PHUNZIRO 6

Kufotokoza Bwino Malemba

Yohane 10:33-36

MFUNDO YAIKULU: Musamangoti kuwerenga lemba ili, basi kupita pa lemba lina. Muzithandiza anthu kuona kugwirizana pakati pa lemba limene mwawerenga ndi nkhani imene mukukamba.

MMENE MUNGACHITIRE:

Sankhani mawu ofunika. Mukawerenga lemba, muzisankhapo mawu amene akugwirizana kwambiri ndi mfundo yaikulu yamunkhani yanu. Mungabwereze kutchula mawuwo, kapena kufunsa funso limene lingachititse anthu kuganizira mawuwo.

Ngati mukugwiritsa ntchito mawu ena pofotokozera lemba, muzitsimikizira kuti anthu akuona kugwirizana pakati pa mawu a m’Baibulo ndi mfundo imene mukufotokoza.
Tsindikani mfundo. Ngati munatchula chifukwa chowerengera lemba, mukaliwerenga muzisonyeza mmene mawu amulembalo akuperekera chifukwacho.

Mukamafotokozera lemba, Baibulo lanu lizikhala lotsegula. Izi zimathandiza kuti anthu azigwirizanitsa zimene mukunena ndi mavesi amene mwawerenga.
Fotokozani mwachidule mmene tingagwiritsire ntchito. Pewani kunena zambirimbiri pa mawu amene sakugwirizana ndi mfundo yanu yaikulu. Ganizirani zimene anthu akudziwa kale pa lembalo. Kenako fotokozani mwachidule mmene anthu angagwiritsire ntchito mfundoyo.