PHUNZIRO 23

Ubatizo Ungakuthandizeni Kuti Mukhale Ndi Tsogolo Labwino

Losindikizidwa

Yesu anaphunzitsa kuti Akhristu ayenera kubatizidwa. (Werengani Mateyu 28:19, 20.) Koma kodi ubatizo n’chiyani? Nanga kodi munthu akuyenera kuchita chiyani kuti abatizidwe?

1. Kodi ubatizo n’chiyani?

Mawu akuti “batiza” amachokera ku mawu a Chigiriki amene amatanthauza kuviika m’madzi. Pamene Yesu ankabatizidwa, thupi lake lonse linaviikidwa mumtsinje wa Yorodano ndipo kenako ‘anavuuka m’madzimo.’ (Maliko 1:9, 10) Mofanana ndi Yesu, masiku ano Akhristu enieni akamabatizidwa, thupi lawo lonse limaviikidwa kapena kumizidwa m’madzi.

2. Kodi ubatizo ndi chizindikiro cha chiyani?

Munthu akabatizidwa, amasonyeza kuti anadzipereka kwa Yehova Mulungu. Koma kodi munthu amadzipereka bwanji? Asanabatizidwe, amapemphera kwa Yehova payekha n’kumuuza kuti akufuna kumutumikira kwa moyo wake wonse. Amalonjeza Yehova kuti azilambira Iye yekha, komanso kuti chinthu chofunika kwambiri pa moyo wake chikhala kuchita zimene Yehova amafuna. Iye amasankha ‘kudzikana yekha . . . n’kupitiriza kutsatira’ zimene Yesu anaphunzitsa komanso kuchita. (Mateyu 16:24) Akadzipereka komanso kubatizidwa zimamuthandiza kuti akhale pa ubwenzi wolimba ndi Yehova komanso Akhristu anzake.

3. Kodi munthu ayenera kuchita chiyani kuti abatizidwe?

Kuti munthu abatizidwe, ayenera kuphunzira zokhudza Yehova koma kuyamba kumukhulupirira kwambiri. (Werengani Aheberi 11:6.) Mukapitiriza kuphunzira zambiri zokhudza Yehova komanso kumukhulupirira, m’pamenenso mudzayambe kumukonda kwambiri. Kenako mudzayamba kufuna kulalikira zokhudza Yehova komanso kuchita zimene Iye amafuna pa moyo wanu. (2 Timoteyo 4:2; 1 Yohane 5:3) Munthu akangoyamba ‘khalidwe logwirizana ndi zimene Yehova amafuna, kuti azimusangalatsa pa chilichonse,’ amasankha kupereka moyo wake kwa Mulungu kenako amabatizidwa.—Akolose 1:9, 10.a

FUFUZANI MOZAMA

Onani zomwe tingaphunzire pa ubatizo wa Yesu komanso zomwe munthu angachite pokonzekera ubatizo.

4. Zimene tikuphunzira pa ubatizo wa Yesu

Werengani Mateyu 3:13-17 kuti mudziwe zomwe zinachitika pa ubatizo wa Yesu. Kenako mukambirane mafunso otsatirawa:

Kodi Yesu anabatizidwa ali wakhanda?
Kodi anabatizidwa bwanji? Kodi anangochita kumuwaza madzi?

Yesu atangobatizidwa, anayamba kugwira ntchito yapadera yomwe Mulungu anamutuma padzikoli. Werengani Luka 3:21-23 ndi Yohane 6:38, kenako mukambirane funso ili:

Yesu atabatizidwa, kodi ndi ntchito iti yomwe ankaiona kuti ndi yofunika kwambiri pa moyo wake?

5. N’zotheka kukwaniritsa cholinga chanu choti mubatizidwe

Poyamba mukhoza kuchita mantha mukaganizira zoti mudzipereke kwa Mulungu ndiponso kubatizidwa. Koma mukapitiriza kuphunzira zambiri zokhudza Yehova n’kufika pomudziwa bwino, mantha akhoza kutheratu ndipo mungakwanitse cholinga chofunika kwambiri chimenechi. Kuti muone anthu ena amene anakwanitsa kuchita zimenezi, onerani VIDIYO.

VIDIYO: Mungatani Kuti Yehova Akhale Mnzanu? (1:11)

Werengani Yohane 17:3 ndi Yakobo 1:5, kenako mukambirane funso ili:

Kodi munthu angatani kuti akonzekere kubatizidwa?

