PHUNZIRO 57
Kodi Muyenera Kuchita chiyani Ngati Mwachita Tchimo Lalikulu?
Ngakhale kuti mumakonda kwambiri Yehova ndiponso mumayesetsa kupewa kuchita zinthu zomwe zingamukhumudwitse, nthawi zina mukhoza kulakwitsa zinazake. Komabe machimo ena amakhala aakulu kuposa ena. (1 Akorinto 6:9, 10) Ngati mwachita tchimo lalikulu musataye mtima ndipo musaiwale kuti Yehova sanasiye kukukondani. Iye ndi wofunitsitsa kukukhululukirani komanso kukuthandizani kuti musinthe.
1. Kodi tiyenera kuchita chiyani kuti Yehova atikhululukire?
Anthu amene amakonda Yehova amadzimvera chisoni kwambiri akazindikira kuti achita tchimo lalikulu. Komabe Yehova amawatonthoza ndi lonjezo lakuti: “Ngakhale kuti machimo anu ndi ofiira kwambiri, adzayera kwambiri.” (Yesaya 1:18) Tikalapa mochokera pansi pa mtima, Yehova amatikhululukira ndi mtima wonse ndipo sakumbukiranso machimo athuwo. Ndiye timasonyeza bwanji kuti talapa? Timadzimvera chisoni kwambiri chifukwa cha zimene tachitazo ndipo chisoni chimenechi chimatichititsa kuti tisiye kuchita zinthu zoipa, kenako timapempha Yehova kuti atikhululukire. Komanso timachita khama kuti tisiye kuchita kapena kuganizira zinthu zoipa zimene zinachititsa kuti tichite tchimolo. Kuonjezera pamenepa, timayesetsa kutsatira mfundo za Yehova za makhalidwe abwino pa moyo wathu.—Werengani Yesaya 55:6, 7.
2. Kodi Yehova amagwiritsa ntchito bwanji akulu kuti atithandize tikachimwa?
Tikachita tchimo lalikulu Yehova amatiuza kuti ‘tiitane akulu a mpingo.’ (Werengani Yakobo 5:14, 15.) Akuluwa amakonda Yehova ndi nkhosa zake. Iwo anaphunzitsidwa bwino mmene angatithandizire n’cholinga choti tikhalenso pa ubwenzi wabwino ndi Yehova.—Agalatiya 6:1.
Kodi akulu amatithandiza bwanji tikachita tchimo lalikulu? Akulu awiri kapena atatu amagwiritsa ntchito mfundo za m’Malemba potithandiza kuzindikira kuti zomwe tachitazo ndi zolakwika. Iwo amatipatsa malangizo ndi kutilimbikitsa n’cholinga chotithandiza kuti tipewe kudzachitanso tchimolo. Pofuna kuteteza mpingo kuti ukhalebe woyera, akulu amachotsa mumpingo munthu yemwe wachita tchimo lalikulu ngati sanasonyeze mtima wolapa. Iwo amachita zimenezi kuti munthuyo asasokoneze ena.
FUFUZANI MOZAMA
Onani zimene mungachite kuti muziyamikira zimene Yehova amachita potithandiza tikachita tchimo lalikulu.
3. Kuulula machimo athu kumatithandiza kuti tikhalenso pa ubwenzi ndi Yehova
Tikachita tchimo lililonse Yehova amakhumudwa. Choncho tingachite bwino kuulula kwa iyeyo. Werengani Salimo 32:1-5, kenako mukambirane funso ili:
N’chifukwa chiyani tiyenera kuulula machimo athu kwa Yehova m’malo momubisira?
Tikaulula machimo athu kwa Yehova tiyeneranso kuuza akulu ndipo kuchita zimenezi kumathandiza kuti zinthu ziyambirenso kutiyendera bwino. Onerani VIDIYO, kenako mukambirane funso lotsatirali.
Muvidiyoyi, kodi akulu anathandiza bwanji Canon kuti abwerere kwa Yehova?
