Malapa, Retang Modimo Le Le Karolo Ya Phuthego Ya Gagwe

“Ke Xo rêtê, Morêna, kè le mo diphuthexong.”​—PSALME 26:12.

1. Ke karolo efe ya borapedi bja therešo yeo e lego bohlokwa go okeletša go ithuteng le go rapeleng ka gae?

BORAPEDI bja Jehofa ga bo akaretše feela thapelo le go ithuta Beibele ka gae eupša gape bo akaretša go šoma le le karolo ya phuthego ya Modimo. Isiraele ya bogologolo e ile ya laelwa gore “[ba] phuthêlê sethšaba mmôxô, banna le basadi le bana,” gore ba ithute molao wa Modimo e le gore ba sepele tseleng ya gagwe. (Doiteronomio 31:​12; Jošua 8:​35) Batho ba bagolo gotee le ‘masogana le basetsana’ ba be ba kgothaletšwa go kopanela go reteng leina la Jehofa. (Psalme 148:​12, 13) Dithulaganyo tše swanago di a šoma ka phuthegong ya Bokriste. Diholong tša Mmušo lefaseng ka moka, banna, basadi le bana ba tšea karolo ka bolokologi dikarolong tšeo di akaretšago batheetši, gomme ba bantši ba thabišwa kudu ke go ba le karolo.​—Ba-Hebere 10:​23-25.

2. (a) Ke ka baka la’ng go lokišeletša e le taba e bohlokwa bakeng sa go thuša bana gore ba thabele diboka? (b) Ke mohlala wa mang wo o lego bohlokwa?

² Ke therešo gore go thuša bana go ba le thulaganyo e botse ya modiro wa phuthego e ka ba tlhohlo. Ge e ba bana ba bangwe bao ba bago gona dibokeng le batswadi ba bona go bonala ba sa thabele diboka, bothata e ka ba e le eng? Ke therešo gore bana ba bantši ga ba kgone go tsepamiša kgopolo ka nako e telele gomme ba tenega gabonolo. Go lokišetša go ka thuša go lokiša bothata bjo. Bana ba ka se kgone go tšea karolo ka tsela e nago le morero dibokeng ka ntle le go lokišetša. (Diema 15:​23) Ge ba sa lokišetše go tla ba thata gore ba dire tšwelopele ya moya yeo e tlišago kgotsofalo. (1 Timotheo 4:​12, 15) Ke’ng seo se ka dirwago? Sa pele, batswadi ba swanetše go ipotšiša ge e ba bona ka bobona ba lokišeletša diboka. Mohlala wa bona ke tutuetšo e matla. (Luka 6:​40) Go rulaganyetša thuto ya lapa ka kelohloko le gona e ka ba lebaka le bohlokwa.

Go Aga Pelo

3. Ke ka baka la’ng go swanetše go dirwa boiteko bjo bo kgethegilego bakeng sa go aga dipelo nakong ya thuto ya lapa, gomme se se nyaka’ng?

³ Thuto ya lapa ga se ya swanela go fo ba nako ya go tlatša dihlogo ka tsebo eupša gape e swanetše go ba nako ya go aga dipelo. Se se nyaka go lemoga mathata ao ditho tša lapa di lebeletšanago le ona gotee le go kgomega ka lerato ka yo mongwe le yo mongwe. Jehofa o “fenyêka pelo.”​—1 Koronika 29:17.

4. (a) Go ‘hlaelelwa ke pelo’ go bolela’ng? (b) Ke’ng seo se akaretšwago tabeng ya ‘go hwetša pelo’?

