Wo Tete Wahonekelwa Ova Kolindu

15 Mahi pahe vanthu vetu, ame ndyimuhinangelesa oviwa ovipe nemupopilile,+ evi noonwe mwetavela, evi mwakwata-po umwe. 2 Noonwe omo umwe muli nokuyovokela, tyahanda vala mukakatele umwe moviwa ovipe evi nemupopila, otyo okwehetyilingi opo tyokwalinga ovataveli mwelipwilisa vala.

3 Mokonda ovipuka evi tete nemupele, ovievi umwe naame napelwe, no tya Kilisitu wankhila ononkhali mbetu, tyityipopia Ovihonekwa;+ 4 neetyi apakwa,+ no tyokwapindulwa-po+ monthiki ya tatu,+ tyityipopia Ovihonekwa;+ 5 no tyokuti wamonekele ku Sefa,*+ pahe amoneka Kekwii na Vevali.+ 6 Pahe konyima amoneka kovataveli valamba 500 ankho veliongiya mphangwa ike,+ ovanyingi puvo nkhele tuna-vo, mahi vamwe velele-ale mononkhia. 7 Pahe amoneka vali ku Tiaku,+ konyima amoneka kovatumwa aveho.+ 8 Mahi pahe konyima-nyima umwe, amoneka kwaame,+ andyilingi lwo ou wahelulwa.

9 Mokonda ame povatumwa, ame mututu watyo, no mokutiwa omutumwa hatele-mo-ale nahukaisile ewaneno lya Huku.+ 10 Mahi mokankhenda okanene ka Huku, ame uno. Okankhenda kae okanene mwaame kakapesekele, ame naundapa vali unene kuvo aveho; ngwe mahi hame-ko-ale, okankhenda okanene nalingwa na Huku. 11 Mahi ngwe tyati vala ame, ovo, atuho tyike vala tupopia, pahe noonwe otyo mwetavela.

12 Ine tyili nokupopiwa movanthu okuti Kilisitu wapindulwa-po kovokwankhia,+ opo vamwe pwoonwe vakati vokwankhia kavatutila, ovo vetyipolapi? 13 Ngwe tyili ine vokwankhia kavatutila, opo naina Kilisitu nae kapindulilwe-po. 14 Mahi ine Kilisitu kapindulilwe-po, opo naina etyi tupopia tuli vala nokulipwilisa, nonthumbi muna-yo mwelipwilisa vala. 15 Ngwe hatyo vala otyo, opo noonthwe twalinga vala onombangi mba Huku+ mbukemba, mokonda o Huku tuna nokuti wapindula-po Kilisitu,+ ngwe naina kemupindulile-po, ine tyili vokwankhia kamavapindulwa-po. 16 Ine vokwankhia kamavapindulwa-po, opo Kilisitu nae kapindulilwe-po. 17 Ngwe ine Kilisitu kapindulilwe-po, opo nonthumbi muna-yo itupu-ale etyi imupa, muli vala naina mononkhali.+ 18 Pahe opo, naava vokwakalangala-le velele mononkhia veli vala kumwe na Kilisitu, vakakota umwe.+ 19 Ine naina ankho tukevela tupu apa Kilisitu, o tyomwenyo ou vala, opo naina twaetesa umwe vali unene onkhenda.

20 Mahi mwene Kilisitu wapindulwa-po kovokwankhia, oe ovikuna viatetekela okuyela pu ava velele mononkhia.+ 21 Ngeetyi ononkhia mbatuka vala momulume wike,+ netutilo lyo vokwankhia, liatuka vala momulume wike.+ 22 Ngeetyi tyalinga Andau tyaeta ononkhia movanthu aveho,+ neetyi tyalinga Kilisitu aveho mavakala nomwenyo.+ 23 Mahi munthu na munthu una mwene omuvo wae: Kilisitu oe ovikuna viatetekela okuyela,+ akulandula aveho va Kilisitu ngwe pahe pokweya-le.+ 24 Haa pahe, apakula Ouhamba ku Huku, ku He, tyina amanyimi-ko etyi tyokutumina, atyiho no tyounene, no tyononkhono.+ 25 Mokonda ngwe malingi ohamba, atumina atee Huku apaka onondyale mbae ambuho mombwelo yonomphai mbae.+ 26 Pahe, ondyale yahulilila ononkhia, ainyimwa-ko.+ 27 Mokonda Huku, “ovipuka aviho wemupakulila-vio vihule kolutei lwae mombwelo yonomphai mbae.”+ Mahi tyina ati ‘ovipuka aviho wevipakulilwa vihule kolutei lwae,’+ tyiivala nawa okuti Ou wokwemupakulila-vio kavalulilwa povipuka ovio vili kolutei lwae.+ 28 Mahi tyina ovipuka aviho viamahulu kolutei lwae, pahe Nomona nae akala vala kolutei lwo Ou wemupakulilile ovipuka aviho,+ pahe Huku ngae mwene utumina ovipuka aviho.+

