Masalimo

90 Inu Yehova, ndinudi malo athu okhalamo+

Ku mibadwomibadwo.+

 2 Mapiri asanabadwe,+

Kapena musanakhazikitse dziko lapansi+ ndi malo okhalapo anthu,*+

Inu ndinu Mulungu kuyambira kalekale mpaka kalekale.+

 3 Mumabwezera munthu kufumbi,+

Ndipo mumanena kuti: “Bwererani kufumbi, inu ana a anthu.”+

 4 Pakuti kwa inu zaka 1,000 zili ngati dzulo lapitali,+

Ndiponso zili ngati ulonda umodzi wa usiku.*+

 5 Mwawawonongeratu,+ ndipo amangozimiririka ngati maloto.+

M’mawa amakhala ngati msipu wobiriwira umene watsitsimuka.+

 6 Msipuwo umaphuka ndi kutsitsimuka m’mawa.+

Madzulo umafota kenako umauma.+

 7 Pakuti ife tatha chifukwa cha mkwiyo wanu,+

Ndipo tasokonezeka chifukwa cha kupsa mtima kwanu.+

 8 Zolakwa zathu mwaziika patsogolo panu,+

Ndipo machimo athu obisika* ali patsogolo pa nkhope yanu yowala.+

 9 Pakuti masiku athu onse atha chifukwa cha mkwiyo wanu.+

Zaka zathu zafika kumapeto ngati mpweya wotuluka m’mphuno pousa moyo.+

10 Masiku a moyo wathu amangokwana zaka 70,+

Ndipo ngati tili ndi mphamvu yapadera amakwana zaka 80.+

Koma ngakhale zili choncho, amangodzaza ndi mavuto ndi zopweteka.+

Pakuti masiku amene timakhala ndi moyo amatha mwamsanga ndipo timachoka mofulumira.+

11 Ndani angadziwe kukula kwa ukali wanu,+

Ndi kukula kwa mkwiyo wanu kumene kumafanana ndi ulemu umene muyenera kulandira?+

12 Tisonyezeni mmene tingawerengere masiku athu+

Kuti tikhale ndi mtima wanzeru.+

13 Bwererani kwa ife, inu Yehova!+ Kodi mudzatenga nthawi yaitali bwanji musanabwerere kwa ife?+

Timvereni chisoni ife atumiki anu.+

14 M’mawa mutikhutiritse ndi kukoma mtima kwanu kosatha,+

Kuti tifuule mokondwera ndi kuti tikhale osangalala masiku onse a moyo wathu.+

15 Tichititseni kusangalala kwa masiku ofanana ndi masiku amene mwatisautsa,+

Kwa masiku ofanana ndi zaka zimene taona masoka.+

16 Ntchito zanu zionekere kwa atumiki anu,+

Ndipo ulemerero wanu uonekere pa ana awo.+

17 Ubwino wa Yehova Mulungu wathu ukhale pa ife,+

Ndipo mukhazikitse ntchito ya manja athu.+

Muidalitse ntchito ya manja athu.+