⁴ Ke’ng seo Jehofa a se hwetšago ge a fenyeka dipelo tša bana ba rena? Ba bantši ba bona ba ka bolela gore ba rata Modimo, gomme seo se a retega. Lega go le bjalo, motho yo e lego yo mofsa goba yo e lego gona a ithuta ka Jehofa o na le phihlelo e nyenyane ditseleng tša Jehofa. Ka gobane a se na phihlelo, a ka ba a ‘hlaelelwa ke pelo,’ go etša ge Beibele e bolela. Mohlomongwe ga se maikemišetšo a gagwe ka moka ao e lego a mabe, eupša go dira gore pelo ya motho e be boemong bjo bo tla tlogago bo thabiša Modimo go nyaka nako. Se se akaretša gore motho a dumelelanye dikgopolo tša gagwe, dikganyogo tša gagwe, maikwelo a gagwe a borutho, maikwelo a gagwe le dipakane tša gagwe bophelong le seo Modimo a se amogelago, go fihla bokgoleng bjoo se se kgonegago bakeng sa batho ba ba sa phethagalago. Ge motho a bopa motho wa ka gare ka tsela yeo gore a dumelelane le tsela ya Modimo, ‘o hwetša pelo.’​—Diema 9:4, NW; 19:8, NW.

5, 6. Batswadi ba ka thuša bjang bana ba bona ‘go hwetša pelo’?

⁵ Na batswadi ba ka thuša bana ba bona go ‘hwetša pelo’? Ke therešo gore ga go na motho yo a ka tsenyago boemo bjo bobotse bja pelo ka go motho yo mongwe. Yo mongwe le yo mongwe wa rena o neilwe mpho ya tokologo ya boikgethelo, gomme go gontši go ithekgile ka seo re itumelelago gore re nagane ka sona. Lega go le bjalo, ka temogo batswadi gantši ba ka fatolla seo se lego ka pelong ya ngwana wa bona, ba ithuta seo se lego ka pelong le moo go nyakegago thušo. Diriša dipotšišo tša go etša ‘O ikwa bjang ka se?’ le ‘Ke’ng seo ruri o bego o ka rata go se dira?’ Ke moka o theetše ka go se fele pelo. O se ke wa arabela ka go tshelwa ke pelo. (Diema 20:5) Ge e ba o nyaka go fihlelela pelo, moya wa botho, kwešišo le lerato o bohlokwa.

⁶ Gore o tiišetše ditshekamelo tše di agišago, ahla-ahla dienywa tša moya leboelela​—sebopego se sengwe le se sengwe sa tšona​—gomme le šome gotee le le lapa bakeng sa go di hlagolela. (Ba-Galatia 5:​22, 23) Aga lerato la go rata Jehofa le Jesu Kriste, e sego feela ka go bolela gore re swanetše go ba rata eupša ka go ahla-ahla mabaka ao ka ona re ba ratago le kamoo re ka bontšhago lerato leo. (2 Ba-Korinthe 5:​14, 15) Tiiša kganyogo ya go dira se se nepagetšego ka go nea mabaka ka mehola yeo e tlago go tšwelela. Aga kganyogo ya go phema dikgopolo, dipolelo le boitshwaro tše di fošagetšego ka go ahla-ahla mafelelo a mabe a dilo tše bjalo. (Amosi 5:​15; 3 Johane 11) Bontšha kamoo, dikgopolo, polelo le boitshwaro​—e ka ba tše botse goba tše mpe​—di ka kgomago tswalano ya motho le Jehofa.

7. Ke’ng seo se ka dirwago go thuša bana go lebeletšana le mathata le go dira diphetho ka tsela yeo e tlago go ba dira gore ba dule ba le kgaufsi le Jehofa?

⁷ Ge e ba ngwana a e-na le bothata goba a swanelwa ke go dira phetho e bohlokwa, re ka mmotšiša gore: ‘O nagana gore Jehofa o lebelela se bjang? Ke’ng seo o se tsebago ka Jehofa seo se go dirago gore o bolele bjalo? Na o ile wa mo rapela mabapi le se?’ Thuša bana ba gago gore ba age mokgwa wa bophelo woo go wona go dirwago boiteko bjo matla ka mehla bakeng sa go kgonthišetša thato ya Modimo le go e dira, gomme o thome go dira bjalo ka pela ka mo go ka kgonegago. Ge ba thoma go ba le tswalano ya kgaufsi, le ya motho ka noši le Jehofa ba tla thabišwa ke go sepela ditseleng tša gagwe. (Psalme 119:​34, 35) Se se tla aga ka go bona tebogo ya go leboga tokelo ya go kopanela le phuthego ya Modimo wa therešo.

