THUTO 11

Go Bolela ka Mafolofolo

Baroma 12:11

KA BORIPANA: Bolela ka mafolofolo go thuša batheetši gore ba dule ba phafogile le go ba thuša go diriša seo o ba rutago sona.

Dira gore taba yeo o e lokišetšago e kgome pelo ya gago pele. Ge o dutše o lokišetša polelo, nagana ka mo go tseneletšego ka bohlokwa bja seo o tlago go se ruta batheetši. Tseba taba ya gago gabotse e le gore o tle o rute go tšwa pelong.
Nagana ka batheetši ba gago. Naganišiša kamoo taba yeo o tlago go e bala goba go e ruta e tlago go hola batheetši ba gago. Nagana ka tsela yeo o tlago go e bala ka yona goba go e ruta ka gona gore batheetši ba holege.
Dira gore polelo ya gago e phele. Bolela ka mafolofolo. Diriša diatla le mmele ka tsela ya tlhago go bontšha batheetši kamoo o ikwago ka gona ka seo o ba rutago sona. Dira bjalo le ka sefahlego sa gago.

Phema go makatša batheetši ka go diriša leboelela mokgwa wo o o tlwaetšego wa boitšhišinyo bja mmele. Diriša boitšhišinyo bja mmele ge feela o gatelela dintlha tša bohlokwa. Eba mafolofolo, kudukudu ge o bolela dintlha tše bohlokwa le ge o kgothaletša batheetši go diriša seo o ba rutago sona. O se ke wa lapiša batheetši ka go ba mafolofolo kudu polelong ya gago ka moka.