उत्पत्ति

४९ अनि याकुबले आफ्ना छोराहरूलाई बोलाए अनि यसो भने: “तिमीहरू सबै मेरो सामु जम्मा होओ। पछि तिमीहरूको जीवनमा के-के हुनेछ, म बताउँछु। २ हे याकुबका छोराहरू हो, मेरो सामने भेला होओ र मेरो कुरा सुन। तिमीहरूका बुबा म इस्राएलको कुरा सुन।

३ “रुबेन,+ तिमी मेरो पहिलो सन्तान,+ मेरो बल र प्रजनन शक्‍तिको पहिलो फल हौ। तिमी सबैभन्दा धेरै गौरवशाली र पराक्रमी छौ। ४ तर तिमी आफ्ना भाइहरूभन्दा महान्‌ हुन पाउनेछैनौ। किनकि खोलाको छालझैँ अनियन्त्रित भएर तिमी आफ्नो बुबाको ओछ्यानमा चढ्‌यौ। तिमीले मेरो ओछ्यान बिटुलो* पाऱ्‍यौ।+ हो, तिमीले नीच काम गऱ्‍यौ!

५ “सिमियोन र लेवि दाजुभाइ हुन्‌।+ तर तिनीहरूले आफ्नो तरबार उठाएर हिंसा मच्चाए।+ ६ हे मेरो मन, तिनीहरूसित सङ्‌गत नगर्‌। हे मेरो गौरव,* तिनीहरूको सभामा नबस्‌। किनभने रिसको झोकमा तिनीहरूले मानिसहरूलाई मारे+ अनि गोरुहरूको ढोडनसो* काटेर रमाइलो माने। ७ कसैलाई दयामाया नगर्ने+ तिनीहरूको रिसलाई धिक्कार छ। आगोजस्तो दन्कने तिनीहरूको क्रोधलाई धिक्कार छ। म तिनीहरू दुवै जनालाई याकुबको देशमा छरपस्ट पार्नेछु; म तिनीहरूलाई इस्राएलमा तितरबितर पार्नेछु।+

८ “हे यहुदा,+ तिमीले आफ्ना दाजुभाइको प्रशंसा पाउनेछौ।+ तिमीले आफ्ना शत्रुहरूको गर्दन समात्नेछौ।+ तिम्रा दाजुभाइ तिमीसामु झुक्नेछन्‌।+ ९ यहुदा सिंहको डमरु हो।+ हे मेरो छोरा, तिमी आफ्नो सिकार खाएर उठ्‌नेछौ। सिंहझैँ तिमी लमतन्‍न पल्टनेछौ। तिमीलाई जगाउने कसको आँट? १० जबसम्म सीलो* आइपुग्दैन,+ तबसम्म यहुदाको हातबाट राजदण्ड र तिनको गोडाको बीचबाट शासकको लौरो हट्‌नेछैन+ अनि मानिसहरूले सीलोको आज्ञा पालन गर्नेछन्‌।+ ११ यहुदाले आफ्नो गधालाई अङ्‌गुरको बोटमा र त्यसको बच्चालाई सबैभन्दा राम्रो अङ्‌गुरको लहरामा बाँध्नेछन्‌। तिनले आफ्नो कपडा मद्यमा र अङ्‌गुरको रसमा धुनेछन्‌। १२ तिनका आँखा मद्य पिएर राता भएका छन्‌ र तिनका दाँत दूध पिएर सेता भएका छन्‌।

१३ “जबुलुन+ समुद्री किनारामा बसोबास गर्नेछन्‌, पानीजहाज अड्‌याउने बन्दरगाहमा तिनी बस्नेछन्‌।+ तिनको सिमाना सिदोनतर्फ हुनेछ।+

१४ “इस्साकार+ बलियो गधाजस्तै हो, आफ्नो पीठको दुवैतिर भारी बोकेर पनि आराम गर्न सक्ने। १५ आफ्नो इलाका, आफ्नो भागको जमिन राम्रो रहेछ भनेर इस्साकारले देख्नेछन्‌। अनि तिनी भारी बोक्न झुक्नेछन्‌ र गह्रौँ भारी बोक्न पनि पछि हट्‌नेछैनन्‌।

१६ “दानले+ इस्राएलको एउटा कुलको रूपमा मानिसहरूको निसाफ गर्नेछन्‌।+ १७ दानचाहिँ बाटो छेउको सर्पझैँ हुनेछन्‌, गोरेटोमा आउने सिङ भएको सर्पझैँ, जसले घोडाको कुर्कुच्चो डस्छ र घोडचढी पछारिन्छ।+ १८ हे यहोवा, मेरो उद्धार गर्नुहोस्‌, म तपाईँकै बाटो हेर्नेछु।