29 Ine katyeende ngootyo, opo ava vokuli nokumbatisalwa nomphango yokunkhia mavalingi ñgeni?+ Ine vokwankhia kavakapindulwa-po, opo oityi ovo vambatisalelwa nomphango oyo? 30 Opo noonthwe vokukalela vala* okuliyumbahi tutyilinga vala pohi ya huku?+ 31 Ononthiki ambuho ndyikondaukila-ko. Ngwe otyili umwe, naame ndyihambukwa tyina ndyimusoka vanthu vetu, ndyilimphandela onwe mu Kilisitu Sesusi Tatekulu yetu. 32 Ine naame nalwa novinyama mo Efesu+ nga valume vakwetu,* oityi napola-po? Ine vokwankhia kavakapindulwa-po opo naina “tuliei, tunwei, muhuka matunkhi-ale.”+ 33 Mwahayondywei. Omapanga omavi anyona ovituwa oviwa.*+ 34 Kondokei monondunge mwali nambo, lingei etyi tyaviuka, mwahapangelei vala monkhali, vamwe vetupu enoñgonoko lya Huku. Ame ndyipopia umwe ngootyo tyimupe olukundo.

35 Mahi umwe mapulu mati: “Vokunkhia vakapindulwa-po ñgeni? Ngootyo maveya nolutu patyi?”+ 36 Onwe naina nkhele kamusoko-ale! Etyi ukuna ine nkhele katyinkhi, opo katyikala nomwenyo. 37 Etyi onwe mukuna, etyi mupaka pohi, hatyingenge-ko etyi haa tyikekula, mahi mukuna oñgima, ilinge o yotiliku, ilinge o yovikuna ovikwavo vali; 38 mahi Huku wiipa olutu ahanda, uti umwe ei weipa olutu lwayo, ei weipa olutu lwayo. 39 Onohitu kambulii, kuna ohitu o yomunthu, kuna ohitu o yongombe, kuna ohitu o yotyiila, kuna ohitu o yombisi. 40 Olutu lweetyi tyikala keulu lutyityalo,+ lweetyi tyili pano pohi lutyityalo:+ omunkhima wolutu lwo vyo keulu lutyalo, lwo vyo pohi tupu lutyalo. 41 Omunkhima wekumbi utyao, wohanyi utyao,+wononthungululu utyao; mahi tupu, ononthungululu omunkhima wambo kaulii.

42 Ongootyo tyeenda etutilo lyo vokwankhia. Tyikunwa, olutu luvola; mahi olutu lupindulwa-po, kaluvolo.+ 43 Lukunwa tyehena omunkhima; alupindulwa-po nomunkhima.+ Lukunwa tyayengenga; alupindulwa-po nononkhono.+ 44 Lukunwa olutu lwohitu nohonde; alupindulwa-po olutu lwopamphepo. Ine kuna olutu lwohitu nohonde, opo tupu kuna olutu lwopamphepo. 45 Tyahonekwa: “Omulume wo tete Andau alingi omunthu una* omwenyo.”+ Ou pahe Andau wahulilila walinga omphepo ipa omwenyo.+ 46 Mahi, etyi tyomphepo, hatyoko o tete. Tyo tete o tyohitu nohonde, pahe akuya tyomphepo. 47 Omulume wo tete watunda meheke, walingilwe nombuma;+ omulume wavali, oo watunda keulu.+ 48 Tyali oo wokwalingilwe nombuma, otyo tyikahi ovanthu vokwalingwa nombuma; Tyikahi ou wo keulu, no vo keulu otyo vekahi.+ 49 Ngeetyi twelifwa umwe nawa nou wokwalingilwe nombuma,+ nou wo keulu matulifu.+

50 Mahi ndyimutolele vanthu vetu, ohitu nohonde havipuka vipiñgana Ouhamba wa Huku, neetyi tyivola katyipingi pweetyi tyahavolo. 51 Tala! Mandyimutolela otyipuka tyikola tyaholekwa: Ha atuho matukalangala mononkhia, mahi vamwe matupilululwa vala,+ 52 tyahasete-ale, mokupanyina vala kweiho tyina pahe onkhwino ikehulila-ko ihikwa. Mokonda onkhwino maihiki,+ ava vokwankhia avapinduka-po avekeya nolutu lwahavolo, onthwe pahe atupilululwa. 53 Olutu luvola, luna okuvalekwa olu lwahavolo,+ olutu lunkhia, luna okuvalekwa olu lwahankhi.+ 54 Mahi tyina olutu luvola lwamavalekwa olu lwahavolo, olu lunkhia aluvalekwa olu lwahankhi, opo pahe etyi tyatolelwe tyahonekwa matyiyapo: “Ononkhia mbanyinwa-ko mbakakota.”+ 55 “Nonkhia, pahe pokwehevilwa kwoove pelipei? Nonkhia, poulio wove pahe pelipei?”+ 56 Oulio utwala kononkhia, onkhali,+ tyipa onkhali ononkhono, Ovitumino.*+ 57 Mahi pahe upandulwa o Huku, wetwaavela omafa Tatekulu yetu Sesusi Kilisitu, opo onthwe tutyivile!+

58 Naina vanthu vange ndyihole, pamekei,+ mwahahiñginyei, apeho undapei unene+ movilinga vya Tatekulu, tyityii okuti onduvia muna-yo movilinga mulinga mu Tatekulu, kaipeseka.+