Níłchʼi Bidaʼiiníziinii éí Daneeznánígíí Tʼahdii Dahiná Daaníigo Dabiyoochʼííd
Diyin Bizaad áníigo éí Séítan ‘nihookááʼ tʼáá siʼą́ą́ nítʼééʼ yinaʼaloʼ.ʼ (Revelation 12:9) Séítan dóó níłchʼi bidaʼiiníziinii nidaalʼaʼí doo éí Diyin Bizaad deidiidląął da danízingo ádaaní. Daneeznánígíí tʼahdii dahináago deidiidląął danízin. Haitʼéego ákódaaníníí dadíníilʼįįł.
Doo Tʼááʼaaníí Nahaghá
Bílaʼashdlaʼii, naaldlooshii, łóóʼ, dóó tsídii nidaatʼaʼii—tʼááʼátʼéii ńtʼééʼ daniné
Ághá ánéelą́ąʼgo nahaghaʼígíí díí yee ndaʼntin, łaʼ diné daatsaahgo biiʼsizíinii tʼahdii náásgóó hináh daaní. Ádaaníigo éí atsʼíís ádin silı̨́ı̨́ʼ ndi, biiʼsizíinii éí doo ádin dooleeł da. Hwiiʼsizíinii éí tsʼídá doo dadootsaał da daaníigo yee naazı̨́.
Diyin Bizaad éí díí doo yínaʼniłtin da. Áłtsé Diyin Bizaad ályaa yę́ędą́ą́ʼ éí Genesis 2:7gi Ádam “hinááh silı̨́ı̨́ʼ” ní. Baa ákoninzı̨́ı̨́ʼ daatsʼí doo éí “hwiiʼsizíinii” hinááh silı̨́ı̨́ʼ níida. Ádam iiná bee yíílyá, diné ńdídzihii silı̨́ı̨́ʼ.
Diyin Bizaad áníigo éí diné daatsaahgo bee iinaʼígíí ninítʼíʼgo doo náá hínáa da. Áko náánáłaʼ diné bee iinaʼ tʼahdii yoołtʼíhígíí doo éí haitʼéego yaa nídóotʼįįł da. Diyin Bizaad biiʼ hadasdzoígíí ání:
“Diné łaʼda atʼı̨́ ábiʼdiilʼįįhgo . . . háálá daaztsą́ągo tʼáadoo dah yididooléłí da”.—Psalm 49:16,17.
“Biyol haalwoʼgo bí éí łeeyiʼ góyaa yileeh; tʼáá éí bijı̨́ bintsíkees ádįįh.”—Psalm 146:4.
Diyin Bizaad áníigo éí diné daatsaahgo bee iinaʼígíí ninítʼíʼgo doo náá hínáa da
Áádóó łahgóó Diyin Bizaad biiʼ hanáádasdzooígíí áníigo éí naaldloosh ádin yileehígi átʼéego diné ałdóʼ ádin yileeh. (Ecclesiastes 3:19, 20) Daneeznáanii éí tsʼídá tʼáadoo bił bééhóziní da. (Ecclesiastes 9:5, 10) Áko diné ádin yileehgo, doo éí háadida náá hínáa da.
Diyin Bizaad tsʼídá tʼááʼátʼéii ńtʼééʼ ałtso yííníłtaʼ ndi haaʼída daneeznáaníí háadida náá dahiiná doo níida. Łáʼ diné daatsaahgo doo éí níłchʼi yileeh da. Diné daatsaahgo biníłchʼi náánáłaʼ háajigoda ííyáh haʼnínígíí éí Diyin Bizaad doo yínaʼniłtin da. Éí Séítan dóó níłchʼi bidaʼiiníziinii nidaalʼaʼí binaʼnitin átʼé. Jiihóvah éí tʼááʼátʼéii ńtʼééʼ yoochʼííd nahaghaʼ kʼehgo yijoołxáago doo yíłdin da.—Proverbs 6:16-19; 1 Timothy 4:1, 2.
