Nkhondo Yomwe Inawononga Zaka za Zana la 19

1914

POKUMBUKIRA za zaka chikwi zatsopano, Charley Reese, wolemba nyuzipepala ya The Orlando Sentinel, analemba kuti: “Nkhondo ya mu 1914-18 yomwe inawononga zaka za zana la 19 sinathebe.” Kodi iye anatanthauzanji? Iye anafotokoza kuti: “Mbiri sigonera. Zaka za zana la 19​—zofotokozedwa mwa zikhulupiriro zake, zitsimikizo, malingaliro ndi makhalidwe abwino​—sizinathe pa Jan. 1, 1901. Zinatha mu 1914. Nthaŵi imeneyo mpamenenso zaka za zana la 20 zinayamba, zofotokozedwanso mofananamo. . . .

“Mwachionekere, mikangano yonse imene yachitika ife tilipo ndi moyo inachokera kunkhondo imeneyo. Pafupifupi zonse za maphunziro ndi zikhalidwe zimene takhala nazo zinayambika ndi nkhondo imeneyo. . . .

“Ndiganiza kuti nkhondoyo inasokoneza zinthu chifukwa chakuti inathetsa chikhulupiriro chimene anthu anali nacho chakuti iwo angalamulire zimene zidzawachitikira mtsogolo. . . . Nkhondoyo inachititsa anthu kukana chikhulupiriro chimenecho. Palibe gulu lililonse mwa magulu omenyanawo limene linaganizapo kuti zidzakhala mmene zinakhalira. Inawononga ufumu wa Britain ndi ufumu wa France. Inapha anthu ofunika kwambiri a mbadwowo ku Britain, France ndi Germany. . . . M’nthaŵi yochepa chabe, inapha anthu 11 miliyoni.”

Kwazaka zoposa 120, Mboni za Yehova zakhala zikufotokoza kuti 1914 inali mapeto a zimene Yesu anazitcha “nthaŵi zawo za anthu akunja.” (Luka 21:24) M’chaka chimenecho, Yesu Kristu woukitsidwa ndi wokwezekayo anaikidwa monga Mfumu ya Ufumu wakumwamba. Mwa Ufumu umenewo, Yehova Mulungu adzachotseratu mavuto onse omwe akhala akuchitika m’zaka za zana lino.​—Salmo 37:10, 11; Mlaliki 8:9; Chivumbulutso 21:3, 4.

[Mawu a Chithunzi patsamba 32]

Chithunzi cha U.S. National Archives