Wa Vali Wahonekelwa Ova Kolindu
9 Pahe motyilinga etyi tyokulingila ovasukuki,+ ha atyiho tyisukisa ame okumuhonekela, 2 mokonda onwe ndyimwii tyokuyaka vakwenyi o tyenyi-ale, otyo ndyilimphandela kova Masendonia, neveti vomo Akaya ñgaa vena-le enima, vakevela vala, okuta kwenyi ombili ovipuka ovanyingi tyevepa ondundo. 3 Mahi ndyili nokutuma oko vataveli vakwetu, tyahatie vala okwelimphanda twelimphandele, mahi naina etyi twelimphandela tyitupu, onwe oko mufwe-po umwe, ngeetyi nemutolelele. 4 Ngwe ine ndyiya oko nova Masendonia, atwehemuvasi mwafwapo, onthwe — onwe opo himupopi-ale vali — matyitukundisa mokonda ankho twemuyumba onthumbi. 5 Otyo natila ndyipopie na vakwetu nkhele veye oko, avatetekela okwoongiya ovipuka mwapopile mwaava kotyali tyenyi, tyimoneke umwe okuti o kotyali tyenyi, atyahalingi ngoti mwatiwa ngaliti-pano etei.
6 Mahi ngwe, ou ukuna notyinkhe, ukateya katutu, ou ukuna nomutima wavialuka ukateya unene.+ 7 Munthu na munthu alingile omu mwene omutima wae wetavelela, ahalinge ngo ou watiwa ngaliti-pano,* ou wakuluminywa,+ una Huku uhole ou waava tyahambukwa.+
8 Mwene Huku okankhenda kae akeho okanene, utyivila okukelinga okanyingi, opo onwe apeho mumone umwe mwene ovipuka musuka navio vituuka, amumono umwe novipuka vituuka viovilinga aviho oviwa.+ 9 (Tyahonekwa-le: “Waava;* wapa ava vahepa. Okuviukisa kwae kakupu.”+ 10 Pahe ou upa umwe ombuto onyingi omulimi, haa mape ovanthu ombolo valie, emutyitihila ombuto onwe mukune, otyilinga tyokuteya moundingaviwa wenyi eketyilinga otyinene.) 11 Onwe movipuka aviho muli umwe nokuputuka mulinge votyali movipuka aviho, mweetyi pahe tulinga ovanthu vapandule Huku; 12 mokonda etyi muli nokulingila ovanthu, katyiyembe vala kokupa ovasukuki+ etyi vakamba, mahi tupu tyipa Huku okupandulwa unene. 13 Omu mwaendela otyilinga etyi tyokulihukulula, ngwe vapa umwe omunkhima Huku tyo onwe mwetavela oviwa ovipe viyemba ku Kilisitu, evi onwe mwene mwapopia, mokonda onwe mwalinga ovanthu votyali mwevepa, mwapa umwe ovanthu aveho.+ 14 Pahe ngwe omalikwambelo vemulingila, tyiivala umwe okuti vemuhole, tyokankhenda okanene, okankhenda kehelifwe-ale pano Huku emulinga.
15 Upandulwa o Huku vala motyali tyae otyinene tyehetavela-le okutyipopia.