Ova Loma
12 Moluotyo vakuatate, mokankhenda ka Huku ndyimuita okuti, avei omalutu enyi ngotyilikutila tyina omuenyo, tyasukuka, tyitavelwa na Huku, ngotyo mamuumbila Huku nonondunge mbenyi ambuho. 2 Tupu yekei-po okukala novituwa viouye uno,* mahi pilululei omalusoke enyi aakala omape opo munoñgonoke ehando ewa lya Huku, liafuapo, nokuapandwa.
3 Mokonda yokankhenda ka Huku napewa, ame ndyimupopila amuho okuti kese umwe ahasoke okuti hamwe una vali esilivilo enene tyipona eli ena, mahi asoke monkhalelo ilekesa okuti una onondunge mbelikuata nekolelo kese umwe apewa* na Huku. 4 Mokonda, ngetyi tuna ononthele ononyingi kolutu lwike vala, mahi ononthele ombo kambulingi otyilinga tyike, 5 ngotyo no onthue namphila tuvanyingi, olutu luetu lwike vala kumwe na Kilisitu, mahi kese umwe utei ku vakuavo. 6 Mokonda tuapewa ounongo wokulinga ovilinga vielikalaila tyitei kokankhenda okanene Huku etuavela. Inkha ounongo tuapewa owokuula, tuulei tyata mekolelo lietu; 7 ine inkha tuapewa ounongo wokukuatesako vakuetu, tutualeiko okuvekuatesako. Inkha tuapewa ounongo wokulongesa, tutualeiko okulongesa; 8 una wokuna ounongo wokupameka,* apameke;* ou una ounongo wokuava,* aave tyihakuluminyua; una uhongolela,* etyilinge nombili; ou una okankhenda, etyilinge nehambu.
9 Ohole yenyi ihakale yomatutu. Yalei otyivi; kakatelei motyiwa. 10 Kalei nohole na vana mufenda navo, ngetyi vokulikwai velihole pokati. Kalei ovatete* kokulekesa vakuenyi onthilo. 11 Undapei nononkhono,* muhakalei vokuananga.* Yekei ononkhono mba Huku mbumupe ondundo. Umbilei Siovaa ngovapika. 12 Hambukilwei ekevelelo. Koleleyei mononkhumbi. Tualeiko okulikuambela. 13 Kuateseiko ovasukuki muetyi vesukisa. Kalei notyituwa tyokutambula ovaenda. 14 Itei ku Huku akanene nawa vana vemuhataikisa; itei ku Huku akanene nawa ovanthu, muhevepopiei omapita. 15 Hambukwei na vana vahambukwa; lilei na vana valila. 16 Talei vakuenyi ngetyi mulitala onwe muene, muhasokei kovipuka ovinene,* muhalandulei otyituwa tyokulipaka-ko, mahi liolei omutima. Muhakalei ovanongo komaiho enyi muene.
17 Muhakondolelei nawike otyivi notyivi. Sukei novipuka vikahi nawa komaiho ovanthu aveho. 18 Inkha tyitavela, lingei atyiho muvila, opo mukale nombembwa novanthu aveho. 19 Nonthyolwe, muhakondolelei vakuenyi ovivi, muene yekei Huku alekese onyengo yae, mokonda yovivi vikahi nokulingwa; tyetyi tyahonekwa okuti: “‘Tyokukondolela ovanthu otyange; ame mandyikondolela ovanthu ovivi valinga,’ otyo tyapopia Siovaa.” 20 Mahi, “inkha ondyale yove waliua nondyala, muavela tyokulia; inkha waliua nohunga, muavela tyokunwa; mokonda okulinga ngotyo ukahi nokuongiya omakala ena otupia pomutwe wae.”* 21 Muhayekei ovivi vimufinde, mahi otyivi tyifindei notyiwa.