Namwahi Yehova Ali?

Vikhi yivi usoka kukhanda ya Yehova? Usoka uti Suku muthu munene, ali kakwihi netu nañgu zithethemwa? Ni usoka uti kamuthu aku, sitembu? Mazi Yehova yili? Bibilya yituzimbwila yiti Suku muthu wamboti, endi akusola sinene.

1. Mukonda lya vikhi katuhasi kumona Suku?

Bibilya mu mukanda wa João 4:24 yiti: “Suku nzumbi.” Yehova kesi na manyinga na vifuha. Endi watunga kolu, katuhasi kumumona.

2. Yehova muthu mukhi?

Katuhasi kumona Yehova. Mazi nga twalilonga Bibilya, twakutala tuti endi kweni ali. Twakutala tuti endi muthu wamboti. Bibilya yiti: ‘Yehova ali na sisola sa vyuma vyamboti, endi kesi kulava va vali na ufelelo kwendi.’ (Salmo 37:28) Endi ali na “sali sinene sa vathu,” landa lya landa va vali mokumona lamba. (Tiago 5:11) “Yehova wali kuhehi wa va vali mukwiva kukola kumbungi.” (Salmo 34:18) Waziva kali kwakuninga nga walumba vyuma vya viha Suku akuzinda? (Salmo 78:40, 41) Mazi nga walumba vyuma vyamboti Yehova akusanguluka.—Tanga Provérbios 27:11.

3. Namwahi Yehova ezi kutuleka sisola sendi?

Bibilya yiti: “Suku sisola.” Kakwesi muthu atusola sinene nañgu Suku. (1 João 4:8) Tuhasa kumona sisola sa Yehova ku vye tutanga mu Bibilya na vye yindi akalumba. (Tanga Atos 14:17.) Asi soka momo yindi akatulumba. Etu tuhasa kutala vyuma vyamboti, kwiva tuselu twa waha na makulya amboti. Mukonda lya vikhi akatulumba momo? Mukonda endi wasola nga tukhala na kusanguluka.

LILONGI WEKHA

4. Nzumbi ikola zikhono za Suku

Etu twali na mavoko phala kulumba milimu. Amuni Yehova me? Endi ezi kulumba milimu na vikhi? Endi ezi kulumba na Nzumbi ikola. Vamwe vathu vezi kusoka veti Nzumbi ikola, Suku. Mazi Bibilya yiti Nzumbi ikola zikhono za Suku ezi kulumba nazu milimu ze yindi asoli. Tangyenu Lucas 11:13 na Atos 2:17. Vyelienu kukhanda ya vihulu vye:

• Twatuva kwakuninga Yehova ‘akuhana Nzumbi ikola’ kuva vamulomba. Mukusoka kwavi, Nzumbi ikola Suku ni zikhono za Suku? Mukonda lya vikhi usoka momo?

Yehova ezi kulumba vyuma vinzi na Nzumbi Ikola. Tangyenu Salmo 33:6 na 2 Pedro 1:20, 21. Vyelienu kukhanda ya sihulu se:

• Vyuma vikhi Yehova alumbi kali na Nzumbi ikola?

5. Yehova muthu wamboti

Moises wakakhala kamba lya Suku, mazi ola mwemomo wakasola kuziva wekha kukhanda ya Suku. Endi wakaywela eti: “Ñguleke zinzila zavi phala yime kukuziva samboti.” (Êxodo 33:13) Yehova kumuzimbwila vilinga vye ali navyu. Tangyenu Êxodo 34:4-6. Vyelienu kukhanda ya vihulu vye:

• Moises wakatuva kwakuninga Yehova yili?

• Vikhi usola sinene kwa Yehova?

6. Yehova ali na sali sa vathu

Zi Hebreu, vathu vakakhala kusimanya Suku kumivu za munyima, mazi vakakhala vahika mu Egitu. Namwahi Yehova akaliva hose akavamona mukuhita na lamba? Evyenu AUDIU mutali mu Bibilya. Ni lowo tangyenu Êxodo 3:1-10. Vyelienu kukhanda ya vihulu vye:

AUDIU: Yehova Kakalivili Samboti Mukonda lya Lamba Lyavu (2:45)

• Kuti Yehova ezi kuliva hose ezi kutumona mukuhita na lamba?—Tala sithimbu 7 na 8.

• Usoka uti Yehova wasola kukwasa vathu? Mukonda lya vikhi usoka momo?

7. Vyuma vinzi vyali mu tumbu vitulonga kukhanda ya Yehova

Evi Yehova akalumba, vitulonga momo yindi ali. Talyenu VIDYU. Tangyenu Romanos 1:20. Vyelienu kukhanda ya sihulu se:

VIDYU: Evi Yehova Akalumba Vileka Kwakuninga Endi Ali na Sisola Netu—Muzimba wa Muthu (1:57)

• Evi Yehova akalumba vikulonga vikhi kukhanda ya yindi?

VIKHI WATUVA

Katuhasi kumona Yehova mukonda endi kesi na muzimba nañgu wetu. Endi muthu wamboti, atusola sinene.

Kuzimbuluka

• Mukonda lya vikhi katuhasa kumona Yehova?

• Nzumbi ikola vikhi?

• Kuti Yehova ali?

KENGA WEKHA

Yehova ali na vilinga vinzi, mazi evi vya landa viwana. Lilongi mumukanda wo.

“Como é Deus?” (A Sentinela, n.º 1 de 2019)

Yehova kesi hanu hosi endi ali tuhu kolu.

“Deus está em todos os lugares ao mesmo tempo?” (Mu jw.org)

Bibilya yiywela yiti Nzumbi ikola zikhono za Suku.

“O que é o espírito santo?” (Mu jw.org)

Julio wakaka mesu. Endi wakakhala kusoka heti Suku kamusoli. Tala vye vya kamukwasa kusoka samboti.

“Agora sinto que posso ajudar outros” (A Sentinela, 1.º de outubro de 2015)