Go Lokišeletša Diboka tša Phuthego

8. (a) Ke’ng seo se ka re thušago go akaretša dilo ka moka tšeo di nyakago tlhokomelo thutong ya rena ya lapa? (b) Thuto ye e bohlokwa gakaaka’ng?

⁸ Go na le ditaba tše dintši tšeo di nyakago tlhokomelo dinakong tša thuto ya lapa. O ka di akaretša bjang ka moka ga tšona? Go dira dilo ka moka ka nako e tee ga go kgonege. Eupša o ka hwetša e le mo go holago go dira lelokelelo la tšona. (Diema 21:5) Le hlahlobe nako le nako gomme o ele hloko seo se nyakago tlhokomelo e kgethegilego. Bontšha kgahlego e tseneletšego ya go kgahlegela tšwelopele ya setho se sengwe le se sengwe sa lapa. Thulaganyo ye ya thuto ya lapa ke karolo e bohlokwa ya thuto ya Bokriste, yeo e re hlamelago bophelo bja gona bjale le go re lokišeletša bophelo bjo bo sa felego bjo bo tlago.​—1 Timotheo 4:8.

9. Ke dipakane dife mabapi le go lokišeletša diboka tšeo re ka katanelago go di fihlelela nakong ya dithuto tša lapa?

⁹ Na thuto ya lapa la gago e akaretša go lokišeletša diboka tša phuthego? Go na le mediro e mentši yeo le ka katanelago go e dira ka mo go tšwelago pele ge le dutše le ithuta gotee. Ye mengwe ya yona e ka nyaka dibeke, dikgwedi goba gaešita le nywaga gore e phethwe. Nagana ka dipakane tše: (1) yo mongwe le yo mongwe ka lapeng a ikemišetše go nea tlhaloso dibokeng tša phuthego; (2) yo mongwe le yo mongwe a katanele go nea tlhaloso ka mantšu a gagwe ka noši; (3) go akaretša mangwalo ditlhalosong; le (4) go hlahloba taba ka morero wa go e diriša ka noši. Se ka moka se ka thuša motho go dira therešo gore e be ya gagwe.​—Psalme 25:​4, 5.

10. (a) Re ka lebiša tlhokomelo bjang go se sengwe le se sengwe sa diboka tša rena tša phuthego? (b) Ke ka baka la’ng se e le se se swanelwago ke boiteko?

¹⁰ Gaešita le ge thuto ya lapa la gago gantši e theilwe thutong ya Morokami ya beke, le se ke la hlokomologa bohlokwa bja gore motho ka o tee ka o tee goba lapa le lokišetše Thuto ya Puku ya Phuthego, Sekolo sa Bodiredi sa Pušo ya Modimo le Seboka sa Tirelo. Tše le tšona ke dikarolo tše bohlokwa tša lenaneo la go re ruta go sepela tseleng ya Jehofa. Mo gongwe nako le nako le ka kgona go lokišeletša diboka le le sehlopha sa lapa. Ka go šomišana ga lena gotee, bokgoni bja go ithuta bo tla kaonefala. Ka baka leo, go tla hwetšwa mehola e mentši dibokeng ka botšona. Gare ga dilo tše dingwe, ahla-ahlang mehola ya go lokišeletša diboka tše ka mehla le bohlokwa bja go beela ka thoko nako e itšego bakeng sa se.​—Ba-Efeso 5:​15-17.