१९ “गादलाई+ लुटेराहरूको दलले आक्रमण गर्नेछ तर तिनले उल्टै हमला गरेर तिनीहरूलाई खेद्‌नेछन्‌।+

२० “असेरसँग+ खानेकुराको छेलोखेलो हुनेछ र तिनले राजाको जस्तै भव्य भोजन उपलब्ध गराउनेछन्‌।+

२१ “नप्तालि+ हरिणीझैँ फुर्तिलो छ। तिनले मीठामीठा कुरा गर्नेछन्‌।+

२२ “युसुफ+ पानीको मुहान छेउको लटरम्म फल फल्ने रूखको हाँगा हो, जसका लामा-लामा हाँगाहरू पर्खाल नाघेर जान्छन्‌। २३ तर धनुर्धारीहरूले तिनलाई दुःख दिइरहे, तिनलाई काँडले हानिरहे र तिनीसित दुस्मनी राखेर मनमा ईख पालिरहे।+ २४ तैपनि तिनको धनु डगमगाएन।+ तिनका हात कमजोर भएनन्‌, तिनले फुर्तीसाथ आफ्ना हात चलाइरहे।+ यसको पछाडि याकुबलाई मदत गर्ने शक्‍तिशाली परमेश्‍वरको हात छ; ती गोठालोको हात छ, जो इस्राएलका चट्टान हुन्‌। २५ तिनी* मेरा परमेश्‍वरको आशिष्‌ हुन्‌। तिनी सर्वशक्‍तिमान्‌ परमेश्‍वरले देखाउनुभएको बाटोमा हिँड्‌छन्‌। उहाँले तिनलाई मदत गर्नुहुनेछ। उहाँले तिनलाई माथि आकाशबाट र गहिरो सागरबाट आशिष्‌ दिनुहुनेछ।+ उहाँको आशिष्‌ले तिनका सन्तान फल्दै-फुल्दै जानेछन्‌ र तिनका वस्तुभाउ पनि बढ्‌नेछन्‌। २६ तिनका बुबाले दिएका यी आशिष्‌हरू युगयुगदेखिका पहाडहरूभन्दा उत्तम अनि कहिल्यै नडगमगाउने पहाडहरूभन्दा पनि मनमोहक छन्‌।+ आफ्ना दाजुभाइबाट अलग पारिएका युसुफमाथि यी आशिष्‌हरू सधैँभरि लागोस्‌; तिनका शिरमा यी आशिष्‌हरू सधैँभरि बर्सिरहोस्‌।+

२७ “बिन्यामिन+ फहराउने ब्वाँसोजस्तै हुनेछन्‌।+ तिनले बिहान सिकार गरेर खानेछन्‌; साँझचाहिँ लुटको धन बाँड्‌नेछन्‌।”+

२८ इस्राएलका यी नै छोराहरूबाट इस्राएलका १२ कुल बने। इस्राएलले आफ्ना छोराहरूलाई दिएका आशिष्‌ यी नै हुन्‌। इस्राएलले आफ्नो हरेक छोरालाई सुहाउँदो आशिष्‌ दिए।+

२९ त्यसपछि तिनले छोराहरूलाई यस्तो आदेश दिए: “अब म मेरा पितापुर्खाजस्तै माटोमा मिल्ने बेला भइसक्यो।+ तिमीहरूले मेरो लासलाई मेरा पुर्खाहरूको चिहान हित्ती एप्रोनको खेतमा भएको ओडारमा लगेर गाड्‌नू,+ ३० जुन मम्रेनजिकैको मक्पेलामा छ। तिमीहरूका जिजुबाजे अब्राहामले चिहान बनाउन हित्ती एप्रोनबाट त्यो जमिन किनेका थिए। ३१ त्यहीँ नै तिमीहरूका जिजुबाजे अब्राहाम र जिजुबज्यै सारालाई गाडिएको थियो।+ त्यहीँ नै तिमीहरूका बाजे इसहाक+ र बज्यै रिबेकालाई गाडिएको थियो। अनि त्यहीँ मैले तिमीहरूकी आमा लेआलाई पनि गाडेँ। ३२ त्यो खेत र त्यहाँको ओडार हित्तीहरूसित किनिएको थियो।”+

३३ यसरी याकुबले आफ्ना छोराहरूलाई यी सबै कुरा अह्राएपछि ओछ्यानमा आफ्नो गोडा पसारे र अन्तिम सास फेरे। यसरी तिनी आफ्ना पितापुर्खाजस्तै माटोमा मिल्न गए।+