemogile gore ge e ba o swara dipoledišano tša Beibele ka mehla le ka thulaganyo le motho yo a thabelago, gomme o akaretša taba ye e lego ka go e nngwe ya dikgatišo tše di kgothaleditšwego gaešita le ge e ka ba e kopana, gona o swara thuto ya Beibele? Ee, se ke sa therešo gaešita le ge e ba thuto e swarelwa mojako goba ka go diriša mogala. Ke ka baka la’ng o sa dire maiteko a kgethegilego ka May le June go thoma thuto e bjalo o diriša poroutšha ya Seo Modimo a se Nyakago?
2 Lokišeletša go Atlega: Ge o sepediša poroutšha ya Seo Modimo a se Nyakago, nagana gabotse ka seo o nyakago go se ahla-ahla. Ge e ba o dira leeto la go boela, nagana ka seo le boledišanego ka sona ketelong ya pele. Ipotšiše: ‘Ke dirapa dife ka poroutšheng tšeo nka lebišago tlhokomelo go tšona gore ke tšwetše pele poledišano yeo le go lebiša thutong ya Beibele?’ Ge e ba o e-ya ka ntlo le ntlo, nagana ka dihlogo tšeo di tla ipiletšago go mofsa yo a lego mahlalagading, motho yo mogolo, monna goba mosadi. Hlahloba dihlogo tše dikgolo tša poroutšha, gomme o kgethe taba e kgahlišago. Ge o dirile phetho mabapi le matseno ao o tlago go a diriša, itlwaetše ona ka makga a mmalwa. Se ke se sengwe sa dinotlelo tše išago katlegong.
3 Pampiri ya ka gare ya Tirelo ya Rena ya Mmušo ya January 2002 e nea “Ditšhišinyo tša ge go Sepedišwa Poroutšha ya Seo Modimo a se Nyakago” tše seswai. Lepokisi la “Matseno a Lebanyago” le bontšha kamoo go ka dirišwago poroutšha go thoma dithuto. O ka fetoša tšhišinyo ya pele ka tsela e latelago:
◼ “Na o be o tseba gore ka metsotso e sego kae fela, o ka hwetša karabo ya potšišo e bohlokwa ya Beibele? Ka mohlala, ke ka baka la’ng go e-na le madumedi a mantši gakaakaa ao a ipolelago gore ke a Bokriste? Na o kile wa ipotšiša seo?” Ka morago ga ge motho yo a arabile, phetla go thuto 13 gomme o ahla-ahle dirapa tše pedi tša mathomo. Ge nako e dumela, bala gomme o ahla-ahle lengwalo le tee goba a mabedi. Ke moka o bale potšišo ya mafelelo ye e lego karolong ya ka godimo letlakaleng, gomme o re: “Thuto ka moka e ahla-ahla dika tše hlano tšeo di hlaolago bodumedi bja therešo. Ke tla thabela go boa gomme ke di ahla-hle le wena.”
4 E-ba yo a Phegelelago: Diriša sebaka se sengwe le se sengwe ka mo go holago go bontšha kamoo thuto ya Beibele e swarwago ka gona ka poroutšha ya Seo Modimo a se Nyakago. Kgopela tšhegofatšo ya Jehofa. (Mat. 21:22) Ka go phegelela maitekong a gago, o ka latswa lethabo la go thuša motho yo mongwe gore a amogele ditaba tše dibotse!