Go Nea Bohlatse Go “Batho Bohle”
1 Ge re kopana le batho ba ditlogo tše di fapa-fapanego goba madumedi a sa swanego, re gopola gore thato ya Jehofa ke “xore batho bohle ba phološwê ba fihlêlê tsebô ya therešô.” (1 Tim. 2:4) Go okeletša go dipampišana le diporoutšha tšeo di lokišeditšwego ka mo go kgethegilego, re na le dikgatišo tše pedi tše dibotse kudu tšeo di ka dirišwago ka nako le ge e le efe bakeng sa go thuša batho bao bodumedi bja bona bo sa ba rutago therešo ka Modimo le Kriste.
2 Puku ya Go Tsoma ga Batho Modimo e nea temogo mabapi le setlogo sa madumedi a magolo a lefase gomme ka go rialo e ka thuša batho kae le kae go bapiša ditumelo tša bona le seo Beibele e se rutago ka Modimo a nnoši wa therešo. Ka lehlakoreng le lengwe, ka go gatelela bophelo bja Jesu Kriste, puku ya Motho yo a Phagamego Kudu yo a Kilego a Phela e ka thuša motho gore a tlwaelane gakaone le Morwa wa Modimo gomme a batamele kgaufsi le yena, go etša ge batho ba bantši lekgolong la pele la nywaga ba ile ba dira. (Joh. 12:32) Neng le neng ge go swanela, o ka rata go leka ditšhišinyo tše di latelago bakeng sa go rola dipuku tše.
3 Ge e ba o nagana gore e tla ba mo go swanetšego go sepedišetša motho puku ya “Motho yo a Phagamego Kudu,” o ka botšiša gore:
◼“Ke’ng seo se tlago monaganong ge o nagana ka Jesu Kriste? [Dumelela karabo.] Bo-radihistori ba bantši ba dumela gore Jesu ke motho yo a phagamego kudu yo a kilego a phela. [Tsopola mohlala o tšwago matsenong a puku ya Motho yo a Phagamego Kudu.] Beibele e bontšha gore bophelo bja Jesu e be e le mohlala bakeng sa rena gore re o ekiše.” Bala 1 Petro 2:21 le serapa sa pele letlakaleng la mafelelo la matseno pukung ya Motho yo a Phagamego Kudu. Ge e ba mong wa ntlo a thabela go ithuta ka Jesu, mo sepedišetše puku ka moneelo wa R15,00. Pele o tloga, bala Johane 17:3 gomme o botšiše, “Re ka monya bjang tsebo ye yeo e išago bophelong bjo bo sa felego?” Dira dithulaganyo tše di tiilego tša go tla le karabo.
4 Ge o boela bakeng sa go yo hlalosa kamoo o ka monyago tsebo e neago bophelo ka gona, o ka re:
◼“Ke ile ka holofetša go boa bakeng sa go tla go go bontšha kamoo re ka monyago tsebo e išago bophelong bjo bo sa felego ka gona.” Rola puku ya Tsebo, gomme o diriša kgaolo ya pele o bontšhe kamoo thuto e swarwago ka gona.
5 Ge e ba o rata go sepediša puku ya “Go Tsoma ga Batho Modimo,” o ka botšiša gore:
◼“Ka ge go e-na le madumedi a mantši gakaakaa lehono, na o kile wa ipotšiša gore re ka tseba bjang bjo bo amogelwago ke Modimo?” Ka morago ga karabo, phetla puku ya Go Tsoma ga Batho Modimo go letlakala 377. Gatelela ntlha ya 7, gomme o botšiše ge e ba mong wa ntlo a dumela gore bodumedi bja therešo bo swanetše go kopanya merafo ka moka ya batho. Lebelela le lengwe la mangwalo ao a bontšhitšwego, gomme ge nako e dumela, ahla-ahla tše dingwe tša dintlha tšeo di lego lelokelelong. Sepediša puku ka moneelo wa R7,50. Ge o tloga, o ka botšiša ka gore, “Bodumedi bja kgonthe bo swanetše go kgoma boitshwaro bja motho bjang?” Rulaganyetša leeto la go boela bakeng sa go araba potšišo yeo.
6 Ge o boela go yo hlalosa kamoo bodumedi bja therešo bo kgomago bophelo bja motho ka gona, o ka botšiša gore:
◼“O nagana gore bodumedi bo swanetše go kgoma boitshwaro bja batho bjang? [Dumelela karabo.] Kriste o re neile tekanyetšo yeo bodumedi bo swanetšego go elwa ka yona.” Bala Mateo 7:17-20 ka go lebanya go tšwa go letlakala 12 ka pukung ya Go Tsoma ga Batho Modimo. Ke moka kgopela mong wa ntlo gore a bale serapa 20 go matlakala 13-14. Ge e ba nako e dumela, ahla-ahla dirapa 25-9 go matlakala 16-18. Se se ka lebiša go thomeng thuto ka poroutšha ya Seo Modimo a se Nyakago goba ka puku ya Tsebo.
7 Ditsela tša go Thoma Poledišano: Go na le dilo tše dintši tša go thuša go ruta ka pukung ya Go Tsoma ga Batho Modimo, tšeo di ka dirišetšwago go thoma poledišano leetong la mathomo goba leetong la go boela. O ka thoma poledišano ka go fo botšiša potšišo e swanetšego. Ka mohlala, ela hloko dipotšišo tše le dihlogo gotee le matlakala ao di ahla-ahlwago go ona:
“Dipotšišo Tšeo di Nyakago Karabo” —matlakala 17-18.
“Na Jesu e be e le Motho wa Nonwane?” —letlakala 237. “Ke Mang yo a Ngwadilego Beibele?” —letlakala 241. “Qur’ān le Beibele” —letlakala 285. “Bohlatse bja go Rereša ga Beibele” —matlakala 340-1. “Seo Dihlatse tša Jehofa di se Dumelago” —matlakala 356-7. “Kamoo o ka Hlaolago Bodumedi bja Therešo ka Gona” — letlakala 377.
8 O ka phetla letlakaleng goba matlakaleng ao a kgethilwego pukung ya Go Tsoma ga Batho Modimo gomme o hlalose taba e ahla-ahlwago. Ke moka o rulaganyetše leeto la go boela ka go botšiša potšišo e sepedišanago le potšišo yeo, yeo e ka arabjago go tšwa pukung ya Seo Modimo a se Nyakago goba pukung ya Tsebo. Kgonthišetša gore o laleletša mong wa ntlo Sebokeng sa Phatlalatša, gomme o tlogele pampišana ya taletšo.
9 Batho ba dipelo tše botegago ba mehuta ka moka ba tsoma therešo ka Modimo le Kriste. Re ka ba thuša ka modiro wa rena wa go nea bohlatse. Ka gona, anke re tšweleng pele “re šoma ka thata le go ikgafa, ka gobane re beile kholofelo ya rena go Modimo yo a phelago, yo e lego Mophološi wa mehuta ka moka ya batho.”—1 Tim. 4:10, PK.