Soka Samboti ku Vye Wakuzala

Muthu na muthu wali na phiku yendi yakuzala. Mazi kuli milongi za Bibilya zitukwasa kuzala samboti na kusangulwisa Yehova. Twakulilonga milongi zasu.

1. Vikhi vihasa kutukwasa kuzala samboti?

Twatokala kuzala samboti na “silunzi na mana amboti.” Nga twalumba vye, twakuleka mukomo kwa Suku. (1 Timóteo 2:9, 10) Tala milongi ziwana ze: (1) Vimbamba vyetu “vyatokala kuleka vumbi ku vakwetu.” Hamwe wakaya kali ku zinzangu za Zimbangi za Yehova, yivi wakamona kali momo vuvu vezi kuzala. Avuvu kavezi kuzala vimbamba vya lififa. Kukhanda yikwau, zikhambu zetu, na kuzala kwitu kwafanya kuhana mukumo kwa Yehova. (2) Twatokala kuzala vimbamba vyamboti, katwatokeleli kuzala vimbamba vye vileka mwila wetu ni lowo vye vilumbisa vakwetu kuliva mwaviha. (3) Tuhasa kuleka ‘silunzi,’ nga katwazeleli nãngu momo vamwe vathu vezi kuzala mu tumbu. (4) Vifa vyetu vyatokala kuleka kwakuniga twasola kusimanya Suku, na kumusangulwisa.—1 Coríntios 10:31.

2. Namwahi vakwetu vahasa kuliva mukonda lya momo twezi kuzala?

Yitu twatokala kuhanda vimbamba vye yitu tusola. Mazi twatokala kusoka samboti momo vakwetu vakuliva kukhanda ya momo twezi kuzala. Twafanya kulumba zikhono phala katupyatwisi vakwetu mukonda lya momo twezi kuzala. “Twafanya kulumba vye vihasa ku sangulwilisa na kukwasa vakwetu.”—Tanga Romanos 15:1, 2.

3. Namwahi kuzala kwetu kukwasa vathu kuywela samboti kukhanda ya Yehova?

Twafanya kuzala samboti kweshoku twali, mazi suma salanda ha twezi kuya mukulonga na ku zinzangu. Katwasoleli nga vathu vasoka mwaviha mukonda lya kuzala kwetu. Kukhanda yikwau, katwasoleli nga vathu vahewa ulongesu wa Bibilya mukonda lya momo twezi kuzala. Nga twazala samboti, “twakuwehesa ulongesu” wa Bibilya na kuhana lifumo kwa Suku yetu, na kukwasa vathu vakwau kutuva sili kukhanda ya Yehova.—Tito 2:10.

LILONGI WEKHA

4. Twafanya kuzala samboti phala kuleka vumbi kwa Yehova

Mukonda lya vikhi twafanya kuzala samboti? Tangyenu Salmo 47:2. Vyelienu kukhanda ya vihulu vye:

• Yitu twezi kusimanya Yehova. Namwahi kuzimbuluka vye vitukwasa kuzala samboti?

• Mukonda lya vikhi twatokala kuzala samboti nga twali phala kuya mukulonga, ni lowo ku zinzangu? Mukonda lya vikhi usoka momo?

5. Twafanya kulumba kayula kamboti kukhanda ya momo twakuzala

Talyenu VIDYU.VIDYU:

“Lumba Vyuma Phala Kuhana Lifumu Kwa Suku” (10:18)

Vimbamba vyetu kavivingi kuta vitali vinzi, mazi vyatokala kuyela. Tangyenu 1 Coríntios 10:24 na 1 Timóteo 2:9, 10. Mukonda lya vikhi vimbamba vyetu ka vyatokaleli kukhala . . 

• vimbamba vya viha

• vimbamba vye kavizuki ku muzimba na vye vileka muzimba na vye vilumbisa vakwetu kukhala na visoka vya kulumba undumbu

Kumivu za munyima Yehova wakahana vituminu vinzi ku mbunga vyendi. Kulinu zi Kilistau kavavingi kulandula vituminu vyasu. Mazi ola mwemomo vituminu vyasu vitulonga sinene momo Yehova ezi kusoka. Tangyenu Deuteronômio 22:5. Vyelienu kukhanda ya sihulu se:

• Mukonda lya vikhi vayala kavatokaleli kuzala vimbamba vya mukhetu, ni lowo vakhetu kuzala vimbamba vya vayala?

Tangyenu 1 Coríntios 10:32, 33 na 1 João 2:15, 16. Vyelienu kukhanda ya vihulu vye:

• Vimbamba nezi kuzala vyezi kulumbisa umwe phangi mu sikungulwila, ni lowo muthu mukwau kuliva mwaviha ko yimi natunga?

• Ako yive watunga, namwahi vathu vezi kuzala?

• Mukusoka kwavi, suma samboti zi Kilistau kuzala mwemomo?

VIKHI WATUVA

Nga twalumba tuyula twamboti kukhanda ya momo twafanya kuzala, twakuleka vumbi kwa Yehova na vakwetu.

Kuzimbuluka

• Mukonda lya vikhi kuzala kwetu kwali na mukomu kwa Yehova?

• Milongi zikhi za Bibilya zihasa kutukwasa kulumba tuyula twa momo twafanya kuzala?

• Namwahi kuzala kwetu kuhasa kuhana lifumu kukhanda ya Yehova?

KENGA WEKHA

Vye wezi kuzala vileka vikhi kukhanda ya yivi?

“O que é que a tua roupa diz sobre ti?” (Mu jw.org)

Tala mukonda lya vikhi suma samboti kusoka andi ya kulisoneka ku muzimba.

“O que diz a Bíblia sobre tatuagens?” (Mu jw.org)

Tala milongi zikwau zihasa kukukwasa kulumba kayula kamboti ku vye wakuzala.

“Será que a sua roupa mostra que você serve a Deus?” (A Sentinela, setembro de 2016)

Tala momo umwe mukhetu akatuva momo vathu vatokala kuzala.

“O modo de me vestir e arranjar era a minha pedra de tropeço” (Despertai!, 22 de dezembro de 2003)