Níłchʼi Dineʼé Kéédahatʼı̨́įdi Bił Achʼįʼ Yáʼátiʼii
Níłchʼi bidaʼiiníziinii éí diné daneeznánée biníłchʼi ádaʼdilʼı̨́
Séítan níłchʼi yádabiiłtiʼii yee diné yóóʼiiniiʼaah. Tsʼídá tʼóóʼahayóí diné, dóó ałdóʼ níłchʼi yádabiyiiłtiʼii, daneeznánée bichʼįʼ háá dahadziih danízingo dee yoodlą́. Diyin Bizaad áníigo éí daneeznáanii bił achʼįʼ yáʼátíʼígíí tsʼídá doo bohónéedzą́ą da.—Ecclesiastes 9:5, 6, 10.
Ákoísh háí éí íiyisíí bitsʼą́ą́dę́ę́ʼ dahaneʼ? Éíyeeʼ níłchʼi bidaʼiiníziinii tʼáá bí ádaatʼı̨́! Diné dahiinánígíí haitʼéego yáłtiʼ, haa nóolin, átʼįįdę́ę áádóó índída tsʼídá ałtso yee yaa áhoniizı̨́ı̨́ʼę́ę, díí dı̨́įʼgo, níłchʼi bidaʼiiníziinii hadeesííd. Éí biniinaa diné ádaadinée doo bándanitłʼago yéédaʼałʼı̨́.—1 Samuel 28:3-19.
Haneʼ Tʼóó Ádaalyaii
Séítan bihaneʼ tʼóó ádaalyaaígíí, daneeznáanii tʼáh dahiináládą́ą́ʼ éí diné dee doodląąłgo yá yinízin. Tʼóó ádaalyaago haneʼígíí biniinaa diné tʼááʼaaníínii Diyin Bizaad biiʼę́ę yitsʼą́ąjigo dahidikááh.—2 Timothy 4:4.
Łaʼ shı̨́ı̨́ ádeenízingo diné dayooʼínígíí daaztsánée átʼı̨́ danízin
Łahgóó daneeznánée nídajiiłtsą́ągo baa dahaneʼ. Diné łaʼ ádaaníigo éí tʼáá ájídinéegi naagháago nééłtsą́ daaníigo yaa chʼídahwiiʼah.
Africadi łahda éí daneeznánéeígíí doo kéédahatʼínéegi nídabiʼdiiltsééh. Ákó ndi shı̨́ı̨́ díí diné deeyiiłtsánígíí éí diné ádinée tʼóó yił áhinoolin. Áko ákótʼéego éí łaʼ baa haneʼ kweʼé: naakigo Jiihóvah Yá Dahalneʼé hooghan tahgóó hoolnihgo hastiin sáníléiʼ haanízáadjįʼ shı̨́ı̨́ haakééʼ nikidiiyá. Hastiin sáníyę́ę díí łaʼ Jiihóvah Yá Dahalneʼé íidííniid ‘shinaaí ádinée ánítʼı̨́ı̨́ lá.ʼ Tʼáá bahatʼaadí doo éí átʼı̨́įda ndi doo baghaʼdeetʼą́ą́go yoosdląąd. Hááhgóóshı̨́ı̨́ ayóó átʼéego bikʼis dóó yił kééhatʼíinii yee yił nahasneʼ!
Hoł Áhátʼı̨́, Hakʼínáʼiilchíigo, Naʼiigeeł, Biinééʼ Dazhdiitsʼaʼ
Hoł áhátʼı̨́, akʼináʼiilchííh, naʼiigeeł, biinééʼ dazhdiitsʼaʼígíí, díí dı̨́įʼgo, níłchʼi bidaʼiiníziinii chodayoołʼı̨́įgo diné yee yóóʼadeeniiʼaah
Díí shı̨́ı̨́ nił bééhózin łaʼ tʼáá bitaʼígi ádahooníiłgo diné dee yiiłtsánígíí dóó dee diiztsʼąʼígíí dóó yaa ndayiizyeelígíí; łahda shı̨́ı̨́ díí táaʼgo baa hosidínítsʼą́ą́ʼ. Díí áhootʼįįhgo éí diné ayóo yéédaaldzid łi. Marein éí Africa Eʼeʼaahjiʼgo hazʼánígi bighan. Áko tʼááʼahą́ą́ tłʼééʼgo bimásání ádinée biinééʼ yidiitsʼaʼ łi. Marein éí tsʼídá ayóo bééjíldzidgo bikʼee háázhdílwosh. Áko tsʼídá tʼááʼátʼéii ńtʼééʼ bił dahooghanígíí chʼééndajisiʼ. Biniinaa hániʼę́ę ásdįįd. Áko áyiisíí díí átʼéego atídaʼałʼínígíí éí níłchʼi bidaʼiiníziinii ádaatʼı̨́.
