Masalimo

29 M’patseni Yehova, inu amphamvu,*

M’patseni Yehova ulemerero ndipo vomerezani kuti iye ndi wamphamvu.+

 2 M’patseni Yehova ulemerero woyenera dzina lake.+

Weramirani Yehova mutavala zovala zopatulika zokongola.+

 3 Liwu la Yehova lili pamwamba pa madzi,*+

Liwu la Mulungu waulemerero+ lagunda ngati bingu.+

Yehova ali pamwamba pa madzi ambiri.+

 4 Liwu la Yehova ndi lamphamvu,+

Liwu la Yehova ndi lokwezeka.+

 5 Liwu la Yehova likuthyola mitengo ya mkungudza,

Yehova akuthyolathyola mitengo ya mkungudza ya ku Lebanoni.+

 6 Iye akuichititsa kudumphadumpha ngati mwana wa ng’ombe,+

Lebanoni ndi Sirioni+ akudumphadumpha ngati ana a ng’ombe zakutchire.

 7 Liwu la Yehova likutulutsa malawi a moto.+

 8 Liwu la Yehova likuchititsa chipululu kuphiriphitha,+

Yehova akuchititsa chipululu cha Kadesi+ kuphiriphitha.

 9 Liwu la Yehova likuchititsa mbawala zazikazi kuphiriphitha ndi ululu wa pobereka,+

Ndipo likufafaniza nkhalango.+

M’kachisi wake aliyense akunena kuti: “Ulemerero ndi wa Mulungu!”+

10 Yehova wakhala pampando wake wachifumu pamwamba pa chigumula,*+

Ndipo Yehova ndi mfumu mpaka kalekale.+

11 Yehova adzapatsa anthu ake mphamvu.+

Yehova adzadalitsa anthu ake ndi mtendere.+