Mmene Tingaonetsele Cikondi kwa Anthu Anzathu

Popeza kuti tonsefe kholo lathu loyamba ni Adamu, ndife banja limodzi. Ngakhale kuti a m’banja amafunika kukondana na kulemekezana, masiku ano n’zovuta kuti anthu a m’banja limodzi azikondana. Ndipo izi si zimene Mulungu wathu wacikondi amafuna.

ZIMENE MALEMBA OYELA AMAKAMBA PONENA ZA CIKONDI

“Uzikonda mnzako mmene umadzikondela wekha.”—LEVITIKO 19:18.

“Pitilizani kukonda adani anu.”—MATEYU 5:44.

ZIMENE KUKONDA ANTHU ANZATHU KUMATANTHAUZA

Onani mmene Mulungu amafotokozela khalidwe lacikondi m’Mawu ake pa 1 Akorinto 13:4-7:

“Cikondi n’coleza mtima ndiponso n’cokoma mtima.”

Ganizilani izi: Kodi mumamvela bwanji ngati ena acita nanu zinthu moleza mtima komanso mokoma mtima, ndipo sacita nanu zinthu mwaukali mukalakwitsa zina zake?

“Cikondi sicicita nsanje.”

Ganizilani izi: Kodi mumamvela bwanji ngati ena amakukaikilani, kapena kukucitilani kaduka?

Cikondi “sicisamala zofuna zake zokha.”

Ganizilani izi: Kodi mumamvela bwanji ngati ena amalemekeza maganizo anu, ndipo saumilila maganizo awo?

Cikondi “sicisunga zifukwa.”

Ganizilani izi: Mulungu ni wokonzeka kukhululukila aliyense wolapa amene anam’lakwila. Malemba amatiuza kuti: “Iye sadzakhalila kutiimba mlandu nthawi zonse cifukwa ca zolakwa zathu, kapena kutisungila mkwiyo.” (Salimo 103:9) Timakondwela ngati munthu amene tinam’khumudwitsa watikhululukila. Conco, tiyenela kukhala okonzeka kukhululukila ena akatikhumudwitsa.—Salimo 86:5.

Cikondi “sicikondwela ndi zosalungama.”

Ganizilani izi: Zoipa zikaticitikila, sitingakonde kuti ena azikondwela pamene tivutika. Conco, sitiyenela kukondwela ngati ena akukumana na mavuto ngakhale kuti anaticitilapo zoipa.

Kuti tipeze madalitso a Mulungu, tifunika kukonda ena m’njila zimenezi, mosasamala kanthu za msinkhu, dziko, kapena cipembedzo cawo. Tingacite zimenezi mwa kuthandiza amene afunikila thandizo.