Łaʼ shı̨́ı̨́ diné bikʼéí ádaadinée bíká inídaalwoʼgo deeyoodlą́. Éí shı̨́ı̨́ bee bitah yáʼáhootʼéehgo ádabósin. Asdzání léiʼ Gbassay wolyéego Sierra Leonegi bighan, éí kweʼé baa haneʼ. Gbassay éí yéego bitah honeezgai. Bizhéʼé jiiłtsą́ągo baa nijiizyeel. Áko ńtʼééʼ kódíínííł bidííniid: tsʼídá haa shı̨́ı̨́ yitʼéhígíí tsin bitʼąʼ léiʼ tó bił tah dííkáałgo díídlı̨́ı̨́ł. Áádóó tʼááká háiida bił hólneʼ lágo bidííniid. Áko tsʼídá tʼáá biʼjiilaago yáʼátʼééh níjísdlı̨́ı̨́ʼ.
Asdzání bahastiin hádą́ą́ʼ shı̨́ı̨́ bitsʼą́ą́ʼ ádinée níyiiłtsą́ągo yahalneʼ. Áko ayóó ánóolingo néełtsą́ biʼééʼ ndi danizhóníyeeʼ.
Díí hoł áhátʼínígíí dóó naʼiigeeł shı̨́ı̨́ tʼááʼaaníí danízingo deeyoodlą́. Díísh God bitsʼą́ą́dę́ę́ʼ? Ndagaʼ, doo bíbitsʼą́ą́dę́ę́ʼ da. Jiihóvah éí “Diyin God tʼáá aaníinii” nilı̨́. (Psalm 31:5) Jiihóvah éí tsʼídá doo yóó anihidínóoʼáh da dóó doo nihiniʼdooloh da. Tsʼídá níłchʼi bidaʼiiníziinii tʼéiyá ákódaatʼı̨́.
Níłchʼi bidaʼiiníziiniiísh yáʼátʼéehgo ádaʼdoolííłgo átʼé? Ndagaʼ. Tsʼídá doo yáʼátʼéehgo ádaʼdoolíił da tʼááʼátʼéii ńtʼééʼ doo yáʼádajishxǫ́ǫ da, azhą́shı̨́ı̨́ tʼááʼaaníigo áká inídaalwoʼ nahalin ndi. Séítan ĺiv yichʼįʼ haadzííʼ yę́ędą́ą́ʼ hááhgóshı̨́ı̨́ báhózhǫ́ǫgo íʼdiilyaa. (Genesis 3:1) Áko ĺiv Séítan kónééh hałnínée biʼjiilaa. Biniinaash hajiidzaa? ĺiv daaztsą́.
Séítan éí ĺiv doo dadíítsaał da bił nínée, joosdląądígíí biniinaa náásdi są́ bikʼee dajiztsą́
Diné łaʼ doo yáʼáshónígíí hoʼdidooloh nízingo hááhgóóshı̨́ı̨́ łí hodiilchíih łi. Áko Diyin Bizaad kweʼé ání: “Séítan tʼáá bí níłchʼi bidaʼiiníziinii binanitʼaʼí nilíinii nidi, łahgo átʼéego diyingo naalʼaʼí bitsʼádiʼnídínígi átʼéego yíʼínídiilʼįįh.”—2 Corinthians 11:14.
Hoł áhátʼı̨́, naʼiigeeł, biinééʼ dazhdiitsʼaʼígíí, díí táaʼgo, Diyin God kʼad doo choyoołʼı̨́į da. Kʼad choyoołʼínígíí éí tʼáá bíBizaad diné yee neenitin. Díí éí Diyin Bizaad wolyé. Áko díí éí diné “tʼáá ałtsojįʼ yáʼátʼééh ájooníił doo biniyé hashtʼeʼázdólzin doo.”—2 Timothy 3:17.
Jiihóvah éí ayóóʼínihóʼní. Séítan ayóo binaʼadloʼígíí biniinaa Jiihóvah éí Séítan bitsʼąą ádaa ádahołyą́ nihiłní. Níłchʼi bidaʼiiníziinii anaaʼí danilı̨́ áko ayóo báá dahadzidgo bił bééhózin.