Kodi Mungatani Kuti Kuphunzira Baibulo Kuzikusangalatsani Komanso Kuzikuthandizani?

Yoswa akuwerenga Chilamulo; mzinda wa Yeriko ukugwa koma nyumba ya Rahabi sikugwa; Yoswa akweza manja m’mwamba ndipo akupemphera

YOSWA anapatsidwa ntchito yovuta kwambiri. Iye ankayenera kutsogolera mtundu wa Aisiraeli pa ulendo wokalowa m’Dziko Lolonjezedwa ndipo ankayembekezera kukumana ndi mavuto ambiri. Yehova anamutsimikizira kuti akwanitsa ntchitoyi ndipo anamuuza kuti: ‘Khala wolimba mtima ndipo uchite zinthu mwamphamvu. Uonetsetse kuti ukutsatira malamulo anga. Uziwawerenga usana ndi usiku, kuti uonetsetse kuti ukutsatira zonse zolembedwamo. Pakuti ukatero, udzakhala ndi moyo wopambana, ndipo udzachita zinthu mwanzeru.’—Yos. 1:7, 8.

Popeza tili ‘m’masiku otsiriza komanso ovuta,’ nafenso timakumana ndi mavuto ambiri. (2 Tim. 3:1) Kuti zinthu zitiyendere bwino, tiyenera kutsatira chitsanzo cha Yoswa yemwe ankatsatira malangizo amene Yehova anamupatsa. Zimenezi zingatheke tikamawerenga Baibulo nthawi zonse komanso kugwiritsa ntchito mfundo zake tikakumana ndi mayesero.

Ambirife tingavomereze kuti sitikonda kuwerenga ndipo timafunika kuchita khama kwambiri kuti tiziwerenga. Koma popeza kuwerenga Baibulo ndi kofunika kwambiri, tikukupemphani kuti muwerenge bokosi lakuti “Yesani Izi.” M’bokosili mupezamo mfundo zimene zingachititse kuti kuwerenga Baibulo kuzikusangalatsani komanso kuzikuthandizani.

Munthu wina wolemba masalimo anati: “Ndiyendetseni m’njira ya malamulo anu, pakuti ndikukondwera ndi njira imeneyi.” (Sal. 119:35) Nanunso mukhoza kumasangalala kwambiri powerenga Mawu a Mulungu. Ndipo mukamawerenga Baibulo mwakhama mudzazindikira mfundo zothandiza kwambiri.

N’zoona kuti inuyo simunapatsidwe udindo wotsogolera mtundu wa anthu ngati mmene zinalili ndi Yoswa. Koma tingavomereze kuti aliyense amakumana ndi mavuto. Ndiye muziwerenga komanso kutsatira mfundo za m’Baibulo kuti zikuthandizeni ngati mmene zinathandizira Yoswa. Mukamachita zimenezi, zidzakuyenderani bwino ndipo mudzachita zinthu mwanzeru.

YESANI IZI

Muzipemphera musanayambe kuphunzira. M’Baibulo muli maganizo a Mulungu wamphamvuyonse ndipo anawalembamo kuti azitithandiza. Choncho mukamawerenga Baibulo, muzimupempha kuti akuthandizeni kumvetsa mfundo zake, kuzikumbukira komanso kuzigwiritsa ntchito pa moyo wanu.—Ezara 7:10.
Muzidzifunsa mafunso mukamawerenga Baibulo kapena mabuku othandiza pophunzira Baibulo. Mungamadzifunse kuti, ‘Kodi zimene ndawerengazi zikundiphunzitsa chiyani zokhudza Yehova? Kodi zikugwirizana bwanji ndi mfundo zina za m’Mawu ake? Kodi ndingagwiritse ntchito bwanji mfundozi pothandiza ena?’
Muzisinkhasinkha zimene mwaphunzira. Muzisiya kaye kuwerenga n’kudzifunsa kuti, ‘Kodi zimene ndawerengazi zikundipangitsa kumva bwanji mumtima? N’chifukwa chiyani zikundipangitsa kumva chonchi? Kodi zikugwirizana bwanji ndi zimene zinandichitikira, zimene zikundichitikira panopa kapena zimene zingadzandichitikire m’tsogolo? Kodi ndingagwiritse ntchito bwanji malangizo komanso mfundo za m’Baibulozi pa moyo wanga? (Yobu 23:5; Sal. 49:3) Onani ngati mungathe kufotokoza chifukwa chake Yehova amauza anthu ake kuti asamachite zinthu zina. Mungaganizirenso mavuto amene munthu angakumane nawo chifukwa chochita zinthu zinazake.—Deut. 32:28, 29.
Muziyerekezera kuti mukuona zinthu zikuchitika mukamawerenga nkhani za m’Baibulo. Mwachitsanzo, mungaone m’maganizo mwanu zimene zinkachitika pa nthawi imene azichimwene ake a Yosefe ankamugulitsa kwa Aisimaeli. (Gen. 37:18-28) Kodi mukuona zotani, mukumva chiyani, nanga pakununkhira zinthu zotani? Yerekezerani kuti ndinu mmodzi mwa anthu otchulidwa munkhaniyo. Kodi akuganiza chiyani? Nanga akumva bwanji mumtima mwawo? Kuphunzira mwa njira imeneyi kungachititse kuti zimene mukuwerengazo muziziona kuti ndi zenizeni komanso kuti zinthuzo zikuthandizeni pa moyo wanu.
Muzigwiritsira ntchito zinthu zothandiza pophunzira zimene tili nazo. Phunzirani mmene mungagwiritsire ntchito zinthu zofufuzira zimene zikupezeka m’chinenero chanu. Mungachitenso bwino kupempha ena kuti akuthandizeni kuphunzira mmene mungazigwiritsire ntchito moyenera. Mwachitsanzo, pali Buku la Mboni za Yehova Lofufuzira Nkhani. Bukuli lingakuthandizeni kupeza zimene gulu linafotokoza pa nkhani zambiri komanso mungapeze matanthauzo a mawu ambiri amene anagwiritsidwa ntchito m’Baibulo. Mungagwiritsenso ntchito zakumapeto za mu Baibulo la Dziko Latsopano la Malemba Opatulika ngati lilipo m’chinenero chimene mumachidziwa. Zakumapetozi zimakhala ndi nkhani zokhudza malo, nthawi imene zinthu zinachitika, kulemera kwa zinthu ndi zinanso zambiri.
Muzipeza mfundo zikuluzikulu za m’nkhaniyo kuti muthe kukumbukira zimene mwaphunzira. Mungachitenso bwino kuuzako ena zimene mwaphunzira. Kodi pali mfundo zina zimene mungazigwiritse ntchito mu utumiki? Izi zimathandiza kuti zimene mwaphunzirazo zikhazikike m’maganizo mwanu komanso kuti muzigwiritse ntchito pothandiza ena.