Tizimasuka pofotokozera akulu za tchimo lathu ndipo tiziwauza zoona zokhazokha. Iwo ndi okonzeka kuti atithandize. Werengani Yakobo 5:16, kenako mukambirane funso ili:
N’chifukwa chiyani akulu savutika kutithandiza tikawauza zoona zokhazokha zokhudza tchimo lathu?
Muziulula machimo anu kwa Yehova, muziuza akulu zoona zokhazokha komanso muzivomereza chilango chochokera kwa Yehova chimene amachipereka mwachikondi
4. Yehova amasonyeza chifundo kwa anthu ochimwa
Ngati munthu amene wachita tchimo lalikulu sakufuna kulapa komanso kutsatira mfundo za m’Malemba amachotsedwa mumpingo ndipo sitiyenera kumacheza naye. Werengani 1 Akorinto 5:6, 11, kenako mukambirane funso ili:
Mofanana ndi mmene zofufumitsa zimafufumitsira mtanda wa ufa wokandakanda, kodi kucheza ndi munthu wochimwa yemwe sanalape kungakhudze bwanji mpingo wonse?
Potsanzira Yehova amene amasonyeza chifundo kwa anthu ochimwa, akulu amayesetsa kuthandiza anthu amene anachotsedwa mumpingo. Anthu ambiri amene anachotsedwapo mumpingo anabwerera chifukwa cha chilango chomwe anapatsidwa. Ngakhale kuti kuchotsedwa mumpingo ndi kowawa, kunawathandiza kuzindikira kuti zimene anachita zinali zolakwika.—Salimo 141:5.
Kodi mmene Yehova amachitira zinthu ndi anthu ochimwa zimasonyeza bwanji kuti amawamvetsa, amawachitira chifundo ndiponso amawakonda?
5. Yehova amakhululukira munthu amene walapa
Yesu anagwiritsa ntchito fanizo lomwe limatithandiza kumvetsa mmene Yehova amamvera munthu wochimwa akalapa. Werengani Luka 15:1-7, kenako mukambirane funso ili:
Kodi fanizoli likukuphunzitsani chiyani zokhudza Yehova?
Werengani Ezekieli 33:11, kenako mukambirane funso ili:
Kodi munthu ayenera kuchita chiyani posonyeza kuti walapadi?
Mofanana ndi m’busa, Yehova amasamalira mwachikondi nkhosa zake
ANTHU ENA AMANENA KUTI: “Ndikuopa kuti ndikaulula tchimo langa kwa akulu andichotsa mumpingo.”
Kodi munthu amene ali ndi maganizo amenewa mungamuuze zotani?
ZOMWE TAPHUNZIRA
Ngati munthu wachita tchimo lalikulu n’kulapa mochokera pansi pa mtima komanso watsimikiza mtima kuti sadzachitanso tchimolo, Yehova amamukhululukira.
Kubwereza
N’chifukwa chiyani tiyenera kuulula machimo athu kwa Yehova?
Kodi tiyenera kuchita chiyani kuti Yehova atikhululukire machimo athu?
Ngati tachita tchimo lalikulu, n’chifukwa chiyani tiyenera kupempha akulu kuti atithandize?
ONANI ZINANSO
Onani mmene Yehova anasonyezera munthu wina chifundo chimene achitchula pa Yesaya 1:18.
Kodi akulu amathandiza bwanji munthu amene wachita tchimo lalikulu?
“Mmene Tingasonyezere Chikondi ndi Chifundo Wina Akachita Tchimo” (Nsanja ya Olonda, August, 2024)
Onani mmene anthu osalapa amasonyezedwera chikondi komanso chifundo.
“Kodi Akulu Angathandize Bwanji Anthu Amene Achotsedwa Mumpingo?” (Nsanja ya Olonda, August, 2024)
Munkhani yakuti, “Ndinazindikira Kuti Ndiyenera Kubwerera kwa Yehova,” onani chifukwa chake munthu wina anaona kuti Yehova wamuthandiza kubwerera kwa iye.
“Baibulo Limasintha Anthu” (Nsanja ya Olonda, April 1, 2012)