11, 12. Go lokišeletša go opela phuthegong go ka re hola bjang, gomme se se ka dirwa bjang?

¹¹ Dikopanong tša “Tsela ya Modimo ya Bophelo” re ile ra kgothaletšwa go lokišeletša karolo e nngwe ya diboka tša rena​—go opela. Na le ile la thoma go dira seo? Go dira bjalo go ka thuša go gatelela ditherešo tša Beibele menaganong ya rena le dipelong tša rena gomme ka nako e swanago gwa oketša go thabela ga rena diboka tša phuthego.

¹² Go lokišeletša mo go akaretšago go bala le go ahla-ahla seo se bolelwago ke mantšu go tše dingwe tša dikopelo tšeo di rulagantšwego go ka re thuša go opela go tšwa pelong. Isiraeleng ya bogologolo diletšo di be di dirišwa kudu borapeding. (1 Koronika 25:1; Psalme 28:7) Na go na le motho yo a kgonago go bapala seletšo sa mmino ka lapeng la gago? Ke ka baka la’ng le sa diriše seletšo seo bakeng sa go itlwaetša e nngwe ya dikopelo tša Mmušo tša beke, gomme la opela kopelo le le lapa. Kgonagalo e nngwe ke go diriša kgatišo ya dikopelo. Dinageng tše dingwe banababo rena ba opela gabose ba sa sepedišane le diletšo tša mmino. Ge ba dutše ba le ditseleng goba ba dutše ba phetha modiro wa bona mašemong, gantši ba thabela go opela dikopelo tšeo di rulaganyeditšwego bakeng sa diboka tša phuthego tša beke yeo.​—Ba-Efeso 5:19.

Go Lokišeletša ga Lapa Tirelo ya Tšhemo

13, 14. Ke ka baka la’ng dipoledišano tša lapa tšeo di lokišetšago dipelo tša rena bakeng sa bodiredi bja tšhemo di le bohlokwa?

¹³ Go nea bohlatse go ba bangwe ka Jehofa le merero ya gagwe ke karolo e bohlokwa ya maphelo a rena. (Jesaya 43:​10-12; Mateo 24:​14) Go sa šetšwe gore re ba bagolo goba ba banyenyane re thabela modiro wo kudu gomme re phetha modiro o mobotse kudu ge e ba re lokišeditše. Re ka dira se bjang ka lapeng?

¹⁴ Ka go swana le dilong ka moka tšeo di lego mabapi le borapedi bja rena, go bohlokwa gore re lokišetše dipelo tša rena. Ga se ra swanela go ahla-ahla feela seo re yago go se dira eupša le lebaka leo ka lona re yago go se dira. Mehleng ya Kgoši Josafate batho ba ile ba hlahlwa ka molao wa Modimo, eupša Beibele e re botša gore ‘ba be ba se ba hlwa ba lokišeletša dipelo tša bona.’ Se se ile sa dira gore ba tle ba gokeletšege dilong tšeo di bego di ka ba tloša borapeding bja therešo. (2 Koronika 20:​33, bapiša le NW; 21:​11.) Pakane ya rena ga e fo ba go kgona go bega diiri tšeo re di feditšego tirelong ya tšhemo, le gona ga se go fo sepediša dipuku. Bodiredi bja rena e swanetše go ba pontšho ya lerato la rena la go rata Jehofa le lerato la rena la go rata batho bao ba nyakago sebaka sa go kgetha bophelo. (Ba-Hebere 13:​15) Ke modiro woo go wona re lego “badirišani ba Modimo.” (1 Ba-Korinthe 3:9) A tokelo e kaakang! Ge re dutše re tšea karolo bodireding, re dira bjalo ka go dirišana le barongwa ba bakgethwa. (Kutollo 14:​6, 7) Ga go nako e kaone-kaone ya go bopa tebogo ya rena ya go leboga se go feta dipoledišanong tša lapa, e ka ba thutong ya rena ya beke le beke goba ge re ahla-ahla temana e swanetšego go tšwa ka pukwaneng ya Go Hlahloba Mangwalo ka Mehla!