A. Mzimayi akudzipereka kwa Yehova kudzera m’pemphero.

B. Mzimayi yemwe uja akubatizidwa kuti akhale wa Mboni za Yehova ndipo wachita kuviikidwa thupi lonse m’madzi.

Timadzipereka kwa Yehova pomuuza m’pemphero kuti tikufuna kumutumikira kwa moyo wathu wonse
Pa tsiku limene tabatizidwa timasonyeza anthu kuti tinadzipereka kwa Mulungu

6. Tikabatizidwa timakhala m’banja la Yehova

Tikabatizidwa, timakhala m’banja logwirizana lapadziko lonse. Ngakhale kuti timachokera madera osiyanasiyana komanso tili ndi zikhalidwe zosiyanasiyana, timakhulupirira zinthu zofanana ndiponso timayendera mfundo zamakhalidwe abwino zofanana pa moyo wathu. Werengani Salimo 25:14 ndi 1 Petulo 2:17, kenako mukambirane funso ili:

Mogwirizana ndi mavesiwa, kodi ubatizo umathandiza bwanji munthu?

Zithunzi: Mlongo wobatizidwa akuganizira madalitso amene akusangalala nawo chifukwa chokhala pa ubwenzi wabwino Akhristu anzake mumpingo. Akufotokozera mlongo wina nkhawa zake. 2. Akuthandiza mlongo wachikulire kuyenda. 3. Waitanira chakudya anzake amisinkhu yosiyanasiyana. 4. Akulalikira bambo wina limodzi ndi mlongo wina. 5. Ali kumsonkhano ndi anzake ndipo akudzijambula.

ANTHU ENA AMANENA KUTI: “Ndidzabatizidwabe m’tsogolomu, panopa sindinakonzeke.”

Ngati inunso mukuganiza choncho, kodi mukuona kuti kukhala ndi cholinga choti mubatizidwe n’kofunika?

ZOMWE TAPHUNZIRA

Yesu anaphunzitsa kuti Akhristu ayenera kubatizidwa. Munthu amene akufuna kubatizidwa ayenera kukhulupilira kwambiri Yehova, kuyendera mfundo za Yehova pa moyo wake ndiponso kudzipereka kwa Yehova.

Kubwereza

Kodi ubatizo n’chiyani, nanga n’chifukwa chiyani anthu amayenera kubatizidwa?
Kodi kudzipereka komanso kubatizidwa n’zogwirizana bwanji?
Kodi ndi zinthu ziti zimene munthu ayenera kuchita asanafike podzipereka komanso kubatizidwa?

Phunziroli talimaliza pa:

Zoti Muchite

Onani mfundo za kumapeto kwa Gawo 4, “Kodi Ndakonzeka Kulalikira Limodzi ndi Mpingo?” komanso “Kodi Ndakonzeka Kubatizidwa?” kuti mudziwe zoyenera kuchita kuti muyambe kulalikira komanso kuti mubatizidwe.

Zina:

Your other goal

ONANI ZINANSO

Werengani nkhaniyi kuti mudziwe zimene ubatizo umatanthauza.

“Kodi Ubatizo N’chiyani?” (Nkhani yapawebusaiti)

Onani zimene munthu ayenera kuchita kuti afike pobatizidwa.

“Munthu Amabatizidwa Chifukwa Chokonda Yehova Komanso Kumuyamikira” (Nsanja ya Olonda, March 2020)

Werengani nkhaniyi kuti muone mmene munthu wina anasankhira kubatizidwa chifukwa chomvetsa bwino mfundo za m’Baibulo.

“Ankafuna Kuti Ndione Ndekha Kuti Zoona Ndi Ziti” (Nsanja ya Olonda, February 1, 2013)

Onani chifukwa chake ubatizo ndi wothandiza komanso zomwe mungachite kuti mufike pobatizidwa.

“Kodi Ndiyenera Kubatizidwa?” (Mayankho a Zimene Achinyamata Amafunsa, Buku Lachiwiri, mutu 37)

a Munthu ayenera kubatizidwanso ngakhale kuti anabatizidwa kale ku chipembedzo china. Tikutero chifukwa chipembedzo chimene analicho sichiphunzitsa choonadi cha m’Baibulo.—Onani Machitidwe 19:1-5 ndi Phunziro 13.