15. Re ka lokišeletša neng tirelo ya tšhemo re le lapa?

¹⁵ Na o fela o ipha nako thutong ya lapa la gago bakeng sa go thuša ditho tša lapa la gago go lokišeletša tirelo ya tšhemo ya beke? Go dira bjalo e ka ba mo go holago kudu. (2 Timotheo 2:​15) Go ka thuša go dira gore tirelo ya bona e be e nago le morero le e enywago dienywa. Nako le nako o ka beela ka thoko lenaneo ka moka la thuto bakeng sa tokišetšo e bjalo. Gantši o ka swaragana le dibopego tša bodiredi bja tšhemo dipoledišanong tše kopana mafelelong a thuto ya lapa goba ka nako e nngwe bekeng.

16. Ahla-ahla mohola wa o mongwe le o mongwe wa megato yeo e lokeleditšwego serapeng.

¹⁶ Mananeo a lapa a ka lebiša tlhokomelo malokelelong a megato, a bjalo ka a latelago: (1) Lokišeletša thero yeo e boeleditšwego gabotse yeo e akaretšago lengwalo leo le swanetšego go balwa go tšwa Beibeleng ge e ba sebaka se dumela. (2) Kgonthišetša gore ge e ba go kgonega yo mongwe le yo mongwe o na le mokotla wa gagwe wa tirelo ya tšhemo, Beibele, puku ya go ngwalela dintlha, pene goba phentshele, dipampišana le dipuku tše dingwe tše di lego boemong bjo bobotse. Ga se gore mokotla wa tirelo e swanela go ba o bitšago tšhelete e ntši, eupša e swanetše go ba wa bothakga. (3) Ahla-ahlang moo le ka neago bohlatse bjo bo sa rulaganyetšwago le kamoo le ka bo neago ka gona. Latelela mogato o mongwe le o mongwe wa tlhahlo ye ka dinako tšeo ka tšona le šomago gotee tirelong ya tšhemo. Nea ditšhišinyo tše di holago, eupša o se ke wa nea keletšo dintlheng tše dintši kudu.

17, 18. (a) Ke tokišetšo efe yeo e dirwago ke lapa yeo e ka thušago go dira gore bodiredi bja tšhemo e be bjo bo enywago dienywa kudu? (b) Ke sebopego sefe sa tokišetšo ye seo se ka dirwago beke le beke?

¹⁷ Karolo e kgolo ya modiro woo Jesu Kriste a o abetšego balatedi ba gagwe ke go dira barutiwa. (Mateo 28:​19, 20) Go dira barutiwa go akaretša se se fetago go fo dira boboledi. Go nyaka go ruta. Thuto ya lena ya lapa e ka le thuša bjang gore le atlege go direng bjalo?

¹⁸ Le le lapa, ahla-ahlang gore ke bomang bao e ka bago mo go holago go boela go bona. Ba bangwe ba bona ba ka ba ba amogetše dipuku; ba bangwe ba ka ba ba ile ba fo theetša. Go ka ba go ile gwa kopanwa le bona modirong wa ntlo le ntlo goba go neeng bohlatse bjo bo sa rulaganyetšwago mmarakeng goba sekolong. Dumelelang Lentšu la Modimo gore le le hlahle. (Psalme 25:9; Hesekiele 9:4) Dirang phetho mabapi le yoo yo mongwe le yo mongwe wa lena a nyakago go mo etela bekeng yeo. Go tla boledišanwa ka’ng? Poledišano ya lapa e ka thuša setho se sengwe le se sengwe gore se lokišetše. Ngwala mangwalo a itšego bakeng sa go a abelana le batho ba thabelago gotee le dintlha tše di swanetšego go tšwa poroutšheng ya Ke Eng Seo Modimo a se Nyakago go Rena? goba puku ya Tsebo e Išago Bophelong bjo bo sa Felego. O se ke wa leka go akaretša go gontši ketelong e tee. Tlogela mong wa ntlo le potšišo yeo e tlago go arabja ketelong e latelago. Ke ka baka la’ng le sa go dire karolo ya tlwaelo ya beke le beke ya thuto ya lapa go rulaganyetša maeto a go boela ao yo mongwe le yo mongwe a ilego go a dira, nako yeo a tlago go a dira ka yona le seo a holofelago go se phetha. Go dira se go ka thuša go dira gore bodiredi bja tšhemo bja lapa ka moka e be bjo bo enywago dienywa kudu.

Tšwela Pele o ba Ruta Tsela ya Jehofa

19. Ditho tša lapa di swanetše go ba le phihlelo efe ge e ba di tla tšwela pele di sepela tseleng ya Jehofa, gomme ke’ng seo se tlaleletšago go se?

¹⁹ Ke tlhohlo go ba hlogo ya lapa lefaseng le le kgopo. Sathane le batemona ba gagwe ba katanela go senya boemo bja moya bja bahlanka ba Jehofa. (1 Petro 5:8) Go feta moo, lehono go na le kgateletšo e ntši godimo ga lena batswadi, kudu-kudu go lena batswadi bao ba se nago balekane. Go thata go hwetša nako ya go dira dilo ka moka tšeo le ratago go di dira. Eupša gaešita le ge le ka diriša tšhišinyo e tee ka nako, gomme ganyenyane-ganyenyane la kaonefatša lenaneo la thuto ya lena ya lapa, seo se swanelwa ke boiteko. Ke moputso o ruthetšago pelo go bona bao ba lego kgaufsi le rena ba sepela ka potego ya go se kwanantšhe tseleng ya Jehofa. Ditho tša lapa di swanetše go thabela go ba dibokeng tša phuthego le go ba le karolo bodireding bja tšhemo e le gore di sepele ka katlego tseleng ya Jehofa. Gore seo se direge, go nyakega go lokišetša​—e lego go lokišetša mo go agago pelo le mo go hlamago yo mongwe le yo mongwe gore a be le karolo ka tsela e nago le morero.

20. Ke’ng se se ka thušago batswadi ba bantši gore ba hwetše lethabo leo le bolelwago go 3 Johane 4?

²⁰ Moapostola Johane o ngwadile mabapi le bao a ba thušitšego moyeng gore: “Nna xa ke na lethabô le le fetaxo leo la xe ke kwa xore bana ba-ka ba swere tsela ya therešô.” (3 Johane 4) Dithuto tša lapa tšeo di swarwago go nagannwe ka maikemišetšo a kwagalago gotee le dihlogo tša malapa tšeo di dirišanago le setho se sengwe le se sengwe sa lapa ka botho le ka mo go holago di ka dira go gontši go dira gore lapa le kopanele lethabong leo. Batswadi ba thuša lapa la bona go thabela tsela e phalago tšohle ya bophelo ka go hlagolela tebogo ya go leboga tsela ya Modimo ya bophelo.​—Psalme 19:​7-11.

Na o ka Hlalosa?

◻ Ke ka baka la’ng go lokišeletša diboka go le bohlokwa gakaakaa bakeng sa bana ba rena?

◻ Batswadi ba ka thuša bjang bana ba bona go ‘hwetša pelo’?

◻ Thuto ya rena ya lapa e ka thuša bjang go lokišeletšeng diboka ka moka?

◻ Go lokišeletša tirelo ya tšhemo re le lapa go ka re thuša bjang gore re be bao ba atlegago kudu?

[Seswantšho go letlakala 20]

Thuto ya lapa la gago e ka akaretša go lokišeletša diboka tša phuthego

[Seswantšho go letlakala 21]

Go itlwaeletša go opela dibokeng ke mo go holago